Yanvarın 29-da keçirilən bələdiyyə seçkilərində altı seçki məntəqəsinin nəticələri ləğv edilib.

Bu barədə qərar fevralın 3-də keçirilən Mərkəzi Seçki Komissiyasının iclasında qəbul olunub.

Məlumata görə, bugünkü iclasda qeyd edilib ki, 81 saylı İmişli seçki dairəsi üzrə 42, 43, 44, 45, 46 saylı məntəqələrdə bələdiyyə seçkiləri üzrə nəticələr ləğv edilib.

Həmin məntəqələrdə Bəcirəvan kənd bələdiyyəsinə seçkilər keçirilib. Bununla da həmin bələdiyyəsi üzrə seçkilərin nəticələrə etibarsız hesab olunur.

Sözügedən bələdiyyəsinin tərkibinə Sabirabad rayonun Ağcüyür və Bəcirəvan kəndləri daxildir.

Eyni zamanda 23 saylı Nəsimi-Səbail seçki dairəsi üzrə isə bir seçki məntəqəsinin nəticələri ləğv edilib.

Bundan əlavə iclasda qeyd olunub ki, bələdiyyə seçkilərindən sonra MSK-ya 20 müraciət, dairə seçki komissiyalarına 10 müraciət daxil olub.

Müraciətlər 81 saylı İmişli, 69 saylı Biləsuvar, 119 saylı Ağdam kənd, 95 saylı Zərdab-Kürdəmir-Ucar seçki dairəsi, 82 saylı İmişli-Saatlı, 23 saylı Nəsimi-Səbail seçki dairələri üzrə daxil olub.

119 və 95 saylı seçki dairələri üzrə müraciətlər təsdiqini tapmadığından təmin edilməyib.

69 və 82 saylı seçki dairələri üzrə müraciətlər isə araşdırılması üçün dairə seçki komissiyalarına göndərilib.

Yanvarın 29-da Azərbaycanda bələdiyyə seçkiləri keçirilib. Səsvermə ölkə üzrə 118 seçki dairəsinin 5846 seçki məntəqəsində aparılıb.

Seçkilərdə 685 bələdiyyəyə 8071 bələdiyyə üzvü uğrunda 16 min 96 namizəd mübarizə aparıb.

Amerikanın Səsinin müxbiri Bakı şəhərində bir sıra seçki məntəqələrində seçkilərin gedişini izləyib. Seçki qutularında çoxsaylı bülletlenlər olsa da, səsəvermənin kütləviliyini müşahidə etməyib.

Yeni Azərbaycan Partiyasının İdarə Heyətinin üzvü Bahar Muradova Amerikanın Səsinə seçkilərin şəffaf və demokatik keçirildiyini bildirib.

Bununla yanaşı, bələdiyyə üzvlüyünə namizəd, fəal Cəmilə Əlişova bildirib ki, bələdiyyə seçkilərində qanun pozuntularını müşahidə edib.

İlkin nəticələrə görə, Azərbaycanda yanvarın 29-da keçirilən bələdiyyə seçkilərində seçicilərin 31,45 faizi səs verib.

Bu barədə Mərkəzi Seçki Komissiyasının sədri Məzahir Pənahov bildirib.

Amerikanın Səsi 

Əfqan Sadıqov

Yanvarın 31-də Tbilisi Şəhər Məhkəməsi Azərbaycanın Azel TV saytının təsisçisi Əfqan Sadıqovun həbs müddətini daha 3 ay uzadıb.

Jurnalistin həyat yoldaşı Sevinc Sadıqova Amerikanın Səsinə bildirib ki, Əfqan özü və vəkili məhkəmənin keçiriləcəyini son anda Sosial Ədalət Mərkəzindən öyrəniblər.

Müdafiə tərəfinin Əfqanın ev dustaqlığına və ya gürcü jurnalistlər qrupunun zaminliyi müqabilində buraxılması haqqında vəsatətləri təmin edilməyib.

Bununla belə, Avropa İnsan Hüquqları Məhkəməsi Gürcüstan hakimiyyətinə iş üzrə yekun qərar qəbul edilənə qədər Sadıqovu Azərbaycana ekstradisiya etməmək göstərişi verib.

Sadıqova deyib ki, həyat yoldaşı Qdlani həbsxana kompleksinin İstintaq Təcridxanasının xəstəxanasında 133 gündür aclıq edir.

“Əfqana son bir həftədir dərman və vitaminli maye verirlər ki, qanda şəkər təhlükəli səviyyəyə düşməsin və o, komaya düşməsin. Əvvəllər bu mayedən bir porsiya verirdilərsə, indi üç porsiya verirlər. Əfqan 54 kiloya qədər arıqlayıb, baxmayaraq ki, aclıqdan əvvəl 95 kiloqram idi. O, bu gün məhkəmədə bildirib ki, həbs müddətinin uzadılmasına etiraz əlaməti olaraq bu mayeni də qəbul etməkdən imtina edəcək”, Sevinc Sadıqova bildirib.

2024-cü il noyabrın 28-də Tbilisi Şəhər Məhkəməsi Azərbaycanın Azel.TV saytının rəhbəri Əfqan Sadıqovun Azərbaycana ekstradisiya olunması barədə qərar qəbul edib.

Müdafiə tərəfi məhkəmənin qərarından apellyasiya şikayəti verib və Avropa İnsan Hüquqları Məhkəməsinə müraciət edib.

Jurnalistin hüquqlarını müdafiə edən Gürcüstanın Sosial Ədalət Mərkəzi bildirib ki, bu ölkənin Baş Prokurorluğu vəsatətlə Tbilisi Şəhər Məhkəməsinə müraciət edərək Əfqan Sadıqovun Azərbaycana ekstradisiyasının məqbul olmasını xahiş edib.

Əfqan Sadıqov və müdafiəçiləri təqdim olunmuş vəsatətlə razılaşmır və məhkəmə qarşısında onun Azərbaycana ekstradisiyasının siyasi və özbaşına təqib məqsədi daşıdığını, bu da onun jurnalist fəaliyyəti, hakimiyyətin bu illər ərzində törətdiyi korrupsiya fəaliyyətini tənqid etməsi ilə bağlı olduğunu iddia ediblər.

Müdafiə tərəfi Sadıqovun Azərbaycana ekstradisiya ediləcəyi təqdirdə təqiblərə, işgəncələrə və qeyri-insani rəftara məruz qalacağını sübut edən faktları məhkəməyə təqdim edib. Müdafiə tərəfi bildirib ki, o, əvvəlki illərdə dəfələrlə siyasi təqiblərin qurbanı olub və bu, beynəlxalq təşkilatlar tərəfindən tanınıb.

2012-ci ildə yaradılan Sosial Ədalət Mərkəzi insan hüquqları və sosial ədalətlə bağlı fəaliyyət göstərən təşkilatdır.

Azərbaycanlı jurnalist Əfqan Sadıqov 2023-cü il dekabrın 24-dən Gürcüstandadır və Gürcüstan Ədliyyə Nazirliyi tərəfindən verilmiş müvəqqəti yaşamaq icazəsinə malikdir.

Ötən il iyulun 18-də Əfqan Sadıqov ailəsi ilə birlikdə Türkiyəyə getmək istəsə də, sərhədçilər ona icazə verməyiblər və bildiriblər ki, həyat yoldaşı və uşaqları sərhədi keçə bilər, lakin Əfqan Sadıqov yalnız Azərbaycana qayıda bilər. Gürcüstan tərəfində artıq Azərbaycanda ona qarşı cinayət işinin başlanması və axtarış elan edilməsi barədə məlumat olmasına baxmayaraq, səbəbi izah edilməyib.

Gürcüstan Prokurorluğunun məlumatına görə, Əfqan Sadıqova qarşı Azərbaycanda 2024-cü il mayın 9-da cinayət işi başlanıb. Mayın 13-də Azərbaycan tərəfi ekstradisiya tələbi ilə Gürcüstanın Baş Prokurorluğuna və Daxili İşlər Nazirliyinə müraciət edib.

2024-cü il avqustun 2-də Əfqan Sadıqov “Gürcüstanın Hüquqları”nın vəkili ilə birlikdə Gürcüstanın ombudsmanı ilə görüşüb və onun Türkiyəyə buraxılmaması faktını müzakirə ediblər. Daxili İşlər Nazirliyi Əfqan Sadıqovun Gürcüstandan buraxılmamasının səbəbi ilə bağlı ombudsmanın ofisinə məlumat verməyib, habelə ona qarşı Azərbaycanda cinayət işinin başlanması və axtarış qərarı barədə məlumat verməyib.

Azərbaycanlı jurnalist avqustun 3-də Tbilisidə Mərkəzi Kriminal Polisinin nümayəndələri tərəfindən həbs edilib və o vaxtdan Qldanidəki 8 saylı cəzaçəkmə müəssisəsindədir. Onun həyat yoldaşı və azyaşlı uşaqları həbsin şahidi olublar. Əfqan Sadıqov axtarışda olduğunu və barəsində Azərbaycanda cinayət işi açıldığını yalnız həbs olunandan sonra bilib.

İstintaqın məlumatına görə, Əfqan Sadıqovun həbsi Azərbaycanın tələbi ilə həyata keçirilib. O, Azərbaycan Cinayət Məcəlləsinin 188.2.2 və 182.2.4-cü maddələrində nəzərdə tutulmuş cinayətdə – “hədə-qorxu ilə tələb etmə, tanımadığı şəxsin külli miqdarda əmlakını ələ keçirmə, təhqiredici məlumat yaymaqla hədələmə”də ittiham olunur.

2024-cü il avqustun 4-də Tbilisi Şəhər Məhkəməsi azərbaycanlı jurnalist Əfqan Sadıqovun barəsində həbs qətimkan tədbiri olaraq ekstradisiya həbsi qərarı verib.

Avqustun 8-də “Gürcüstanın Hüquqları” təşkilatının vəkilləri qərardan apellyasiya məhkəməsinə şikayət verərək, Əfqan Sadıqovun 3 aylıq ekstradisiya həbs cəzasının ləğv edilməsini, alternativ olaraq məhkəməyə girovdan istifadə olunmasını təklif edib. Eyni zamanda, Əfqan Sadıqov və vəkilləri Gürcüstan Daxili İşlər Nazirliyinin Miqrasiya Departamentinə Gürcüstandan beynəlxalq sığınacaq verilməsi xahişi ilə müraciət edib.

2024-cü il avqustun 13-də Tbilisi Apellyasiya Məhkəməsinin İstintaq İşləri üzrə Kollegiyasının hakimi Giorgi Mirotadze “Gürcüstanın Hüquqları”nın apellyasiya şikayətini qəbuledilməz hesab edib və birinci instansiya məhkəməsinin qərarını dəyişməz saxlayıb.

Azel.TV saytının rəhbəri Əfqan Sadıqov bundan öncə 2020-ci ilin mayında hədə yolu ilə pul tələb etmək ittihamı ilə Azərbaycanda həbs edilib. 3 noyabr 2020-ci ildə məhkəmə onu yeddi il azadlıqdan məhrum edib. Apellyasiya Məhkəməsi cəza müddətini 6 ilədək, Ali Məhkəmə isə 4 ilədək azaldıb.

2 il 15 gün həbsdə saxlanıldıqdan sonra prezidentin əfv sərəncamı ilə azadlığa buraxılan Sadıqov həbsxanada 242 gün aclıq edib.

Yerli hüquq müdafiəçiləri onu siyasi məhbus kimi tanıyıb.

Amerikanın Səsi 

Avropa İnsan Hüquqları Məhkəməsi (AİHM) 2024-cü ildə Azərbaycandan göndərilmiş 76 ərizəyə mahiyyəti üzrə baxaraq 39 qərar çıxarıb və onların 38-də ən az bir pozuntu müəyyən edib.

Məhkəmənin yanvarın 31-də yaydığı 2024-cü il üzrə illik hesabatına əsasən, ötən il Azərbaycanla bağlı çıxarılmış qərarlarda ən çox ədalətli məhkəmə araşdırması hüququnun pozuntusu aşkarlanıb.

Mülkiyyət hüququ, işgəncə və pis rəftara məruz qalmamaq hüququ, ifadə azadlığı, həmçinin toplaşmaq və birləşmək azadlığı Azərbaycanda digər ən çox pozulan hüquqlar sırasındadır.

Avropa Məhkəməsi 2024-cü ildə ümumilikdə mahiyyəti üzrə 1102 qərar qəbul edib. Azərbaycan barəsində çıxarılan qərarların sayına (39) görə Avropa Şurasına üzv ölkələr arasında altıncı sırada yer alıb.

Məhkəmə Rusiyaya qarşı 302, Ukraynaya qarşı 158, Türkiyəyə qarşı 73, Rumıniya və İtaliyaya qarşı 58, Macarıstana qarşı isə 51 qərar çıxarıb. Cənubi Qafqaz ölkələrindən Gürcüstan və Ermənistan barəsində isə müvafiq olaraq 18 və 16 qərar elan edilib.

Avropa Məhkəməsinə göndərilən şikayətlərin ümumi sayında ciddi azalma müşahidə olunur. 2022-ci ildə məhkəməyə 45 mindən çox şikayət daxil olmuşdusa, ötən il bu rəqəm 29 min civarında olub.

Hüquqşünas Xalid Ağaliyev bunu xüsusən də Rusiyanın məhkəmənin yurisdiksiyasından çıxması ilə əlaqələndirir.

Digər tərəfdən Azərbaycandan göndərilən şikayətlərin sayında ardıcıl ikinci ildir artım qeydə alınıb. Ötən il Azərbaycandan göndərilmiş 600 ərizə qəbul edilib. 2023-cü ildə bu rəqəm 438, 2022-ci ildə isə 389 olmuşdu.

Hazırda Azərbaycandan göndərilmiş 1968 ərizə baxılmasını gözləyir və ölkə bu baxımdan Avropa Şurasına üzv ölkələr sırasında 8-ci yerdədir.

2024-cü ilin statistikasına əsasən, AİHM qarşısında baxılmasını gözləyən ümumilikdə 60 mindən bir qədər çox ərizə var. Bu, son beş ildə ən aşağı rəqəmdir.

Türkiyə 21 mindən çox ərizə ilə bu kateqoriyaya liderlik edir. İlk üçlüyü 8 mindən çox ərizə ilə Rusiya və 7 mindən çox ərizə ilə Ukrayna tamamlayır.

Amerikanın Səsi