Əfqan Sadıqov

Gürcüstanda həbs edilən Azərbaycanın Azel.TV saytının rəhbəri Əfqan Sadıqov saxlandığı Tbilisi təcridxanadan ailəsinə zəng edib.

Bu barədə jurnalistin həyat yoldaşı Sevinc Sadıqova Amerikanın Səsinə bildirib.

Onun sözlərinə görə, Əfqan Sadıqov 108-ci gündür aclıq aksiyasını davam etdirir .

“Həkimlərin verdiyi içir, içində vitamin olan mayeni qəbul edir, amma bununla belə getdikcə halı pisləşir. Çünkü həkimlər o mayenin sadəcə müvəqqəti olaraq şəkərini və təzyiqini stabilləşdirmək üçün olduğunu bildiriblər”, Sadıqova əlavə edib.

Sevinc Sadıqova qeyd edib ki, həkimlər Əfqandan aclığı dayandırmağı xahiş ediblər.

“ O, 35kq çox çəti itirib. Bu gedişlə o, həyatını itirəcək, çox ağır durumdadır”, Əfqan Sadıqovun həyat yoldaşı bildirib.

Yanvarın 15-də Tbilisi Apellyasiya Məhkəməsi Gürcüstanda ekstradisiya məqsədi ilə barəsində həbs qətimkan tədbiri seçilmiş Azərbaycanın Azel.TV saytının rəhbəri Əfqan Sadıqovun Azərbaycana ekstradisiya olunması ilə bağlı Tbilisi Şəhər Məhkəməsinin qərarından şikayətə baxacaq.

2024-cü il noyabrın 28-də Tbilisi Şəhər Məhkəməsi Sadıqovun Azərbaycana ekstradisiya olunması barədə qərar qəbul edib.

Müdafiə tərəfi Avropa İnsan Hüquqları Məhkəməsinə müraciət edib.

Jurnalistin hüquqlarını müdafiə edən Gürcüstanın Sosial Ədalət Mərkəzi bildirib ki, bu ölkənin Baş Prokurorluğu vəsatətlə Tbilisi Şəhər Məhkəməsinə müraciət edərək Əfqan Sadıqovun Azərbaycana ekstradisiyasının məqbul olmasını xahiş edib.

Əfqan Sadıqov və müdafiəçiləri təqdim olunmuş vəsatətlə razılaşmır və məhkəmə qarşısında onun Azərbaycana ekstradisiyasının siyasi və özbaşına təqib məqsədi daşıdığını, bu da onun jurnalist fəaliyyəti, hakimiyyətin bu illər ərzində törətdiyi korrupsiya fəaliyyətini tənqid etməsi ilə bağlı olduğunu iddia ediblər.

Müdafiə tərəfi Sadıqovun Azərbaycana ekstradisiya ediləcəyi təqdirdə təqiblərə, işgəncələrə və qeyri-insani rəftara məruz qalacağını sübut edən faktları məhkəməyə təqdim edib. Müdafiə tərəfi bildirib ki, o, əvvəlki illərdə dəfələrlə siyasi təqiblərin qurbanı olub və bu, beynəlxalq təşkilatlar tərəfindən tanınıb.

Azərbaycanlı jurnalist Əfqan Sadıqov 2023-cü il dekabrın 24-dən Gürcüstandadır və Gürcüstan Ədliyyə Nazirliyi tərəfindən verilmiş müvəqqəti yaşamaq icazəsinə malikdir.

Ötən il iyulun 18-də Əfqan Sadıqov ailəsi ilə birlikdə Türkiyəyə getmək istəsə də, sərhədçilər ona icazə verməyiblər və bildiriblər ki, həyat yoldaşı və uşaqları sərhədi keçə bilər, lakin Əfqan Sadıqov yalnız Azərbaycana qayıda bilər. Gürcüstan tərəfində artıq Azərbaycanda ona qarşı cinayət işinin başlanması və axtarış elan edilməsi barədə məlumat olmasına baxmayaraq, səbəbi izah edilməyib.

Gürcüstan Prokurorluğunun məlumatına görə, Əfqan Sadıqova qarşı Azərbaycanda 2024-cü il mayın 9-da cinayət işi başlanıb. Mayın 13-də Azərbaycan tərəfi ekstradisiya tələbi ilə Gürcüstanın Baş Prokurorluğuna və Daxili İşlər Nazirliyinə müraciət edib.

2024-cü il avqustun 2-də Əfqan Sadıqov “Gürcüstanın Hüquqları”nın vəkili ilə birlikdə Gürcüstanın ombudsmanı ilə görüşüb və onun Türkiyəyə buraxılmaması faktını müzakirə ediblər. Daxili İşlər Nazirliyi Əfqan Sadıqovun Gürcüstandan buraxılmamasının səbəbi ilə bağlı ombudsmanın ofisinə məlumat verməyib, habelə ona qarşı Azərbaycanda cinayət işinin başlanması və axtarış qərarı barədə məlumat verməyib.

Azərbaycanlı jurnalist avqustun 3-də Tbilisidə Mərkəzi Kriminal Polisinin nümayəndələri tərəfindən həbs edilib və o vaxtdan Qldanidəki 8 saylı cəzaçəkmə müəssisəsindədir. Onun həyat yoldaşı və azyaşlı uşaqları həbsin şahidi olublar. Əfqan Sadıqov axtarışda olduğunu və barəsində Azərbaycanda cinayət işi açıldığını yalnız həbs olunandan sonra bilib.

İstintaqın məlumatına görə, Əfqan Sadıqovun həbsi Azərbaycanın tələbi ilə həyata keçirilib. O, Azərbaycan Cinayət Məcəlləsinin 188.2.2 və 182.2.4-cü maddələrində nəzərdə tutulmuş cinayətdə – “hədə-qorxu ilə tələb etmə, tanımadığı şəxsin külli miqdarda əmlakını ələ keçirmə, təhqiredici məlumat yaymaqla hədələmə”də ittiham olunur.

2024-cü il avqustun 4-də Tbilisi Şəhər Məhkəməsi azərbaycanlı jurnalist Əfqan Sadıqovun barəsində həbs qətimkan tədbiri olaraq ekstradisiya həbsi qərarı verib.

Avqustun 8-də “Gürcüstanın Hüquqları” təşkilatının vəkilləri qərardan apellyasiya məhkəməsinə şikayət verərək, Əfqan Sadıqovun 3 aylıq ekstradisiya həbs cəzasının ləğv edilməsini, alternativ olaraq məhkəməyə girovdan istifadə olunmasını təklif edib. Eyni zamanda, Əfqan Sadıqov və vəkilləri Gürcüstan Daxili İşlər Nazirliyinin Miqrasiya Departamentinə Gürcüstandan beynəlxalq sığınacaq verilməsi xahişi ilə müraciət edib.

2024-cü il avqustun 13-də Tbilisi Apellyasiya Məhkəməsinin İstintaq İşləri üzrə Kollegiyasının hakimi Giorgi Mirotadze “Gürcüstanın Hüquqları”nın apellyasiya şikayətini qəbuledilməz hesab edib və birinci instansiya məhkəməsinin qərarını dəyişməz saxlayıb.

Azel.TV saytının rəhbəri Əfqan Sadıqov bundan öncə 2020-ci ilin mayında hədə yolu ilə pul tələb etmək ittihamı ilə Azərbaycanda həbs edilib. 3 noyabr 2020-ci ildə məhkəmə onu yeddi il azadlıqdan məhrum edib. Apellyasiya Məhkəməsi cəza müddətini 6 ilədək, Ali Məhkəmə isə 4 ilədək azaldıb.

2 il 15 gün həbsdə saxlanıldıqdan sonra prezidentin əfv sərəncamı ilə azadlığa buraxılan Sadıqov həbsxanada 242 gün aclıq edib.

Yerli hüquq müdafiəçiləri onu siyasi məhbus kimi tanıyıb.

Amerikanın Səsi 

Rüfət Səfərov anası ilə

Həbsdə olan hüquq müdafiəçisi Rüfət Səfərovun anası Tahirə Tahirqızı yanvarın 6-da şahid qismində ifadə vermək üçün Bakı Şəhər Baş Polis İdarəsinə istintaqa çağırılıb. Ancaq o, ifadə verməkdən imtina edib. Bu barədə Turan-a Tahirqızı özü bildirib.

“Qanunvericiliyə uyğun olaraq ifadə verməkdən imtina etdim və müstəntiqə dedim ki, oğlum böhtan ittihamı ilə həbs edilib”, – Tahirqızı deyib.

O, ölkədən çıxmasının niyə qadağan olunduğunu da soruşub.

“Heç bir cavab ala bilmədim”, – qadın deyib.

O qeyd edib ki, həyat yoldaşı ağır Parkinson xəstəliyindən əziyyət çəkir və hər yarım ildən bir Türkiyədə müayinədən keçir. Son hadisələr, oğlunun həbsi onun vəziyyətini daha da ağırlaşdırıb.

“Yanvarın 7-nə bilet aldıq ki, həyat yoldaşımı İstanbula müayinəyə aparım. Ötən gün mənə məlum oldu ki, Azərbaycan Daxili İşlər Nazirliyi ölkədən çıxışa qadağa qoyub. Biz pensiyaçıyıq, biletləri öz  pensiyamıza almışıq və getməsək, pul itirəcəyik ki, bu da bizim üçün böyük məbləğdir”, – Tahirqızı deyib.

O ümidvar olduğunu bildirib ki, istintaq və  oğlunun həbsinin sifarişçiləri humanizm nümayiş etdirəcəklər və onun atasının xaricə getməsinə imkan verəcəklər.

“Hər dəqiqə istintaqdan zəng gözləyirik. Ümidimizi itirmirik. Sabah ümidimizin son günüdür”, – Tahirqızı deyib.

O həmçinin bildirib ki, yanvarın 6-da Rüfət istintaq təcridxanasından zəng edib: “O, atasının səhhətindən və xaricə getməsinin qadağan edilməsindən çox narahatdır”.

*Rüfət Səfərov dekabrın 3-də saxlanılıb. Ona qarşı Cinayət Məcəlləsinin üç maddəsi – 178.3.2 (külli miqdarda ziyan vurmaqla törədilmiş dələduzluq), 221.1 (xuliqanlıq) və 127.2.3-cü (qəsdən sağlamlığa daha az ciddi ziyan vurmaq, ümumi təhlükəli üsulla və ya xuliqan səbəblərindən) maddələri ilə ittiham irəli sürülüb. Ertəsi gün məhkəmə onu 4 ay müddətinə həbs edib.

Rüfət Səfərov ittihamları rədd edərək bildirib ki, hüquq- müdafiə fəaliyyətinə və ABŞ Dövlət Departamentinin mükafatına layiq görüldüyünə görə təqib olunur.

Turan 

Yanvarın 29-da keçiriləcək bələdiyyə seçkilərində 16 min 174 namizəd qeydiyyata alınıb. Bu barədə Mərkəzi Seçki Komissiyasının sədri Məzahir Pənahov bugünkü iclasda bildirib.

Onun sözlərinə görə, 8 429 namizəd 23 siyasi partiyanı təmsil edir.

Pənahov həmçinin bildirib ki, bu gün seçkiqabağı təşviqat mərhələsi başlayıb və səsvermə başlamadan bir gün əvvəl –  28 yanvar saat  8:00-da başa çatacaq.

Öz növbəsində Mərkəzi Seçki Komissiyası sədrinin müavini Rövzət Qasımov qeyd edib ki, seçkiqabağı təşviqat aparmaq üçün ölkə üzrə namizədlərə 3 730 açıq və 2 180 qapalı məkan ayrılıb.

İctimai Televiziya və Radioda və dövlət qəzetlərində pulsuz təşviqat aparmaq hüququ qazanan yeganə partiya hakim Yeni Azərbaycan Partiyası olub, çünki təkcəy o, bələdiyyələrin yarısından çoxunda namizədlərin olması  meyarına uyğundur.

Qasımov həmçinin bildirib ki,  namizədlərə ödənişli əsaslarla təşviqat üçün yer ayırmağa hazır olan 20 KİV Mərkəzi Seçki Komissiyasına müraciət edib.

Xatırladaq ki, yanvarın 29-da Azərbaycanda 685 bələdiyyədə 8 071 yerə seçkilər keçiriləcək.

Turan

“Azərbaycan Respublikasında bələdiyyə seçkilərinin hazırlanıb keçirilməsi üzrə Tədbirlərin Təqvim Planı”na əsasən, yanvarın 6-dan seçkiqabağı təşviqat başlayacaq. Təşviqat kampaniyası yanvarın 28-dək davam edəcək.

Seçki Məcəlləsinə əsasən, qeydə alınmış namizədlər, onların səlahiyyətli nümayəndələri və vəkil edilmiş şəxsləri, habelə namizədləri irəli sürmüş siyasi partiyalar, partiyaların blokları təşviqat apara bilərlər.

Dekabrda Azərbaycan Mərkəzi Seçki Komissiyası siyasi partiyalara və siyasi partiyaların bloklarına pulsuz efir vaxtı və kütləvi informasiya vasitələrində dərc üçün yer ayrılacağı barədə məlumat yayıb. Bu media qurumları İctimai Televiziya və Radio Yayımları Şirkəti, “Azərbaycan”, “Xalq qəzeti”, “Respublika” və “Bakı zəhmətkeşi” qəzetləridir.

Azərbaycanda bələdiyyə seçkiləri yanvarın 29-da keçirləcək.

Mərkəzi Seçki Komissiyasının son məlumatına görə, bələdiyyə seçkilərində 118 seçki dairəsini əhatə edən 685 bələdiyyə üzrə 15 min 696 nəfər namizəd qeydə alınıb.

Xatırladaq ki, ölkənin əksər siyasi partiyaları bələdiyyə seçkilərində iştirak edəcəyini bəyan edib. Yalnız Azərbaycan Xalq Cəbhəsi Partiyası bələdiyyə seçkilərinə qatılımayıb.

Amerikanın Səsi 

Anar Məmmədli

Norveç İnsan Hüquqları Evi Fondu yenidən Seçkilərin Monitorinqi və Demokratiyanın Tədrisi Mərkəzinin direktoru Anar Məmmədlini azad etməyə çağırır.

Təşkilat X platformasında xatırladır ki, azərbaycanlı hüquq müdafiəçisi Anar Məmmədli ötən ilin aprelin 29-dan istintaq təcridxanasında saxlanılır.

“Onun həbsi ölkədə vətəndaş cəmiyyətinə qarşı yenidən repressiyaların bir hissəsidir”, Norveç İnsan Hüquqları Evi Fondu əlavə edib.

Fond həmkarı Anar Məmmədlini və ölkədəki bütün siyasi məhbusları dərhal və qeyd-şərtsiz azad etməyə çağırır.

Ötən ilin noyabrın 20-də Bakı şəhər Xətai Rayon Məhkəməsi Seçkilərin Monitorinqi və Demokratiyanın Tədrisi Mərkəzinin direktoru Anar Məmmədlinin barəsində seçilmiş həbs qətimkan tədbiririnin müddətini daha üç ay uzadıb.

Vəkil qeyd edib ki, məhkəmədə iştirak edən Anar Məmmədli həbs müddətinin uzadılmasını əsassız sayıb və həbsini siyasi sifariş hesab etdiyini bildirib.

Anar Məmmədli ötən il aprelin 29-da saxlanılıb. Aprelin 30-da ona qarşı Cinayət Məcəlləsinin 206.3.2-ci (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.

Bir sıra beynəlxalq təşkilatlar, həmçinin ABŞ Dövlət Departamenti, ABŞ Səfirliyi Azərbaycan hökumətini Anar Məmmədli və digər haqsız həbs edilən şəxsləri dərhal azad etməyə çağırıb.

Anar Məmmədli Azərbaycanda seçki hüququ sahəsində ixtisaslaşmış qeyri-hökumət təşkilatının rəhbəridir. O, seçkilərlə bağlı tənqidi hesabatların müəllifidir.

Məmmədli ATƏT-in Demokratik Təsisatlar və İnsan Haqları Bürosunun beynəlxalq seçki monitorinq missiyasının tərkibində Türkiyə, Əfqanıstan, Almaniya, Norveç, Ukrayna, Gürcüstan, Qırğızıstan və Albaniyada keçirilən seçkilərin müşahidəsində iştirak edib.

Məmmədli bundan öncə 2013-cü il dekabrın 17-də həbs olunub. O, vergidən yayınma və vəzifə səlahiyyətlərindən sui-istifadə edərək, seçki və referendumun nəticələrini saxtalaşdırmaqda ittiham olunub.

Bakı Ağır Cinayətlər Məhkəməsi Anar Məmmədlini 5 il 6 ay müddətinə azadlıqdan məhrum edib. Məmmədli itiihamı qəbul etməyib və Amnesty International təşkilatı tərəfindən vicdan məhbusu elan edilib.

O, 2016-cı il martın 17-də Azərbaycan Prezidenti İlham Əliyevin əfv sərəncamı ilə azadlığa buraxılıb.

Anar Məmmədli 2014- cü il sentyabrın 29-da Avropa Şurasının Parlament Assambleyasının (AŞPA) payız sessiyasında Vatslav Havel mükafatına layiq görülüb.

Azərbaycanlı rəsmilər bir qayda olaraq Azərbaycanda söz və mətbuat azadlığının hədəf alınması, jurnalistlərin və fəalların əsassız həbsi ilə bağlı ittihamları rədd edir, Azərbaycanda fundamental hüquq və azadlıqların, eləcə də media azadlığının “tam olaraq” təmin edildiyini vurğulayır.

Rəsmi Bakı jurnalistlərə və fəallara qarşı cinayət işlərinin siyasi motivli olduğuna dair fikirlərin “kökündən yanlış və qəbuledilməz” olduğunu qeyd edib.

Amerikanın Səsi 

Tofiq Yaqublu

Milli Şuranın və Müsavat Partiyasının üzvü Tofiq Yaqublunun cinayət işi üzrə növbəti məhkəmə prosesi yanvarın 10-na təyin olunub.

Bu barədə onun qızı Nigar Həzi Amerikanın Səsinə bildirib.

O qeyd edib ki, hazırda Tofiq Yaqublunun işi üzrə məhkəmə prosesində sənədlərin tədqiqi mərhələsi davam edir.

Nigar Həzi deyib ki, dekabrın 29-da keçirilən məhkəmə prosesində Yaqublu müstəntiqin məhkəmədə ifadə verməsi barədə vəsatət qaldırıb.

Onun sözlərinə görə, daha sonra Tofiq Yaqublu və onun vəkilləri məhkəmədə vəsatətlər veriblər ki, mobil operatorlardan anten məlumatları alınsın.

Söhbət Almaniyaya getmək istədiyini və bundan ötrü pul verdiyini iddia edən Elşən Hüseynov və pulu gətirib Yaqubluya verdiyini deyən Elnur Məmmədovla bağlı bilgilərdən gedir.

Nigar Həzi bildirib ki, prokuror əleyhinə olsa da, hakim telefon anten bilgilərinin mobil operatorlardan alınmasıyla bağlı vəsatəti təmin edib.

Müstəntiqin çağırılıb dindirilməsinə prokuror da etiraz etməyib. Amma hakimlər müstəntiqi çağırıb dindirmək barədə vəsatəti baxılmamış saxlayıblar.

Bundan əlavə Nigar Həzi yanvarın 5-də istintaq təcridxanasında atası Tofiq Yaqublu ilə görüşəcəyini bildirib.

Tofiq Yaqublu ötən il dekabrın 14-də həbs edilib. Ona qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq), 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama və ya satma) və 320.2-ci (bilərəkdən saxta sənədlərdən istifadə etmə) maddələri ilə cinayət işi başlanıb.

İttiham aktında deyilir ki, Tofiq Yaqublu Elnur Məmmədovla cinayət əlaqəsinə girərək, özgənin əmlakını dələduzluq yolu ilə ələ keçirmək üçün sövdələşib. İddia olunur ki, Tofiq Yaqublu zərərçəkmiş kimi tanınan Elşən Hüseynovdan Almaniyada vətəndaşlıq verilməsi üçün 25 min avro, 10 min manat pul istəyib. Elnur Məmmədov isə həmin vəsaiti alaraq Tofiq Yaqubluya verdiyini deyir.

Tofiq Yaqublu isə bu iddiaları qəbul etmir və həbsini siyasi sifarişli, ittihamları isə saxta adlandırır.

Yerli və beynəlxalq təşkilatlar siyasətçini siyasi məhbus kimi tanıyıb.

Azərbaycan hökuməti isə ölkədə siyasi məhbus kimi tanınan şəxslərlə bağlı beynəlxalq tənqidləri qəbul etmir və qərəzli sayır. Hökumət rəsmiləri Azərbaycanda insanların siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edir.

Amerikanın Səsi 

Sərhədsiz Reportyorlar (RSF) təşkilatı “Toplum TV işi” üzrə saxlanılanların həbs müddətinin yenidən uzadılmasından narahatdır.

“Toplum TV-nin direktoru Ələsgər Məmmədlinin, jurnalist Müşfiq Cabbarovun və İlkin Əmrahovun həbs müddəti bir ildən artıqdır ki, yenidən uzadılıb. RSF onları azad etməyə və bu məhkəmə təzyiqinə son qoymağa çağırır”, RSF-nin X platformasında deyilir.

Dekabrın 28-də Xətai Rayon Məhkəməsində “Toplum TV işi” üzrə saxlanılan “III Respublika Platforması”nın spikeri Akif Qurbanov, qurumun qurucu heyət üzvü Ruslan İzzətli, “Toplum TV”nin təsisçisi Ələsgər Məmmədli, videoredaktor Müşfiq Cabbar, “Demokratik Təşəbbüslər İnstitutu”nun əməkdaşları Əli Zeynal, İlkin Əmrahov və Ramil Babayev haqqındakı həbs müddəti daha 3 ay – aprelin 6-dək uzadılıb.

Onlar barəsində seçilmiş həbs qətimkan tədbrinin vaxtı yanvarın 6-da başa çatır.

Hər bir məhkəmə iclasında Bakı Şəhər Baş Polis İdarəsinin müstəntiqi təqdimatı müdafiə edib, təmin olunmasını istəyib.

“Toplum TV işi” üzrə nə baş verib?

Martın 6-da hüquq-mühafizə orqanları “Toplum TV”, “Demokratik Təşəbbüslər İnstitutu”, həmçinin “III Respublika Platforması”nın ofislərində, bir neçə əməkdaşın evində axtarış aparıb. Məlumata görə, iyirmidən çox əməkdaş polis tərəfindən saxlanılıb, bir neçə saat sonra əməkdaşların əksəriyyəti sərbəst buraxılıb. Lakin “Toplum TV”nin ofisinin qapısı möhürlənib. “Toplum TV”nin jurnalistləri Fərid İsmayılova (polisin nəzarətinə verilməklə ev dustaqlığı qətimkanim tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı qətimkan tədbiri seçilib) və “Demokratik Təşəbbüslər İnstitutu”nun rəhbəri, həmçinin “III Respublika Platforması”nın spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs qətimkan tədbiri seçilib.

Martın 8-də “III Respublika Platforması”nın qurucu heyət üzvü Ruslan İzzətli və “Toplum TV”nin həmtəsisçisi Ələsgər Məmmədli həbs olunub. Xətai Rayon Məhkəməsi onlar barəsində 4 aylıq həbs qətimkan tədbiri seçib. Hər ikisi də qaçaqmalçılıqda ittiham olunur.

Bu ilin iyul ayında bütün həbs olunanların həbs qətimkan tədbiri daha 3 ay uzadılıb.

Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.

Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edir.

Amerikanın Səsi