Bəxtiyar Hacıyev

Yanvarın 13-də Bakı Ağır Cinayətlər Məhkəməsi ictimai fəal Bəxtiyar Hacıyevi 10 il azadlıqdan məhrumetmə cəzasına məhkum edib. Məhkəmə həmçinin onun mənzilinin və bank hesablarındakı pulunun müsadirə edilməsi, həmçinin onun azad edildikdən sonra 1 il ərzində təlim-tərbiyə işləri ilə məşğul olmasının qadağan edilməsi haqqında qərar verib.

Hacıyev hökmü siyasi motivli adlandırıb. Ona qarşı irəli sürülmüş bütün ittihamlar hüquqi olaraq təkzib edilib. Xuliqanlıq ittihamlarına gəlincə, onlar “hakimiyyətdəki kuratorlarının” əmrini yerinə yetirən Ülviyyə Alovlunun şikayəti əsasında saxtalaşdırılıb.

Hacıyev bütün digər iqtisadi ittihamları absurd adlandırıb. Bu ittihamlar guya onun Qərb təşkilatlarından qrant alması və Azərbaycanda dövlət çevrilişi törətməyi planlaşdırması haqqında anonim elektron məktub əsasında irəli sürülüb.

Hacıyev bu ittihamları “tamamilə uydurma” adlandırıb. Fəal həbsinin əsl səbəbinin Azərbaycanda insan hüquqlarını pozanlara qarşı sanksiyaların tətbiq edilməsinə yönəlmiş fəal işi olduğunu hesab edir.

O, DİN-in Mütəşəkkil Cinayətkarlığa qarşı Mübarizə Baş İdarəsinin əməkdaşına qarşı ünvanlı sanksiyalar tətbiq edildikdən dərhal sonra həbs olunub.

Hacıyev ailəsinə, jurnalistlərə (xüsusilə həbs edilmiş jurnalistlərə), həmçinin beynəlxalq qurumlara – ABŞ Dövlət Departamentinə, Konqresə, Aİ-yə, AŞPA-ya, Avropa Şurasına, Avropa Parlamentinə minnətdarlığını bildirib.

Eyni zamanda, o, sonradan özü də həbs edilən Rüfət Səfərovun onun müdafiəsinə verdiyi töhfəni xüsusi olaraq qeyd edib.

“Rüfət Səfərov son ana qədər insan hüquqlarını müdafiə edirdi. O, vəzifə və imtiyazların deyil, vicdanlı işin və insan hüquqlarının müdafiəsinin əsas olduğunu göstərib”, deyə Hacıyev qeyd edib.

* Bəxtiyar Hacıyev 2022-ci ilin dekabrında xuliqanlıq və məhkəməyə qarşı hörmətsizlik ittihamı ilə həbs edilib.

Ötən il iyunun 16-da fəala qarşı yeni ittihamlar irəli sürülüb. Bu ittihamlar əsasən maliyyə məsələlərilə – ayrılan qrantların təyinatı üzrə xərclənməməsilə bağlıdır. Ona həmçinin qanunsuz sahibkarlıq, cinayət yoluyla əldə edilmiş əmlakı leqallaşdırma, qaçaqmalçılıq, saxta sənədlərdən istifadə ittihamları irəli sürülüb.

Həmin ilin noyabrda isə ona daha bir ittiham verilib. Hacıyevə qarşı Cinayət Məcəlləsinin 213.1-ci (vergidən yayınma) maddəsilə daha bir ittiham irəli sürülüb.
Hacıyev özü və həmkarları prosesi Azərbaycan DİN-i və şəxsən nazir Vilayət Eyvazovu kəskin tənqid etdiyinə görə siyasi sifariş hesab edir.

Turan 

Ruslan İzzətli

Yanvarın 10-da Bakı Apellyasiya Məhkəməsi “Toplum TV işi” üzrə həbs edilmiş III Respublika Platformasının qurucu üzvü Ruslan İzzətlinin həbs müddətinin daha 3 ay uzadılması barədə qərardan verilən apellyasiya şikayətini təmin etməyib.

Bu barədə Amerikanın Səsinə Ruslan İzzətlinin həyat yoldaşı , jurnalist Günel Manaflı bildirib.

Onun sözlərinə görə, məhkəm ə birinci instanisya məhkəməsinin qərarını qüvvədə saxlayıb.

Günel Manaflı bildirib ki, bugünki məhkəmə prosesində Ruslan İzzətli də iştirak edib və o çıxışında həbsinin uzadılmasını ədalətsiz kimi qiymətləndirib.

Dekabrın 28-də Xətai Rayon Məhkəməsində “Toplum TV işi” üzrə saxlanılan “III Respublika Platforması”nın spikeri Akif Qurbanov, qurumun qurucu heyət üzvü Ruslan İzzətli, “Toplum TV”nin təsisçisi Ələsgər Məmmədli, videoredaktor Müşfiq Cabbar, “Demokratik Təşəbbüslər İnstitutu”nun əməkdaşları Əli Zeynal, İlkin Əmrahov və Ramil Babayev haqqındakı həbs müddəti daha 3 ay – aprelin 6-dək uzadılıb.

Hər bir məhkəmə iclasında Bakı Şəhər Baş Polis İdarəsinin müstəntiqi təqdimatı müdafiə edib, təmin olunmasını istəyib.

Müstəntiq bildirib ki, istintaq davam edir, bu müddətdə təqsirləndirilən şəxslərin həbsdən buraxılması istintaqın gedişinə mane ola bilər.

Vəkillər və təqsirləndirilən şəxslər təqdimata etiraz edib, lakin müdafiə tərəfinin arqumentlərinin nəticəsi olmayıb.

“Toplum TV işi” üzrə nə baş verib?

Martın 6-da hüquq-mühafizə orqanları “Toplum TV”, “Demokratik Təşəbbüslər İnstitutu”, həmçinin “III Respublika Platforması”nın ofislərində, bir neçə əməkdaşın evində axtarış aparıb. Məlumata görə, iyirmidən çox əməkdaş polis tərəfindən saxlanılıb, bir neçə saat sonra əməkdaşların əksəriyyəti sərbəst buraxılıb. Lakin “Toplum TV”nin ofisinin qapısı möhürlənib. “Toplum TV”nin jurnalistləri Fərid İsmayılova (polisin nəzarətinə verilməklə ev dustaqlığı qətimkanim tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı qətimkan tədbiri seçilib) və “Demokratik Təşəbbüslər İnstitutu”nun rəhbəri, həmçinin “III Respublika Platforması”nın spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs qətimkan tədbiri seçilib.

Martın 8-də “III Respublika Platforması”nın qurucu heyət üzvü Ruslan İzzətli və “Toplum TV”nin həmtəsisçisi Ələsgər Məmmədli həbs olunub. Xətai Rayon Məhkəməsi onlar barəsində 4 aylıq həbs qətimkan tədbiri seçib. Hər ikisi də qaçaqmalçılıqda ittiham olunur.

Bu ilin iyul ayında bütün həbs olunanların həbs qətimkan tədbiri daha 3 ay uzadılıb.

Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.

Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edir.

Tofiq Yaqublu

Yanvarın 10-da Bakı Ağır Cinayətlər Məhkəməsində Milli Şura və Müsavat Partiyasının üzvü Tofiq Yaqublunun növbəti məhkəmə prosesi baş tutub.

Siyasətçinin məhkəmə prosesində iştirak etməyə gələn ictimai fəal Cəmil Hacıyev məhkəmənin qarşısında “Siyasi məhbuslara azadlıq!” yazılmış plakat qaldırıb. Daha sonra polis əməkdaşları onu polis maşınına mindirərək naməlum istiqamətə aparıblar. Onun yerini hələlik müəyyənləşdirmək mümkün olmayıb.

Yaqublunun qızı Nigar Həzi bildirib ki, məhkəmə prosesi gərgin keçib və artıq üç məhkəmə prosesidir iş materiallarının tədqiqi gedir.

“Tofiq Yaqublu onların yazdıqlarını cümləbəcümlə ifşa etməklə məşğuldur. Hakim saxta “WhatsApp” yazışmalarını oxuyurdu, o mətn sayəsində Tofiq Yaqublu hazırda həbsdədir. Haqlı olaraq atam ona qarşı tərtib edilmiş bu ssenarini dağıtmaqla məşğul idi, hakim isə utanmadan dedi ki, “siz burada deyilmiş hər cümlə ilə bağlı fikir söyləsəniz, gərək aylarla proses davam eləsin”. Tofiq Yaqublu bildirdi ki, “mən 1 ildən çoxdur həbsdəyəm, sizin işinizin-gücünüzün adı nədir?”.

Bugünkü prosesə sədrlik edən hakim Elnur Nuriyev siyasətçinin kürəkəni, Azərbaycan Xalq Cəbhəsi Partiyasının sədr müavini Seymur Həzinin məhkəmə zalından çıxarılmasına göstəriş verib:

“Hakim Elnur Nuriyev bütün iclas boyu özünü xüsusi komissar kimi aparırdı və bir neçə dəfə nəzakət qaydalarını, etik normaları pozdu. Xüsusilə Tofiq Yaqubluya qarşı etik normaları pozdu və artıq əsəblər gərildi, reaksiya vermək lazım oldu. Mən onu nəzakətə dəvət elədim, bizim aramızda mübahisə yarandı. Mən hesab edirəm ki, mənim zaldan çıxarılmağım qanunsuzdur və Azərbaycanda məhkəmə sisteminin Prezident Administrasiyasının qolunun tərkib hissəsi olduğunun göstəricisidir”.

Nigar Həzinin sözlərinə görə, hakim Yaqublunun özünü də məhkəməni onun iştirakı olmadan keçirməklə hədələyib.

Siyasətçinin növbəti məhkəməsi yanvarın 17-də davam edəcək.

Tofiq Yaqublu 2023-cü ilin dekabrın 14-də həbs edilib. Ona qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq), 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama və ya satma) və 320.2-ci (bilərəkdən saxta sənədlərdən istifadə etmə) maddələri ilə cinayət işi başlanıb.

İttiham aktında deyilir ki, Tofiq Yaqublu Elnur Məmmədovla cinayət əlaqəsinə girərək, özgənin əmlakını dələduzluq yolu ilə ələ keçirmək üçün sövdələşib. İddia olunur ki, Tofiq Yaqublu zərərçəkmiş kimi tanınan Elşən Hüseynovdan Almaniyada vətəndaşlıq verilməsi üçün 25 min avro, 10 min manat pul istəyib. Elnur Məmmədov isə həmin vəsaiti alaraq Tofiq Yaqubluya verdiyini deyir.

Tofiq Yaqublu isə bu iddiaları qəbul etmir və həbsini siyasi sifarişli, ittihamları isə saxta adlandırır.

Yerli və beynəlxalq təşkilatlar siyasətçini siyasi məhbus kimi tanıyıb.

Azərbaycan hökuməti isə ölkədə siyasi məhbus kimi tanınan şəxslərlə bağlı beynəlxalq tənqidləri qəbul etmir və qərəzli sayır. Hökumət rəsmiləri Azərbaycanda insanların siyasi baxışlarına görə təqib edilmədiyini və bütün fundamental hüquqların tam təmin edildiyini bəyan edir.

Amerikanın Səsi