Rüfət Səfərov

Dekabrın 8-də hüquq müdafiəçisi, “Müdafiə Xətti” hüquq-müdafiə təşkilatının icraçı direktoru Rüfət Səfərova qarşı açılmış cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsində baş tutan iclasda zərərçəkmiş şəxs qismində Natiq İmamquliyev dindirilib. O bildirib ki, torpaq sahəsi almaq məqsədilə Rüfət Səfərova 60 min manat verib, lakin nə torpaq satılıb, nə də pul geri qaytarılıb.

İmamquliyevin sözlərinə görə, sonuncu dəfə ötən il dekabrın 3-də Səfərovdan pulunu geri istəyəndə aralarında mübahisə yaranıb və həmin vaxt xəsarət alıb. Zərərçəkmiş pulu Tibb Universitetinin yanında verdiyini iddia edib.

Müdafiə tərəfi İmamquliyevin istifadə etdiyi telefon nömrəsinə dair anten məlumatlarını araşdırdıqlarını bildirərək ona suallar ünvanlayıb. Vəkillərin sorğularına əsasən, Rüfət Səfərovun saxlanmasında iştirak edən polislərdən üçü ilə Natiq İmamquliyev arasında əlaqə mövcud olub. Müdafiəçilər iddia ediblər ki, anten məlumatları hüquq müdafiəçisinin həbsindən əvvəl tərəflərin telefon əlaqəsinə çıxdığını göstərir.

Müdafiə tərəfi eyni zamanda anten məlumatlarının İmamquliyevin bir neçə dəfə Səfərovun yaşadığı evin yaxınlığında olduğunu göstərdiyini də qeyd edib. Bu məqamlarla bağlı izahat verməsi istənilən zərərçəkmiş isə məsələni xatırlamadığını, suallara cavab vermək istəmədiyini söyləyib. O, həmçinin oxuyub-yazmaq qabiliyyətinin olmadığını bildirib.

Rüfət Səfərov isə məhkəmədə Natiq İmamquliyevi tanımadığını və həbs olunması üçün “sifarişli seçildiyini” deyib. Hüquq müdafiəçisi aylardır davam edən prosesdən ədalət gözləmədiyini bildirib və ölkədə ədalətli məhkəmənin mümkünlüyünə inanmadığını vurğulayıb.

Səfərov məhkəmədə hakimiyyətə yönəlik sərt ifadələr də işlədib: “Görün, bu hökumət nə vəziyyətdədir ki, anlaqsız, tərbiyəsiz birinin xidmətinə möhtac qalıb. Məni həbs etmək üçün belə birini işə qoşmaq mənim özümə qarşı da hörmətsizlikdir. Bura onsuz da məhkəmə deyil, nə qərar verirsinizsə-verin, bu tamaşanı sürdürməyin. Mənim məhkəmə adına sizə də yazığım gəlir. Ayıbdır…”

Rüfət Səfərov ötən il dekabrın 3-də saxlanılıb. O, Cinayət Məcəlləsinin bir neçə maddəsi üzrə (xuliqanlıq, dələduzluq və qəsdən sağlamlığa zərər vurma) ittiham olunur.

Hüquq müdafiəçisi həbsinin səbəbini ABŞ-də insan hüquqları sahəsində aldığı mükafatla əlaqələndirir. Hüquq müdafiə təşkilatlarının son hesabatlarına görə, Azərbaycanda hazırda 400-ə qədər çox siyasi məhbus var. Hakimiyyət isə ölkədə siyasi baxışlara görə təqib olmadığını bildirir.

AbzasMedia

Namizəd Səfərov

Dekabrın 9-da hüquqşünas Namizəd Səfərovun saxlanıldığı deyilir.

APA yazır ki, faktla bağlı araşdırma aparılır.

“İlkin məlumata görə, onun saxlanılmasına dələduzluqla bağlı şikayətlər səbəb olub”, – xəbərdə deyilir.

N.Səfərov Vəkillər Kollegiyasından 2005-ci ildə çıxarılıb.

Özü bunu kollegiyanın rəhbərliyini tənqid etməsi ilə əsaslandırmışdı.

Kollegiya isə bildirirdi ki, N.Səfərov qanunvericiliyin tələblərini pozub.

Toplum TV 

Anar Məmmədli

Dekabrn 8-də Bakı Ağır Cinayətlər Məhkəməsində Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli və ictimai fəal Anar Abdullayevin işi üzrə növbəti məhkəmə prosesi keçirilib.

Hakim Aygün Qurbanovanın sədrliyi ilə keçirilən proses şahidlərin dinlənilməsi ilə davam edib.

Növbəti proses 5 yanvar 2026-cı il, saat 14:00-a təyin olunub.

Xatırlatma

Anar Məmmədli 2024-cü ilin aprelin 29-da Bakı Şəhər Baş Polis İdarəsi tərəfindən Azərbaycanda vətəndaş cəmiyyəti və mediaya qarşı aparılan genişmiqyaslı siyasi həbslər çərçivəsində saxlanılıb. Aprelin 30-da ona qarşı Cinayət Məcəlləsinin 206.3.2-ci (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Daha sonra ona qarşı irəli sürülən ittihamlar iki dəfə ağırlaşdırılıb.

Bir sıra beynəlxalq təşkilatlar, Avropa İttifaqı parlamenti, həmçinin ABŞ Dövlət Departamenti, ABŞ Səfirliyi Azərbaycan hökumətini Anar Məmmədli və digər həbs edilən şəxsləri dərhal azad etməyə çağırıb.

Anar Məmmədli Azərbaycanda seçki hüququ sahəsində ixtisaslaşmış qeyri-hökumət təşkilatının rəhbəridir. O, seçkilərlə bağlı tənqidi hesabatların müəllifidir.

Məmmədli ATƏT-in Demokratik Təsisatlar və İnsan Haqları Bürosunun beynəlxalq seçki monitorinq missiyasının tərkibində Türkiyə, Əfqanıstan, Almaniya, Norveç, Ukrayna, Gürcüstan, Qırğızıstan və Albaniyada keçirilən seçkilərin müşahidəsində iştirak edib.

Azərbaycanlı rəsmilər isə bir qayda olaraq Azərbaycanda söz və mətbuat azadlığının hədəf alınması, jurnalistlərin və fəalların əsassız həbsi ilə bağlı ittihamları rədd edir, Azərbaycanda fundamental hüquq və azadlıqların, eləcə də media azadlığının “tam olaraq” təmin edildiyini vurğulayır.

“Sərhədsiz Reportyorlar” beynəlxalq mətbuat azadlığı təşkilatı (RSF) son bir ildə dünyada jurnalistlərin fəaliyyətinə yaradılan əngəllər haqda hesabat dərc edib.
Ötən ilin dekabrın 1-dən bu ilin dekabrın 1-ə qədər müddəti əhatə edən hesabatda bildirilir ki, bu müddətdə dünyada 67 jurnalist öldürülüb və onların 53-ü müharibələrin və cinayətkar qrupların qurbanı olub.

Jurnalistlərin 43%-i İsrail tərəfindən Qəzza zolağında öldürülüb. Ukraynada isə Rusiyanın işğalçı müharibəsini işıqlandıran 3 jurnalist öldürülüb.
Hesabatda, həmçinin, qeyd olunur ki, dünyada 503 jurnalist həbsdədir. 121 jurnalistin həbsdə olduğu Çin siyahıya liderlik edir. 48 və 47 jurnalistin həbsdə olduğu Rusiya və Myanma müvafiq olaraq 2-i və 3-cü yerdədirlər.

RSF bildirir ki, Azərbaycanda 25 jurnalist həbsdədir. Azərbaycanın qonşularından İranda 21, Türkiyədə 3, Gürcüstanda 1 jurnalist həbsdədir.
RSF Rusiya, Gürcüstan, Azərbaycan və Belarusdakı vəziyyətin keçmiş Sovet məkanında mətbuat azadlığına ciddi təhdidləri əks etdirdiyini vurğulayır.

Toplum TV 

Dekabrın 8-də Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi keçirilib.

Hakim Azər Tağıyevin sədrliyi ilə baş tutan prosesdə şahidlərin dindirilməsi davam edib.

Proses zamanı təqsirləndirilən şəxslərdən “Toplum TV” həmtəsisçisi, media eksperti Ələsgər Məmmədlinin halı pisləşib. Onun təzyiqi yüksəlib və ürəyində narahatlıq yaranıb. Məhkəmə zalına çağırılan həkim Ələsgər Məmmədlini müayinə edib və ona dərman preparatı verib.

Təqsirləndirilən şəxslərdən “Toplum TV” jurnalisti Fərid İsmayılov bu dəfə Milli Məclis üzvlərinin məhkəməyə çağırılması üçün vəsatət verib. O, bunu belə əsaslandırıb ki, şahid qismində dindirilən şəxslər onu sadəcə jurnalist kimi tanıdıqlarını deyiblər, elə isə Fərid İsmayılovun müsahibə aldığı deputatlar da məhkəmədə dindirilə bilər.

“İstintaq orqanı 49 nəfəri dindirib. Barəmdə nəyi öyrənib, nəyi tapıb? Heç nəyi. Şahidlər heç nəyə şahid olmayıblar. Sadəcə məni tanıdıqlarını, müsahibə aldığımı, reportajlarımı izlədiklərini bildiriblər. Kimisə tanımaq niyə cinayət sayılmalıdır ki? Onda xalq artistlərini də tutsunlar, insanlar onları da tanıyır”, – o qeyd edib.

Növbəti proses 15 dekabra təyin olunub.

Proses məhkəməyə gəlmək imkanı olmayan şahidlərin onlayn dindirilməsi ilə davam edəcək.

Toplum TV 

Ruslan İzzətli

“Toplum TV işi” üzrə həbsdə olan III Respublika Platformasının qurucu üzvü, siyasətçi Ruslan İzzətlinin səhhətində problemlərin yarandığı bildirilir. Bu barədə onun həyat yoldaşı Günel Manaflı dekabrın 7-də sosial şəbəkədə məlumat yayıb.

Manaflının sözlərinə görə, o, şənbə günü İzzətli ilə görüşüb və siyasətçinin yüksək təzyiq, baş ağrısı, eləcə də öd nahiyəsində ağrılardan əziyyət çəkdiyini görüb. Bildirilib ki, Ruslan İzzətli təzyiqini yalnız hər gün dərman qəbul etməklə normada saxlaya bilir.

Açıqlamada qeyd olunur ki, son təxminən 10 gündür ödündə kəskin ağrılar başlayıb və dözümsüz ağrılara görə ona mütəmadi olaraq ağrıkəsici vurulmasına ehtiyac yaranır.

Günel Manaflı yazıb ki, həkim müayinəsi və USM-dən sonra ödünün müalicəyə tabe olmadığı, əməliyyatla götürülməsinin vacib olduğu bildirilib. Onun sözlərinə görə, həbsxana şəraitində belə müdaxilənin mümkün olmaması vəziyyəti daha da riskli edir.

Manaflı həmçinin İzzətlinin həyatına təhlükə yarandığını vurğulayaraq, ödünün kəskinləşməsi halında qan zəhərlənməsi riskindən bəhs edib və bunun “həyəcan siqnalı” olduğunu bildirib. O, Ruslan İzzətlinin başına hər hansı hadisə gələrsə, məsuliyyətin hakimiyyətin üzərində olacağını qeyd edib.

Ruslan İzzətli ötən ilin martında “Toplum TV işi” çərçivəsində həbs edilib. Bu iş üzrə ümumilikdə 10 nəfər barəsində cinayət işi açılıb. Təqsirləndirilənlər arasında III Respublika Platformasının spikeri Akif Qurbanov, “Toplum TV”nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev də var. Jurnalist Elmir Abbasov polis nəzarətinə buraxılıb. “Toplum TV”nin redaktoru Şahnaz Bəylərqızı əvvəlcə ev dustaqlığına buraxılıb, daha sonra onun barəsində qətimkan tədbiri polis nəzarətinə verilmə ilə əvəzlənib.

Onlara qarşı ittihamlar əvvəlcə qaçaqmalçılıq maddəsi ilə irəli sürülsə də, sonradan daha ağır ittihamlarla əvəzlənib.

Təqsirləndirilən şəxslər iddiaları rədd edir və həbslərinin siyasi sifariş olduğunu bildirirlər.

AbzasMedia

Gültəkin Hacıbəyli

Milli Şuranın üzvü, sabiq deputat Gültəkin Hacıbəylinin İstanbulda saxlanılması və barəsində tətbiq olunan G-82 məhdudiyyət kodu Türkiyə Böyük Millət Məclisinin gündəminə çıxarılıb.

Gültəkin Hacıbəyli noyabrın 29-da Türkiyədə kirayə yaşadığı evinə gələn dörd polis əməkdaşının onu heç bir hüquqi əsas göstərmədən İstanbuldakı Arnavutköy Deportasiya Mərkəzinə apardığını bildirib.

O, “Facebook”da etdiyi paylaşımında qeyd edib ki, barəsində Türkiyə qanunvericiliyində xarici terrorçular üçün nəzərdə tutulan G-82 maddəsi tətbiq olunur və məqsəd onu Azərbaycana deportasiya etməkdir:

Məsələ ilə bağlı DEM Partiyasının Kocaeli millət vəkili Ömər Faruk Gergerlioğlu Daxili İşlər naziri Ali Yerlikayaya geniş yazılı sorğu ünvanlayıb.

Sorğuda Gültəkin Hacıbəyli haqqında tətbiq olunan G-82 məhdudiyyət kodunun hansı kəşfiyyat və ya informasiya məlumatlarına əsaslandığı, Azərbaycan hakimiyyətindən rəsmi müraciət və ya bildirişin olub-olmadığı, fərdi risk qiymətləndirilməsinin aparılıb-aparılmadığı və inzibati nəzarət qərarının hüquqi əsaslarının nədən ibarət olduğu sual edilir.

Gergerlioğlu həmçinin G-82 kodunun hansı tarixdə və hansı qurumun qiymətləndirməsi əsasında tətbiq edilməsi, bu kodun rəsmiləşdirilməsi zamanı Nazirliyə təqdim olunan məlumatın mənbəyi, Hacıbəylinin Türkiyədə olduğu müddətdə hər hansı cinayət işi, axtarış qərarı və ya ictimai asayişə dair konkret hadisə ilə bağlı prosedurun mövcudluğu, onun etibarlı yaşayış icazəsi və qanuni qalma müddətinin olub-olmaması, “Türkiyəni tərk etməyə dəvət” prosedurunun işə salınıb-salınmaması, inzibati nəzarət qərarını hansı orqanın və hansı əsaslarla verməsi, qərarın özünə və ya vəkilinə nə vaxt təqdim olunması, vəkilə çıxış, ailə ilə əlaqə, tərcüməçi və tibbi xidmət hüquqlarının təminatı, Azərbaycana göndəriləcəyi halda siyasi motivli həbs və pis rəftar riski iddiaları fonunda “geri göndərməmə” prinsipi və YUKK-un 55-ci maddəsi üzrə fərdi risk qiymətləndirilməsinin aparılması, 2023–2025-ci illərdə Azərbaycan vətəndaşları barəsində G-82 kodu ilə verilən deportasiya və inzibati nəzarət qərarlarının sayı ilə bağlı rəsmi izahat istəyib.

Mətndə qeyd olunub ki, polis əməkdaşları Hacıbəylini qaldığı ünvandan götürülərək G-82 kodu əsasında inzibati nəzarətə alınıb. Azərbaycanın rəsmi qurumlarının onun barəsində irəli sürülən “dövlət çevrilişi cəhdinə dəstək vermək” ittihamına əsasən Türkiyəyə müraciət etdiyi iddia olunur. Bu iddialar deputat sorğusunun əsas mövzuları sırasındadır.

Gültəkin Hacıbəyli isə vəkili vasitəsilə açıqlamasında saxlanmanın hüquqi əsasının olmadığını bildirib. O, sentyabrın 25-də Türkiyəyə daxil olduğunu, üç aylıq qanuni qalma müddətinin bitmədiyini və iki illik yaşayış icazəsinin olduğunu vurğulayıb.

Hacıbəyli Azərbaycanın müxalifətinə qarşı təzyiqlər fonunda deportasiya olunacağı təqdirdə siyasi səbəblərlə həbs ediləcəyini deyib:

“Türkiyədən Azərbaycana göndəriləcəyim təqdirdə siyasi səbəblərlə həbs ediləcəyəm. Bu qərar Azərbaycan müxalifətinə yönələn təzyiqlərin dəstəklənməsi anlamına gəlir”.

Gültəkin Hacıbəyli noyabrın 30-na keçən gecə İstanbulda kirayə yaşadığı evdən Taksim Polis Şöbəsinə aparılıb və daha sonra deportasiya mərkəzinə köçürülüb.

Hökumətyönlü medianın yazdığına görə, bu hadisə AXCP sədri Əli Kərimli və partiyanın Rəyasət Heyətinin üzvü Məmməd İbrahimin həbsi ilə bağlı aparılan istintaq fonunda baş verib. Həbslər Prezident Administrasiyasının sabiq rəhbəri Ramiz Mehdiyevin cinayət işi ilə əlaqələndirilib.

Dekabrın 1-də Səbail Rayon Məhkəməsi Əli Kərimli və Məmməd İbrahim barəsində Cinayət Məcəlləsinin 278.1-ci maddəsi (hakimiyyəti zorla ələ keçirməyə və dövlətin konstitusiya quruluşunu zorla dəyişdirməyə yönələn hərəkətlər) ilə 2 ay 15 gün müddətinə həbs qətimkan tədbiri seçib.

AbzasMedia