Əli Kərimli

Avqustun 13-də Bakının Nəsimi Rayon Məhkəməsində Aydın Əliyevin Azərbaycan Xalq Cəbhəsi Partiyasının rəhbəri Əli Kərimliyə qarşı xüsusi ittiham qaydasında şikayəti üzrə hazırlıq iclası başlayıb. Hazırlıq iclasına Babək Pənahov sədrliyik edir.

Əliyev Kərimlinin Azərbaycan Cinayət Məcəlləsinin 147.1-ci (böhtan) maddəsilə məsuliyyətə cəlb olunmasını tələb edir.

İddiaçı onun şikayətindən sonra Azərbaycan Xalq Cəbhəsi Partiyasının qurultayının qərarlarının məhkəmə tərəfindən ləğv edilməsilə bağlı Kərimlinin şərhini “böhtan” adlandırıb.

Xüsusilə, Kərimliyə qarşı onun aşağıdakı ifadələri üzrə iddialar irəli sürülüb:

“Partiyanın siyasi kursundan yayındığına, hakimiyyətlə əməkdaşlığa görə Azərbaycan Xalq Cəbhəsi Partiyasından xaric edilən Aydın Əliyev məhkəmənin qərarı ilə zorla nəzarət-təftiş komissiyasının rəhbəri vəzifəsinə bərpa edilib. Partiyaya zorla bərpa edilmiş bu şəxsin şikayəti əsasında 05.07.2024-cü il tarixində Nəsimi Rayon Məhkəməsi 24.06.2023-cü il tarixli qurultayın qərarlarını etibarsız sayıb, qərar 287 lehinə, bir səs əleyhinə olmaqla qəbul edilmişdi”.

Əli Kərimli qeyd edib ki, hazırkı proses “Azərbaycanın məhkəmə sistemi üçün sınaq” olacaq. Məhkəmə şikayəti təmin edərsə, bu rejimin özü üçün rüsvayçılıq olacaq, çünki “ hakimiyyət ilə əməkdaşlıq”  şərəf və ləyaqətə təhqir kimi tanınacaq, Azərbaycan Xalq Cəbhəsi Partiyasının lideri qeyd edib.

Turan 

Fazil Qasımov

İstanbul Universitetinin doktorantı, iqtisadçı Fazil Qasımov 58-ci gündür aclıq aksiyasını davam etdirir. Bu barədə “Turan”a avqustun 10-da Penitensiar xidmətin müalicə müəssisəsində onunla görüşəndən sonra yaxınları məlumat verib.

“Aclıq aksiyası nəticəsində Fazilin bədəni taqətdən düşüb. Onun vəziyyəti ağırdır.

Mədə, böyrək və ürək ağrıları dözülməz hala gəlib. O qədər arıqlayıb ki, sanki bədəni əriyib yoxa çıxır. Eləcə də şiddətli baş ağrıları var. Amma ailəmizin xahişinə baxmayaraq, Fazil aclıq aksiyasını dayandırmaq istəmir. O, sona qədər ac qalacağını söylədi”, – deyə qardaşı Nazim Qasımov “Turan”a bildirib.

Penitensiar Xidmətdən şərh almaq mümkün olmayıb.

Bakı Ağır Cinayətlər Məhkəməsində hakim Mahirə Kərimovanın sədrliyi ilə N.Qasımovun cinayət işi üzrə hazırlıq iclası avqustun 15-nə təyin edilib.

* Fazil Qasımov 2023-cü il avqustun 7-də Türkiyədə saxlanılaraq Azərbaycana gətirilib və AR Cinayət Məcəlləsinin 204.3.1 (mütəşəkkil dəstənin tərkibində saxta pul hazırlama, əldə etmə və ya satma) maddəsi ilə təqsirli bilinir.

İstintaq iddia edir ki, saxta pulu sonradan həbs edilən müxalif siyasətçi Qubad İbadoğluya məhz o verib.

Bu günlərdə Qasımov Baş prokurora, Ombudsmana, yerli və beynəlxalq ictimaiyyətə müraciətində bu ifadəni işgəncə altında verdiyini bildirib. O, İbadoğluya saxta pul vermədiyini, onunla FETÖ mövzularında (Türkiyədə terror təşkilatı kimi tanınan vaiz Fətullah Gülənin hərəkatı) heç vaxt müzakirə etmədiyini bildirərək bu ifadəsini geri götürüb.

İyunun 14-dən Qasımov istintaqın əvvəlindən əsassız cinayət təqibinə və işgəncələrə etiraz olaraq aclıq aksiyası keçirir.

Turan 

Tofiq Yaqublu

Avqustun 9-da Bakı Ağır Cinayətlər Məhkəməsində Milli Şuranın və Müsavat Partiyasının üzvü Tofiq Yaqublunun cinayət işi üzrə məhkəmə prosesi davam etdirilib. Məhkəmədə onunla birlikdə ittiham olunan Elnur Məmmədov ifadə verib. Bu barədə Tofiq Yaqublunun qızı Nigar Həzi məlumat verib.

“Elnur Məmmədov suallara çətinliklə cavab verirdi. Hakim Elnur Nuriyev Elnur Məmmədovu yönləndirirdi ki, necə cavab versin. Axır ki, hakimin yardımı ilə Elnur Məmmədov suallara cavab verməkdən imtina etdi”, deyə, o bildirib.

İttiham aktında deyilir ki, Tofiq Yaqublu Elnur Məmmədovla cinayət əlaqəsinə girərək, özgənin əmlakını dələduzluq yolu ilə ələ keçirmək üçün sövdələşib. İddia olunur ki, Tofiq Yaqublu zərərçəkmiş kimi tanınan Elşən Hüseynovdan Almaniyada vətəndaşlıq verilməsi üçün 25 min avro, 10 min manat pul istəyib. Elnur Məmmədov isə həmin vəsaiti alaraq Tofiq Yaqubluya verdiyini deyir. Tofiq Yaqublu isə bu iddiaları qəbul etmir və həbsini siyasi sifarişli, ittihamları isə saxta adlandırır. Siyasətçi Elnur Məmmədovun yalan danışdığını, onunla heç bir sövdələşmə aparılmadığını deyir.

Daha sonra məhkəmədə Elşən Hüseynov ifadə verib. Nigar Həzinin sözlərinə görə, onun ifadəsini müstəntiq düz-qoş etdiyi üçün bir sözü ilə digəri düz tutmurdu:

“Hər cümləsindən yalan yağırdı. Ölkənin bütün dələduzları yığışıb Tofiq Yaqublunu dələduzluqda şərləmək üçün üzünə dururlar. Şərləmə işində qollarını çırmayıb canfəşanlıq edən müstəntiq də, hakim də, prokuror da, üzəduranlar da konkret olaraq bu işdə cinayət törədiblər. Əminəm ki, bunun müqabilində hakimiyyət onlara yaxşı mükafat verəcək”.

Növbəti məhkəmə prosesi avqustun 16-a təyin olunub.

Tofiq Yaqublu ötən il dekabrın 14-də həbs edilib. Ona qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq), 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama və ya satma) və 320.2-ci (bilərəkdən saxta sənədlərdən istifadə etmə) maddələri ilə cinayət işi başlanıb.

Siyasətçi bundan öncə də dəfələrlə cinayət və inzibati təqiblərə məruz qalıb.

Beynəlxalq təşkilatlar onu vicdan məhbusu kimi tanıyıb.

Azərbaycanda son aylar iyirmidən çox fəal və jurnalist həbs edilib. Bu həbslər çoxsaylı beynəlxalq hüquq-müdafiə təşkilatları, həmçinin ABŞ Dövlət Departamenti tərəfindən qınanılıb.

Azərbaycan hökuməti isə ölkədə siyasi məhbus kimi tanınan şəxslərlə bağlı beynəlxalq tənqidləri qəbul etmir və qərəzli sayır. Hökumət rəsmiləri Azərbaycanda insanların siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edir.

Amerikanın Səsi 

Avqustun 9-dan başlayaraq növbədənkənar parlament seçkiləri ilə əlaqədar seçkiqabağı təşviqat kampaniyasına start verilir.

“Milli Məclisə növbədənkənar seçkilərin keçirilməsi üzrə əsas hərəkət və tədbirlərin Təqvim Planı”na əsasən təşviqat kampaniyası avqustun 31-dək davam edəcək.

Təşviqat üçün ölkə üzrə 3259 açıq, 1854 qapalı yer ayrılıb.

Seçkiqabağı təşviqatın aparılması qeydə alınmış namizədlər, onların səlahiyyətli nümayəndələri və vəkil edilmiş şəxsləri, namizədi qeydə alınmış siyasi partiyalar, siyasi partiyaların blokları, onların səlahiyyətli nümayəndələri və vəkil edilmiş şəxsləri tərəfindən həyata keçirilə bilər.

Bununla yanaşı, qanunvericiliyə görə növbədənkənar seçkilərdə seçkiqabağı təşviqat aparmaq məqsədilə ölkə üzrə birmandatlı seçki dairələrinin 60-dan çoxunda namizədləri qeydə alınmış siyasi partiyalara, siyasi partiyaların bloklarına dövlət büdcəsindən maliyyələşən bir sıra media subyektlərində ödənişsiz efir vaxtı və dərc üçün yer ayrılacaq. Bunlar İctimai Televiziya və Radio Yayımları Şirkəti, “Azərbaycan” qəzeti, “Xalq qəzeti”, “Respublika” qəzeti, “Bakinski raboçi” qəzetidir.

Amma yalnız iqtidarda olan Yeni Azərbaycan Partiyasının seçki dairələrinin 60-dan çoxunda namizədləri qeydə alınıb. Seçkilərdə iştirak edən müxalifətdə olan Müsavat Partiyasının 22, REAL Partiyasının isə 11 namizədi qeydə alınıb. Beləliklə adı çəkilən media vasitələrində yalnız Yeni Azərbaycan Partiyası pulsuz təşviqatla məşğul ola bilər. Bundan öncəki seçki praktikasına görə, Yeni Azərbaycan Partityası adətən pulsuz təşviqatdan yararlanmaqdan imtina edir.

Ölkə mediasında pullu təşviqata gəlincə, televiziyalarda bir saniyə təşviqat 20-30 manat, radioda isə 1 saniyə təşviqat 7-25 manatdır.

Deputatlığa namizədlərin pullu təşviqatını dərc etmək üçün 58 çap mediası MSK-ya müraciət edib. Belə ki, plakatların seçki platformasının çap medialarında dərci 1000 manatdan başlayaraq bir neçə min manatadək yüksəlir.

Növbədənkənar seçkilərdə 22 gün seçkiqabağı təşviqatın aparılması nəzərdə tutulub. Deputalığa namizədlər avqustdun 9-da təşviqat kampaniyasına başlayacaq və bu, avqustun 31-də başa çatacaq.

Seçki Müşahidə Alyansının rəhbəri Məmməd Məmmədzadə Amerikanın Səsinə bildirib ki, seçki bir yarışdır.

“Seçki öncəsi prosesdə bu yarış yoxdur. Siyasi partiyalar arasında milli səviyyədə yarış getmir. Gələk müstəqil namizədlərə. Müstəqil namizədlər 22 gündə bəlkə də yarış apara bilərlər. 22 günlük seçki kampaniyası çox məhduddur. Amma deyək ki, kiminsə müəyyən gəlirləri var və yaxud ianələr toplayaraq imicmeyker xidmətindən istifadə edir. Azərbaycanda bu xidmətdən də istifadə etsələr belə bu, seçki prosesinə təsir etməyəcək. Bunun əsas problemi seçkiöncəsi tərəflər üçün bərabər və ədalətli şəraitin yaradılmamasıdır”, o qeyd edib.

MSK-nin son məlumatına görə, 125 serçki dairəsi üzrə 1030 nəfərin deputatlığa namizədliyi qeydə alınıb.

Prezident İlham Əliyev sentyabrın 1-də növbədənkənar parlament seçkilərinin keçirilməsi barədə sərəncam imzalayıb.

Azərbaycanda Konstitusiyaya əsasən, 125 üzvü olan Milli Məclisə seçkilər beş ildən bir, parlamentin sonuncu səlahiyyət ilinin noyabr ayının ilk bazar günü keçirilir. Seçkilərin tarixi onların keçirilməsindən iki ay əvvəl elan edilir.

Bundan öncəki parlament seçkisi və son iki prezident seçkiləri növbədənkənar keçirilib.

Azərbaycan rəsmiləri bir qayda olaraq insan hüquqları ilə bağlı beynəlxalq və yerli tənqidləri qəbul etmir, qərəzli sayır. Ölkə rəhbərləri bütün fundamental azadlıqların, o cümlədən söz və mətbuat azadlığının tam təmin edildiyini bildirir. Bununla yanaşı, Azərbaycan beynəlxalq media azadlığı indeksində 180 ölkə arasında 151-ci sırada yer alır. Yerli hüquq müdafiəçiləri ölkədə 300-dən çox siyasi məhbusun olduğunu iddia edir.

Amerikanın Səsi 

İlhamiz Quliyev

Avqustun 8-də Bakı Ağır Cinayətlər Məhkəməsində hakim Azər Tağıyevin sədrliyi ilə ictimai fəal İlhamiz Quliyevin işi üzrə məhkəmə prosesi keçirilib. Məhkəmə şahidlərin dindirilməsi ilə davam etdirilib.

Vəkil Zibeydə Sadıqova Amerikanın Səsinə bildirib ki, Quliyev ittihamı qəbul etmir, narkotikin polis şöbəsində onun cibinə qoyulduğunu deyib.

Bu gün məhkəmədə şahid qismində tədqiqatçı Nicat Abdullayev ifadə verib. İlhamiz Quliyev narkotiki şahid qismində dindirlən şəxsin onun cibinə qoyduğunu məhkəmə heyətinin diqqətinə çatdırıb. O, bir daha qeyd edib ki, narkotiklə əlaqəsi yoxdur, ittiham uydurmadır, həbs olunan zaman ailəsinə xəbər verilməyib, öz istədiyi vəkillə təmin olunmayıb.

Məhkəmə digər iki şahidin dindirilməsi məqsədi ilə avqustun 22-dək təxirə salınıb.

İlhamiz Quliyev dekabrın 4-də həbs olunub və Cinayət Məcəlləsinin 234.4.3-cü (Kütləvi şəkildə narkotik vasitələri hazırlama, istehsal etmə, əldə etmə, saxlama, daşıma, göndərmə və ya satma) maddəsi ilə ittiham olunur.

Yaxınlarının sözlərinə görə o, saxlanılarkən zorakılığa məruz qalıb. Hüquq müdafiəçilərinin fikrincə, həbsin səbəbi Quliyevin “Abzas Media”ya verdiyi müsahibədir. O, siyasi fəalları təqib etmək üçün polisin “sənədləşdirilməmiş narkotik maddələrdən” istifadə etməsindən danışıb.

Daxili İşlər Nazirliyi ittiham edilən şəxslərin belə iddialarının özünü müdafiə xarakteri daşıdığını bildirir.

Amerikanın Səsi