Azərbaycanda 87 nəfərin deputatlığa namizədliyi qeydə alınıb.

Bu barədə Mərkəzi Seçki Komissiyasının (MSK) sədri Məzahir Pənahov iyulun 27-də bildirib.

MSK-nin bu gün keçirilən iclasında Pənahov deyib ki, sentyabrın 1-də keçiriləcək növbədənkənar parlament seçkilərinə 1255 nəfər namizəd olmaq üçün müraciət edib.

Mərkəzi Seçki Komissiyası (MSK) sədrinin müavini Rövzət Qasımov isə deyib ki, növbədənkənar parlament seçkiləri ilə əlaqədar 6 milyon 516 min 567 seçki bülleteni çap ediləcək.

Sentyabrın 1-də keçiriləcək parlament seçkilərində boykot qərarı verən Azərbaycan Xalq Cəbhəsi Partiayası istisna olmaqla ölkədəki siyasi partiyaların hamısı iştirak edir.

Bu arada iqtidarda olan Yeni Azərbaycan Partiyası bütün seçki dairələrindən, müxalifətdə olan Müsavat Partiyası 33 seçki dairəsindən, REAL Partiyası isə 13 seçki dairəsindən namizədlərinin (4 partiya üzvünün namizədliyi qeydə alınıb) adını açıqlayıb.

Milli Məclisə ölkə üzrə 125 seçki dairəsindən deputatlar seçilir. Nаmizədin qeydə alınması üçün zəruri olan seçki sənədlərinin dairə seçki komissiyasına təqdim edilməsi avqustun 2-də başa çatacaq.

Amerikanın Səsi

Famil Xəlilov

Həbsdə saxlanılan ictimai fəal, 1-ci qrup əlil Famil Xəlilovun cinayət işi üzrə ibtidai istintaq başa çatıb. Bu gün, iyulun 26-da müstəntiq istintaq təcridxanasına gələrək ibtidai istintaqın başa çatdığını elan edəcək və müdafiə tərəfi cinayət işinin materialları ilə tanış olmağa başlayacaq.

Bu barədə vəkil Fəxrəddin Mehdiyev Amerikanın Səsinə bildirib.

Vəkil müdafiə tərəfinin Famil Xəlilov barədə həbs qətimkan tədbirinin ev dustaqlığı tədbiri ilə əvəz edilməsi barədə vəsatətinin təmin edilməməsindən təəssüflənir.

“Famil Xəlilov iflicdir. Təcridxana şəraitində saxlanılması onun üçün çox çətindir. Qolları iflic olduğundan özü sərbəst qida, su qəbul edə bilmir, yuyuna bilmir. Sanitar qovşaq şəraitində saxlanılır. Ona yalnız kamera yoldaşları kömək edir. Hərəkət edərkən əllərini müvazinətini saxlaya bilmədiyindən parça ilə bağlayırlar”, vəkil qeyd edib.

Mayın 2-də saxlanılan Xəlilova qarşı Cinayət Məcəlləsinin 234.4.3-cü (satış məqsədilə küllü miqdarda narkotik hazırlama, daşıma, saxlama) maddəsi ilə ittiham irəli sürülüb. Fəal barəsində 4 aylıq həbs qətimkan tədbiri seçilib. Bu maddədə 5 ildən 12 ilədək həbs cəzası nəzərdə tutulub.

Yaxınları onun təqsirsiz olduğunu, sosial şəbəkələrdəki paylaşımlarına görə cəzalandırıldığını deyirlər.

Famil Xəlilov mayın 6-da vəziyyətinin pisləşməsilə əlaqədar 1 saylı Bakı İstintaq Təcridxanasının tibb-sanitariya hissəsinə yerləşdirilib.

Amerikanın Səsi 

Anar Məmmədli

Həbsdə olan hüquq müdafiəçisi Anar Məmmədlinin azad edilməsinə çağıran kampaniya çərçivəsində iyulun 26-da BMT-nin İqlim Dəyişikliyi üzrə Çərçivə Konvensiyasının icraçı katibi Saymon Stilə məktub ünvanlanıb.

“Progress & Change Action Lab” beynəlxalq qeyri-hökumət təşkilatının prezidenti Florian İrmingerin imzası ilə ünvanlanan məktubda hüquq müdafiəçiləri davamlı repressiya mühitinin COP29 ərəfəsində Azərbaycanda ictimai dialoqu mümkünsüz etdiyini, Anar Məmmədli ilə yanaşı çoxsaylı hüquq müdafiəçisi, jurnalist və fəalların həbs edildiyini vurğulayırlar.

İrminger qeyd edir ki, daha əvvəl də həbsə məhkum edilən Anar Məmmədlinin bu dəfə “xarici valyuta qaçaqmalçılığı” ilə ittiham edilir və son dönəmlərdə Azərbaycanda jurnalist və fəalların bu ittihamla həbs edilməsi adi hala çevrilib.

Məktubda Söyüdlü kəndində ətraf mühitə vurulan zərərlə bağlı etirazları işıqlandırmağa çalışan jurnalistlərin həbs edildiyi, müstəqil medianın, o cümlədən Abzas Media, Toplum TV və Kanal 13-ün təqiblərə məruz qaldığı, müstəqil vətəndaş cəmiyyətinin fəaliyyətinin tamamilə məhdudlaşdırıldığı qeyd edilir.

Hüquq müdafiəçiləri BMT rəsmisi Saymon Stildən Məmmədlinin və digər siyasi məhbusların azad edilməsini tələb etmək, COP29-da vətəndaş cəmiyyətinin inklüziv iştirakını təmin etmək və konransa ev sahibliyi sazişini dərc etmək üçün öz mövqeyindən istifadə etməyə çağırırlar.

Aprelin 29-da mülki geyimli polislər tərəfindən saxlanılan Anar Məmmədli barəsində növbəti gün məhkəmə “qaçaqmalçılıq” ittihamı ilə həbs qətimkan tədbiri seçib. O, ittihamı qondarma adlandırıb.

Seçki hüququ və seçkilərin müşahidəsi üzrə tanınmış ekspert olan Məmmədli həmçinin bu il fevralın 20-də ölkədə vətəndaş azadlıqlarının, ictimai iştirakçılığın təmin olunması və ətraf mühitdə ədalətin bərqərar olunması təşəbbüsü ilə təsis edilən COP29 – Ədalət Mühiti Təşəbbüsünün (COP29 – Cimate of Justice Initiative) təsisçilərindəndir.

Anar Məmmədli bundan əvvəl 2013-cü ildə həbs edilib, vergidən yayınma və vəzifə səlahiyyətlərindən sui-istifadə edərək seçki və referendumun nəticələrini saxtalaşdırmaqda günahlandırılaraq 5 il 6 ay müddətinə məhkum edilib. 2016-cı ildə əfv sərəncamı ilə azadlığa çıxıb.

Avropa İnsan Hüquqları Məhkəməsi Anar Məmmədlinin və 2013-14-cü illərdə həbs edilən digər tanınmış vətəndaş cəmiyyəti nümayəndələri, jurnalist və fəalların işləri ilə bağlı (Məmmədli qrupu işləri) qərarlarında hökumətin öz tənqidçilərini susdurmaq üçün cinayət qanunvericiliyindən sui-istifadə etdiyini vurğulayıb.

Rəsmi Bakı isə bir qayda olaraq Azərbaycanda söz və mətbuat azadlığının hədəf alınması, jurnalistlərin və fəalların əsassız həbsi ilə bağlı ittihamları rədd edir, Azərbaycanda fundamental hüquq və azadlıqların, eləcə də media azadlığının “tam olaraq” təmin edildiyini vurğulayır.

Amerikanın Səsi

Bəxtiyar Hacıyev

İyulun 26-da Bakı Ağır Cinayətlər Məhkəməsində insan haqları fəalı Bəxtiyar Hacıyevin işi üzrə növbəti məhkəmə prosesi keçirilib. Məhkəmədə üç şahidin ifadəsi dinlənilib.

Şahidlərdən biri ifadəsində deyib ki, o, Çexiyaya tur üçün viza almaq üçün Hacıyevə müraciət edib və onunla başqa heç bir münasibəti olmayıb. Şahid qeyd edib ki, şəxsən pul verməyib, xidmətə görə köçürmə edib.

Başqa şahid bildirib ki, kurslarda dərs deyib və Hacıyevdən dərs otağı icarəyə götürüb.

Digər şahid isə ABŞ-da kurslarda təhsil almaq üçün Hacıyevin vasitəsilə viza aldığını deyib.

Proses zamanı Hacıyev ev dustaqlığına buraxılması üçün vəsatət qaldırsa da, məhkəmə vəsatəti təmin etməyib.

Hacıyevin ikinci vəsatəti məhkəməyə gəlməyən şahidlərlə bağlı olub. Hacıyev onların ifadələrini ilkin istintaqda açıqlamağı təklif edib. Məhkəmə vəsatəti təmin edib və növbəti iclası avqustun 2-nə təyin olunub.

Bəxtiyar Hacıyev 2022-ci ilin dekabrında həbs olunub. O zaman ona qarşı Cinayət Məcəlləsinin 221.2.2-ci (ictimai qaydanın qorunması üzrə vəzifəni yerinə yetirən şəxsə qarşı müqavimət göstərməklə xuliqanlıq) və 289.1-ci (məhkəməyə hörmətsizlik) maddələrilə ittiham irəli sürülüb. Onunla Ülviyyə Alovlu (Muradova) arasında Yasamal Rayon Məhkəməsində insident baş verdiyi iddia olunur. İttihama görə, Bəxtiyar Hacıyev həmin insident zamanı icra məmuru Orxan Abdullayevə də zorakılıq tətbiq edib.

Ötən il iyunun 16-da fəala qarşı yeni ittihamlar irəli sürülüb. Bu ittihamlar əsasən maliyyə məsələlərilə – ayrılan qrantların təyinatı üzrə xərclənməməsilə bağlıdır. Ona həmçinin Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş əmlakı leqallaşdırma), 206-cı (qaçaqmalçılıq), 320-ci (saxta sənədlərdən istifadə) maddələrilə ittiham verilib.

Həmin ilin noyabrda isə ona daha bir ittiham verilib. Hacıyevə qarşı Cinayət Məcəlləsinin 213.1-ci (vergidən yayınma) maddəsilə daha bir ittiham irəli sürülüb.

Bəxtiyar Hacıyev bu ittihamların heç birini qəbul etmir. Fəal özünü təqsirli bilmir, sifarişlə həbs olunduğunu, Daxili İşlər naziri Vilayət Eyvazovun ünvanına səsləndirdiyi tənqidlərə görə cəzalandırıldığını deyir.

Daxili İşlər Nazirliyi isə bu ittihamların əsassız olduğunu bəyan edib.

Amerikanın Səsi

Emin İbrahimov

3 saylı Şüvəlan İstintaq Təcridxanasında saxlanılan keçmiş diplomat Emin İbrahimov həbsinə etiraz olaraq 3 gündür aclıq edir və aclığı sonadək davam etdirmək fikrindədir. Artıq onun sifəti solğunlaşıb, səhhəti pisləşib, baş ağrıları başlayıb.

Bu barədə vəkil Aqil Layıc İbrahimovla iyulun 26-da görüşündən sonra Amerikanın Səsinə deyib.

Vəkil bildirib ki, İbrahimov karantində saxlanılır.

“Aclıq edən şəxsi karantində saxlamazlar. Karantində olduğu üçün ona hər hansı tibbi yardım göstərilmir. Amma o, aclıq etdiyi üçün xüsusi palataya köçürülməlidir. O dedi ki, karantində saxlanma şəraiti yaxşı deyil. 4-5 nəfər üçün nəzərdə tutulan kameraya 10 nəfər yerləşdiriblər, yatmağa belə şərait yoxdur”, o qeyd edib.

Layıc İbrahimov barədə məhkəmənin həbs qətimkan tədbiri seçməsindən apellyasiya şikayəti verdiyini bildirib.

İyulun 24-də saxlanılan keçmiş diplomat Emin İbrahimov Cinayət Məcəlləsinin 126.2.4-cü (xuliqanlıq niyyəti ilə sağlamlığa qəsdən ağız zərər vurmaq) və 221.1-ci (xuliqanlıq) maddələri ilə ittiham olunub.

Vəkilin sözlərinə görə, Emin İbrahimovun iyulun 22-də Kamal Şükürov Hacıəli oğlu adlı Qaraçuxur qəsəbəsinin sakininə bıçaqla xəsarət yetirdiyi iddia olunur.

“Emin hadisəni belə təsvir edir: “Xalqlar dostluğu” metro stansiyasının yaxınlığında mənzilinin təmiri ilə bağlı evinə gedərkən tanımadığı adam ona hücum çəkib və paltarını cırmağa başlayıb. Üstündən saniyələr keçən kimi mülki geyimli polislər tərəfindən saxlanılaraq Nizami Rayon Polis İdarəsinin 24-cü Polis Bölməsinə aparılıb. Emin həmin şəxsi ümumiyyətlə görmədiyini, tanımadığını bildirdi. Həmin şəxsi mənim saxlandığım yerə təcili tibbi yardım avtomobilində gətirmişdilər. Özü qeyd etdi ki, onu izləyiblər və bu qeyd olunan “cinayət” qondarmadır, onun tənqidi mövqeyi ilə bağlıdır”, vəkil qeyd edib.

Nizami Rayon Məhkəməsi Emin İbrahimov barəsində 4 aylıq həbs qətimkan tədbiri seçib. İbrahimov məhkəmədə həbsinə etiraz olaraq aclıq aksiyasına başladığını bəyan edib.

Keçmiş diplomatın polis bölməsində elektroşokla işgəncəyə məruz qaldığı bildirilib. Lakin Daxili İşlərlər Nazirliyindən bu iddia ilə bağlı mövqe almaq mümkün olmayıb.

Daxili İşlər Nazirliyinin mətbuat xidməti bildirib ki, Emin İbrahimov başqa birinə bıçaqla xəsarət yetirdiyinə görə saxlanılıb.

“Bıçaq xəsarəti yetirdiyi şəxs xəstəxanaya yerləşdirilib”, mətbuat xidmətindən deyiblər.

Ötən il sentyabrın 20-də İbrahimova 30 sutka inzibati həbs cəzası verilib. Məlumata görə o, müharibənin “Rusiyanın əlinə oynayan siyasət” olduğunu yazıb.

Həmin dövrdə Emin İbrahimov Amerikanın Səsinə bildirib ki, saxlanılma zamanı zorakılıqla üzləşib.

“Evə icazəsiz mülki geyimli şəxslər basqın elədilər, mənə heç ayaqqabı belə geyinməyə imkan vermədilər. Məni yazdığım tənqidi fikirlərə görə həbs etdilər. Ölkədəki hazırkı eyforiya dumanı hüquqları daha da məhdudlaşdırmaq, avtoritarizmi gücləndirmək üçün istifadə olunur. Həm daxili, həm də xarici siyasət əl-ələ verərək ilk növbədə ən ali məqsədə – rejimin saxlanması məqsədinə xidmət edir. Bunların strateji kursu ölkəni daha da qaranlığa aparır. Hər keçən il hüquqlarımızın daha da məhdudlaşdırılması mənim uydurmam deyil, faktdır. İrticadan başqa bir şey gözləmək mümkün də deyil”, o qeyd edib.

Emin İbrahimov 2002-ci ildə Bakı Dövlət Universitetinin Beynəlxalq Münasibətlər fakültəsini bitirib. 2005-ci ildə Ankara Universitetindən Beynəlxalq Münasibətlər ixtisası üzrə magistr dərəcəsi alıb. 2009-cu ildə NATO Müdafiə Kollecinin Ali Kursunu bitirib.

2007 – 2020-ci illərdə Azərbaycan Respublikasının diplomatik xidmətində olub. 2012 – 2016-cı illərdə Azərbaycan Respublikasının ABŞ-dakı səfirliyində, 2016 – 2019-cu illərdə Azərbaycan Respublikasının Uruqvaydakı Diplomatik Nümayəndəliyində işləyib.

Emin İbrahimov 2020-ci il martın 13-də ölkədə seçki hüququnun və azadlıqların boğulmasına etiraz olaraq Xarici İşlər Nazirliyinə istefa ərizəsi yazıb və diplomatik fəaliyyətdən istefa verib.

Azərbaycanda son illərdə bir neçə siyasi fəal kiməsə bıçaqla xəsarət yetirməkdə ittiham edilərək həbs olunsalar da, onlar bu ittihamı qəbul etmirlər. Fəallar məhkəmədə bildiriblər ki, həmin şəxslər əvvəldən öyrədilmiş ssenari üzrə özlərinə xəsarət yetirərək, bıçaqlanmaları görüntüsünü yaradıblar.

Bu cür ittihamla həbsdə olanlar arasında Azərbaycan Xalq Cəbhəsi Partiyasının fəalları Aqil Hümbətov, Zamin Salayev, Almaniyada Azərbaycan hökuməti əleyhinə etiraz aksiyalarında iştirak etmiş və Almaniyadan readmissiya olunandan sonra həbs olunmuş Samir Aşurov, İşçi Masası Həmkarlar İttifaqları Konfederasiyasının İdarə Heyətinin sədri Afiəddin Məmmədov da var.

Azərbaycan hakimiyyəti isə heç kimin siyasi baxışlarına görə təqib edilmədiyini, həbs olunanların konkret cinayət əməlinə görə ittiham olunduqlarını bildirir.

Möhyəddin Orucov

İyulun 24-də Bakı Ağır Cinayətlər Məhkəməsində İşçi Masası Həmkarkar İttifaqları Konfederasiyasının üzvü Möhyəddin Orucovun işi üzrə hazırlıq iclası keçirilib. İşçi Masası hakim Rasim Sadıqovun sədrliyi ilə keçirildiyi prosesdə bir sıra qanunsuzluqlar olduğunu bildirib.

“Məhkəmə ictimaiyyət üçün açıq olsa da, Möhyəddinin anasından başqa prosesə gələn digər insanları məhkəmə zalına buraxmadılar. Üzvümüz məhkəmədə şüşə qəfəsdə saxlanılsa da, onun qolundakı qandalı açmayıblar. Həmçinin, vəkil Nazim Musayev ittiham aktı ilə bağlı verdiyi şikayətlərə görə hakim tərəfindən xəbərdarlıq alıb. Məhkəmə prosesinin başlanmasına baxmayaraq, ittiham aktı hələ də hazır deyil”, deyə Konfederasiyanın yaydığı məlumatda deyilir.

Növbəti məhkəmə prosesi iyulun 30-a təyin olunub.

İşçi Masasının digər üzvü Möhyəddin Orucov ötən il dekabrın 13-də saxlanılıb.

Suraxanı Rayon Məhkəməsi Möhyəddin Orucova Cinayət Məcəlləsinin 234.4.3-cü (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, külli miqdarda törədildikdə) maddəsi ilə 4 aylıq həbs qətimkan tədbiri seçib.

Bundan əvvəl də ictimai fəal 2023-cü ilin oktyabrın 18-də inzibati həbs cəzası almışdı. O, Suraxanı Rayon Polis İdarəsinin 32-ci polis bölməsində işgəncəyə məruz qaldığını bildirib.

Həmin dövrdə Möhyəddin Orucov Suraxanı Rayon Məhkəməsinin qərarı ilə 30 sutka müddətinə həbs cəzası alıb və 200 manat cərimə olunub.

Azərbaycanda işçi haqlarını müdafiə etdiyinə görə İşçi Masası Həmkarkar İttifaqları Konfederasiyasının digər 3 üzvü də həbs olunub.

Amerikanın Səsi