Famil Xəlilov

Narkotik maddə alveri ittihamı ilə həbs olunan ictimai fəal, birinci qrup əlil Famil Xəlilov mayın 6-da vəziyyətinin pisləşməsilə əlaqədar 1 saylı Bakı İstintaq Təcridxanasının tibb-sanitariya hissəsinə yerləşdirilib. Bu barədə Turan-a vəkil Bəhruz Bayramov bildirib.

Xəlilovun hər iki əli iflic olub, köməksiz vəziyyətdədir. Ona görə istintaq təcridxanasının adi kamerasında bir neçə gün  qalıb. Dünən tibb-sanitariya hissəsinə köçürüldükdən sonra işçilər onu yedirtməyə başlayıblar. Bundan əlavə, Xəlilovun arterial təzyiqi dəyişir.

Binəqədi məhkəməsinin hakimi Vüsal Tağıyev həbs qətimkan tədbiri seçərkən Xəlilovun narkotik maddə alverilə məşğul olma qabiliyyətini qiymətləndirməliydi. Digər tərəfdən, onu həbsdə saxlamaq üçün əsas yoxdur, çünki birinci qrup əlildir, faktiki olaraq əlləri yoxdur,  istintaqın gedişatına təsir göstərə və ya istintaqdan gizlənə bilməz.

*Xəlilov sığınacaq almaq ümidilə bir neçə il İsveçdə yaşayıb. Üç ayda bir dəfə vəziyyətini yüngülləşdirən xüsusi inyeksiyalar edilib. Bir il əvvəl Azərbaycana deportasiya edildikdən sonra bu tibbi yardımdan məhrum olub və vəziyyəti pisləşib.

Xəlilov əllərinin iflic olmasına baxmayaraq, sosial şəbəkələrdə fəal olub, kompüterdə ayaq barmaqları ilə yazıb. O, hakimiyyəti tənqid edib və etiraz aksiyalarında iştiraka etməyə çağırıb.

Famil Xəlilov mayın 4-də saxlanılıb. Fəala qarşı Cinayət Məcəlləsinin 234.4.3-cü maddəsilə (külli miqdarda narkotik maddənin qanunsuz dövriyyəsi) ittiham irəli sürülüb.

Turan 

Hafiz Babalı

Bu gün Bakının Nərimanov Rayon Məhkəməsində Turan agentliyinin iqtisadi xəbərlər şöbəsinin redaktoru Hafiz Babalının Qafqazinfo.az onlayn nəşrinə qarşı iddiası üzrə hazırlıq iclası başa çatıb.

Babalının iclasda iştirakı təmin edilib. İddia 28 dekabr 2023-cü il tarixində Qafqazinfo.az saytında dərc edilmiş “Hafiz Babalının işi üzrə yeni detallar” adlı yazı ilə əlaqədar qaldırılıb.

İddiaçı hesab edir ki, yazıda araşdırmaçı jurnalist kimi Babalının şərəfinə, ləyaqətinə və işgüzar reputasiyasına xələl gətirən böhtan və təhqiredici məlumatlar var.

Əsasən məqalədə bildirilib ki, “Babalı qrant layihələrilə əlaqədar xarici təşkilatlar və fondlar ilə əlaqə quraraq, onların tapşırığı ilə araşdırmalar aparıb və məqalələr hazırlayıb”.

Babalı bu iddianı böhtan adlandırıb, çünki xarici təşkilatların və fondların sifarişilə araşdırmalar aparmayıb və onların sifarişilə məqalələr dərc etdirməyib. Araşdırmalar onun jurnalist fəaliyyətinin bir hissəsi olub, bu çərçivədə hər zaman jurnalistikanın etik prinsiplərinə və normalarına riayət olunub.

Bundan əlavə, heç kim və  heç zaman  araşdırmalar və dərc olunan məqalələrlə bağlı irad irəli sürməyib, bu materiallardakı məlumatlar isə heç bir inzibati orqan tərəfindən təkzib edilməyib və məhkəmədə mübahisələndirilməyib.

Babalı “Hafiz Babalının iştirak etdiyi layihələrə Avropadakı azərbaycanlı siyasi mühacirlərin cəlb edilməsi” barədə fikirləri də böhtan adlandırıb.

Babalı məhkəmədən xahiş edib ki, nəşrə böhtan xarakterli iddiaları təkzib etməyi, ondan üzr istəməyi və 9900 manat məbləğində kompensasiya  ödəməyi, redaksiyanı 119 manat məbləğində məhkəmə xərclərini ödəməyi həvalə etsin.

Vəkil Rəsul Cəfərov iddianı dəstəkləyərək Babalıya qarşı qaçaqmalçılıq üzrə istintaqın aparıldığı Bakı Şəhər Baş Polis İdarəsinin nümayəndəsinin məhkəməyə çağırılması barədə vəsatət qaldırıb.

Məhkəmə vəsatəti təmin edib.

Qafqazinfo.az  saytının nümayəndəsi iddianın təmin edilməməsini istəyib, ancaq bunun lehinə heç bir sübut göstərməyib.

Hakim Səbinə Nuriyeva mahiyyəti üzrə dinləmələri iyunun 11-nə təyin edib.

* Hafiz Babalı dekabrın 13-də saxlanılıb. Ona qarşı  “xarici valyuta qaçaqmalçılığı” ittihamı irəli sürülüb. Məhkəmənin qərarı ilə  üç ay müddətinə ilkin həbs cəzasına məhkum edilib. Babalı “Abzas Media işi” üzrə cəlb edilib.  Hüquq müdafiəçiləri Hafiz Babalını siyasi məhbus kimi tanıyıblar.

Turan 

Qubad İbadoğlu

240 beynəlxalq vətəndaş cəmiyyəti təşkilatı, alim və hüquq müdafiəçisi korrupsiyaya qarşı mübarizə üzrə ekspert, Azərbaycanda ev dustaqlığında olan Qubad İbadoğlunun azad edilməsini tələb edən açıq məktub dərc ediblər.

Məktub Birləşmiş Millətlət Təşkilatının Korrupsiyaya qarşı Konvensiyası üzrə vətəndaş cəmiyyəti təşkilatlarının beynəlxalq koalisiyasının saytında dərc edilib.

“Koalisiya dostumuz və həmkarımız Qubad İbadoğlunun dərhal və qeyd – şərtsiz azad edilməsini qətiyyətlə tələb edir”, – Koalisiyanın idarəedici direktoru Matias Huter bildirib.

“Qubad bizim  şəbəkənin üzvüdür və dünya antikorrupsiya hərəkatında görkəmli səsdir. Ona qarşı ittihamlar əsassızdır və Azərbaycan hakimiyyətinin vətəndaş cəmiyyətini sarsıtmaq və tənqidi antikorrupsion səsləri susdurmaq cəhdidir”, – o qeyd edib.

Tezliklə müvafiq tibbi yardım göstərilməsə, ciddi ürək tutması riski altındadır.

Qubad Azərbaycanda korrupsiyaya qarşı tanınmış mübarizdir. O, ölkənin neft-qaz sektorundakı mühüm  korrupsiyanı ifşa edib, büdcənin şəffaflığını müdafiə edib və Azərbaycan oliqarxları tərəfindən oğurlanmış və ofşorlarda gizlədilmiş aktivlərin müsadirə edilməsinə kömək edib.

O həmçinin müsadirə edilmiş aktivləri azərbaycanlı tələbələr üçün təqaüdlərə çevirmək üçün Böyük Britaniyada təhsil fondu yaradıb.

“Öz həyatını Azərbaycan xalqının rifahının təmin edilməsinə həsr etmiş adamın indi belə ağır fəsadlardan əziyyət çəkməsi çox dəhşətlidir. Qubada qarşı ittihamların heç bir əsası yoxdur və Azərbaycan hakimiyyəti onları dərhal aradan qaldırmalıdır”, – Huter bildirib.

Məktubu 164 təşkilat və 76 yüksək vəzifəli şəxs imzalayıb. Sənəd Azərbaycan hakimiyyətinə və bütün dünyada bu işi izləyən hökumətlərə göndərilib.

Ünvan sahiblərinin arasında ABŞ, Koalisiyanın iştirakçı dövlətləri Konfransının hazırkı sədri; Böyük Britaniya (İbadoğlu həbs vaxtı orada yaşayıb) və Avropa İttifaqı (bu yaxınlarda parlament Avropa institutlarını alimin işini dəstəkləmək üçün daha çox iş görməyə çağıran qətnamə qəbul edib) var.

“Koalisiya beynəlxalq birliyi Qubad İbadoğlunun və hazırda Azərbaycan həbsxanalarında olan digər siyasi məhbusların sağlamlığını və azadlığını müdafiə etmək üçün çevik və qətiyyətli tədbirlər görməyə çağırır. Biz Azərbaycanı – qarşıdan gələn COP iqlim konfransını qəbul edən tərəf kimi – insan hüquqları sahəsində öz beynəlxalq öhdəliklərinə əməl etməyə, vətəndaş cəmiyyəti fəalları, jurnalistlər və hüquq müdafiəçiləri üçün təhlükəsiz və əlverişli mühitə zəmanət verməyə çağırırıq”, – Huter bildirib.

* 23 iyul 2023-cü ildə Nərimanov Rayon Məhkəməsi Qubad İbadoğlunu Cinayət Məcəlləsinin 204.3.1 (saxta pulların satışı), habelə 167-3.1 (ekstremizmyönlü materialların saxlanması və yayılması) maddələrilə ittiham edərək 3 ay 26 gün müddətinə həbs edib.

Bir sıra ölkələr və beynəlxalq təşkilatlar, o cümlədən  ABŞ Dövlət Departamenti, ABŞ senatorları və konqresmenləri İbadoğlunu azad etməyə çağırıblar. O, siyasi məhbus kimi tanınır.

22 aprel 2024-cü ildə məhkəmə Qubad İbadoğlunun ev dustaqlığına buraxılması barədə müdafiə tərəfinin vəsatətini təmin edib.

Turan

Elgiz Qəhrəman

İctimai fəal Elgiz Qəhrəman mayın 3-də “Abzas Medianın işi” üzrə şahid qismində dindirilib. Bu barədə jurnalistlərə o özü bildirib.

Fəal istintaq sirrini yaymamaq öhdəliyi ilə əlaqədar verilən sualların məzmununu açıqlaya bilməyib.

Qəhrəman həmçinin bildirib ki, onun ölkədən çıxışına qadağa qoyulub və polis bölməsində bunu onun cinayət işi üzrə şahid olması ilə izah ediblər.

* 2023-cü ilin noyabr ayı – 2024-cü ilin yanvar ayı ərzində Abzas Media ilə əlaqəsi olan səkkiz jurnalist və mətbuat işçisi həbs olunub.

Apreldə bu iş üzrə meclis.info saytının rəhbəri İmran Əliyev və Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli də həbs olunub.

İşin bütün fiqurantlarına qarşı “əvvəlcədən əlbir olan bir qrup şəxs tərəfindən xarici valyuta qaçaqmalçılığı” ittihamı irəli sürülüb. Jurnalistlər ittihamları qəbul etmirlər və cinayət işini korrupsiya faktlarını araşdırmaları ilə izah edirlər. Əliyev və Məmmədli ümumiyyətlə Abzas Media-nın fəaliyyəti ilə əlaqələri olmadığını bildiriblər. Hüquq müdafiəçiləri həbs olunanları siyasi məhbus kimi tanıyıb.

“Sərhədsiz Reportyorlar”ın illik media azadlığı reytinqinə əsasən, rekord sayda ölkədə vəziyyət xeyli pisləşib.

Həmin ölkələr sırasında Azərbaycan və Gürcüstan da var.

Azərbaycan 180 ölkə arasında 164-cü yerdə qərarlaşıb. Ötən illə müqayisədə ölkə 13 pillə geriləyib. Ermənistan, əksinə, göstəricisini 6 pillə yaxşılaşdıraraq 43-cü yerə yüksəlib.

“Şərqi Avropa və Mərkəzi Asiyada, xüsusən də Belarusda (167), Gürcüstanda (103), Qırğızıstanda (120), Azərbaycanda (164) Rusiyanın repressiv üsullarının effektiv yamsılaması ilə media senzurası güclənib”, – hesabatda bildirilir.

Mətbuat azadlığı ilə bağlı ən yaxşı vəziyyət Norveç, Danimarka və İsveçdədir. Siyahını Eritreya bağlayır.

2024 Dünya Mətbuat Azadlığı İndeksi

“Sərhədsiz Reportyorlar”ın müşahidələrinə görə, bütün dünyada media azadlığı ilə bağlı durum sürətlə pisləşməkdə davam edir. Jurnalistlərə qarşı hücumların, iş şəraitinin “fəlakətli” kimi dəyərləndirildiyi ölkələrin sayı artmaqdadır.

Hesablamalara görə, ötən il 36 ölkə müstəqil jurnalistikanın əməli cəhətdən qeyri-mümkün olduğu ölkələr kateqoriyasına düşüb. Bu, son 10 ilin rekordu sayılır.

Xatırlatma

Son aylar Azərbaycanda 10-a yaxın jurnalist, əsasən, qaçaqmalçılıq ittihamı ilə həbsə atılıb. Onlar ittihamları qəbul etmir, onu peşə fəaliyyətləri ilə izah edirlər.

Azərbaycan hakimiyyəti isə ölkədə jurnalistlərə təzyiqlə bağlı deyilənləri rədd edir, onların konkret cinayətlərə görə həbs olunduğunu vurğulayır.

AzadlıqRadiosu