Bəxtiyar Hacıyev

İctimai fəal Bəxtiyar Hacıyevin üç gündür ki, saxlandığı 6 saylı Cəzaçəkmə Müəssisəsində cərimə kamerasına (kars) salındığı və aclıq aksiyası keçirdiyi bildirilir.

Bununla bağlı bu gün, noyabrın 25-də onun qardaşı Vüqar Hacıyev məlumat yayıb. Onun vurğuladığına görə, noyabrın 23-24-də Ədliyyə Nazirliyinin qaynar xəttinə, Mətbuat xidmətinin rəhbərinə, Penitensiar Xidmətin Mətbuat xidmətinin rəhbərinə, Ombudsman Aparatına müraciət edib: “Lakin müsbət bir addım atılmayıb”.

Bundan əvvəl də ictimai fəalın yaxınları rəsmi qurumlara müraciət edərək Bəxtiyar Hacıyevin həbsdə hüquqlarının pozulduğunu bildirmişdilər.

Bütün bu deyilənlərə Ədliyyə Nazirliyi və başqa cavabdeh qurumlardan münasibət almaq mümkün olmayıb. Amma Penitensiar Xidmətdən bundan əvvəl oxşar şikayətlərlə bağlı vurğulanıb ki, onlar heç bir məhbusa ayrıseçkilik etmir və onlarla qanun çərçivəsində davranırlar.

Xatırlatma

Bəxtiyar Hacıyev 2022-ci il dekabrın 9-dan həbsdədir. Həbs edilərkən, ona Cinayət Məcəlləsinin 221.2.2-ci (vəzifəsini yerinə yetirən şəxsə qarşı müqavimət göstərməklə xuliqanlıq) və 289.1-ci (məhkəməyə sayqısızlıq) maddələriylə ittiham verilib. İstintaqın gedişində Bəxtiyar Hacıyevə qarşı qanunsuz sahibkarlıq, cinayət yoluyla əldə olunmuş vəsaitlərin leqallaşdırılması, qaçaqmalçılıq, saxta sənədlərdən istifadə, vergidən yayınma və s. əlavə ittihamlar irəli sürülüb.

Bu ilin yanvarında Bakı Ağır Cinayətlər Məhkəməsi Bəxtiyar Hacıyevə 10 il həbs cəzası kəsib, onun mənzilinin və bank hesabındakı vəsaitin müsadirəsinə qərar verib. Bəxtiyra Hacıyev özünü təqsirli bilmir, bu ittihamların hamısının əsassız olduğunu deyir. Bəxtiyar Hacıyev daxili işlər naziri Vilayət Eyvazovun ünvanına tənqidlərinə görə onun sifarişiylə həbs olunduğunu iddia edir.

Daxili İşlər Nazirliyi bu iddianı təkzib edib.

AzadlıqRadiosu

Avropa İnsan Hüquqları Məhkəməsi (AİHM) “Azadlıq” qəzetinin Azərbaycan hökumətinə qarşı işi ilə bağlı qərar verib.

Noyabrın 25-də verilən qərarda AİHM ərizəçiyə qarşı Avropa İnsan Hüquqları Konvensiyasının 10-cu maddəsinin (ifadə azadlığı) pozulmasını tanıyıb.

Qərara əsasən, Azərbaycan hökuməti qəzetə maddi və mənəvi zərərə görə 28 min, hüquqi xərclərə görə isə 1,500 avro olmaqla ümumilikdə 29,500 avro ödəməlidir.

İş 2012-ci ildə qəzetdə  dərc olunmuş, Bakı Metropoliteni haqqında məqalə ilə bağlıdır. “Tağı Əhmədov 5 qəpikləri mənimsədi” başlıqlı məqalədə iddia olunub ki, həmin ilin aprelində metroda gediş haqlarının artırılmasından sonra sərnişinlərin kart balansında əvvəl mövcud olan 5 qəpiklər “yoxa çıxıb”.

“Bununla yüz minlərlə vətəndaşın cibinə girilib. Bu yeni fırıldaqçılıq növüdür. Milyonlarla sakin metrodan istifadə edir. Bu sərnişinlərin ən azı dörddə birinin metro kartı var. Tutaq ki, 750,000 kartdan ən azı 250,000-də 0,05 AZN qalıb. Bu isə 12,500 manat edir. Aylıq 85 AZN pensiya alan bir pensiyaçı bu məbləğlə 12 il yaşaya bilər. Bax, Bakı Metropoliteninin rəisi Tağı Əhmədov həmin pulları mənimsəyib. Bu məsələdə başqasını ittiham etmək mümkün deyil… Belə “əhəmiyyətsiz”, “fərq edilməyən” qərarları verən məhz odur”, – deyə məqalədə qeyd olunub.

Tağı Əhmədov qəzeti böhtan iddiası ilə məhkəməyə verib və 200 min manat təzminat tələb edib. Həmin ilin iyununda Yasamal Rayon Məhkəməsi Tağı Əhmədovun xeyrinə qərar qəbul edib, lakin təzminatı 30 min manat məbləğində təyin edib.

Yuxarı məhkəmə instansiyaları da qəzetin qərardan şikayətini təmin etməyib və “Azadlıq” qəzeti 2013-cü ilin avqustunda AİHM-ə müraciət edib.

AİHM hakimləri qərarlarında qeyd ediblər ki, yerli məhkəmələr sözügedən “məqalənin məzmununu və oradakı konkret ifadələri ətraflı təhlil etməyiblər və bunların fakt, yoxsa şəxsi fikir əsasında məlumat olub-olmadığını qiymətləndirməyiblər”.

“Həmçinin, onlar qəzetin məqalənin ictimai maraq doğuran məsələni müzakirə etdiyi barədə arqumentlərini də nəzərə almayıblar. Yerli məhkəmələr məqaləni bütövlükdə qiymətləndiriblər və yalnız Tağı Əhmədovun nüfuzuna zərər verdiyini müəyyən etməklə kifayətlənmiş, qəzetin məlumatın həqiqiliyini sübut etmək üçün heç bir dəlil təqdim etmədiyini qeyd etmişlər”,- deyə bildirilib.

Məhkəmə bu qənaətə gəlib ki, məqalə, əsasən, şəxsi fikirlərdən deyil, fakt əsasında məlumatlardan ibarət olub.

“Məqalənin bəzi hissələrinin müəllifin şəxsi fikirləri olduğunu qəbul etsək belə, məhkəmə hesab edir ki, bunlar müəllifin Tağı Əhmədovun mənimsəmə halları və Bakı Metropoliteninin ümumi “nəzarətsiz” idarəçiliyi ilə bağlı əvvəlki fakt əsasında iddialarına əsaslanır”, -deyə əlavə olunub.

AİHM yerli məhkəmənin təzminat qərarı ilə bağlı bildirib ki, bu cür böhtan iddialı işlərdə “proqnozlaşdırıla bilməyəcək qədər yüksək məbləğdə təzminatlar ifadə azadlığı üzərində soyuducu təsir göstərə bilər”.

Hakimlər “Azadlıq” qəzetinin maddi çətinliklərini nəzərə alaraq qeyd ediblər ki, yerli məhkəmələr “ərizəçi qəzetə tətbiq olunan maliyyə sanksiyasının ağırlığı üçün müvafiq və kifayət qədər əsaslandırma təqdim etməyiblər və bu sanksiyanın həyata keçirilən qanuni məqsədlə nisbətdə məqbul bir əlaqəyə malik olmadığı görünür”.

Azərbaycan hökuməti isə qəzetin iddialarını rədd edib.

“Azadlıq” qəzeti 2016-cı ildə maddi çətinliklərə görə çap versiyasını dayandırıb.

Toplum TV 

Ayxan İsrafilov

Həbsdə olan işçi hüquqları fəalı, “İşçi Masası” Həmkarlar İttifaqları Konfederasiyasının üzvü Ayxan İsrafilovun üç gündür quru aclıq etdiyi bildirilir.

Bu barədə noyabrın 25-də onun yaxınları “Toplum TV”-yə məlumat verib.

Yaxınlarının sözlərinə görə, Ayxan İsrafilov Bakı İstintaq Təcridxanasında (BİT) qapalı rejimli şəraitdə saxlanılması və şəxsi əşyalarının götürülüb geri qaytarılmamasına etiraz olaraq quru aclığa başlayıb.

“Bu gün telefonla danışarkən danışığı yarımçıq kəsilib. Ayxan İsrafilov 3-cü qrup əlildir və quru aclıq onun səhhəti üçün son dərəcə təhlükəlidir. Hazırda onunla əlaqə saxlamaq mümkün deyil. Biz Ayxan İsrafilovun səhhətindən narahatıq”, – yaxınları bildirib.

Ayxaan İsrafilov həbs müddətinin üçdə ikisini başa vurduğu üçün şərti azadlığa buraxılması barədə məhkəməyə müraciət edib. Lakin məhkəmə vəsatəti təmin etməyib və fəal Bakı Apellyasiya Məhkəməsinə müraciət edib. Onun şikayəti üzrə noyabrın 12-də keçiriləcək iclas öncəsi Ayxan İsrafilov saxlanıldığı 10 saylı Cəzaçəkmə Müəssisəsindən BİT-ə köçürülüb.

Apellyasiya Məhkəməsində proses noyabrın 26-na təxirə salınıb.

Ayxan İsrafilov daha əvvəl yaxınları vasitəsilə bildirib ki, BİT-də qapalı rejim hökm sürür və bu şərait onun səhhətinə zərər vurur.

“Bakı Ağır Cinayətlər Məhkəməsi mənə ümumi rejimli cəzaçəkmə müəssisəsində həbs verib. Hal-hazırda cəzamdan şərti olaraq azad olmaq üçün apellyasiya məhkəməsinin olması üçün məni Kürdəxanı təcridxanasına aparırlar. İstintaq təcridxanası isə qapalı şəraitdir. Bu birbaşa olaraq mənə verilən hökmə əsasən hüquq pozuntusudur”,- o qeyd edib.

Ailə üzvləri bildiriblər ki, fəalın ayağında zədə var və o, vəziyyətini yaxşılaşdırmaq üçün mütəmadi idman hərəkətləri etməlidir. Qapalı rejimdə isə bunun mümkün olmadığı deyilir.

Ayxan İsrafilov həmçinin bildirib ki, BİT-də ona ailə üzvləri ilə yalnız şüşə arxasından görüşə biləcəyi deyilib. O əlavə edib ki, saxlanıldığı 10 kvadratmetrlik kamerada 6 nəfər yerləşdirilib.

Xatırlatma

Ayxan İsrafilov 2023-cü il avqustun 13-də moto-kuryerlərin etiraz aksiyasına dəstək verdikdən sonra narkotik ittihamı ilə saxlanılmışdı.

Bu ilin aprelində Bakı Ağır Cinayətlər Məhkəməsi onu 3 il azadlıqdan məhrum edib.

May ayında Avropa İnsan Hüquqları Məhkəməsi A. İsrafilovun işi üzrə qərar verərək, onun azadlıq hüququnun Azərbaycan hökuməti tərəfindən pozulduğunu müəyyənləşdirib.

2022-ci ildə yaradılan “İşçi Masası” Həmkarlar İttifaqları Konfederasiyasının dörd üzvü – sədr Afiəddin Məmmədov, eləcə də Ayxan İsrafilov, Elvin Mustafayev və Möhyəddin Orucov hazırda müxtəlif ittihamlarla həbsdədir. Onlar ittihamların qurama olduğunu və siyasi motivlər daşıdığını bildirirlər.

Toplum TV 

Noyabrın 24-də Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi keçirilib.

Hakim Azər Tağıyevin sədrliyi ilə baş tutan prosesdə iş üzrə şahidlərin dindirilməsi davam edib.

Şahid qismində dindirilən Fidan Əlicanova və Cəmilə Əzimova ibtidai istintaqda təzyiq altında ifadə verdiklərini deyiblər. Cəmilə Əzimova bildirib ki, müstəntiq onun üstünə qışqırıb və onu səhərə qədər polis bölməsində saxlamaqla hədələyib. Şahidlərin hər ikisi telefonlarının müsadirə olunduğunu və hələ də qaytarılmadığını, bununla bağlı heç bir hüquqi sənəd təqdim olunmadığını qeyd edib.

Şahidlərin dindirilməsi zamanı təqsirləndirilən şəxslərdən “Toplum TV” jurnalisti Fərid İsmayılovla dövlət ittihamçısı Rauf Malışov arasında mübahisə yaranıb. Jurnalist Rauf Malışovun şahidə verdiyi suala etiraz edib, dövlət ittihamçısı isə ona “otur aşağı” deyib və əlavə edib ki, “onunla belə danışa bilməz”. Mübahisə nəticəsində Fərid İsmayılovun halı pisləşib və o, məhkəmə zalından müvəqqəti çıxarılıb.

Fərid İsmayılov məhkəmə zalına qayıtdıqdan sonra Dövlət Gömrük Komitəsinin sədri Şahin Bağırovun məhkəməyə gəlib ifadə verməsi tələbilə vəsatət verib. O bildirib ki, sonuncu dəfə ölkə xaricindən gələrkən könüllü şəkildə gömrük orqanlarının yoxlamasından keçib və üzərində qanunsuz əşya və ya pul vəsaiti olmaması barədə sənəd alıb. Buna görə də, o, qaçaqmalçılıqda ittiham edilməsinin ziddiyyətli olduğunu və Ş.Bağırovun buna aydınlıq gətirməli olduğunu deyib.

“Gömrük Komitəsi də gömrük bəyannamələrini istintaqla bölüşüb. Orada da qeyd olunur ki, üzərimdə pul və ya qiymətli əşya aşkar olunmayıb. O zaman iki qurumdan biri yalan danışır. Deyək ki, “Toplum”çular, “Abzas”çılar, “Meydan”çılar qaçaqmalçılıqla məşğul olub. Şahin Bağırov gəlsin cavab versin ki, hara baxırdı? Necə oldu ki, bir ildə 20-dən çox jurnalistin qaçaqmalçılıq ittihamı ilə həbsindən sonra “Vətənə xidmətə görə” medalı aldı?”, – Fərid İsmayılov sual edib.

Məhkəmə vəsatətin cinayət işi ilə əlaqəsi olmadığını əsas gətirərək  onu təmin etməyib. Bu vaxt digər təqsirləndirilən şəxslər məhkəmənin qərarına etiraz edib və vəsatəti müdafiə edib.

“İttiham aktında yazılıb ki, biz isti izlərlə saxlanılmışıq. İl yarımdan çoxdur həbsdəyik, hələ də bilmirəm hansı əsaslarla bizi saxlayıblar. Heç kimə maaş verməmişəm, əleyhimə heç bir ifadə yoxdur”, – “Toplum TV” videoredaktoru Müşfiq Cabbar bildirib.

Hakim Azər Tağıyev isə cavab olaraq işin hələ də araşdırıldığını deyib. Bu zaman təqsirləndirilən şəxslərdən III Respublika Platformasının qurucu üzvü Ruslan İzzətli hakimə etiraz edib.

“Onda bizi buraxın, çıxaq gedək. Araşdırıb bitirəndə bizi çağırıb deyərsiniz ki, filan işləri görmüsünüz, cəzanız da budur”, – o deyib.

Ruslan İzzətli daha sonra ev dustaqlığına buraxılması üçün vəsatət verib. Məhkəmə vəsatəti təmin etməyib.

Müşfiq Cabbar isə hakimə bu yaxınlarda ev dustaqlığına buraxılan “Sputnik Azərbaycan” əməkdaşlarının ölkəni necə tərk etdiklərini soruşub. Hakim deyib ki, bunu onların özlərindən soruşmaq lazımdır, jurnalist isə sualının ritorik olduğunu bildirib: “Bura Azərbaycandır, burada hər şey formaldır.”

Xatıratma

“Toplum TV işi” üzrə ümumilikdə 10 nəfərə cinayət işi açılıb. III Respublika Platformasının spikeri Akif Qurbanov, bu qurumun qurucu heyət üzvü Ruslan İzzətli, “Toplum TV”-nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev həbs olunublar.

Jurnalist Elmir Abbasov polis nəzarətinə verilib, “Toplum TV” redaktoru Şahnaz Bəylərqızı isə əvvəlcə ev dustaqlığına buraxılıb, sonra haqqında polis nəzarətinə verilməklə qətimkan tədbiri seçilib.

“Toplum TV işi” üzrə həbs edilənlər öncə qaçaqmalçılıqda ittiham edilsələr də, sonradan ittiham ağırlaşdırılıb. Onlar ittihamları rədd edir, siyasi sifariş əsasında həbs olunduqlarını bildirirlər.

Toplum TV 

Elman Şeydayev

Həbsdə olan inanclı fəal Elman Şeydayevin saxlanıldığı 6 saylı Cəzaçəkmə Müəssisəsində etiraz olaraq aclıq aksiyasına başladığı bildirilir.

Bu barədə jurnalist Arzu Abdulla noyabrın 24-də “Facebook” səhifəsində məlumat paylaşıb.

Onun sözlərinə görə, fəal bu ilin avqustunda həbs olunan altı inanclı qadın fəalın azadlığa buraxılmasını tələb edir və hazırda səhhəti ağırdır.

Elman Şeydayev 2022-ci ilin fevralında saxlanılıb və həmin ilin iyulunda Bakı Ağır Cinayətlər Məhkəməsinin hökmü ilə Cinayət Məcəlləsinin 234.3.4-cü maddəsi (külli miqdarda narkotik vasitələrin və ya psixotrop maddələrin qanunsuz dövriyyəsi) üzrə 7 il müddətinə azadlıqdan məhrum edilib.

Elman Şeydayev ittihamları qəbul etmir və həbsinin fəaliyyətinə, eləcə də ilahiyyatçı Sərdar Hacıhəsənli ilə bağlı ifadə verməkdən imtina etməsinə görə olduğunu bildirir.

Nailə Bağırova, Xoşqədəm Quliyeva, Şərqiyyə Sadıqova, Arzu Hüseynova, Aytən İbrahimova və Şəhla Fərəcova avqustun 15-də Binə qəsəbəsində İmam Hüseyn adına ehsan payladıqları və Fələstinlə bağlı şüarlar səsləndirdikləri üçün saxlanılıblar.

Onlar Cinayət Məcəlləsinin 221.3-cü (bir qrup şəxs tərəfindən və ya təkrar törədilən xuliqanlıq, zor tətbiqi və ya əmlaka ziyan vurulması halları) və 233-cü (ictimai qaydanın pozulmasına səbəb olan hərəkətlərin təşkili və ya bu cür hərəkətlərdə fəal iştirak) maddələri ilə təqsirləndirilirlər.

Toplum TV