“Human Rights Watch” beynəlxalq insan hüquqları təşkilatı Azərbaycanda yeni yaradılan, vətəndaşların şəxsi məlumatlarını yığacaq sistemin ləğvinə çağırıb.

Təşkilatın Avropa və Mərkəzi Asiya şöbəsinin direktor müavini Giorgi Qoqianın müəllifi olduğu bəyanatda Dövlət Təhlükəsizliyi Xidmətinin (DTX) Mərkəzləşdirilmiş İnformasiya və Rəqəmsal Analitika Sisteminin (MİRAS) hüquqi legitimliyi şübhə altına alınıb.

“Avropa İnsan Hüquqları Məhkəməsi dəfələrlə vurğulayıb ki, nəzarət (müşahidə) tədbirləri qanunilik, zərurilik və proporsionallıq üzrə ciddi standartlara cavab verməli, həmçinin müstəqil nəzarət, şəffaf qaydalar və effektiv hüquqi müdafiə vasitələrini əhatə etməlidir. MİRAS bu təminatlardan məhrumdur. Orada şəxsi məlumatlara nə vaxt və hansı hallarda çıxış edilə biləcəyi göstərilmir, məhkəmə və ya müstəqil orqanın icazəsi tələb olunmur, məlumatların saxlanma müddətinə limitlər, minimallaşdırma standartları və ya xarici audit mexanizmləri nəzərdə tutulmur. Nəzarət tam şəkildə DTX-nin əlində mərkəzləşdirilir və ictimai hesabatlılıq, eləcə də şəxslərin öz məlumatlarına çıxış əldə etməsi və ya onları düzəltməsi üçün heç bir prosedur nəzərdə tutulmur”, – Qoqia qeyd edib.

Təşkilat nümayəndəsi Azərbaycanın “olduqca avtoritar bir dövlət” olduğunu və jurnalistlərə, hüquq müdafiəçilərinə və fəallara qarşı “qanunsuz rəqəmsal nəzarətin tətbiqi ilə bağlı keçmişə malik olduğunu” xatırladıb.

“Keçmiş araşdırmalar hakimiyyət orqanlarının tənqidçiləri izləmək və qorxutmaq məqsədilə internet istifadəsinin monitorinqi alətlərindən və cəsus proqramlardan istifadə etdiyini ortaya qoymuşdur. Bu kontekstdə, güclü və müstəqil nəzarət mexanizmləri olmadan müxtəlif sektorlar və qurumlar üzrə həssas şəxsi məlumatları mərkəzləşdirən vahid bir sistem, özbaşına və ya qeyri-mütənasib nəzarət risklərini ciddi şəkildə artırır”, – o əlavə edib.

Qoqia Avropa Şurası da daxil olmaqla beynəlxalq tərəfdaşları Azırbaycan hakimiyyətinə “rəqəmsal idarəetmə islahatları adı altında nəzarətsiz müşahidə səlahiyyətlərindən sui-istifadə etməməsi üçün” təzyiq göstərməyə çağırıb.

Noyabrın 21-də Azərbaycan prezidenti İlham Əliyev MİRAS-ı təsis edən və dövlət qurumlarına öz məlumat bazalarını sistemə inteqrasiya etməyi tapşıran fərman imzalayıb.

MİRAS haqda Əsasnamə də həmin gün prezidentin saytında dərc edilsə də, bir müddət sonra silinib.

Əsasnamədə məlumat bazasına hansı geniş həcmli məlumatların daxil olunacağı qeyd olunub. Bunlara şəxslərin identifikasiya məlumatları, müşahidə sistemlərindən əldə edilən məkan məlumatları, habelə ailə, iş, təhsil, fiziki və psixi sağlamlıq vəziyyəti haqda məlumatlar daxildir.

Əsasnamə çoxsaylı yarımbəndləri olan səkkiz bənddən təşkil olunub və DTX-ni yaradılacaq sistemin həm sahibi, həm də operatoru kimi müəyyənləşdirib.

Toplum TV 

Hafiz Babalı

Bu gün araşdırmaçı jurnalist və iqtisadçı Hafiz Babalının həbsindən iki il ötür.  Onun həbsi tənqidi jurnalistikaya, xüsusilə korrupsiya, dövlət resurslarının idarə olunması, büdcə şəffaflığı və dövlət şirkətlərinin fəaliyyəti kimi ictimai əhəmiyyətli sahələrdə aparılan araşdırmalara qarşı yönəlmiş sistemli təzyiqin ən bariz nümunələrindən biridir. Artıq iki ildir ki, Hafiz Babalı azadlıqdan məhrumdur və bu müddət ərzində onun işi həm maddi, həm də prosessual hüquq pozuntuları, eləcə də birbaşa siyasi motivlərlə müşayiət olunub.

Hafiz Babalı 730 gündür ki, heç bir hüquqi əsas olmadan azadlıqdan məhrum edilib. O, 2023-cü il 13 dekabr tarixində “Abzas Media işi” çərçivəsində saxlanılıb. İlkin olaraq Babalıya qarşı Cinayət Məcəlləsinin 206.3.2-ci maddəsi (qaçaqmalçılıq – qabaqcadan əlbir olan bir qrup şəxs tərəfindən törədildikdə) ilə ittiham irəli sürülüb və barəsində üç ay müddətinə həbs qətimkan tədbiri seçilib. Müdafiə tərəfinin ev dustaqlığı və digər alternativ qətimkan tədbirlərinin tətbiqi ilə bağlı vəsatətləri məhkəmə tərəfindən təmin edilməyib və bu qərarlar heç bir fərdiləşdirilmiş hüquqi əsaslandırma ilə müşayiət olunmayıb. Halbuki Cinayət Prosessual Məcəlləsinin 155-ci maddəsi və Avropa İnsan Hüquqları Məhkəməsinin presedent hüququ həbsin yalnız real, sübut edilmiş və konkret risklər olduqda tətbiqini tələb edir.

İstintaqın gedişində ittihamlar ağırlaşdırılıb və Cinayət Məcəlləsinin 192.3.2, 193-1.3.1, 193-1.3.2, 206.4, 320.1 və 320.2, 213.2.1-ci maddələri ilə (xüsusilə külli miqdarda gəlir əldə etməklə qanunsuz sahibkarlıq, mütəşəkkil dəstə şəklində cinayət yolu ilə əldə edilmiş xeyli miqdarda pul vəsaitlərini leqallaşdırma, mütəşəkkil dəstə tərəfindən törədilmiş qaçaqmalçılıq, sənəd saxtalaşdırma və saxta sənədlərdən istifadə etmə, mütəşəkkil dəstə halında vergi ödəməkdən yayınma) kimi yeni ittihamlar irəli sürülüb.

İstintaq dövrü ərzində Hafiz Babalı barəsində seçilmiş həbs-qətimkan tədbirinin müddəti dəfələrlə uzadılıb. Bu uzadılmaların hər biri eyni məzmunlu, şablon qərarlarla rəsmiləşdirilib və müdafiə tərəfinin Bakı Apellyasiya Məhkəməsinə verdiyi şikayətlər heç bir halda təmin olunmayıb. İki il ərzində müdafiə tərəfi tərəfindən iş üzrə onlarla vəsatət, o cümlədən maliyyə və iqtisadi ekspertizaların təyin edilməsi, istintaqın əsas sübutlarının yoxlanılması, elektron materialların analizi, şahidlərin müstəqil və təzyiqsiz dindirilməsi ilə bağlı vəsatətlər ya dərhal rədd edilib, ya da ümumiyyətlə baxılmamış saxlanılıb. Bu isə işin obyektiv araşdırılması imkanlarını ciddi şəkildə məhdudlaşdırıb.

Məhkəmə iclaslarında Hafiz Babalı açıq şəkildə bildirib ki, bu iş siyasi motivlidir. O, uzun illərdir Azərbaycanın iqtisadi idarəetməsi, enerji sektoru, dövlət borcu, büdcə xərcləri və dövlət şirkətlərinin fəaliyyəti barədə araşdırmalar aparan jurnalist kimi tanınır. Onun hazırladığı materiallar geniş ictimai rezonans doğurmuş, bir sıra hallarda dövlət strukturlarının ciddi narahatlığına səbəb olmuşdu. Babalının sözlərinə görə, məhz bu araşdırmalar, xüsusilə də korrupsiya mexanizmlərini ifşa edən jurnalistika fəaliyyəti onun hədəfə çevrilməsinin əsas səbəbidir.

Bu müddət ərzində Hafiz Babalının həbsdə saxlanılma şəraiti və sağlamlıq vəziyyəti də ciddi narahatlıq doğurub. O, dəfələrlə tibbi yardıma ehtiyacı olduğunu bildirsə də, müvafiq xidmətlərin lazımi səviyyədə təmin edilmədiyini qeyd edib. Həmçinin hüquqi yardıma çıxışın məhdudlaşdırılması, Ombudsmana və digər dövlət qurumlarına ünvanlanan müraciətlərin cavabsız qalması insan hüquqlarının fundamental təminatlarının pozulması kimi səciyyələnib.

2025-ci ilin iyun ayında Bakı Ağır Cinayətlər Məhkəməsi Hafiz Babalı və digər Abzas Media əməkdaşları barəsində hökm çıxararaq onu 9 il müddətinə azadlıqdan məhrum edib. Apellyasiya instansiyası isə hökmü formal qaydada qüvvədə saxlayıb, nə faktlar yenidən araşdırılıb, nə də müdafiə tərəfinin irəli sürdüyü ciddi prosessual pozuntulara hüquqi qiymət verilib. Bununla da, apellyasiya instansiyası AİHM-in  tələb etdiyi “tam yurisdiksiya” standartına uyğun davranmayıb.

Hafiz Babalı bu iki il ərzində müxtəlif instansiyalarda, birinci instansiya məhkəməsi, Bakı Apellyasiya Məhkəməsi və daha sonra Bakı Ağır Cinayətlər Məhkəməsində 30 dəfədən artıq məhkəmə qarşısına çıxarılıb. Lakin məhkəmələrin heç biri nə həbsin zəruriliyini faktiki risklərlə əsaslandırıb, nə də müdafiə tərəfinin qaldırdığı hüquqi pozuntulara mahiyyəti üzrə qiymət verib. Məhkəmə nəzarətinin bu cür formal xarakter alması cinayət prosesinin ədalətli aparılması prinsipini faktiki olaraq aradan qaldırıb.

Hafiz Babalının işi təkcə bir jurnalistin uzunmüddətli həbsi deyil. Bu iş Azərbaycanda araşdırmaçı jurnalistikanın, ictimai nəzarətin və medianın müstəqilliyinin real vəziyyətini açıq şəkildə ortaya qoyur. İki ilin yekunu göstərir ki, Hafiz Babalının həbsi hüquqi zərurətdən deyil, siyasi repressiyadan qaynaqlanır və onun fəaliyyəti ilə dövlət strukturlarının tənqidə dözümsüzlüyü arasında birbaşa əlaqə mövcuddur.

Hafiz Babalının həbsi beynəlxalq insan hüquqları və media azadlığı qurumları tərəfindən də ardıcıl şəkildə tənqid olunub. Amnesty International, International Federation of Journalists, Committee to Protect Journalists, Reporters Without Borders və Front Line Defenders bu işin siyasi motivli olduğunu qeyd edərək Hafiz Babalının və digər “Abzas Media” əməkdaşlarının dərhal azad olunmasını tələb ediblər. Həmin təşkilatlar yaydıqları bəyanatlarda ittihamların jurnalist fəaliyyətinə görə irəli sürüldüyünü, istintaqın qərəzsiz aparılmadığını, məhkəmələrin isə müstəqil və obyektiv nəzarət funksiyasını yerinə yetirmədiyini vurğulayıblar. Onların da qiymətləndirməsinə görə, Hafiz Babalının işi Azərbaycanda müstəqil araşdırmaçı jurnalistikaya qarşı sistemli repressiyanın və ifadə azadlığının boğulmasının tərkib hissəsidir.

Full link to the text in English

Xaricdə yaşayan azərbaycanlı vətəndaş cəmiyyəti nümayəndələri Avropa Parlamentinin Prezidenti Roberta Metsolaya müraciət edərək Azərbaycanda insan haqlarının vəziyyətindən narahatlıqlarını bildiriblər. Onlar Aİ-dən Bakıya münasibətdə daha prinsipial və şərtli siyasət yürütməyi tələb edirlər

“Meydan TV”nin məlumatına görə, müraciətdə qeyd olunub ki, Azərbaycanda media, siyasi müxalifət və vətəndaş cəmiyyətini zəiflətməyə və aradan qaldırmağa yönəlmiş sistemli repressiya qurulub. Müəlliflər bildirib ki, hazırda ölkədə 400-dən çox siyasi məhbus var və bu, Azərbaycanın Avropa Şurasına üzv olduğu dövrdə ən yüksək göstəricidir.

Məktubda xatırladılıb ki, jurnalistlərə, ictimai-siyasi fəallara və müxalifət təmsilçilərinə qarşı, əsasən, vergi ittihamları irəli sürülür, hazırda 30-dan çox jurnalist həbsdə saxlanılır. “Meydan TV”, “Toplum TV”, “Abzas Media”, “Kanal 13” kimi müstəqil media qurumlarının fəaliyyətinə müxtəlif məhdudiyyətlər tətbiq olunduğu, “Turan” İnformasiya Agentliyi və BBC Azərbaycan xidmətinin ofisinin zorla bağlandığı, “Bloomberg” xəbər agentliyinin akkreditasiyasının ləğv edildiyi qeyd edilib.

Müraciətdə əsas müxalifət partiyalarından sayılan Azərbaycan Xalq Cəbhəsi Partiyasının sədri Əli Kərimlinin həbsi, eləcə də bir sıra siyasi fəalların, dini inanclı şəxslərin və hüquq müdafiəçilərinin azadlıqdan məhrum edilməsi xüsusi vurğulanıb.

Fəallar Aİ rəhbərliyini tənqid edərək xatırladıblar ki, 2025-ci ilin aprelində Bakıya səfəri zamanı Avropa İttifaqının Ali Nümayəndəsi Kaya Kallas Azərbaycanla enerji əməkdaşlığını yüksək qiymətləndirsə də, insan hüquqları məsələlərini açıq şəkildə gündəmə gətirməyib:

“Bu susqunluq Azərbaycanda belə qəbul edilib ki, repressiyaların daha da sərtləşdirilməsi hər hansı real nəticə doğurmayacaq. Bu isə Aİ-nin Belarus və Gürcüstandakı proseslərə verdiyi sərt və prinsipial reaksiyalarla tam ziddiyyət təşkil edir”, – deyə məktubda vurğulanıb.

Müraciətdə Avropa Parlamentinin 2024-cü ilin oktyabr və dekabr aylarında qəbul etdiyi qətnamələr alqışlanıb. Həmin sənədlərdə insan hüquqlarının pozulmasına görə məsuliyyət daşıyan yüksək vəzifəli Azərbaycan rəsmilərinə qarşı hədəfli sanksiyaların tətbiqi çağırışı dəstəklənib.

Bununla belə, müəlliflər qeyd ediblər ki, bu tövsiyələri Avropa Komissiyası və Aİ Xarici Fəaliyyət Xidməti icra etməyib, nəticədə Azərbaycan vətəndaş cəmiyyəti “tamamilə təcrid və müdafiəsiz vəziyyətdə” qalıb:

“Bu səbəbdən biz Avropa Parlamentindən xahiş edirik ki, Azərbaycanla Aİ münasibətləri üçün insan hüquqları meyarlarına əsaslanan aydın yol xəritəsi qəbul etsin, yeni tərəfdaşlıq sazişi üzrə irəliləyişi siyasi məhbusların azadlığı, QHT və media qanunlarında islahatlar və beynəlxalq qurumlarla əməkdaşlıq şərtlərinə bağlasın”, – deyə məktubda yazılıb.

Vətəndaş cəmiyyəti nümayəndələri bunun təcili məsələ olduğunu bildiriblər. Məktubda qeyd edilib ki, Azərbaycanda müstəqil vətəndaş cəmiyyəti və media “demək olar ki, mövcud deyil”, sürgündə yaşayan fəalların durumları ağırlaşıb, ABŞ-dən dəstəyin zəiflədiyi bir şəraitdə Aİ “yeganə real təsir imkanına malik aktor” kimi qalır:

“Avropa Parlamentinin prinsipial mövqeyi regiona və Azərbaycan hakimiyyətinə mühüm mesaj verəcək: Aİ üçün insan hüquqları və hüququn aliliyi danışıqsız dəyərdir”.

Hüquq müdafiəçilərinin hazırladığı siyahıya görə, hazırda ölkədə 392 siyasi məhbus var.

Azərbaycan hakimiyyəti isə ölkədə siyasi məhbusların olduğunu qəti şəkildə rədd edir. Rəsmi qurumlar bildirirlər ki, heç kəs siyasi baxışına və ya fərqli düşüncəsinə görə deyil, yalnız konkret cinayət əməllərinə görə məsuliyyətə cəlb olunur.

AbzasMedia

Dekabrın 12-də Bakı Ağır Cinayətlər Məhkəməsində “Meydan TV işi” üzrə həbsdə olan jurnalistlərin hazırlıq iclası keçirilib

Hakim Aytən Əliyevanın sədrlik etdiyi prosesdə təqsirləndirilənlərin anket məlumatları dəqiqləşdirilib. Ardınca prosedura uyğun olaraq onların hər birinə dövlət hesabına vəkil təyin olunub. Təqsirləndirilənlərin hamısı həmin vəkillərdən imtina edərək, şəxsi vəkilləri ilə təmin olunduqlarını bildiriblər.

Daha sonra müdafiə tərəfi bir sıra vəsatətlər qaldırıb. Vəkillər təqsirləndirilənlərin proses zamanı zalda əyləşməsinə şərait yaradılmasını istəyiblər. Məhkəmə vəsatəti təmin edib və bunun növbəti iclasda icra olunacağı bildirilib.

Müdafiə tərəfi bu iş üzrə həbs edilən jurnalistlər Ramin Cəbrayılzadənin (Deko), Natiq Cavadlının və Ülvi Tahirovun 3 saylı İstintaq Təcridxanasından Bakı İstintaq Təcridxanasına köçürülməsi ilə bağlı da vəsatət verib. Məhkəmə həmin vəsatəti təmin edib.

İşə xitam verilməsi barədə vəsatət isə təmin olunmayıb.

Təqsirləndirilən jurnalist Aytac Əhmədova (Tapdıq) bir ildir evlənməsinə qadağa qoyulmuş Kamran Məmmədli ilə şüşə arxasından görüşün təmin edilməsi üçün məhkəməyə müraciət edib. Məhkəmə bu vəsatəti də təmin edib.

Eyni zamanda təqsirləndirilən şəxslərin ev dustaqlığına buraxılması barədə vəsatətlər rədd edilib. Aynur Elgünəşin vəkili həbs qətimkan tədbirinin ev dustaqlığı ilə əvəz olunmasını müvəkkilinin səhhətində problemlər olduğunu əsas gətirərək xahiş edib. Digər vəkillər də analoji tələblərlə çıxış ediblər. Məhkəmə vəsatətləri təmin etməyib.

Cinayət işi məhkəmə baxışına verilib. Baxış iclası dekabrın 22-nə təyin olunub.

Ötən ilin dekabrında “Meydan TV işi” üzrə jurnalistlər Ramin Cəbrayılzadə (Deko), Aynur Elgünəş (Qənbərova), Aytac Tapdıq (Əhmədova), Natiq Cavadlı, Xəyalə Ağayeva, Aysel Umudova və Ülvi Tahirov saxlanılıb, barələrində həbs qətimkan tədbiri seçilib.

Bu ilin fevralında iş üzrə “Arqument.az” saytının baş redaktoru Şəmşad Ağa, daha sonra jurnalistlər Fatimə Mövlamlı və Nurlan Qəhrəmanlı (Libre) həbs olunub. Martda jurnalist Ülviyyə Əli (Quliyeva) barəsində həbs qətimkan tədbiri seçilib, avqustda isə foto-müxbir Əhməd Muxtar həbs edilib.

Onlara əvvəlcə Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir neçə şəxs tərəfindən törədildikdə) maddəsi ilə ittiham irəli sürülüb. Daha sonra ittihamlar ağırlaşdırılıb.

Jurnalistlər ittihamları qəbul etmir, həbslərinin peşə fəaliyyətləri ilə bağlı siyasi sifariş olduğunu bildirirlər.

AbzasMedia

Kənan Basqal

Dekabrın 11-də Bakı Ağır Cinayətlər Məhkəməsində Azərbaycan Xalq Cəbhəsi Partiyasının (AXCP) üzvlərindən biri, partiya sədri Əli Kərimlinin ictimai əsaslarla mühafizəçisi olmuş Kənan Zeynalovun (Kənan Basqal) məhkəmə prosesi keçirilib

“Azadlıq Radiosu”nun məlumatına görə, hakim Mahirə Kərimovanın sədrliyi ilə, hakimlər Fəxri Məmmədov və Leyla Əsgərova-Məmmədovadan ibarət hakim heyətinin baxışında olan prosesdə Kənan Zeynalov ifadə verib. O, heç bir cinayət törətmədiyi halda, doqquz aydır həbsdə saxlanıldığını deyib.

Vəkil Nazim Musayev məhkəmə iclasında hakimlər heyətinə etiraz verərək bildirib ki, müvəkkilinə münasibətdə prosessual qanunvericiliyin tələbləri pozulub. Onun sözlərinə görə, Kənan Zeynalov barəsində seçilmiş həbs-qətimkan tədbirinin müddəti 7 noyabrda başa çatsa da, həbsin uzadılması barədə qərar olmadan o, azadlıqdan məhrum vəziyyətdə qalıb:

“Hakimlər ən azı, məhkəmənin ilkin hazırlıq iclasının vaxtını irəli çəkə bilərdilər. Amma etmədilər, 17 gün gecikmə oldu. Nəticədə Kənan Zeynalov bu müddətdə qanunsuz şəkildə həbsdə saxlandı”.

Hakimlər kollegiyası müdafiə tərəfinin bu vəsatətini baxılmamış saxlayıb.

Vəkil əvvəlki iclasda vəsatət qaldıraraq əvvəlcə Kənan Zeynalovun bıçaqladığı iddia edilən zərərçəkmiş Anar Rəhimovun dindirilməsini, daha sonra müvəkkilinin ifadə verməsini təklif etmişdi. Lakin prokuror və hakimlər əvvəlcə AXCP fəalının dindirilməsində israr edib, əks halda bunu “ifadə verməkdən imtina” kimi qiymətləndirəcəklərini bildiriblər. Bu səbəbdən Kənan Zeynalov dekabrın 11-də ifadə verib.

Yeni Günəşli ərazisində Anar Rəhimovu bıçaqlamaqda ittiham olunan Kənan Zeynalov məhkəmədə bildirib ki, nə üstündə bıçaq olub, nə də kiməsə bıçaqla xəsarət yetirib. O, saxlanılmasının Ramazan ayında, məscidə getdiyi vaxt baş verdiyini deyib:

“Ramazan ayı idi, oruc tutmuşdum, axşamtərəfi məscidə gedirdim. Evin yaxınlığında həmin şəxs qabağımı kəsdi, dedi ki, “məni söymüsən”. Başa düşdüm ki, salamat adam deyil, aralanıb çıxmaq istədim, imkan vermirdi. Axırda dedim ki, yaxşı, üzr istəyirəm, burax, çıxım gedim. Bu, məni qaldırıb yerə vurdu. Dərhal polislər gəldilər, məni yerə yıxdılar. Birdən bu da yıxıldı yanıma. Soruşdum ki, buna nə oldu? Dedilər ki, “sən onu bıçaqlamısan””.

AXCP fəalı vurğulayıb ki, əgər həqiqətən belə bir cinayət törətsəydi, bunu inkar etməyi özünə sığışdırmazdı:

“36 yaşlı, 120 kilo çəkisi olan adamdır, mənim isə 60 yaşım var. Sonradan özünə də dedim ki, ola bilsin, üstündə hansısa cinayət işi var, ona görə mənə şər atıb üzümə durmaqla xilas olmaq istəyirsən. Mən namusuma and içirəm ki, bu cinayəti törətməmişəm”.

O, həmçinin qeyd edib ki, təqsirsiz olduğuna baxmayaraq, məhkəmədən ədalətli hökm gözləmir, çünki ölkədə məhkəmə sisteminin vəziyyətini yaxşı bilir.

Kənan Zeynalov bu il martın 21-də saxlanılıb. Ona qarşı Cinayət Məcəlləsinin 126.2.4-cü (xuliqanlıq niyyəti ilə qəsdən sağlamlığa ağır zərər vurma) və 221.3-cü (silah qismində əşyadan istifadə etməklə xuliqanlıq) maddələri ilə ittiham irəli sürülüb. Bu maddələrdə 11 ilədək azadlıqdan məhrumetmə cəzası nəzərdə tutulur.

Cinayət işinin materiallarında iddia olunur ki, AXCP üzvü Anar Rəhimovla mübahisə edib və ona bıçaqla xəsarət yetirib. Hadisədən sonra o, əməliyyat-axtarış tədbirləri nəticəsində saxlanılıb.

Məhkəmə prosesi dekabrın 25-də davam etdiriləcək.

AXCP sədri Əli Kərimli mühafizəçisinin həbsini “qeyri-adi şərləmə” adlandırıb:
“Kənan Basqalı tanıyanlar bilir ki, o, həddən artıq mədəni, mehriban, heç vaxt zorakılığa meyl göstərməyən bir insandır”.

Partiya rəhbərliyi Kənan Zeynalova qarşı irəli sürülən ittihamları siyasi motivli sayır. Dövlət orqanları isə ümumiyyətlə belə işlərdə siyasi motivləri qəbul etmir, ittiham olunan şəxslərin konkret cinayət əməlində təqsirləndirildiyini bildirirlər.

AbzasMedia

Azər Qasımlı

Dekabrın 10-da Bakı Ağır Cinayətlər Məhkəməsində Siyasi Menecment İnstitutunun həbsdə olan direktoru Azər Qasımlının işi üzrə məhkəmə prosesi davam edib.

Proses zamanı sənədlərin tədqiqi mərhələsinə başlanılıb. Azər Qasımlının və zərərçəkən qismində çıxış edən Qurbanəli Yusifovun istintaqa verdiyi ifadələr, Mingəçevir Şəhər Məhkəməsinin əvvəlki qərarı və digər istintaq materialları hakim Telman Hüseynov tərəfindən elan olunub.

Sənədlər oxunduqca müdafiə tərəfi Qurbanəli Yusifovun ifadəsindəki şübhəli məqamlara diqqət çəkib. Vəkillər bildirib ki, “zərərçəkən” Azər Qasımlının onu 2022-2023-cü illərdə borca görə atasını öldürməklə və oğlunu qaçırmaqla hədələdiyini desə də, bununla bağlı hüquq-mühafizə orqanlarına müraciət etməyib.

Azər Qasımlı da qeyd edib ki, 2024-cü ilin aprelində Qurbanəli Yusifovun ona olan borcu ilə əlaqədar Mingəçevir məhkəməsində iş açılıb və həmin prosesdə Qurbanəli Yusifovun atası dindirilib, lakin o, hər hansı təhdiddən danışmayıb. Qurbanəli Yusifov cavab olaraq bildirib ki, həmin vaxt “məsələni şişirtmək istəməyiblər”. Başqa bir cavabında isə ümumiyyətlə Mingəçevir məhkəməsindəki prosesdən xəbərsiz olduğunu iddia edib.

Qurbanəli Yusifov Azər Qasımlı üçün “bitcoin” aldığını da inkar edib. Lakin müdafiə tərəfi sənədlərə əsaslanaraq vurğulayıb ki, Yusifovun atası Mingəçevir məhkəməsində oğlunun bunu etiraf etdiyini bildirib.

Növbəti məhkəmə prosesi dekabrın 17-nə təyin edilib.

Azər Qasımlı ötən ilin dekabrından həbsdədir. O, Cinayət Məcəlləsinin 182.2.3-cü maddəsi (hədə-qorxu ilə tələb etmə, zor tətbiqi ilə törədildikdə) ilə ittiham olunur.

Siyasətçi ittihamı rədd edir və həbsinin ictimai-siyasi fəaliyyətinə bağlı olduğunu bildirir.

Toplum TV