Bu gün Abzas Media-nın işi üzrə həbsdə olan araşdırmaçı jurnalist Hafiz Babalıya ibtidai istintaqın yekunlaşdığı açıqlanıb. Bu barədə jurnalistin yaxınları məlumat verib.

Elə bu gün işin digər fiqurantlarına istintaqın yekunlaşdığı haqqında məlumat verilib. İndi bütün təqsirləndirilən şəxslər və onların vəkilləri ayrı-ayrılıqda istintaq materialları ilə tanış olacaqlar. Daha sonra iş baxılması üçün məhkəməyə göndəriləcək.

* Babalı 2023-cü ilin noyabr – 2024-cü ilin yanvar aylarında Abzas Media-nın işi üzrə həbs edilən altı jurnalist və mətbuat işçisindən (Ülvi Həsənli, Sevinc Vaqifqızı, Nərgiz Absalamova, Elnarə Qasımova, Məhəmməd Kekalov) biri idi. Sonradan bu iş üzrə iqtisadçı Fərid Mehralızadə də həbs olunub.

Əvvəlcə onların hamısına CM-in 206.3.2-ci (qaçaqmalçılıq, əvvəlcədən əlbit olan bir qrup şəxs tərəfindən törədildikdə) maddəsi ilə ittiham irəli sürülüb. Lakin 16-19 avqust tarixlərində jurnalistlərə qarşı daha ağır ittihamlar – CM-in 192.3.2 (qanunsuz sahibkarlıq, külli miqdarda gəlir əldə eetməklə törədildikdə), 193-1.3.1 və 193-1.3.2 (cinayət yolu ilə əldə edilmiş əmlakı leqallaşdırma, qabaqcadan əlbir olan bir qrup şəxs tərəfindən törədildikdə), 206.4 (qaçaqmalçılıq, mütəşəkkil dəstə tərəfindən törədildikdə), 320.1 və 320.2 (sənədləri saxtalaşdırma və saxta sənədlərdən istifadə etmə), 213.2.1 (vergilərdən yayınma, mütəşəkkil dəstə tərəfindən törədildikdə) maddələri ilə ittihamlar irəli sürülüb.
Bu ittihamlara görə 12 ilədək azadlıqdan məhrumetmə cəzası nəzərdə tutulub.
Jurnalistlər bütün ittihamları rədd edir, hakimiyyətin yüksək eşelonlarında korrupsiya  faktlarını araşdırdıqlarına görə təqib olunduqlarını bildirirlər.

Hüquq müdafiəçiləri bütün təqsirləndirilən şəxsləri siyasi məhbus kimi tanıyıblar.

Turan 

Fazil Qasımov

İstanbul Universitetinin doktorantı, iqtisadçı Fazil Qasımov Bakı İstintaq Təcridxanasında qanunsuz həbsinə etiraz əlaməti olaraq 88 gündür aclıq edir. Bu barədə Penitensiar Xidmətin Müalicə Müəssisəsində ona baş çəkən qardaşı Nazim Qasımov bildirib.

“Qardaşımın durumu acınacaqlıdır. O, hər an həyatını itirə bilər. Yalvarışlarımıza baxmayaraq, inadından dönmür. Çəkisi 67 kiloqramdan 35 kiloqramadək düşüb. Dəhşətli ağrılardan qıvrılır. Qorxunc ağrıların sifətinə çökmüş cizgiləri, onun iniltiləri ürəyimi parçalayır. Saçları tam ağarıb, beli bükülüb”, deyə Qasımov qeyd edib.

Onun sözlərinə görə, müalicə müəssisəsində Fazil Qasımovun vəkilləri ilə danışıqlarına qulaq asılır. “Yazdığı müraciətlər, vəsatətlər də senzuraya məruz qalır. Nəzarətçilər onun yazdılarını oxuyur və lazım bilmədiklərini əlindən alırlar”, deyə Nazim Qasımov qardaşına istinadən bildirib.

Öz növbəsində, vəkil Telman Qasımov Turan-a Fazil Qasımovun durumunun çox ağır olduğunu təsdiq edib. “Onun arterial təzyiqi 50/30 nisbətinə düşür”, deyə o bildirib.

Penitensiar Xidmət F.Qasımovun aclıq etməsi və vəziyyəti haqqında məlumatlarla bağlı şərh vermir.

*  Fazil Qasımov 7 avqust 2023-cü il tarixində Türkiyədə saxlanılıb, Azərbaycana gətirilib və ona qarşı CM-in 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma – eyni əməllər mütəşəkkil dəstə tərəfindən törədildikdə) maddəsi ilə ittiham irəli sürülüb. İstintaq onun sonradan həbs edilən müxalif siyasətçi Qubad İbadoğluna saxta pul verdiyini iddia edir.

Qasımov baş prokurora, ombudsmana, yerli və beynəlxalq ictimaiyyətə müzakirəsində bildirib ki, etirafedici ifadələri işgəncə altında verdiyini, İbadoğluna saxta pul vermədiyini, heç vaxt onunla FETÖ (Türkiyədə terrorçu təşkilat kimi tanınan hərəkat) mövzusunda müzakirələr aparmadığını bildirib.

İyunun 14-dən etibarən Qasımov əsassız cinayət təqibinə etiraz əlaməti olaraq aclıq edir. İyulun 26-da vəziyyətinin pisləşməsi ilə əlaqədar Qasımov İstintaq Təcridxanasından Penitensiar Xidmətin Müalicə Müəssisəsinə köçürülüb.

Turan 

Deputatlığa namizəd Vəfə Nağıyevə Neftçala Dairə Seçki Komissiyası önündə etiraz aksiyası keçirərkən.

Neftçalada təxminən 19:00 radələrində saxlanılan Vəfa Nağıyeva, Seymur Abbas və Şəhla Kərimli təxminən 23:00 radələrində Bakıda sərbəst buraxılıblar. Mülki geyimli polislər onları Neftçaladan Bakının Əhmədli ərazisinə gətiriblər. Bu barədə Vəfa Nağıyevanın özü məlumat verib.

***

Sentyabrın 6-da Neftçala Dairə Seçki Komissiyası önündə etiraz aksiyası keçirən zaman deputatlığa namizəd Vəfa Nağıyevə polis əməkdaşları tərəfindən saxlanılıb. Nağıyeva ilə bərabər onun vəkili Seymur Abbas və jurnalist Şəhla Kərimli də saxlanılıb.

Saxlanılanların hara aparıldığı məlum deyil. Neftçala Rayon Polis Şöbəsindən saxlanılanların orada olmadığı deyilir.

Vəfa Nağıyevə sentyabrın 6-da Neftçala DSK-sı önündə çadır qurmağa cəhd edib. Deputatlığa namizəd 1 sentyabr parlament seçkilərində pozuntulara etiraz etdiyini, nəticələrin saxtalaşdırıldığını bildirib. O, DSK-dan onun suallarına cavab vermələrini tələb edib.

Vəfa Nağıyeva 70 saylı Neftçala seçki dairəsindən deputatlığa namizəd olub. Onun seçkidə əsas rəqibi Vətəndaş Həmrəyliyi Partiyasından Tənzilə Rüstəmxanlı idi. İlkin nəticələrə görə MSK Rüstəmxanlını seçkinin qalib elan etsə də, Nağıyeva rəqibinin seçkiləri saxtakarlıq yoluyla udduğunu iddia edir.

Hüquqşünas Səməd Rəhimli Amerikanın Səsinə bildirib ki, qeydə alınmış namizədin hüquqi təminatlarından biri olan toxunulmazlıq təminatı Seçki Məcəlləsinin 70.4-cü maddəsinə əsasən müəyyən edilir. Hüquqşünasın sözlərinə görə, toxunulmazlıq təminatına əsasən qeydə alınmış namizəd kimi Vəfa Nağıyeva seçkilərin nəticələrinin rəsmi dərc edildiyi günədək müvafiq prokurorun (bu halda Neftçala Rayon Prokuroru) razılığı olmadan namizəd kimi qeydə alındıqdan sonra törətdiyi əməllərə görə cinayət məsuliyyətinə cəlb edilə bilməz, tutula bilməz, məhkəmə qaydasında müəyyənləşdirilən inzibati tənbeh tədbirlərinə məruz qala bilməz.

“Qeydə alınmış namizəd cinayət başında yaxalanarsa, tutula bilər. Belə razılıq verildikdə və ya qərar qəbul edildikdə, müvafiq prokuror və ya məhkəmə namizədin qeydə alındığı seçki komissiyasını bu barədə dərhal xəbərdar edir”, deyə Rəhimli qeyd edib.

Hüquqşünas bildirib ki, bu gün Vəfa Nağıyevanın 70 saylı Neftçala Dairə Seçki Komissiyasının qarşısında həmin seçki dairəsində baş verən pozuntulara görə etiraz aksiyası keçirməsi Azərbaycan Respublikası Konstitusiyasının 49-cu maddəsi ilə müəyyən edilmiş sərbəst toplaşmaq azadlığının sferasına aiddir:

“Bu baxımdan seçkilərin nəticələrinə dinc yolla DSK-nın binasının qarşısında etiraz etmək cinayət sayıla bilməz və cinayət törədərkən yaxalanma hesab edilə bilməz. Bu baxımdan Neftçala Rayon Polis Şöbəsi tərəfindən Vəfa Nağıyevanın tutulması ilə bağlı yol verdiyi hərəkətlər qanunsuzdur. Bundan əlavə, Vəfa Nağıyevanın tutulması üçün prokuror razılığı alınıb-alınmadığı da bəlli deyil. Hətta belə razılıq alınmış olsa belə DSK-nın qarşısında etiraz aksiyası keçirmək heç bir halda cinayət əməli yaxud inzibati xəta kimi qiymətləndirilə bilməz”.

Rəhimli qeyd edib ki, hüquq normalarına əsasən Vəfa Nağıyevanın Neftçala Rayon Polis Şöbəsi tərəfindən DSK-nın qarşısında təşkil etdiyi etiraza görə tutulması həm onun qeydə alınmış namizəd kimi Seçki Məcəlləsi ilə müəyyənləşdirilmiş toxunulmazlıq təminatıdır pozuntusudur, həm də Azərbaycan Respublikası Konstitusiyası ilə müəyyən edilən sərbəst toplaşmaq azadlığı hüququnun pozuntusu kimi qiymətləndirilməlidir.

“Eləcə də, göstərilənlərə əsasən Vəfa Nağıyevanın seçki üzrə vəkilinin tutulması da hüquqaziddir. Hadisəni işıqlandıran jurnalistin tutulması isə Konstitusiyanın 47-ci və 50-ci maddələri ilə təmin edilən media azadlığı hüququnun pozuntusunu təşkil edir. Burada tutulma dedikdə polis tərəfindən faktiki olaraq saxlanılma başa düşülür. Hətta polis bundan sonra Vəfa Nağıyeva və digərlərini azad etsə belə, artıq onları faktiki olaraq saxlamaqla qeyd edilən hüquq pozuntularına yol verib”, deyə, hüquqşünas bildirib.

Amerikanın Səsi 

Metyu Miller

Birləşmiş Ştatlar ATƏT-in müşahidə missiyasının Azərbaycanda 1 sentyabr növbədənkənar parlament seçkiləri ilə bağlı narahatlıqlarını bölüşdüyünü bildirib.

“Biz ATƏT-in Demokratik Təsisatlar və İnsan Haqları Bürosunun monitorinq missiyasının Azərbaycanda 1 sentyabr parlament seçkiləri ilə bağlı müşahidə və narahatlıqlarını bölüşürük”, ABŞ Dövlət Departamentinin sözçüsü Metyu Miller çərşənbə günü baş tutan mətbuat konfransında Turan agentliyinin sualına cavab olaraq qeyd edib.

ATƏT-in Demokratik Təsisatlar və İnsan Haqları Bürosunun (DTİHB) və ATƏT Parlament Assambleyasının (PA) birgə müşahidə missiyası növbədənkənar parlament seçkilərinin həqiqi plüralizmə imkan verməyən və rəqabətsiz yarışa səbəb olan məhdudlaşdırıcı siyasi-hüquqi mühitdə keçdiyini vurğulayıb.

ATƏT müşahidəçilərinin sentyabrın 2-də yaydığı ilkin bəyanatda seçkilərin hüquqi bazasının demokratik seçkilər üçün əlverişli olmadığı, beynəlxalq standartlara və ATƏT qarşısında götürülən öhdəliklərə zidd olaraq ifadə, birləşmə və toplaşma kimi fundamental azadlıqlara əsassız məhdudiyyətlərin hələ də qalmaqda olduğu, ATƏT DTİHB və Venesiya Komissiyasının tövsiyələrinin yerinə yetirilmədiyi qeyd edilir.

“Biz Azərbaycanı ATƏT-in əvvəlki, eləcə də qarşıdan gələn tövsiyələrini yerinə yetirməyə, Konstitusiyasına və beynəlxalq öhdəliklərinə uyğun olaraq öz xalqının fundamental azadlıqlardan istifadə etməsinə şərait yaratmağa çağırırıq”, Metyu Miller deyib.

Daha əvvəl Avropa İttifaqı (Aİ) da Azərbaycanda son parlament seçkilərinin rəqabətdən məhrum və məhdudlaşdırıcı şəraitdə baş tutduğunu qeyd edərək Azərbaycan hakimiyyətini ATƏT DTİHB-nin tövsiyələrini yerinə yetirməyə çağırıb.

Aİ-nin xarici məsələlər üzrə sözçüsü Peter Stano səslərin hesablanmasında ciddi pozuntulara yol verilməsi, mühüm təhlükəsizlik tədbirlərinin görülməməsi, seçkilərin müxalif səslərə qarşı davamlı repressiya fonunda keçməsi ilə bağlı beynəlxalq müşahidəçilərin narahatlıqlarını bölüşüb.

Rəsmi Bakı isə tənqidləri qərəzli hesab edir və seçkilərin qanunvericiliyə uyğun keçirildiyini bildirir.

“ATƏT DTİHB-nin Azərbaycandakı seçkilərlə bağlı əvvəlcədən müəyyən edilmiş mənfi münasibətini təkrarlayan Aİ sözçüsü tərəfindən bu cür subyektiv iddia və qərəzli siyasi mülahizə etibarsızdır. Seçkilər ölkə Konstitusiyasına və onun milli qanunlarına tam uyğun olaraq keçirilib”, Azərbaycan Xarici İşlər Nazirliyinin mətbuat katibi Ayxan Hacızadə Aİ nümayəndəsinin bəyanatına cavab olaraq deyib.

Cəmi 37 faizlə son 30 ilin ən aşağı seçici fəallığı qeydə alınan növbədənkənar seçkilərin elan edilən ilkin nəticələrinə görə, iqtidarda olan Yeni Azərbaycan Partiyası (YAP) 67 mandat qazanıb. Daha 45 deputat yerini hökumətyönlü mövqeyi ilə tanınan müstəqil namizədlərin qazandığı bildirilir.

İqtidar təmsilçiləri seçkilərin qanunvericiliyə uyğun və şəffaf şəkildə keçirildiyini iddia etsə də, aparıcı müxalif qurumlar səsvermənin qanun pozuntuları, total saxtalaşdırma şəraitində keçirildiyini, reallığı əks etdirmədiyini qeyd edirlər.

Amerikanın Səsi