Vəfa Nağı

Sentyabrın 4-də 70 saylı Neftçala seçki dairəsindən namizəd, ictimai fəal Vəfa Nağı bazar günü keçirilmiş növbədənkənar parlament seçkilərində kütləvi pozuntularla bağlı şikayəti  dairə seçki komissiyasına təqdim edib. Bu barədə o, bugünkü mətbuat konfransında bildirib.

Vəfa Nağı bildirib ki, seçki kampaniyası başlayandan digər namizəd – Vətəndaş Həmrəyliyi Partiyası rəhbərinin xanımı Tənzilə Rüstəmxanlının nümayəndələri tərəfindən ciddi problemlər və maneələrlə üzləşiblər.

“Onun adamları təşviqat kampaniyası boyunca afişalarımızı cırdılar. Dairə Seçki Komissiyasına və Mərkəzi Seçki Komissiyasına şikayətlərimizə baxılmadı” , – Nağı deyib.

“İnzibati resursdan Rüstəmxanlının xeyrinə istifadə olundu, onun seçicilərlə görüşlərinə dövlət qurumlarının, büdcə sahəsinin əməkdaşları göndərildi. Yerli hakimiyyət mənimlə görüşməmək üçün əhaliyə təzyiq göstərdi”, – namizəd qeyd edib.

Səsvermə günü hər yerdə saxtakarlıq – topa bülletenlərin atılması, “karusellər” və müşahidəçilərə təzyiqlər baş verib.

Evdə səs vermək “istəyənlərin” sayı çox olub, Nağı qeyd edib. “Seçki qutularını daşıyanların seçicilərə bülletenlərdə Tənzilə Rüstəmxanlının xeyrinə olan qrafanı qeyd etmələrini göstərdiklərini əks etdirən video- sübutlarımız var”, – Nağı deyib.

Vəfa Nağının nümayəndəsi, hüquqşünas Xalid Bağırov seçkilərdə fəallığın süni şəkildə şişirdilməsinə diqqəti çəkib. Belə ki, bir məntəqədə Rüstəmxanlıya 66, Nağıya 51 səs verilib. Digər məntəqədə Nağı 92, Rüstəmxanlı 40 səs toplayıb. Başqa bir məntəqədə isə Nağı 140, Rüstəmxanlı 112 səs toplayıb. Lakin Mərkəsi Seçki Komissiyasının məlumatına görə, Rüstəmxanlı 5806, Nağı isə 3122 səs toplayıb.

Hüquqşünas  deyib ki, demək olar ki, əhalinin olmadığı 2-ci Mayak seçki məntəqəsində iştirak 72 faiz səviyyəsində göstərilib. Bu da Rüstəmxanlının lehinə səsləri artırmaq üçün edilib.

Vəfa Nağı bildirib ki,  seçkilərin nəticələrinə sonadək etiraz edəcək və hüquqları bərpa edilməsə, Avropa İnsan Hüquqları Məhkəməsinə şikayət edəcək.

Turan

ATƏT-in Parlament Assambleyası (ATƏT PA) Azərbaycanda sentyabrın 1-də keçiriləcək növbədənkənar parlament seçkilərini müşahidə etmək üçün 60-dan çox müşahidəçi göndərir.

ATƏT PA-nın mətbuat xidməti məlumat verir ki, ATƏT-in qısamüddətli müşahidə missiyasının xüsusi əlaqələndiricisi irlandiyalı deputat Maykl Krid, ATƏT PA-nın müşahidəçilərdən ibarət nümayəndə heyətinə rəhbəri isə çexiyalı deputat Lusi Potuçkova olacaq.

Müşahidəçilər seçki administrasiyasının nümayəndələri, vətəndaş cəmiyyəti nümayəndələri, namizədlər, partiya nümayəndələri və ekspertlər seçkiqabağı vəziyyətlə bağlı görüşlər keçirəcək, seçki günü Azərbaycanın bir sıra bölgələrinə səfər edəcəklər.

İrlandiyanın ATƏT PA-dakı nümayəndə heyətinin rəhbəri Maykl Krid seçki ilə bağlı qərəzsiz və hərtərəfli qiymətləndirmə verməyə sadiq olduqlarını qeyd edib.

“Yeganə məqsədimiz demokratik standartların və dəyərlərin qorunmasına, həmçinin Azərbaycan xalqı üçün ədalətli və şəffaf seçki prosesinin keçirilməsinə dəstək olmaqdır”, Krid deyib.

ATƏT PA ilə yanaşı ATƏT-in Demokratik Təsisatlar və İnsan Hüquqları Bürosundan (ATƏT/DTİHB) 227 nəfərin parlament seçkilərini izləyəcəyi bildirilir.

“Biz bu seçkilərin demokratik prinsiplərə uyğun olub-olmaması, azad səsvermə prosedururunun, ədalətli təşviqat mühitinin və medianın əlçatanlığını təmin edilib-edilməsi, nəticələrin dəqiq məlumatlandırılmasını izləmək üçün ATƏT/DTİHB missiyası ilə sıx əməkdaşlıq edirik”, Çexiya parlamentinin üzvü Lusi Potuçkova vurğulayıb.

Azərbaycan Milli Məclisinə seçkilər bu ilin noyabrında keçirilməli olsa da, hakim Yeni Azərbaycan Partiyası (YAP) həmin ay BMT-nin İqlim Dəyişikliyi Konfransının (COP29) keçirilməsini səbəb göstərərək parlamentin vaxtından əvvəl buraxılması təşəbbüsü ilə çıxış edib. Təşəbbüs parlamentdə qəbul edilib.

Daha sonra prezident İlham Əliyev növbədənkənar parlament seçkilərinin keçirilməsi barədə sərəncam imzalayıb.

Azərbaycanda Konstitusiyaya əsasən, 125 üzvü olan Milli Məclisə seçkilər beş ildən bir, parlamentin sonuncu səlahiyyət ilinin noyabr ayının ilk bazar günü keçirilir. Seçkilərin tarixi onların keçirilməsindən iki ay əvvəl elan edilir.

Bundan öncəki parlament seçkisi və son iki prezident seçkiləri növbədənkənar keçirilib.

Amerikanın Səsi

Avqustun 27-də Avropa İnsan Hüquqları Məhkəməsi Qaydalarının 39-cu maddəsinə uyğun olaraq, Azərbaycan hökumətinə həbsdə olan Milli Məclisin keçmiş deputatı Hüseyn Abdullayevin sağlamlıq vəziyyətinin stasionar müalicəyə və ya ambulator müalicəyə və ya hər hansı təcili tibbi müdaxiləyə (məsələn, ürək cərrahiyyəsi) ehtiyac olub-olmadığını müəyyən etmək üçün əlavə hərtərəfli müayinələrdən keçirmək və bununla bağlı məhkəməyə məlumat vermək göstərişi verib.

Bu barədə Amerikanın Səsinə vəkil Cavad Cavadov bildirib.

“Əlavə müayinələrin nəticələri, ərizəçinin sağlamlıq vəziyyəti və göstərilən müalicə haqqında, həmçinin səhhəti ilə bağlı yeniliklər barədə Azərbaycan höküməti məhkəməyə məlumat verməlidir. Eyni zamanda Məhkəmə Qaydalarının 41-ci maddəsinə əsasən onun işinə prioritet qaydada baxılması qərara alınıb”, vəkil qeyd edib.

Bir müddət əvvəl isə Abdullayevin digər vəkili Şəhla Hümbətova bildirib ki, onun istintaq təcridxanasında səhhəti ciddi şəkildə pisləşsə də, effektiv tibbi yardım göstərilmir.

Vəkilin sözlərinə görə, avqustun əvvəlində həkimlər Abdullayevə sol mədəciyin hipertrofiyası, ürəyin arxa divarında çat ehtimalı, ürəyin sol ön hissəsinin blokadası diaqnozu qoyub.

Avqustun 15-də Bakı Ağır Cinayətlər Məhkəməsində hakim Azər Tağıyevin sədrliyi ilə Abdullayevin cinayət işi üzrə hazıqlıq iclası olub. Məhkəmədə müdafiə tərəfi vəsatət qaldırıb ki, Abdullayevin seçdiyi mülki klinikada tibbi müayinədən keçməsi təmin edilsin.

Vəsatət qismən yerinə yetirilib. Abdullayev 1 gün müddətinə həbsxana xəstəxanasına aparılıb, orada vizual müayinə olunub və ertəsi gün 1 nömrəli Bakı İstintaq Təcridxanasına qaytarılıb.

Hüseyn Abdullayevin 6 illik həbs müddətinin başa çatmasına 47 gün qalmış ona qarşı cinayət yolu ilə əldə edilmiş pulların leqallaşdırılması (Cinayət Məcəlləsinin 193-1.3.2-ci maddəsi) ittihamı irəli sürülüb.

Bu il martın 4-də Binəqədi Rayon Məhkəməsi keçmiş deputat barəsində 4 ay müddətinə həbs qətimkan tədbiri seçib.

Vəkilin sözlərinə görə, Abdullayev əvvəlki ittihamlar kimi yeni ittihamı da qəbul etmir.

Yeni ittihama görə, Abdullayev 2006-2014-cü illər arasındakı dövrdə 6 milyon manat vəsaitin yuyulmasında ittiham olunur, bir halda ki, istintaq artıq onun 2000-2018-ci illərdəki fəaliyyətini araşdırıb.

Yeni ittiham ilə Abdullayevi 7 ildən 12 ilədək azadlıqdan məhrumetmə cəzası gözləyir.

Hüseyn Abdullayev 1990-cı illərdə neft və neft məhsulları üzrə biznes sahəsində qabaqcıl mövqelər tutub. O, hazırkı iqtidarın tərəfdarlarından olub və yerli mediada onun müxalifətin etirazlarına qarşı sərt mövqe tutduğu barədə məlumatlar yayılıb.

2005-ci ildə Abdullayev parlamentin deputatı kimi fəaliyyətə başlayıb və Nazirlər Kabinetinin fəaliyyətini tənqid edib. 2007-ci ilin martında parlamentin plenar iclasında deputat Fəzail Ağamalı ilə Abdullayev arasında yumruqlaşma olub. Bundan sonra Abdullayev cəzalandırılıb. O, əvvəlcə həbs edilib, sonra xuliqanlığa görə 2 il müddətinə şərti azadlıqdan məhrumetmə cəzasına məhkum edilib.

2013-cü ildə Abdullayev Azərbaycandan mühacirət edib. O, mühacirət dövründə hazırkı hakimiyyəti tənqid edib və bu yönümlü mahnılar bəstələyib. Hüseyn Abdullayevin “Susma” adlı marşının sosial şəbəkələrdə geniş müzakirələr doğurmasından sonra ona və ailəsinə qarşı təzyiqlərin olduğunu iddia edib.

Ona qarşı vergi ittihamı ilə cinayət işi açılması da tənqidi mahnılarının yayılmasından sonraya təsadüf edir.

Nəhayət keçmiş deputat 2018-ci il aprelin 22-də Türkiyədə saxlanılıb və Azərbaycana ekstradisiya edilib.

Abdullayayev Bakıda Cinayət Məcəlləsinin 192.2.2 (böyük gəlir əldə etməklə qanunsuz sahibkarlıq), 178.2.1, 178.2.2, 178.2.4 (fırıldaqçılıq), 182.2.1 (əvvəlcədən əlbir olmuş şəxslər tərəfindən hədələmə yolu ilə pul tələb etmə), 182.2.2 (eyni əməllər təkrar törədildikdə) və 182.2.4-cü (eyni əməllər, zərərçəkmişə böyük ziyan vurmaqla törədildikdə) maddələri ilə ittiham edilərək 6 il müddətinə azadlıqdan məhrum edilib.

2020-ci ilin avqustun 24-28-də Birləşmiş Millətlər Təşkilatının Özbaşına Həbslər üzrə İşçi Qrupu Hüseyn Abdullayevin dərhal azadlığa buraxılması barədə 48/2020 saylı qərar çıxarıb.

Qərarda qeyd olunur ki, Abdullayevin Türkiyədən (oğurlanması) gətirilməsi, Azərbaycanda cinayət təqibinə məruz qalması qanunsuzdur.

Bununla yanaşı, rəsmi Bakı beynəlxalq tənqidləri qəbul etmir, insanların iradəsinə görə təqib edilmədiyini bildirir.

Amerikanın Səsi 

ABŞ Dövlət Departamenti Azərbaycanda gənc alim Bəhruz Səmədovun həbsini “narahatlıqla izləyir”

Bu barədə Dövlət Deparatmentinin nümayəndəsi Turan agentliyinə bildirib.

“Bəhruz Səmədovun həbsini narahatlıqla izləyirik. Azərbaycanda jurnalistlərə, vətəndaş cəmiyyəti fəallarına və siyasi müxalifətin üzvlərinə qarşı davam edən repressiyalara görə dərin narahatlıq hissi keçiririk”, Dövlət Departamentinin nümayəndəsi Turanın sorğusuna cavabda bildirib.

“Fikri ifadə etmək azadlığı da daxil olmaqla, insan hüquqlarını və əsas azadlıqlarını həyata keçirənlər buna görə təqibə məruz qalmamalıdır”, Dövlət Departamentinin nümayəndəsi əlavə edib.

Praqada Karlov Universitetinin 28 yaşlı doktorantı Səmədov ötən həftə Bakıda saxlanılıb.

Avqustun 23-də məhkəmə onu dövlətə xəyanət ittihamı ilə dörd ay müddətinə həbs edib.

O, bu ittihamı təkzib edir. “Mən yalnız sülh istəyirdim, ölkəmi satmamışam”, Səmədov məhkəmədə bildirib.

Təqsirli bilinsə, onu ömürlük həbs cəzası gözləyir.

Amerikanın Səsi