Azər Qasımlı

Siyasi Menecment İnstitutunun direktoru, bir ilə yaxındır həbsdə olan politoloq Azər Qasımlının vəkilləri onun məhkəməsində şahid kimi tanınan şəxslərdən bir neçəsinin adının sübutlar siyahısından çıxarılmasını istəyirlər. Vəkillərin sözlərinə görə, həmin adamlar birbaşa heç nəyə şahidlik etməyiblər, onlar Azər Qasımlının onu hədələdiyini iddia edən Qurbanəli Yusifov adlı şəxsin yaxınlarıdır, onun adından danışırlar.

Noyabrın 19-da keçirilən məhkəmə iclasında da Qurbanəli Yusifovun anası Səlminə Yusifova dindirilib. Şahid qismində ifadə verən Səlminə Yusifova bildirib ki, ötən ilin yazında Azər Qasımlı ilə oğlu arasında borc problemi yaşanmasından xəbər tutub. Həyat yoldaşı ona xəbər verib ki, məhkəmə oğlunun Azər Qasımlıya borcu ödəmək öhdəliyi qoyması barədə qərar çıxarıb:

“Biz qorxduq ki, bu məsələyə görə evimizi satdırarlar. Bir evimiz var”.

Prokuror Səlminə Yusifovanın yadına salıb ki, istintaqda fərqli fikirlər səsləndirib və deyib ki, Azər Qasımlı onun oğlu Qurbanəlini təhdid edirdi.

Cinayət işinin materiallarında iddia olunur ki, Azər Qasımlı Qurbanəli Yusifovu azyaşlı oğlunu oğurlamaqla hədələyərək ondan 45 min dollar pul tələb edib. Hakim məhkəmədə bu üzdən Qurbanəli Yusifovun anasından soruşub ki, istintaqa ifadəsində yer alan “təhdid” sözünün mənasını bilmirmi? Səlminə Yusifova “bilmirəm” cavabını verib.

Təqsirləndirilən politoloqun özü də Səlminə Yusifovaya sual verib:

“Mənim oğlunuzu təhdid etdiyimi, ona hədə-qorxu gəldiyimi görmüsünüz?”.

O, Azər Qasımlıya belə cavab verib: “Görməmişəm, Qurbanəli atasına deyib, atası da mənə demişdi”.

Daha öncəki məhkəmə iclaslarında Qurbanəli Yusifovun atası, xalası oğlu, dostu da dindiriliblər. Vəkillər onların ifadələrinin də sübutlar siyahısından çıxarılmasını istəyirlər.

Politoloqun məhkəməsi dekabrın 10-da davam edəcək.

Xatırlatma

Azər Qasımlı ötən ilin dekabrından həbsdədir. Ona qarşı Cinayət Məcəlləsinin 182.2.3-cü (hədə-qorxu ilə tələb etmə, zor tətbiq etmə ilə törədildikdə) maddəsi ilə ittiham irəli sürülüb. Bu maddədə 5 ildən 10 ilədək həbs cəzası nəzərdə tutulub.

Məhkəmədə bu ittihama münasibət bildirən A.Qasımlı deyib ki, orada yazılanların heç biri gerçəyəuyğun deyil: “Onu ittiham aktı yox, özümə qarşı antiittiham adlandırardım. Özümü nəinki təqsirli bilmirəm, hətta zərərçəkmiş sayıram”.

Politoloq həbsini siyasi fəaliyyəti və tənqidi fikirləri ilə əlaqələndirir.

Zərərçəkmiş qismində tanınan Qurbanəli Yusifov politoloqa borclu olmadığını desə də, Mingəçevir şəhər Məhkəməsinin bu barədə qərarı olub. Azər Qasımlının vəkilləri həmin məhkəmədən iclas protokollarıyla görüntülərin alınmasını xahiş edirlər. Vəkillər bildirirlər ki, həmin mülki mübahisəylə bağlı məhkəmədə Qurbanəli Yusifov Azər Qasımlıya borclu olduğunu etiraf edib.

AzadlıqRadiosu

Bakı İstintaq Təcridxanası

Bakı İstintaq Təcridxanasında (BİT) oktyabrın sonlarından bəri bütün məhbusların vəkillə görüşlərdən əvvəl və sonra qanunsuz şəkildə axtarışa məruz qaldığı bildirilir. Bu barədə “Abzas Media”ya təcridxanadakı mənbələr məlumat verib

Mənbələrin sözlərinə görə, yoxlamaların sərtləşdirilməsinə kişi məhbuslardan birinin üzərindən elektron cihaz çıxması səbəb olub. Təcridxana rəhbərliyi bu addımı təhlükəsizlik tələbi ilə izah etsə də, mənbələr bunun sui-istifadə edildiyini deyirlər.

Hadisədən sonra istintaq otağının rəisi dəyişdirilib: Ruslan adlı şəxs görüş otağının rəhbəri vəzifəsinə keçirilib, görüş otağının rəisi, mayor Şəhriyar isə istintaq otağının yeni rəhbəri təyin olunub. Mənbə bildirir ki, qanunsuz axtarışlara məhz mayor Şəhriyar rəhbərlik edir.

Onun iddiasına görə, axtarışa etiraz edən məhbuslar vəkildən məhrum edilir və görüşə buraxılmır:

“Şəhriyar adlı mayor həm istintaq otağına, həm də görüş otağına nəzarət edir. Hər hansı məhbusla problem yaşadıqda bunu görüş otağında da davam etdirə bilər”.

Noyabrın 3-də qanunsuz yoxlamaya etiraz edən jurnalist Ülviyyə Əli (Quliyeva) də vəkillə görüşə buraxılmayıb. Jurnalistin yaxınları onun məhkəmə sənədlərinin də yoxlanıldığını və Ülviyyə Əlinin buna etiraz etdiyini deyirlər.

Mənbə qeyd edir ki, mövcud prosedur qanunvericiliyə ziddir:

“Qanunda vəkillə görüşə gedən məhbusun üzərində axtarış aparılması nəzərdə tutulmur. Yalnız xüsusi cihazla baxışdan söhbət gedir. Amma burada nəzarətçilər məhbusları əllə yoxlayır”.

Onun sözlərinə görə, BİT rəhbərliyi qanunsuzluğa etiraz edən siyasi məhbuslara təzyiq göstərmək üçün onları “kamuflyaj” kimi istifadə etməyə çalışır:

“Deyirlər ki, “yuxarıya məlumat verəcəyik, buradan yazı çıxarılır, biz də qarşısını alırıq”. Bu, qanunsuzluğun davam edəcəyinin açıq etirafıdır”.

Mənbə həmçinin bildirir ki, qadın məhbuslar istintaq otağında deyil, görüş otağının inzibati binasında yoxlanılır. Onun fikrincə, bunun iki mümkün səbəbi var:

“Görüş otaqlarının dinlənilməsi ehtimal olunur. Digər səbəb isə qanunsuz yoxlamanı leqallaşdırmaq cəhdidir. İnzibati binaya daxil olarkən yoxlama nəzərdə tutulsa da, nəticə dəyişmir, çünki məhbuslar kameradan vəkillə görüşə aparılmaq üçün çıxarıldığı anda artıq qanun pozuntusu baş verir”.

AbzasMedia

Anar Məmmədli

Müdafiə tərəfinin vəsatətində bildirib ki, ittihamların əsassızlığını göstərən faktlar Avropa məhkəməsinin həm Məmmədlinin həbsi, həm də həmtəsisçisi olduğu ictimai birliyin qeydiyyatından imtina ilə bağlı qərarlarında artıq təsdiq edilib və bu qərarların icrasını gecikdirən dövlətin yaratdığı “qeydiyyatsızlıq” vəziyyəti ictimai fəaliyyətə qarşı təqibə səbəb ola bilməz

Noyabrın 17-də Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli və ictimai fəal Anar Abdullayevin işi üzrə növbəti məhkəmə prosesi keçirilib.

Məhkəmə iclasına Hakim Aygün Qurbanovanın sədrlik edib.

Məhkəmə iclasında Anar Məmmədlinin vəkili Cavad Cavadov Məhkəməyə ittihamların hüquqi və faktiki əsaslarını hərtərəfli şəkildə mübahisələndirən və ittihamlarıın tamamilə əsassız olduğunu sübut edəcək məlumatların və təsdiq edici sənədlərin əldə edilməsini tələb edən vəsatət təqdim edib.Vəsatətdə Avropa İnsan Hüquqları Məhkəməsi yanında Azərbaycan Respublikasının Səlahiyyətli Nümayəndəsindən (Hökümətin nümayəndəsindən) rəsmi sorğu ilə bir sıra məlumat və təsdiqedici sənədlərin əldə edilməsi tələb edilmişdir.

Müdafiəçi tərəfindən təqdim edilən vəsatətdə Məmmədliyə qarşı irəli sürülən ittihamların Avropa Məhkəməsinin Məmmədlinin əvvəlki həbsi və onun rəhbərlik etdiyi ictimai birliyin (Seçkilərin Monitorinqi və Demokratiyanın Tədrisi Mərkəzi)  qeydiyyatından imtina ilə bağlı qəbul etdiyi qərarların icra edilməməsi ilə birbaşa əlaqəli olduğu əsaslı şəkildə göstərilmişdir. Vəsatətdə göstərilmişdir ki, Azərbaycan dövlətinin AİHM-nin həmin qərarlarını icra etməməsi Anar Məmmədliyə qarşı təkrar eyni ittihamların, üstəlik ağırlaşdırıcı halları ilə irəli sürülməsinə səbəb olub.

Vəsatətdə Avropa Məhkəməsinin “Məmmədli Azərbaycana qarşı” işi üzrə 19 aprel 2018-ci il tarixli qərarına istinad edilib. Qeyd edilib ki, Avropa Məhkəməsi həmin işdə Anar Məmmədlinin 2013-cü ildəki həbsini hüquqa zidd, əsassız və siyasi motivli hesab edərək Konvensiyanın 5-ci maddəsinin 1-ci və 4-cü bəndlərinin, həmçinin 18-ci maddənin 5-ci maddə ilə birlikdə pozulduğunu müəyyən etmişdir. Həmin qərarda Məmmədliyə qarşı açılan cinayət işi Azərbaycan dövlətinin cinayət hüququnda sui-istifadə edərək siyasi məqsədlərlə Anar Məmmədlini susdurmaq və cəzalandırmaq məqsədi daşıdığı açıq şəkildə göstərilib və dövlətdən həmin ittihamın və məhkumluğun mənfi hüuqi nəticələrinin tam aradan götürülməsi və Məmmədliyə bəraət verilməsi istənilib.

Vəkil bildirib ki, AİHM qərarına baxmayaraq, əvvəlki məhkumluq ləğv edilməyib və indi bu “məhkumluq statusu” yeni işdə ona qarşı ağırlaşdırıcı hal kimi istifadə olunur. Müdafiə tərəfi bu vəziyyətin həm Konvensiyanın 46-cı maddəsinə, həm də AR Konstitusiyasının 151-ci maddəsinə zidd olduğunu vurğulayıb.

Vəsatətdə ikinci olaraq SMDT Mərkəzinin hüquqi statusu ilə bağlı AİHM-in 12 yanvar 2023-cü il tarixli qərarına diqqət çəkilib. Həmin qərarda Məhkəmə təşkilatın dövlət qeydiyyatına alınmamasının əsassız və “özbaşına” olduğunu və bunun Konvensiyanın 11-ci maddəsinin – birləşmək azadlığının pozulması olduğunu müəyyən edib. Vəsatətdə qeyd olunub ki, dövlət bu pozuntunu aradan qaldırmaq əvəzinə, əksinə, təşkilatın bu günə qədər qeydiyyatsız qalmasını Anar Məmmədliyə qarşı hazırkı ittihamda əsas kimi göstərir. Bu isə tamamilə məntiqsizdir: dövlətin yaratdığı “qeydiyyatsızlıq” problemi indi təşkilat rəhbərinə qarşı ittiham üçün əsas kimi istifadə olunur.

Vəsatətdə qeyd edilib ki, AİHM qərarlarının icrasına nəzarət edən Avropa Şurası Nazirlər Komitəsinin 2019-cu ildən bəri apardığı müzakirələr də Azərbaycanın bu sahədə real addım atmadığını göstərir. Komitə dəfələrlə vurğulayıb ki, “Məmmədli qrupu” işlərində sistemli sui-istifadə halları mövcuddur və tam icra yalnız məhkumluqların ləğvi, onun hüquqi nəticələrin aradan qaldırılması və QHT-lərin qeydiyyat probleminin həll edilməsi (Ramazanova qrupu işlərində) ilə mümkündür. Vəsatətdə göstərilir ki, dövlətin bu öhdəlikləri yerinə yetirmədiyi halda, özünün yol verdiyi hüquq pozuntularını hazırkı cinayət işində müdafiə tərəfinin əleyhinə hüquqi fakt kimi göstərməsi yolverilməzdir.

Vəsatətin nəticə hissəsində vurğulanıb ki, işin obyektiv və hərtərəfli araşdırılması üçün lazım olan əsas hüquqi məlumatlar yalnız dövlət qurumlarında mövcuddur və müdafiə tərəfi bu məlumatlara çıxış edə bilmir. Bu səbəbdən vəkil məhkəmədən xahiş edib ki, Avropa Məhkəməsi yanında Azərbaycan Respublikasının Səlahiyyətli Nümayəndəsinə rəsmi sorğu göndərilsin və hər iki qərarın icra vəziyyəti, Nazirlər Komitəsinə təqdim edilmiş fəaliyyət planları və hesabatlar, həmçinin indiyə qədər görülmüş fərdi və ümumi tədbirlər barədə rəsmi təsdiq edilmiş sənədlər məhkəməyə təqdim edilsin.

Müdafiə tərəfi bildirib ki, bu məlumatlar cinayət təqibinin legitimliyinin qiymətləndirilməsi, ittihamın siyasi motivli olub-olmadığının müəyyən edilməsi və Konvensiyanın tələblərinə uyğun ədalətli məhkəmə araşdırmasının təmin edilməsi üçün həlledici əhəmiyyət daşıyır. Vəsatətdə qeyd edilir ki, AİHM-in hüquq pozuntusu kimi tanınaraq onun aradan qaldırılması tələb olunduğu halda, qanundan eyni şəkildə təkrar sui-istifadə ilə yenidən ittihamın irəli sürülməsi hüquqən yolverilməzdir və məhkəmə bu məsələni mütləq araşdırmalıdır.

Hakim vəsatətə baxılmasını təxirə salaraq ona işin sonunda ayrıca münasibət bildirəcəyini qeyd edib.
Hakim eyni zamanda müdafiə tərəfinə vəsatətin tələbləri ilə bağlı Azərbaycanın Avropa Məhkəməsi yanında rəsmi nümayəndəliyinə də müraciət edilməsini tövsiyyə edib.

Müdafiə tərəfi müvafiq sorğu ilə Nümayəndəliyə müraciət ünvanlayıb.

Daha sonra ictimai fəal Anar Abdullayev yenidən sərbəst ifadəsini təqdim edib. İfadədən sonra Anar Abdulla dövlət ittihamçısının suallarını cavablandırıb.

Növbəti məhkəmə iclası 8 dekabr saat 14:30-a təyin edilib və şahidlərin ifadəsi ilə davam etdiriləcək.

*    *    *

Anar Mammadli Case: Motion Filed in the Baku Court on Grave Crimes Requesting Information from Azerbaijan’s Official Representative before the European Court of Human Rights

In its motion, the defense argued that the facts demonstrating the baselessness of the charges have already been established in the European Court’s judgments concerning both Mammadli’s arrest and the refusal to register the public association he co-founded, and that the “non-registration” situation created by the State’s delay in implementing these judgments cannot be used to justify prosecuting legitimate public activity.

On 17 November, the next court hearing was held at the Baku Court on Grave Crimes in the case of Anar Mammadli, Chair of the Election Monitoring and Democracy Studies Centre (EMDS), and civic activist Anar Abdullayev.

The hearing presided over by Judge Aygun Qurbanova.

At the hearing, Anar Mammadli’s lawyer, Javad Javadov, submitted a motion requesting the Court to obtain information and supporting documents capable of comprehensively challenging the legal and factual basis of the charges and demonstrating their complete lack of merit. The motion sought the issuance of a formal inquiry to the Representative of the Republic of Azerbaijan before the European Court of Human Rights (the Government Agent) in order to obtain a range of relevant information and corroborating documentation.

Follow the link to read more

Qənimət Zahid

“Azadlıq” qəzetinin baş redaktoru, Fransada yaşayan Qənimət Zahid Baş Prokurorluğa çağırılıb.

Bununla bağlı Baş Prokurorluğun rəsmi müraciəti noyabrın 17-də İTV-də yayımlanıb.

Bildirilib ki, o, barəsində açılmış cinayət işi üzrə bu gün bitmiş ibtidai istintaqla bağlı ittiham aktı ilə tanış olması üçün noyabrın 24-də Baş Prokurorluğun İstintaq Baş İdarəsinə çağırılır.

Ona öz seçdiyi müdafiəçi ilə idarəyə gəlməsi və digər hüquqları izah olunub, ittiham aktı ilə tanış olmaq üçün idarədə tam şərait yaradılacağı bildirilib.

Baş Prpkurorluq bildirir ki, Qənimət Zahid barəsində Cinayət Məcəlləsinin 281.2-ci (Dövlət əleyhinə yönələn açıq çağırışlar, təkrar və ya bir qrup şəxs tərəfindən törədildikdə) maddəsi ilə təqsirləndirilən şəxs qismində cəlbetmə haqqında qərar qəbul edilib.

Məlumatda o da qeyd olunub ki, onun barəsində Səbail Rayon Məhkəməsinin qərarı ilə 4 aylıq qiyabi həbs qətimkan tədbiri seçilib.

İttihama görə, Qənimət Zayidov 4 iyul və 18 iyul 2018-ci il tarixlərində “Youtube” platformasında Azərbaycanda qanuni əsaslarla formalaşmış və fəaliyyət göstərən mövcud hakimiyyətə qarşı zor tətbiqini təşviq edən açıq çağırışlar yayıb.

Toplum TV 

Zabil Qəhrəmanov

Gəncədəki 2 saylı İstintaq Təcridxanasında saxlanılan vəkil Zabil Qəhrəmanovun ailəsiylə ünsiyyət hüququ məhdudlaşdırılıb, görüş və telefon danışıqları yasaqlanıb. Gəncə şəhər Baş Polis İdarəsində Zabil Qəhrəmanovun işinin istintaqını aparan müstəntiq Rəşad Süleymanov belə qərar çıxarıb.

Qərarı qanunsuz sayan Zabil Qəhrəmanov və vəkilləri onun ləğvindən ötrü məhkəməyə şikayət veriblər. Noyabrın 14-də Gəncə şəhər Məhkəməsində bu şikayətə baxılıb.

Qərarın qanunsuz və əsassız olduğunu vurğulayan Zabil Qəhrəmanovla vəkilləri bildiriblər ki, bir şəxsi heç bir ciddi əsaslandırma olmadan ailə üzvləriylə ünsiyyətdən məhrum etmək özbaşınalıqdır.

Hakim Məhəmməd Həsənli şikayəti təmin etmədiyindən Zabil Qəhrəmanovun ailə üzvləriylə görüş və telefon danışığına qadağa qüvvədə qalıb.

Zabil Qəhrəmanovun vəkili Səadət Seyidli AzadlıqRadiosuna bildirib ki, məhkəmənin də qərarını ədalətsiz və qərəzli saydıqlarından apellyasiya şikayəti verəcəklər:

“Zabil Qəhrəmanovun görüş və telefon danışığı hüququnun hansı məqsədlə əlindən alındığı müstəntiqin qərarından aydın deyil. Ailəsiylə ünsiyyət həbsdə olan şəxsin əsas hüquqlarından biridir və bunun məhdudlaşdırılması üçün çox ciddi arqument olmalıdır. Çox təəssüf ki, məhkəmə də öz qərarını əsaslandırmağa ehtiyac duymadı”.

Vəkil “Həbs yerlərində saxlanılan şəxslərin hüquq və azadlıqlarının təmin olunması haqqında” qanunun 19-cu maddəsinə də diqqət çəkib. Orada göstərilib ki, həbsdə olan şəxs nəinki yaxın qohumları, onun marağında olan başqalarıyla da həm görüşə, həm də telefonla danışa bilər. Qanun həbsdəki adama həftədə bir dəfə 4 saatadək görüş, həftədə iki dəfə 15 dəqiqəyədək telefonla danışmaq hüququ verir.

Səadət Seyidli həmin qanunun 19.8 maddəsini də xatırladıb. O maddəyə görə, həbsdə olan şəxsin görüş və telefonla danışıq hüququ “hazırlanan cinayətlərin qarşısını almaq, cinayət təqibini və şəxslərin təhlükəsizliyini təmin etmək” məqsədi ilə bəlli müddətə məhdudlaşdırıla bilər. Bu məhdudlaşdırma ya istintaq orqanının, ya da həbs yerinin müdiriyyətinin əsaslandırılmış qərarı ilə olmalıdır.

Amma bu məhdudiyyət heç bir halda şəxsin vəkili ilə görüşü və ya telefonla danışmasına aid edilə bilməz.

Digər vəkil Nazim Musayev deyir ki, qanunda məhdudlaşdırma üçün nəzərdə tutulan istisnadan müstəntiqlər çox vaxt sui-istifadə edirlər. Nəticədə heç bir əsas olmadığı halda, şəxsin uzun müddət ünsiyyət hüquqları məhdudlaşdırılmış olur.

N.Musayev sui-istifadə hallarının artmasında məhkəmələrin də rolu olduğunu düşünür. Vəkilin fikrincə, məhkəmələr bu qəbildən şikayətlərə obyektiv yanaşıb ədalətli qərarlar çıxarsalar, müstəntiqlər qanunun onlara verdiyi səlahiyyətdən bu dərəcədə sui-istifadə etməz:

“Müstəntiq bilər ki, şəxsin ailəsiylə görüş, danışıq hüququnu heç bir əsas olmadığı halda, onun əlindən alsam, sabah məhkəmə mənim qərarımı onsuz da ləğv edəcək. Məhkəmələrin vəziyyətini hamımız bilirik. Müstəntiq də bilir ki, məhkəmə onun qərarını ləğv etməyəcək. Ona görə istədiyi kimi davranır. Bu səbəbdən hesab edirəm ki, sui-istifadəyə şərait yaradan bu norma, ümumiyyətlə, ləğv olunmalıdır”.

Xatırlatma

Gəncə Regional Vəkil Bürosunda çalışan Zabil Qəhrəmanov oktyabrın 23-dən həbsdədir. Ona Cinayət Məcəlləsinin 178.2.4-cü (xeyli miqdarda ziyan vurmaqla dələduzluq) və 221.2.2-ci (ictimai qaydanın pozulmasının qarşısını alan şəxsə qarşı müqavimət göstərməklə xuliqanlıq) maddələriylə ittiham verilib.

İddia olunub ki, saxlandığı gün Zabil Qəhrəmanov avtoyuma məntəqəsində işləyən Fazil İsgəndərovla mübahisə edib, onu vurub.

İddiaya görə, vəkil saxlandığı gün Şəmkir sakini Emin İbrahimov da Gəncə şəhər Baş Polis İdarəsinə ondan şikayət edib. Bildirib ki, Z.Qəhrəmanov 5 min 600 manat pulunu alaraq ona vəkillik edib və prosesin onun istədiyi kimi başa çatacağına söz verib. Ancaq son nəticədə proses onun istədiyi kimi bitməyib.

Z.Qəhrəmanovsa hər iki ittihamın əsassız olduğunu, onu cəzalandırmaq üçün adları çəkilən şəxslərdən istifadə edildiyini deyir.

Həbsindən iki həftə öncə – oktyabrın 8-də Daxili İşlər Nazirliyindən gələn şikayət əsasında Vəkillər Kollegiyasının Rəyasət Heyətinin qərarı ilə Zabil Qəhrəmanovun vəkillik fəaliyyətinin 6 aylıq dayandırılmasına qərar verilmişdi.

O, bir sıra səs-küylü işdə müdafiəçi qismində çıxış edib. Bunların arasında Tovuz rayonunun Dondar Quşçu kəndində 11 yaşlı Nərmin Quliyevanın oğurlanıb meyitinin yandırılmasında suçlanan İlkin Süleymanovun, qətl ittihamı ilə 11 il cəza alıb, 4 il sonra bəraət hökmü ilə azadlığa çıxan Polad İsmayılovun məhkəmələrini sadalamaq olar. Zabil Qəhrəmanov “Tərtər hadisələri”ndə bir neçə zərərçəkmişin və bir çox ictimai-siyasi fəalın da hüquqlarını qoruyub.

AzadlıqRadiosu