Möhyəddin Orucov

Dekabrın 10-da Bakı Ağır Cinayətlər Məhkəməsində İşçi Masası Həmkarlar İttifaqları Konfederasiyasının üzvü Möhyəddin Orucovun işi üzrə məhkəmə prosesi keçirilib. Prosesdə ittiham aktı səsləndirilib, daha sonra fəalın ifadəsi dinlənilib. Orucov bildirib ki, o, işlədiyi yerdə işçilərin istismar olunması ilə bağlı işçi haqlarını müdafiə etdiyi, həmçinin bu məsələni ictimailəşdirdiyi üçün şərlənərək həbs olunub.

Fəalın vəkili Nazim Musayevin sözlərinə görə, artıq məhkəmə istintaqı başlayıb, ondan öncə isə məhkəməyə bir neçə vəsatət verilib.

“Vəsatətlər sübutların təqdim edilməsi ilə bağlı oldu. Möhyəddin ifadəsini sona qədər verə bilmədi, növbəti məhkəmədə ifadəsini davam edəcək. Məhkəmənin iş saatı başa çatırdı deyə, onun ifadəsi yarımçıq qaldı”, vəkil bildirib.

Növbəti məhkəmə prosesi dekabrın 17-ə təyin olunub.

Möhyəddin Orucov ötən il dekabrın 13-də saxlanılıb.

Suraxanı Rayon Məhkəməsi Möhyəddin Orucova Cinayət Məcəlləsinin 234.4.3-cü (Qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, külli miqdarda törədildikdə) maddəsi ilə 4 aylıq həbs qətimkan tədbiri seçib. Bundan əvvəl də ictimai fəal 2023-cü ilin oktyabrın 18-də inzibati həbs cəzası almışdı.

O, Suraxanı Rayon Polis İdarəsinin 32-ci polis bölməsində işgəncəyə məruz qaldığını bildirib. Həmin dövrdə Möhyəddin Orucov Suraxanı Rayon Məhkəməsinin qərarı ilə 30 sutka müddətinə həbs cəzası alıb və 200 manat cərimə olunub.

İşçi Masasının sədri Afiəddin Məmmədov ötən il sentyabrın 20-də həbs olunub. O, Cinayət Məcəlləsinin 126.1-ci (qəsdən sağlamlığa ağır zərər vurma) və 221.3-cü (xuliqanlıq-silah qismində istifadə olunan əşyalardan istifadə etməklə törədildikdə) maddələri ilə ittiham olunurdusa, indi Məmməddov Cinayət Məcəlləsinin 126.2.4-cü (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma), 221.3-cü (xuliqanlıq-silah qismində istifadə olunan əşyalardan istifadə etməklə törədildikdə) və 228.4-cü (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə, milli geyim ləvazimatı hesab olunan ərazilərdə və ya ovçuluq peşəsi ilə bağlı olaraq soyuq silahı gəzdirmə halları istisna olmaqla) maddələri ilə ittiham olunur. İttihamlar sübut olunarsa Məmmədovu 6 ildən 11 ilədək həbs gözləyir.

İşçi Masasının İdarə Heyəti üzvü Ayxan İsrafilov isə ötən ilin avqust ayında həbs olunub. Avqustun 12-də Nərimanov Rayon Məhkəməsinin qərarı ilə onun barəsində 4 aylıq həbs qətimkan tədbiri seçilıb. Ayxan İsrafilov Cinayət Məcəlləsinin 234.1-1-ci (satış məqsədi olmadan qanunsuz olaraq narkotik vasitələri və ya psixotrop maddələri xeyli miqdarda əldə etmə, saxlama, hazırlama, emal etmə, daşıma – külli miqdarda törədildikdə) maddəsi ilə ittiham olunur. Bu ilin aprel ayında məhkəmənin qərarı ilə Ayxan İsrafilov 3 il müddətinə azadlıqdan məhrum edilib.

Yanvar ayında İşçi Masasının digər üzvü Elvin Mustafayev Cinayət Məcəlləsinin 234.1-1-ci maddəsi ilə 3 il müddətinə azadlıqdan məhrum edilib.

2023-cü ilin avqustun 1-də İşçi Masası Həmkarlar İttifaqları Konfederasiyası və Kuryer Birliyi Həmkarlar İttifaqı yeni qüvvəyə minmiş qanunla bağlı bəyanat yayıb. Elə həmin gün bir qrup moped sürən kuryer polislərin onların nəqliyyat vasitələrini cərimə meydançasına aparmasına etiraz olaraq aksiya keçirib. Elvin Mustafayev aksiyanın təşkilatçılarından biri olub.

Fəallar ittihamları qəbul etmir və həbslərini siyasi fəaliyyətləri ilə əlaqələndirirlər.

Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edirlər.

Amerikanın Səsi 

Anar Məmmədli

Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədli qanunsuz olaraq saxlanıldığı Bakı İstintaq Təcridxanasından Beynəlxalq İnsan Hüquqları Günü ərəfəsində insan hüquqları müdafiəçilərinin, müstəqil media nümayəndələrinin və siyasi fəalların həbs edilməsinə münasibət bildirib:

“Əfsuslar olsun ki, 10 dekabr Beynəlxalq İnsan Hüquqları Gününün 75-ci ildönümü ölkəmizdə növbəti dəfə İnsan Hüquqlarının müdafisində böhranla müşayiət olunur.

Mövcud böhranın əsas göstəriciləri sırasında yüzlərlə vətəndaşımızın tənqidi fikirlərinə görə siyasi repressiyaya məruz qalması, dövlətin ifadə azadlığına barışmaz münasibəti, məhkəmə-hüquq sisteminin ədalətsizliyi, vətəndaşların ləyaqətli və firavan həyat arzusu ilə ölkədən kütləvi şəkildə köçməsi halları yer alır.

Belə acınacaqlı vəziyyətdə yeganə təsəllimiz – insan hüquqlarını təbliğ və müdafiə edənlər arasında siyasi təkamül yolu ilə ölkəmizin dəyişəcəyinə inamın sarsılmamasıdır.

Özünün haqqları ilə yanaşı başqalarının da hüquqlarını müdafiə edən vətəndaşlarımızın sayı tükənməyincə, ölkəmizdə insan hüquqları uğrunda mübarizə başa çatmayıb. Bu mübarizədə məğlubiyyət kimi görünən bu vəziyyət ötəri və müvəqqətidir. İnsan hüquqları uğrunda mübarizə sonu görünməyən davamlı prosesdir və bu prosesi hər gün yenidən başlamaq gərəkdir. Bu prosesə töhvə verən hər kəsə uğurlar arzulayıram!”

Dekabrın 9-da Müsavat Partiyası Divanının iclasında Azərbaycanda ictimai-siyasi vəziyyət müzakirə olunub.

Partiyanın mətbuat xidməti bildirib ki, Divan üzvləri ölkədə siyasi motivli həbslərə son qoyulması ilə bağlı yerli və beynəlxalq ictimaiyyətin tələb və çağırışlarına baxmayaraq, davam edən repressiyaları pisləyiblər.

Partiya əsassız olaraq saxlanılan politoloq Azər Qasımlının və siyasi motivlərlə həbs olunmuş digər şəxslərin dərhal azadlığa buraxılmasını tələb edib.

Turan 

Azərbaycanda 2025-ci il yanvarın 29-na təyin edilən bələdiyyə seçkilərində 1531 nəfərin namizədliyi irəli sürülüb.

Bu barədə dekabrın 9-da Mərkəzi Seçki Komissiyasının (MSK) sədri Məzahir Pənahov bidlirib.

Onun sözlərinə görə, namizədlərin sayı artacaq.

MSK-nin məlumatına görə, yanvarın 29-da 685 bələdiyyəyə seçkilər keçiriləcək. Seçkilərdə bələdiyyələr üzrə ümumilikdə 8 min 71 bələdiyyə üzvü seçiləcək.

Azərbaycanda indiyə qədər 6 bələdiyyə seçkisi keçirilib. Seçkilər 1999, 2004, 2009, 2011, 2014 və 2019-cu illəri əhatə edir.

Turan 

Azər Qasımlı

Dekabrın 8-də Siyasi Menecment İnstitutunun rəhbəri Azər Qasımlı Cinayət Məcəlləsinin 182.2.3-cü (Hədə-qorxu ilə tələb etmə, zor tətbiq etmə ilə törədildikdə) maddəsilə 48 saata şübhəli şəxs qismində saxlanılıb.

Bu barədə vəkil Aqil Layıc Turana bildirib.

“Azər Qasımlıya borclu olan bir şəxs var. Məhkəmələri Qasımlı udmuşdu. İndi həmin adamı çağırıblar, guya Azər Qasımlı ondan hədə-qorxu ilə pul tələb edib”, vəkil qeyd edib.

Layıcın sözlərinə görə, Azər Qasımlı ittihamı qəbul etmir və saxlanılmasının ictimai-siyasi fəaliyyəti ilə bağlı olduğunu bildirdi.

*   *   *

Siyasi Menecment  İnstitutunun direktoru, politoloq Azər Qasımlının saxlanıldığı bildirilir.

“Səhər Azər oğlumuzu futbol məşqinə aparıb. Sonradan mənə zəng edib dedi ki, uşağı məm götürüm.  Səbəbini  soruşduqda, o, sadəcə  yalnız “özün bilirsən” deyə bilib və əlaqə kəsilib”, – deyə politoloqun həyat yoldaşı Samirə Qasımlı Turan-a bildirib.

Hazırda Azər Qasımlının telefonuna zəng çatmır.

Noyabrın 22-də Azər Qasımlı səfərə getmək istəyəndə hava limanından geri qaytarılıb. Ona bildiriblər ki, Bakı Şəhər Baş Polis İdarəsi (BŞBPİ) ölkədən çıxışını qadağan edib. Üç gün sonra o, BŞBPİ-də bir neçə cinayət işi üzrə şahid qismində dindirilib.

Azər Qasımlı Azərbaycan hakimiyyətinin daxili və xarici siyasətinin tənqidçisi kimi tanınır. O, sosial şəbəkələrdəki paylaşımlarında və müsahibələrində son bir ildə jurnalistlərin və fəalların həbslərinin yeni dalğasını Azərbaycanın xarici siyasətində Kremllə yaxınlaşma istiqamətində dönüşlə əlaqələndirib.

Turan