Almaniyanın AŞPA-dakı nümayəndə heyətinin sədri Frank Şvabe Bakıda hüquq müdafiəçisi Anar Məmmədlinin həbsini kəskin şəkildə pisləyib.

“Azərbaycanın nə indi, nə yanvarda Parlament Assambleyasına qayıtmağa yolu yoxdur”, deyə o, X platformasında öz hesabında yazıb.

Xatırladaq ki, Şvabe ölkə vətəndaşların hüquq və azadlıqlarının ciddi pozuntularına görə Azərbaycan nümayəndə heyətinin AŞPA-da səs hüququndan məhrum edilməsinin təşəbbüskarı olub.

2024-cü ilin yanvarında qış sessiyasında AŞPA üzvləri bu barədə qətnamə qəbul edərək, Azərbaycan nümayəndə heyətini bir il ərzində səs hüququndan məhrum edib. Qətnamədə deyilir ki, Azərbaycan hakimiyyəti siyasi məhbusları azadetsə və insan hüquqlarının pozuntularına son qoysa səs hüququ qaytarıla bilər.

Turan 

Azərbaycanda Seçkilərin Monitorinqi Mərkəzinin rəhbəri Anar Məmmədlinin saxlanması müstəqil jurnalistlər və fəalların həbsləri silsiləsinin sonuncusudur və Avropa İttifaqı üçün  narahatlıq doğurur. Bu barədə Aİ-nin Xarici Əlaqələr və Təhlükəsizlik Siyasəti Xidmətinin mətbuat katibi Peter Stano X platformasında yazıb.

“Əsas hüquqlarını həyata keçirdiklərinə görə həbs olunanların hamısı azad edilməlidir”, deyə o qeyd edib.

Məmmədli aprelin 29-da saxlanılıb. O, Abzas Media-nın işi üzrə prosesə cəlb edilib. Bu iş çərçivəsində artıq 7 jurnalist və mətbuat işçisi qaçaqmalçılıq ittihamı ilə həbs olunub.

Turan 

Bazar ertəsi ABŞ Dövlət Departamenti Bakıda Seçkilərin Monitorinqi Mərkəzinin rəhbəri Anar Məmmədlinin saxlanılmasına münasibət bildirib.

“Biz Azərbaycan vətəndaş cəmiyyəti nümayəndələrinin həbslərinin davam etməsindən, xüsusən Anar Məmmədlinin həbsindən çox narahatıq”, deyə Dövlət Departamentinin nümayəndəsi Turan-ın müxbirinə bildirib.

Bazar ertəsi Məmmədlinin saxlanılması vətəndaş fəallarının və jurnalistlərin həbsi silsiləsində sonuncu fakt oldu.

“Biz Azərbaycan hökumətini ədalətsiz olaraq saxlanılan hər kəsi dərhal azad etməyə çağırırıq”, deyə Dövlət Departamentinin nümayəndəsi bildirib.

“Biz Azərbaycan hökumətini insan hüquqlarına və əsas azadlıqlarına, xüsusən ifadə azadlığından istifadə edənlərin hüquq və azadlıqlarına hörmət etməyə çağırmaqda davam edirik”.

Məmmədli dövlət katibi Entoni Blinkenin Azərbaycan prezidenti İlham Əliyevlə söhbətində “Azərbaycanı beynəlxalq öhdəliklərinə və insan hüquqları sahəsində öhdəliklərinə riayət etməyə və Azərbaycanda ədalətsiz olaraq həbs edilən şəxsləri azad etməyə” çağırmasından bir gün sonra saxlanılıb.

Turan 

ABŞ-ın Azərbaycandakı səfirliyi Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədlinin saxlanılmasına münasibət bildirib.

“Azərbaycan vətəndaş cəmiyyəti üzvlərinin – ən son Anar Məmmədlinin, həbslərinin davam etməsi bizi çox narahat edir.

Biz Azərbaycan hökumətini haqsız yerə həbs edilən bütün şəxsləri dərhal azad etməyə çağırırıq.

Biz Azərbaycan hökumətini insan haqlarına və ifadə azadlığından istifadə edənlər də daxil olmaqla hamının əsas azadlıqlarınahörmət etməyə çağırmaqda davam edirik”, – ABŞ səfirliynin mətbuat kattibi Amerikanın Səsinin sorğusuna cavabda bildirirb.

Turan 

Anar Məmmədli

Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli aprelin 29-da bir qrup mülki geyimli şəxs tərəfindən saxlanılıb.

Daxili İşlər Nazirliyinin Mətbuat xidmətinin əməkdaşı İbrahim Əmiraslanlı Amerikanın Səsinə Məmmədlinin polis tərəfindən saxlanıldığını təsdiq edib.

“Anar Məmmədli saxlanılıb, hazırda barəsində araşdrıma aparılır”, o qeyd edib.

Bu arada Anar Məmmədlinin yaxınlarından biri Amerikanın Səsinə deyib ki, o, uşağını uşaq bağçasından götürməyə gedərkən Bakının Nərimanov rayonu ərazisində, Teymur Əliyev küçəsində saxlanılıb.

Vəkil Elçin Sadıqov Amerikanın Səsinə bildirib ki, hazırda Anar Məmmədlinin evində axtarış aparılır.

“Məni Anar Məmmədlinin axtarış aparılan evinə buraxmırlar, Anar Məmmədli ilə görüşümə imkan vermirlər. Sadəcə telefonla mənə bildirdilər ki, Anar Məmmədli “Abzas Media” nəşrinin cinayət işi üzrə şahid qismində saxlanılıb, evində axtarış-götürmə əməliyyat tədbiri həyata keçirirlər”, vəkil qeyd edib.

Bu gün həmçinin Anar Məmmədlinin atasının evində axtarış aparılıb. Anar Məmmədlinin bacısı Şəfa Məmmədli Amerikanın Səsinə deyib ki, qardaşının evində axtarış aparılan vaxt, paralel olaraq atasının evində də axtarış aparılıb.

“Atamın evindən köhnədən qalan sənədlər, guya Anarın köynəyinin cibindən qəbzlər, mənim komputerimi, fleş-kartımı götürüblər. Axtarışdan sonra Anarın evində də oldum. Onun komputerini, telefonunu aparıblar. Bir də biz hesab edirik ki, pul qoyublar. Anarın evində pulun bağlandığı iplər qalıb”, o qeyd edib.

Anar Məmmədli Azərbaycanda seçki hüququ sahəsində ixtisaslaşmış qeyri-hökumət təşkilatının rəhbəridir. O, seçkilərlə bağlı tənqidi hesabatların müəllifidir. Məmmədli ATƏT-in Demokrtatik Təsisatlar və İnsan Haqları Bürosunun beynəlxalq seçki monitorinq missiyasının tərkibində bir neçə ölkədə müşahidə aparıb.

Məmmədli bu il fevralın 20-də ölkədə vətəndaş azadlıqlarının, ictimai iştirakçılığın təmin olunması və ətraf mühitdə ədalətin bərqərar olunması təşəbbüsü ilə təsis edilən COP29 – Ədalət Mühiti Təşəbbüsünün (COP29 – Cimate of Justice Initiative) təsisçilərindəndir.

Son zamanlar hökumətyönümlü hesab edilən medialarda, həmçinin Rusiyanın Sputnik.Azərbaycan saytında Anar Məmmədli də daxil olmaqla, bir sıra şəxslər barədə ittihamedici məqalələr dərc edilib.

Amerikanın Səsi