Dekabrın 28-də Bakı Ağır Cinayətlər Məhkəməsində “Abzas Media işi” üzrə növbəti məhkəmə prosesi keçirilib.

Hakim Rasim Sadıxovun sədrliyilə keçirilən prosesdə prokuror ittiham aktını elan edib. Təqsirləndirilən şəxslər isə heç bir ittiham üzrə özlərini təqsirli bilməyiblər.

İş üzrə həbs olunan “Abzas Media”nın baş redaktoru Sevinc Abbasova (Vaqifqızı) çıxış edərək bildirib ki, bu qədər qaçaqmalçılıq baş veribsə, Gömrük Komitəsinin bundan niyə məlumatı olmayıb?

“Abzas Media, Toplum TV və Meydan TV işləri üzrə onlarla jurnalist qaçaqmalçılıqda ittiham edilir. Biz ölkəyə bu qədər pul gətirmişiksə, necə olub ki, Gömrük Komitəsinin sədrinin xəbəri olmayıb. Dövlət Gömrük Komitəsinin sədri Şahin Bağırov hara baxırdı? Onun məhkəməyə gəlib bu suala cavab verməsini tələb edirəm!”, deyə, Vaqifqızı məhkəmədə qeyd edib.

Jurnalistlər ötən iclasda olduğu kimi, bu gün də kollegiyada olan üç hakimdən ikisinə etiraz ediblər. Onlar bildiriblər ki, hakimlər illərlə siyasi sifarişlər icra edib, təqsirsiz insanlar haqqında ittiham hökmləri çıxarıblar.

“Rasim Sadıxov, siz siyasi həbslərdə ad çıxarmış hakimlərdən birisiniz. Eyni şəkildə də yanınızda əyləşən Novruz Kərimov – MTN-in keçmiş əməkdaşı. O MTN-in ki, imicini təmizləmək üçün adını dəyişib DTX qoysalar da, xeyri olmadı. Keçmişi təmiz olmayan adamların indi bu təmiz adamları mühakimə etməsi doğru deyil. Bu işdə sizləri görmək istəmirik”, – Vaqifqızı etirazını əsaslandırarkən deyib.

Digər təqsirləndirilən jurnalistlər də etirazı müdafiə ediblər.

“AzadlıqRadiosu”nun əməkdaşı Fərid Mehralızadə vurğulayıb ki, sənəd üzərində Azərbaycanda hakimiyyətin qolları – qanunverici, icraedici və məhkəmə bir-birindən ayrıdır, müstəqildir, amma reallıqda belə deyil:

“Siz hakimlər tutduğunuz vəzifənin haqqını vermirsiniz”.

Fərid Mehralızadə işin qanunsuz və Cinayət Prosesual Məcəlləsinə zidd şəkildə aparıldığını bildirib. O qeyd edib ki, hazırda prosesual pozuntulara aydınlıq gətirmək yalançı prokurorun yox, məhkəməyə sədrlik edən hakimin işidir. Prokuroru yalançılıqda günahlandırdıqdan sonra Mehralızadə fikrini davam etdirib:

“Bəli, siz yalançı prokurorsunuz. Əgər Buratino olsaydınız, burnunuz divara qədər uzanardı”.

“AbzasMedia işi”üzrə məhkəməyə media nümayəndələrini buraxmayıblar. Bu isə təqsirləndirilən jurnalistlərin etirazına səbəb olub. Onlar deyiblər ki, əgər həmkarlarını məhkəmə zalına buraxmasalar, özləri də prosesdə iştirakdan imtina edəcəklər. Bundan sonra məhkəmə binasının çölündə qalan jurnalistlər məhkəməyə buraxılıb.

Məhkəmədə prokuror ittiham aktını elan edərkən bildirib ki, müxtəlif donor təşkilatlardan Azərbaycanda qeydiyyatdan keçirilməyən qrantlar alınıb, həmin vəsaitlər qaçaqmalçılıq yoluyla ölkəyə gətirilib. İttihamda 64 min manat vergidən yayınma, 541 min manatlıq qanunsuz sahibkarlıq və s. əməllərdən bəhs olunur.

Jurnalistlərə qarşı cinayət yolu ilə əldə olunan əmlakın leqallaşdırılması, qanunsuz sahibkarlıq, qaçaqmalçılıq, saxta sənədlərdən istifadə, vergidən yayınma da daxil olmaqla, 7 maddə ilə ittiham irəli sürülüb.

İttihama münasibət bildirən jurnalistlərin heç biri özünü təqsirli bilməyib. Onlar deyiblər ki, prokurorun elan etdiyi ittihamın ümumiyyətlə, mahiyyəti aydın deyil.

“Biz araşdırma jurnalistikası ilə məşğul olmuşuq, hökumətin başında dayanan adamların korrupsiya əməllərini ifşa eləmişik, buna görə də buradayıq. Bunu bütün aləm bilir. Prokurorluq saxta sübutlarla, “qorotdel”in ofisimizə atdığı 40 min avro ilə başqa don geyindirməyə çalışır. Hökumət də bununla özünü rüsvay edir”, deyə, Ülvi Həsənli bildirib.

Jurnalist Elnarə Qasımova məhkəmədə deyib ki, qaçaqmalçılıq, çirkli pulların leqallaşdırılmasıyla bağlı araşdırma aparmaq istəyənlər üzünü bu ölkənin idarəçiliyində olanlara tərəf tutsunlar.

Hafiz Babalı isə vurğulayıb ki, 35 ildir korrupsiyanı ifşa edən onun kimi jurnalisti mütəşəkkil dəstə üzvü kimi təqdim eləmək hakimiyyətin özü üçün üz qarasıdır.

“Mən də həbsimi siyasi sifariş hesab edirəm. Cinayət Məcəlləsindəki heç bir maddəyə əsas verəcək pozuntuya yol verməmişəm. Amma Azərbaycanda qeyri-rəsmi bir Cinayət Məcəlləsi də var və orada söz-ifadə azadlığı cinayət sayılır. Mən o cinayəti törətmişəm”, – bunu isə Mehralızadə ittihama münasibət bildirərkən deyib.

Məhəmməd Kekalov isə bildirib ki, o da özünü təqsirli bilmir. Onun sözlərinə görə, ittihamlar onun ifadələri əsasında verilsə də, dediklərində cinayət xarakterli heç nə yoxdur.

Jurnalistlərin məhkəməsi yanvarın 21-də davam edəcək.

“Abzas Media” işi ilə bağlı nə baş verib?

“Abzas Media” ilə bağlı cinayət işi üzrə saytın direktoru Ülvi Həsənli ötən ilin noyabrın 20-də həbs olunub. İstintaqın həmin gün onun evində və “Abzas Media”nın ofisində axtarış apardığı və ofisdən 40 min avro pul tapıldığı bildirilib.

Daha sonra noyabrın 20-də direktor müavini Məhəmməd Kekalov, 21-ə keçən gecə xaricdən qayıdanda hava limanında saytın baş redaktoru Sevinc Vaqifqızı həbs olunub. Həmin iş üzrə jurnalistlər Nərgiz Absalamova, Elnarə Qasımova və araşdırmaçı jurnalist Hafiz Babalı da həbs olunub.

Mayın 30-da isə “Abzas Media” işi üzrə iqtisadçı Fərid Mehralızadə saxlanılıb. İyunun 1-də Xətai Rayon Məhkəməsi iqtisadçı barəsində 3 ay 20 gün müddətinə həbs qətimkan tədbiri seçib. Mehralızadə məhkəmədə təqsiri olmadığını və “Abzas Media” ilə heç bir işgüzar fəaliyyətinin olmadığını deyib.

Onların hamısına Cinayət Məcəlləsinin 206.3.2-ci (öncədən əlbir olan bir qrup şəxs tərəfindən qaçaqmalçılıq) maddəsi ilə ittiham verilib. Bu ilin avqust ayında isə “Abzas Media işi” üzrə həbs olunanlara qarşı 7 maddə ilə əlavə ittihamlar irəli sürülüb. Onlar Cinayət Məcəlləsinin 192.3.2-ci, 193-1.3.1-ci, 193-1.3.2-ci, 206.4-cü, 320.1-ci və 320.2-ci, 213.2.1-ci maddələri ilə (xüsusilə külli miqdarda gəlir əldə etməklə qanunsuz sahibkarlıq, mütəşəkkil dəstə şəklində cinayət yolu ilə əldə edilmiş xeyli miqdarda pul vəsaitlərini leqallaşdırma, mütəşəkkil dəstə tərəfindən törədilmiş qaçaqmalçılıq, sənəd saxtalaşdırma və saxta sənədlərdən istifadə etmə, mütəşəkkil dəstə halında vergi ödəməkdən yayınma) maddələri ilə ittiham olunurlar.

Həmin iş üzrə bir sıra vətəndaş cəmiyyəti nümayəndəsi müxtəlif vaxtlarda Bakı Şəhər Baş Polis İdarəsində şahid qismində dindirilib, daha sonra sərbəst buraxılıblar.

Həbs olunanların heç biri özünü təqsirli bilmir, həbslərinin peşə fəaliyyətləri ilə bağlı olduğunu deyir.

Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.

Noyabrın 18-də Sərhədsiz Reportyorlar təşkilatı jurnalistlərə qarşı pis rəftarı qınayıb və onların azad edilməsinə dair çağırışını yeniləyib.

Avropa Şurasının İnsan Hüquqları üzrə Komissarı Maykl O’Flaherti də Azərbaycan Prezidenti İlham Əliyevə ünvanladığı məktubunda jurnalistlərin, hüquq müdafiəçilərinin və fəalların həbsi ilə bağlı narahatlıq ifadə edib, onların azad edilməsinə çağırıb.

Rəsmi Bakı isə jurnalistlərin əsassız həbsi ilə bağlı ittihamları rədd edir, ölkədə bütün hüquq və azadlıqların təmin edildiyini bəyan edir.

Amerikanın Səsi 

Teymur Kərimov

“Kanal 11” internet televiziyasının rəhbəri Teymur Kərimova 8 il həbs cəzası verilib. Üstəlik, əlavə cəza kimi, ona 2 il də jurnalist fəaliyyətilə məşğul olmaq qadağan edilib.

Teymur Kərimovla birlikdə mühakimə olunan reportyor İstək Totiyevaya isə şərti cəza verilib. Bu barədə dekabrın 28-də Bakı Ağır Cinayətlər Məhkəməsində Azad Məcidovun sədrlik etdiyi hakimlər kollegiyası hökm çıxarıb.

Onlar Cinayət Məcəlləsinin 182-ci (hədə-qorxu ilə tələb-etmə) maddəsilə – Fərrux Ələkbərov adlı şəxsdən saytdan materialın silinməsi üçün 10 min manat pul tələb edib, sonda 1000 manat almaqda təqsirli bilinib.

Ancaq Teymur Kərimov deyir ki, yalandır, nə Fərrux Ələkbərovdan pul tələb eləyib, nə də alıb. Elə bu məsələnin araşdırılması üçün də məhkəmədə telefon anten məlumatlarının sorğu ilə alınmasını istəyirdi. Amma hakim bunu etməyib. Onun sözlərinə görə, istintaqda yol verilən çoxsaylı qanun pozuntuları məhkəmədə də davam edib:

“Azad Məcidov o hakimlərdəndir ki, onun əlindən adamlar qan ağlayır…”

Etiraz aksiyalarını, vətəndaşların hüquqlarının pozulması ilə bağlı hadisələri çəkib yaydığına görə sifarişlə həbs edildiyini vurğulayan Teymur Kərimov son sözündə bildirib ki, saxlanılarkən Baş Mütəşəkkil Cinayətkarlıqla Mübarizə İdarəsində işgəncələrə məruz qalıb:

“Sonda məni dubinka ilə zorlamaqla təhdid edib ifadə aldılar”.

Teymur Kərimov son sözündə əlavə edib ki, himayəsində 4 azyaşlı uşağı var, evin yeganə gəlir gətirənidir. Hazırda ailəsi dost-tanışının maddi dəstəyi sayəsində dolanır:

“Necə olur, dövlətin 27 milyonunu yeyən Səlim Müslümovu Bakı Ağır Cinayətlər Məhkəməsi azadlıqda saxlayır, heç bir günahı olmayan adamları illərlə həbsxanada çürüdür? Budur sizin vicdanınız?”

Xatırlatma

Teymur Kərimov 2023-cü il dekabrın 11-dən həbsdədir. O, polislərin Qarabağ müharibəsi əlillərini döyməsini çəkib yaydığına görə cəzalandırıldığını deyir. Jurnalist saxlanılarkən və daha sonra etirafedici ifadə verməsi üçün Baş Mütəşəkkil Cinayətkarlıqla Mübarizə İdarəsində işgəncəyə məruz qaldığını bildirib.

Daxili İşlər Nazirliyinin mətbuat xidməti T.Kərimovun hədələnməsi, işgəncəyə məruz qalması haqda iddiaları rədd edib.

Son 13 ay ərzində Azərbaycanda 30-dan artıq jurnalist və bloqer həbs edilib. Onlar, əsasən, qaçaqmalçılıq, hədə-qorxu ilə tələb etmə və başqa ittihamlarla üzləşiblər.

Jurnalistlər ittihamları qurama sayır və bunu peşə fəaliyyətlərinə bağlayırlar. Rəsmilərsə ölkədə jurnalistlərin peşə fəaliyyəti ilə bağlı həbs olunmalarına dair fikirləri qəbul etmirlər.

AzadlıqRadiosu

Dekabrın 28-də Xətai Rayon Məhkəməsində “Toplum TV işi” üzrə saxlanılan “III Respublika Platforması”nın spikeri Akif Qurbanov, qurumun qurucu heyət üzvü Ruslan İzzətli, “Toplum TV”nin təsisçisi Ələsgər Məmmədli, videoredaktor Müşfiq Cabbar, “Demokratik Təşəbbüslər İnstitutu”nun əməkdaşları Əli Zeynal, İlkin Əmrahov və Ramil Babayev haqqındakı həbs müddəti daha 3 ay – aprelin 6-dək uzadılıb.

Onlar barəsində seçilmiş həbs qətimkan tədbrinin vaxtı yanvarın 6-da başa çatır.

Hər bir məhkəmə iclasında da Bakı Şəhər Baş Polis İdarəsinin müstəntiqi təqdimatı müdafiə edib, təmin olunmasını istəyib.

Müstəntiq bildirib ki, istintaq davam edir, bu müddətdə təqsirləndirilən şəxslərin həbsdən buraxılması istintaqın gedişinə mane ola bilər. Vəkillər də, təqsirləndirilən şəxslərin özləri də təqdimata etiraz ediblər, lakin müdafiə tərəfinin arqumentlərinin nəticəsi olmayıb.

Təqsirsiz olduğunu vurğulayan Ələsgər Məmmədli məhkəməyə təqdimatın əsassızlığını sübut etmək üçün 6 səhifəlik müdafiə nitqi yazıb gətirsə də, Sülhanə Hacıyeva onu səsləndirməyə imkan verməyib. Nəticədə əsəbiləşən Ələsgər Məmmədlinin səhhəti pisləşib, təzyiqi qalxıb.

Akif Qurbanovun məhkəməsində də qalmaqal yaşandığı bildirilir.

“Toplum TV” ilə bağlı cinayət işinin siyasi sifarişlə başlandığını deyən Akif Qurbanovun çıxışını dayandıran Sülhanə Hacıyeva deyib:

“Bura siyasət meydanı deyil, heç kim hakimiyyəti tənqid edə bilməz”.

Akif Qurbanov Sülhanə Hacıyevanın elə özünün də hakim olmadığını və siyasi sifarişlərə xidmət etdiyini vurğulayaraq, ondan heç bir qanuni qərar və ədalət gözləntisi olmadığını bildirib.

Prosesi yarımçıq tərk edən Sülhanə Hacıyeva bir neçə saniyə sonra geri qayıdaraq, təqdimatın təmin olunduğunu elan edib.

Təqsirləndirilən jurnalistlərdən Əli Zeynalovun vəkili Fariz Namazlı bildirib ki, qərardan 3 gün ərzində apellyasiya şikayəti verəcək.

Digər vəkillər də şikayət vermək fikrindədir.

“Müşfiq Cabbarovun nə həbs olunmasına zərurət vardı, nə də həbs müddətinin uzadılmasına. Amma elədilər. Əvvəlki təqdimatların eynisi idi. Onun həbsdə saxlanması üçün heç bir əsas yoxdur. Sonuncu dəfə həbsdə saxlanma müddəti oktyabrda uzadılmışdı. O vaxtdan bu yana onun iştirakı ilə hansı istintaq hərəkəti aparılıb? Qanunda belə boşluq var. İstintaq orqanı da məhkəmə qərarı çətiri altında bundan istifadə edir, adamlar uzun müddət həbsdə saxlanılır”, deyə, Müşfiq Cabbarın vəkili Nazim Musayev bildirib.

“Toplum TV işi” üzrə nə baş verib?

Martın 6-da hüquq-mühafizə orqanları “Toplum TV”, “Demokratik Təşəbbüslər İnstitutu”, həmçinin “III Respublika Platforması”nın ofislərində, bir neçə əməkdaşın evində axtarış aparıb. Məlumata görə, iyirmidən çox əməkdaş polis tərəfindən saxlanılıb, bir neçə saat sonra əməkdaşların əksəriyyəti sərbəst buraxılıb. Lakin “Toplum TV”nin ofisinin qapısı möhürlənib. “Toplum TV”nin jurnalistləri Fərid İsmayılova (polisin nəzarətinə verilməklə ev dustaqlığı qətimkanim tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı qətimkan tədbiri seçilib) və “Demokratik Təşəbbüslər İnstitutu”nun rəhbəri, həmçinin “III Respublika Platforması”nın spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs qətimkan tədbiri seçilib.

Martın 8-də “III Respublika Platforması”nın qurucu heyət üzvü Ruslan İzzətli və “Toplum TV”nin həmtəsisçisi Ələsgər Məmmədli həbs olunub. Xətai Rayon Məhkəməsi onlar barəsində 4 aylıq həbs qətimkan tədbiri seçib. Hər ikisi də qaçaqmalçılıqda ittiham olunur.

Bu ilin iyul ayında bütün həbs olunanların həbs qətimkan tədbiri daha 3 ay uzadılıb.

Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.

Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edir.

Amerikanın Səsi