Bəşir Süleymanlı

Fevralın 12-də Bakı Ağır Cinayətlər Məhkəməsində hakim Vüqur Seyidovun sədrliyi ilə Vətəndaş Hüquqları İnstitutunun rəhbəri, hüquq müdafiəçisi Bəşir Süleymanlının növbəti məhkəmə prosesi keçirilib.

Məhkəmə iclasında çıxış edən Bəşir Süleymanlı ona qarşı irəli sürülən ittihamları qəbul etmədiyini, ittihamların əsassız olduğunu deyib.

Bəşir Süleymanlı fəaliyyətinin qanuni yollarla həyata keçirildiyini söyləyib. O, xidmət müqaviləsi ilə ABŞ-ın Alman Marşal Fondu vasitəsi ilə USAİD-dən alınan vəsaitlə bölgələrdə müharibədən əziyyət çəkən şəxslərə, şəhid ailələrinə, Qarabağ qazilərinə pulsuz hüquqi yardım edildiyini bildirib.

Bəşir Süleymanlı sübut kimi onunla əməkdaşlıq edən hüquqşünasların bölgələrə gedib pulsuz hüquqi yardım etməsi haqda məlumatları, fotoları rəhbərlik etdiyi təşkilatın saytında hələ də qaldığını qeyd edib. Bundan əlavə Bəşir Süleymanlı həmin məlumatların, fotoların bəzilərinin çap formasının məhkəməyə təqdim edib.

Bəşir Süleymanlı onu da əlavə edib ki, istintaq onu sosial şəbəkələrdə Ukraynanı dəstəkləməkdə də günahlandırıb. Bəşir Süleymanlı çıxışında Azərbaycan hökumətinin Ukraynaya maddi yardım göndərdiyini xatırladıb və deyib ki, Ukraynanı sivil qaydada dəstəkləmək qanun pozuntusu deyil.

Bəşir Süleymanlı bildirib ki, Milli Məclisin İnsan hüquqları komitəsinin sədri, Sosial Tədqiqatlar Mərkəzinin İdarə Heyətinin rəhbəri Zahid Oruc 15 mart 2024-cü il tarixdə Milli Məclisdə çıxışı zamanı deyib ki, Azərbaycan hökumət ABŞ və Avropa Birliyinə açıq müraciət edə bilər ki, işğalın nəticələrini aradan qaldırmaq üçün ölkəmizə kömək etsinlər. Hüquq müdafiəçisi deyib ki, Zahid Oruc həmin çıxışında “Əgər milli tikinti şirkətlərinə onların inamı azdırsa, Beynəlxalq İnkişaf Agentliyinin xətti ilə öz tikinti qurumlarına sifariş versinlər” fikrini də səsləndirib və bu məlumat hakimiyyətə yaxın mediada dərc edilib. (https://apa.az/xarici-siyaset/zahid-oruc-hokumet-isgalin-neticelerini-aradan-qaldirmaga-komek-ucun-abs-ve-avropa-birliyine-muraciet-ede-biler-829545)

Bəşir Süleymanlı çıxışında sual edib ki, neçə olur ki, bir tərəfdən deputat, Sosial Tədqiqatlar Mərkəzinin İdarə Heyətinin rəhbəri Zahid Oruc USAİD-in işğaldan azad olunmuş ərazilərdəki bərpa işlərinə cəlb edilməsindən danışır, digər tərəfdən isə istintaq QHT-ləri USAİD-dən xidmət müqaviləsi və bank vasitəsi ilə vəsait aldıqlarıni cinayət əməli hesab edir. Bəşir Süleymanlı Zahid Orucun həmin açıqlamasını çap formasını da məhkəməyə təqdim edib.

Bundan başqa, Süleymanlı çıxışında onu da qeyd edib ki, Ədliyyə Nazirliyi, İqtisadiyyat Nazirliyi, Əmək və Əhalinin Sosial Müdafiəsi Nazirliyi və s. nazirliklər və digər dövlət qurumları da USAİD-dən qrant alıb.

Bəşir Süleymanlı bildirib ki, istintaq ittiham aktında qeyd edilib ki, o, Böyük Britaniya və Şimali İrlandiya Krallığının Azərbaycandakı səfirliyinin şəxsiyyətinin istintaq tərəfindən müəyyən edilməmiş şəxsləri tərəfindən əlbir olaraq onlardan guya qrant alıb. Bəşir Süleymanlı və vəkili vəsatət verib ki, məhkəmə adıçəkilən səfirliyi sorğu göndərib Bəşir Süleymanlı ilə xidmət müqaviləsi bağlayan şəxslərin kimliyini müəyyənləşdirsin. Amma məhkəmə vəsatəti qəbul etməyib.

Sonra Samir Kazımlı məhkəmədə ifadə verib. O, Bəşir Süleymanlının qanun pozuntusuna yol vermədiyini,  onun rəhbəri olduğu təşkilatın müharibədən əziyyət çəkən şəxslərə, şəhid ailələrinə, Qarabağ qazilərinə pulsuz hüquqi yardım etdiyini bildirib.

Növbəti məhkəmə iclası martın 12-nə, saat 17:00-a təyin olunub.

Bəşir Süleymanlı Cinayət Məcəlləsinin 193-1.2.2-ci, 193-1.2.3-cü və 193-1.3.2-ci (qulluq mövqeyindən istifadə etməklə cinayət yolu ilə əldə edilmiş xeyli miqdarda əmlakı təkrar leqallaşdırma), 308.1-ci (vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri ilə ittiham edilir.

Əli Kərimli

Dövlət Təhlükəsizliyi Xidməti (DTX) hakimiyyət əleyhinə yönələn cinayət əməlləri ilə bağlı araşdırma tədbirləri həyata keçirildiyini bildirib.

Qurumun fevralın 12-də yaydığı açıqlamada deyilir ki, Prezident Administrasiyasının sabiq rəhbəri Ramiz Mehdiyev, keçmiş baş nazir müavini Abbas Abbasov, AXCP sədri Əli Kərimli və digərlərinin hakimiyyəti zorla ələ keçirməyə və konstitusiya quruluşunu dəyişdirməyə cəhd göstərdiklərinə dair şübhələr var.

DTX-nin açıqlamasında Rusiya Azərbaycan Təşkilatları İttifaqı” adıyla qeydiyyatdan keçən və “Milyarderlər İttifaqı” adlandırılan təşkilatdan bəhs edilir. İttihama əsasən, təşkilat 2012-ci ildə xarici ölkənin xüsusi xidmət qurumları tərəfindən Azərbaycandakı siyasi proseslərə müdaxilə etmək məqsədilə yaradılıb.

Həmçinin iddia edilir ki, həmin qurumun həmtəsisçiləri və rəhbərləri olmuş A.Abbasov, Rüstəm İbrahimbəyli, eləcə də Ramiz Mehdiyev, AXCP sədri Əli Kərimli, partiyanın üzvləri Fuad Qəhrəmanlı, Qənimət Zahid dövlət hakimiyyətinin zorla ələ keçirilməsi, dövlətin mövcud konstitusiya quruluşunun zorla dəyişdirilməsi barədə sövdələşiblər:

O da vurğulanır ki, respublikanın müxtəlif rayonlarından insanların cəlb edilməsi üçün AXCP-nin üzvü Məmməd İbrahim və digərləri vasitəsilə qəbul etdikləri 933 min 828 manat məbləğində pul vəsaitini, o cümlədən Ramiz Mehdiyevlə Abbas Abbasovdan əldə edilən maddi vəsaitləri qeyd olunan əməllərin törədilməsinə yönəldiblər.

DTX iddia edir ki, Milli Şuranın 2013-cü ildə bir xarici dövlətin rəhbərliyinə ünvanladığı gizli məktubda Şuranın fəaliyyətinin dəstəklənməsi xahiş edilmiş, Azərbaycan dövlətinə təzyiq göstərilməsi təklif olunub.

İddialarda vurğulandığına görə, tərəflər Ə.Kərimli hakimiyyətə gələcəyi təqdirdə Azərbaycanın mərhələli qaydada Kollektiv Təhlükəsizlik Müqaviləsi Təşkilatına (KTMT) tam üzv olacağı barədə razılaşıblar.

Həmçinin iddia olunur ki, Ramiz  Mehdiyev 2025-ci ilin avqust–sentyabr aylarında dövlət hakimiyyəti əleyhinə gizli fəaliyyət istiqamətlərini əks etdirən “Dövlət idarəetmə sisteminin yenidən qurulması haqqında təkliflər” adlı sənədi xarici dildə hazırlayaraq köməkçisi vasitəsilə Əli Kərimliyə çatdırıb.

DTX bildirir ki, Ramiz Mehdiyev cinayət yolu ilə əldə edilmiş 17 milyon manatdan artıq pul vəsaitini leqallaşdırıb.

“Abbas Abbasov, Əli Kərimli, Fuad Qəhrəmanlı, Məmməd İbrahim və Qənimət Zahidov Cinayət Məcəlləsinin 278.1 (hakimiyyətin zorla ələ keçirilməsinə, yaxud zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlər), Eldar Əmirov (Ramiz Mehdiyevin köməkçisi) 32.5, 278.1 (hakimiyyətin zorla ələ keçirilməsinə, yaxud zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlərə kömək etmə), Ramiz Mehdiyev 193-1.3.2 (cinayət yolu ilə əldə edilmiş xeyli miqdarda əmlakı leqallaşdırma), 274 (dövlətə xəyanət) və 278.1-ci maddələri ilə təqsirləndirilən şəxs qismində məsuliyyətə cəlb edilib”,– deyə DTX vurğulayıb.

Abbas Abbasov, Fuad Qəhrəmanlı və Qənimət Zahidov Azərbaycan ərazisindən kənarda olduqları və istintaqdan gizləndikləri üçün barələrində qiyabi həbs-qətimkan tədbiri seçilib.

Yerli mətbuatın yazdığına görə, oktyabrda Ramiz Mehdiyev barəsində ev dustaqlığı qətimkan tədbiri seçilib.

AXCP sədri Ə.Kərimli və həmin partiyanın rəhbər şəxslərindən M.İbrahim ötən ilin noyabrın 29-da həbs ediliblər.

Toplum TV 

Gültəkin Hacıbəyli

Türkiyədə saxlanılan Milli Şuranın Koordinasiya Mərkəzinin üzvü, sabiq deputat Gültəkin Hacıbəylinin Türkiyədən Azərbaycana deportasiya olunduğu bildirilir.

Hökumətyönlü medianın yaydığı məlumatlara görə, deportasiya gecə saatlarında həyata keçirilib. Bildirilir ki, Hacıbəyli hələlik istintaqa cəlb olunmayıb və barəsində hər hansı qətimkan tədbiri seçilməyib.

Hadisə ilə bağlı nə Gültəkin Hacıbəylinin özü, nə də rəsmi qurumlar açıqlama verib.

Gültəkin Hacıbəyli ötən il noyabrın 30-na keçən gecə İstanbulda kirayə yaşadığı mənzildən Taksim Polis Şöbəsinə aparılıb. Daha sonra o, deportasiya mərkəzinə köçürülüb və “milli təhlükəsizlik üçün təhlükə yaradan xaricilər” kateqoriyası üzrə G-82 kodu ilə “idarə nəzarətinə” götürülüb.

Məlumata görə, dekabrın 15-də onun barəsində 5 il müddətinə Türkiyəyə giriş qadağası tətbiq edilməklə deportasiya qərarı çıxarılıb.

Gültəkin Hacıbəyli daha əvvəl deportasiya qərarını siyasi motivli hesab etdiyini bildirmiş, Azərbaycana qaytarılacağı təqdirdə həbs olunacağı ilə bağlı narahatlığını ifadə etmişdi.

Onun saxlanılmasının Azərbaycanda AXCP sədri Əli Kərimli və partiyanın Rəyasət Heyətinin üzvü Məmməd İbrahimin həbsi ilə əlaqələndirilən və ictimaiyyət arasında “Ramiz Mehdiyev işi” kimi tanınan proseslə bağlı baş verdiyi ehtimal olunur.

AbzasMedia

Mehriban Rəhimli

“QHT işi” üzrə ittiham olunan, ABŞ-nin “German Marşal Fondu”nun Azərbaycan üzrə məsləhətçisi olmuş Mehriban Rəhimlinin işi üzrə məhkəmə başlayıb.

Fevralın 11-də Bakı Ağır Cinayətlər Məhkəməsində hakim Namiq Kərimovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Daha sonra Mehriban Rəhimlinin vəkili Cavad Cavadov vəsatət verərək cinayət işinə xitam verilməsini xahiş edib. O bildirib ki, Mehriban Rəhimli gördüyü iş müqabilində maaş alıb, istintaq orqanı isə həmin maaşı qrant kimi təqdim edib. Məhkəmə vəsatəti təmin etməyib.

Cinayət işi məhkəmə baxışına verilib və baxış iclası fevralın 25-nə təyin edilib.

Mehriban Rəhimli Baş Prokurorluqda “QHT işi” ilə bağlı başladılan cinayət işi çərçivəsində ötən ilin mart ayında istintaqa cəlb olunub. Onun barəsində istintaq müddətində polis nəzarətinə verilmə qətimkan tədbiri seçilib.

“QHT işi” üzrə həbslər 2025-ci ilin martında başlayıb. Vətəndaş Hüquqları İnstitutunun rəhbəri Bəşir Süleymanlı, Seçki Müşahidə Alyansının icraçı direktoru Məmməd Alpay və “Hüquq və İnkişaf” İctimai Birliyinin rəhbəri Hafiz Həsənov saxlanılıb. Hafiz Həsənov sonradan ev dustaqlığına buraxılıb.

Onlara qarşı Cinayət Məcəlləsinin vəzifə saxtakarlığı və qanunsuz pul vəsaitlərini leqallaşdırma daxil olmaqla bir neçə maddəsi üzrə ittiham irəli sürülüb.

Apreldə isə ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamla həbs edilib.

İqtisadçı Qalib Bayramov və hüquq müdafiəçisi Nərgiz Muxtarova barəsində polisin nəzarəti altına vermə tədbiri seçilib. Ölkə xaricində olan Sübhan Həsənli və Aytac Ağazadə isə axtarışa verilib.

İstintaqa 100-dən çox şəxs, o cümlədən beynəlxalq donor təşkilatlarının əməkdaşları və bəzi hökumətyönlü QHT rəhbərləri cəlb olunub.

Toplum TV 

İmran Əliyev

Fevralın 10-da Bakı Ağır Cinayətlər Məhkəməsində hakim Roman Ələkbərlinin sədrliyi ilə “Meclis.info işi” üzrə növbəti məhkəmə prosesi keçirilib.

“Abzas Media”nın xəbərinə görə, prosesdə şahid qismində Mədinə Abdullayeva dindirilib. O, təqsirləndirilən şəxslərdən yalnız “Meclis.info” saytının rəhbəri İmran Əliyev və ictimai fəal Elgiz Qəhrəmanı tanıdığını, saytda təcrübəçi kimi yarımştat işlədiyini deyib.

Hakim şahiddən bu işə görə məvacib alıb-almadığını soruşub.

“Məni bu proqrama USAID (ABŞ Beynəlxalq Yardım Agentliyi) seçib, maaşı həmin təşkilat ödəyirdi. İmran sadəcə onlardan alıb mənə verirdi. 300 avro idi, səhv xatırlamıramsa”, – o cavab verib.

Daha sonra İmran Əliyev də şahidə suallar ünvanlayaraq onu işə götürüb-götürmədiyini və əməkhaqqı barədə danışıb-danışmadıqlarını soruşub.

Mədinə Abdullayeva “yox” cavabı verib.

O, vəkil Rəsul Cəfərovun müvəkkilinin nə vaxtsa xarici ölkələrdən pul gətirməsini eşidib-eşitmədiyi, yaxud görüb-görmədiyi barədə sualına da “yox” cavabı verib.

Sonra İmran Əliyev istintaq materiallarında adları çəkilən beynəlxalq təşkilatların nümayəndələrinin məhkəməyə çağırılması barədə vəsatət qaldırıb.

“Bu pul haradan gəlib mənə çatıb? Ağacdan yığıb verməmişəm ki. Beynəlxalq təşkilatlar gəlib desinlər ki, o pul haradan gəlib. Üç aydan bir məhkəmə edirsiniz, o da belə. Sifarişiniz verilməyib hələ? Sifarişi yerinə yetirin. Siz öz işinizə hörmətsizlik edirsiniz”, – o deyib.

Hakim heyəti vəsatəti təmin etməyib. İmran Əliyev buna görə məhkəməyə etiraz olaraq hakimlərə arxasını çevirib. Hakim Roman Ələkbərli onun şüşə kabinə yerləşdirilməsi barədə göstəriş verib.

İmran Əliyev siyasi məhbus kimi tanınan şəxslərin Azərbaycanda səfərdə olan ABŞ vitse-prezidenti Ceyms Vensə ünvanlanan bəyanatına qoşulduğunu da bildirib:

“Vens İlham Əliyevlə alver etməsin. Önəmli olan insan haqlarıdır. Bu ölkədə nə hakim işləyir, nə ədliyyə. Heç biri işləmir. Hamısı şoudur.”

Növbəti məhkəmə iclası martın 3-nə təyin edilib.

İmran Əliyev 2024-cü il aprelin 18-də Bakı Beynəlxalq Hava Limanında saxlanılıb. Ona qarşı əvvəlcə Cinayət Məcəlləsinin 206.3.1 və 206.3.2 (qaçaqmalçılıq) maddələri ilə ittiham irəli sürülüb, sonradan bu siyahı 8 maddəyə qədər genişləndirilib.

İctimai fəal Elgiz Qəhrəman və Tamella Musayeva da eyni iş üzrə təqsirləndirilən şəxs qismində ötən ilin fevral ayında cinayət məsuliyyətinə cəlb olunublar. Onlar barəsində polis nəzarəti qətimkan tədbiri seçilib.

Hazırda hər üç şəxs 12 ilədək həbs cəzası nəzərdə tutan 8 ağır maddə ilə ittiham olunur.

Toplum TV 

Azər Qasımlı

Siyasi Menecment İnstitutunun direktoru Azər Qasımlımın cinayət işi üzrə məhkəmə istintaqı yekunlaşıb.

Fevralın 11-də Bakı Ağır Cinayətlər Məhkəməsində hakim Telman Hüseynovun sədrlik etdiyi prosesdə dövlət ittihamçısı çıxış edib.

O, Azər Qasımlının 13 il müddətinə azadlıqdan məhrum edilməsini təklif edib.

Prosesdə zərərçəkən şəxs qismində tanınan Qurbanəli Yusifov prokurorun çıxışı ilə razılaşdığını bildirib. Müdafiə tərəfi çıxış üçün vaxt istəyib.

Azər Qasımlı 2024-cü ilin dekabrından həbsdədir. O, Cinayət Məcəlləsinin 182.2.3-cü maddəsi (hədə-qorxu ilə tələb etmə, zor tətbiqi ilə törədildikdə) ilə ittiham olunur.

Siyasətçi ittihamı rədd edir və həbsinin ictimai-siyasi fəaliyyəti ilə əlaqəli olduğunu bildirir.

Azər Qasımlının həyat yoldaşı Samirə Qasımlı daha əvvəl “Toplum TV”-yə bildirib ki, Qurbanəli Yusifovun siyasətçiyə borcu olub, lakin borcun qaytarılması üçün ona hədə-qorxu gəlinməyib.

“2020-ci ilin mayında Yusifov Azər Qasımlının istəyilə onun adına kriptovalyuta saytında hesab açıb və onu idarə edib. Həmin ilin may və avqust aylarında Azər Qasımlı ona ümumilikdə 20,000 ABŞ dolları verərək iki ‘bitcoin’ almasını istəyib. Biz sonradan aşkar etdik ki, o, ‘bitcoin’lərin birini alıb, digərini isə almayıb. Sonradan isə bizə hələ də qaranlıq qalan səbəblərdən Azər Qasımlının hesabındakı bir ‘bitcoin’ də yoxa çıxdı”, – o bildirib.

Samirə Qasımlının sözlərinə görə, 2022-ci ilin yanvarında Qurbanəli Yusifov və həyat yoldaşı borcun aylıq hissələrlə qaytarılması barədə razılığa gəliblər və Qurbanəli Yusifov bununla bağlı qəbz də imzalayıb.

Lakin sonradan Qurbanəli Yusifov ölkəni tərk edib və Azər Qasımlı ilə əlaqəni kəsib. Bundan sonra siyasətçi məhkəməyə müraciət edib və 2024-cü ilin aprelində Mingəçevir Şəhər Məhkəməsi Azər Qasımlının xeyrinə qərar çıxarıb.

Toplum TV 

Fazil Qasımov

Həbsdə olan iqtisadçı Fazil Qasımov onun cinayət işində “maddi sübut” kimi göstərilən videogörüntünün materiallardan “yoxa çıxdığını” və məhkəmələrdə həmin görüntüyə baxış keçirilməsi barədə vəsatətlərin təmin olunmadığını bildirir.

Qasımovun yaxınlarının “Abzas Media”ya bildirdiyinə görə, cinayət işi materialında Səbail rayon ərazisində, Nizami küçəsi 2 ünvanında Daxili İşlər Nazirliyinin TŞ1-081 nömrəli “təhlükəsiz şəhər” kamerasının qeydə aldığı Anar Əliyevlə Qubad İbadoğlunun videogörüntüsünün olduğu qeyd edilib. Onun bildirdiyinə görə, müstəntiq Yusif Yusifov həmin videogörüntüdə Qubad İbadoğlunun Anar Əliyevə “Şeyda” adlı kitabın içində 1000 dollar saxta pul verməsini iddia edib və bunun maddi sübut kimi rəsmiləşdirildiyini göstərib.

Qeyd olunur ki, Bakı Ağır Cinayətlər Məhkəməsində və apellyasiya instansiyasında keçirilən məhkəmələrdə həm Qasımovun vəkilləri, həm də özü videogörüntülərə məhkəmə zalında baxış keçirilməsi üçün dəfələrlə vəsatət veriblər, lakin vəsatətlər təmin edilməyib.

Qasımovun yaxınları onun Ali Məhkəməyə, Məhkəmə-Hüquq Şurasına və Bakı Ağır Cinayətlər Məhkəməsinə müraciət etdiyini əlavə edib. Bildirilib ki, o, müraciətlərində müstəntiqin 8 aprel 2024-cü ildə qəbul etdiyi maddi sübutlar və videogörüntülərlə özü və vəkili üçün tanışlıq yaradılmasını istəyib.

Yaxınlarının sözlərinə görə, fevralın 2-də Fazil Qasımovu həmin maddi sübutlarla tanış olmaq üçün Bakı Ağır Cinayətlər Məhkəməsinə gətiriblər və bu zaman vəkili də iştirak edib. Bildirilib ki, cinayət işi materiallarında videogörüntünün 4-cü cildin 54-cü vərəqində olduğu göstərilsə də, həmin vərəq materiallardan çıxarılıb:

“53-cü vərəqdən sonra 55-ci vərəqdir”. Qasımovun yaxınları vurğulayıb ki, iqtisadçının özü və vəkili videogörüntünü tələb etsələr də, yenə də ona baxış keçirilməyib.
Qasımov bunu “videogörüntünün ümumiyyətlə olmadığının” və özünün “saxta ittihamlarla həbs olunmasının” sübutu kimi qiymətləndirib.

Fazil Qasımov bir müddət Türkiyədə yaşayıb. O, 2023-cü il avqustun 8-də İstanbulda saxlanılaraq Azərbaycana gətirilib. Qasımov iqtisadçı alim Qubad İbadoğlu barəsində açılmış cinayət işinin istintaqı çərçivəsində həbs edilib və Cinayət Məcəlləsinin 204.3.1-ci maddəsi ilə ittiham olunub.

Qasımov məhkəmədəki ifadəsində istintaq zamanı zorakılığa məruz qaldığını və xüsusi dərmanların təsiri altında Qubad İbadoğlunun əleyhinə saxta ifadə verməyə məcbur edildiyini bildirib. O, həmin ifadədən imtina edib və həbsini siyasi motivli adlandırıb.

İstintaq dövründə Qubad İbadoğlu barəsində əvvəlcə ev dustaqlığı, daha sonra polis nəzarətinə verilmə qətimkan tədbiri seçilib, işi ayrıca icraata verilib. Fazil Qasımov isə mühakimə olunaraq 2026-cı il martın 13-də Bakı Ağır Cinayətlər Məhkəməsinin hökmü ilə 9 il müddətinə azadlıqdan məhrum edilib. Hüquq müdafiəçiləri onu siyasi məhbus kimi tanıyırlar.

Anar Məmmədli

Fevralın 9-da Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli və ictimai fəal Anar Abdullanın işi üzrə növbəti məhkəmə prosesi keçirilib.

Hakim Aygün Qurbanovanın sədrliyilə keçirilən məhkəmə prosesi şahidlərin dindirilməsi ilə davam etdirilib.

Növbəti proses 2 mart, saat 15:30-a təyin olunub.

Xatırladaq ki, Anar Məmmədli 2024-cü ilin aprelin 29-da Bakı Şəhər Baş Polis İdarəsi tərəfindən Azərbaycanda vətəndaş cəmiyyəti və mediaya qarşı aparılan genişmiqyaslı siyasi həbslər çərçivəsində saxlanılıb. Aprelin 30-da ona qarşı Cinayət Məcəlləsinin 206.3.2-ci (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Daha sonra ona qarşı irəli sürülən ittihamlar iki dəfə ağırlaşdırılıb.

Bir sıra beynəlxalq təşkilatlar, Avropa İttifaqı parlamenti, həmçinin ABŞ Dövlət Departamenti, ABŞ Səfirliyi Azərbaycan hökumətini Anar Məmmədli və digər həbs edilən şəxsləri dərhal azad etməyə çağırıb.

Anar Məmmədli Azərbaycanda seçki hüququ sahəsində ixtisaslaşmış qeyri-hökumət təşkilatının rəhbəridir. O, seçkilərlə bağlı tənqidi hesabatların müəllifidir.

Məmmədli ATƏT-in Demokratik Təsisatlar və İnsan Haqları Bürosunun beynəlxalq seçki monitorinq missiyasının tərkibində Türkiyə, Əfqanıstan, Almaniya, Norveç, Ukrayna, Gürcüstan, Qırğızıstan və Albaniyada keçirilən seçkilərin müşahidəsində iştirak edib.

Azərbaycanlı rəsmilər isə bir qayda olaraq Azərbaycanda söz və mətbuat azadlığının hədəf alınması, jurnalistlərin və fəalların əsassız həbsi ilə bağlı ittihamları rədd edir, Azərbaycanda fundamental hüquq və azadlıqların, eləcə də media azadlığının “tam olaraq” təmin edildiyini vurğulayır.