Emin İbrahimov

Fevralın 5-də Bakı Ağır Cinayətlər Məhkəməsində keçmiş diplomat Emin İbrahimovun işi üzrə hazırlıq iclası olub. İclasa hakim Vuqar İbrahimov sədrlik edib. Mahiyyəti üzrə dinləmələr fevralın 12-nə təyin edilib.

Vəkil Aqil Layıc Turan-a  bildirib  ki, müdafiə tərəfi cinayət təqibinə xitam verilməsi, həbs qətimkan tədbirinin ev dustaqlığı ilə əvəz edilməsi barədə vəsatətlər qaldırıb. Lakin vəsatətlər təmin edilməyib.

Bununla yanaşı hakim Emin İbrahimovun vəkillərin yanında oturması barədə vəsatəti təmin edib.

Emin İbrahimov prosesdə çıxış edib.

“O dedi ki, bu, məhkəmə deyil, ona görə də hər hansı münasibət bildirmir. Məhkəmə onunla bağlı hər hansı məsələni həll etməkdə legitim deyil”.

*Emin İbrahimov 2024-cü il iyulun 22-də sağlamlığa ciddi ziyan vurmaq və xuliqanlıq ittihamı  ilə saxlanılıb. Onu 11 ilə qədər həbs təhlükəsi gözləyir. İyulun 24-də məhkəmə onu 4 ay müddətinə həbs edib. Noyabrın 19-da həbs 2 ay müddətinə uzadılıb.

Emin İbrahimov əvvəllər Azərbaycan Xarici İşlər Nazirliyi sistemində çalışıb. 2012-2016-cı illərdə Azərbaycanın ABŞ-dakı səfirliyinin ikinci katibi, 2016-2020-ci illərdə Uruqvayda müvəqqəti işlər vəkili olub. Sonradan hökumətin siyasətilə razılaşmadığını bildirərək diplomatik xidmətdən istefa verib və bundan sonra sosial şəbəkələrdə hakimiyyəti tənqid edib.

Turan 

Şahnaz Bəylərqızı

Fevralın 5-də jurnalist Şahnaz Bəylərqızı saxlanıb. Yaxınlarının bildirməsinə görə, onun Bakı şəhərindəki mənzilində də axtarış aparılıb.

Yaxınlarının məlumatına görə, fevralın 5-də polisdə olarkən jurnalist Şahnaz Bəylərqızının qan təzyiqi qalxıb, təcili tibbi yardım çağrılıb

Jurnalist Şahnaz Bəylərqızının “ToplumTV işi” ilə bağlı saxlandığı bildirilir. Onun istintaq zərurəti ilə əlaqədar saxlandığı deyilir.

Bu məlumatı Daxili İşlər Nazirliyinin (DİN) Mətbuat xidmətindən yerli saytlara təsdiqləyiblər.

“ToplumTV işi” ilə bağlı həbslər ötən ilin martından başlayıb. Həmin vaxt bu işlə əlaqədar həbs edilənlər III Respublika Platformasının spikeri Akif Qurbanov, qurumun üzvü Ruslan İzzətli, Demokratik Təşəbbüslər İnstitutunun üzvləri Ramil Babayev, İlkin Əmrahov, Əli Zeynal, habelə ToplumTV-nin təsisçisi Ələsgər Məmmədli və redaktoru Müşfiq Cabbar idi.

Bu ilin yanvarında əlavə olaraq həmin işlə əlaqəli Fərid İsmayılov da həbs edilib.

“ToplumTV işi” üzrə həbs olunanlar əvvəlcə 206.3.2-ci (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddələri ilə təqsirləndirilirdi. Daha sonra onlara qarşı Cinayət Məcəlləsinin 162-1.1 (Əmək müqaviləsi hüquqi qüvvəyə minmədən işçilərin hər hansı işlərin yerinə yetirilməsinə cəlb edilməsi), 192.3.2 (xüsusilə küllü miqdarda gəlir əldə etməklə qanunsuz sahibkarlıq), 193-1.3.1 (Cinayət yolu ilə əldə edilmiş əmlakı leqallaşdırma), 193-1.3.2 (…xeyli miqdarda törədildikdə), 206.4 (mütəşəkkil dəstə tərəfindən qaçaqmalçılıq) və 213.2.1 (Vergiləri,… ödəməkdən yayınma – mütəşəkkil dəstə tərəfindən törədildikdə) maddələri ilə yeni ittihamlar irəli sürülüb.

Əvvəlki ittihamlarla şəxsə 8 ilədək həbs verilə bilərdisə, indi cəza müddəti 12 ilə çata bilər.

Müdafiə tərəfi vurğulayıb ki, sözügedən ittihamlarla razılaşmırlar və bu ittihamlar üçün prosessual əsas yoxdur.

AzadlıqRadiosu 

“Bütün siyasi məhbusların azad olunmasını tələb edirik. Siyasi məhbusların sağlıq durumuna görə hakimiyyət məsuliyyət daşıyır”.

Bu barədə Müsavat Partiyasının Divanının (İdarə Heyəti) fevralın 3-də keçirlən iclasında bəyan edilib.

“Müsavat Partiyası siyasi motivlərlə həbs olunmuş şəxslərdən bəzilərinin, o cümlədən ictimai fəallar Anar Məmmədli və Ələsgər Məmmədlinin səhhətində problemlər yaranması ilə bağlı məlumatlardan narahatdır”, Müsavat Partiyasının məlumatında deyilir.

Yerli hüquq müdafiə təşkilatlarının son hesabatına görə, ölkədə 331 nəfər siyasi məhbus var. Hüquq müdafiə təşkilatları bildirir ki, siyasi məhbusların bir çoxu xəstəliklərdən əziyyət çəkir, onlara keyfiyyətli tibbi yardım göstrərilmir. Bununla yanaşı sosial mediada siyasi məhbus kimi tanınan şəxslərə qarşı son zamanlar təzyiqlərin artdığı barədə məlumatlar yayılır.

Öz növbəsində, Penitensiar Xidmət Amerikanın Səsinin sorğusuna cavabda bildirib ki, məhbuslara qarşı təzyiqlərlə bağlı yayılan məlumatlar həqiqəti əks etdirmir.

“Saxlanma yerlərində və cəzaçəkmə müəssisələrində saxlanılan şəxslərə qarşı münasibətlər qanunvericilik normalaraına və daxili nizamnamə qaydalarına uyğun qurulur, hər hansı ayrıseşkiliyə yol verilmir”, cavabda qeyd edilir.

Azərbaycan hakimiyyəti isə ölkədə siyasi məhusların olmadığını və insanların iradəsinə görə təqibə məruz qalmadğını bəyan edir.

Bununla yanaşı, Azərbaycan insan hüquqları və siyasi məzmunlu təqiblərlə bağlı beynəlxalq təşkilatlar tərəfindən ən çox tənqidə məruz qalan ölkələrdən biridir. Avropa İttifaqı, Avropa Parlamenti, ABŞ Dövlət Departamneti Azəıbaycanda haqsız həbsə məruz qalanların azadlığa buraxılmasını tələb edən bəyanatlarla çıxış edib.

Amerikanın Səsi 

Hafiz Babalı

Turan İnformasiya Agentliyinin iqtisadiyyat şöbəsinin redaktoru Hafiz Babalının Qafqazinfo.az internet nəşrinə qarşı iddiasının baxılması yubadılır. Jurnalist “Abzas Media” nəşrinin işi üzrə həbs edilib.

Xatırladaq ki, iddia 28 dekabr 2023-cü ildə Qafqazinfo.az saytında dərc edilmiş “Hafiz Babalının işi üzrə yeni detallar” adlı yazı ilə əlaqədar qaldırılıb.

İddiada bildirilir ki, yazıda jurnalistin şərəfinə, ləyaqətinə və işgüzar reputasiyasına xələl gətirən “böhtan və təhqiredici” məlumatlar yer alıb.

Məqalədə bildirilib ki, “Babalı qrant layihələrilə əlaqədar xarici təşkilatlar və fondlar ilə əlaqə quraraq onların tapşırığı ilə araşdırmalar aparıb və məqalələr hazırlayıb”.

Babalı bu fikirləri qəbul etmir, bildirir ki, araşdırmalar onun jurnalist fəaliyyətinin bir hissəsi olub. Bundan əlavə, heç kim və heç zaman araşdırmaları və dərc olunan məqalələrilə bağlı irad irəli sürməyib, bu materiallardakı məlumatlar isə heç bir inzibati orqan tərəfindən təkzib edilməyib və məhkəmədə mübahisələndirilməyib.

Babalı “Hafiz Babalının iştirak etdiyi layihələrə Avropadakı azərbaycanlı siyasi mühacirlərin cəlb edilməsi” barədə fikirləri də qəbul etmir.

Jurnalist məhkəmədən xahiş edib ki, nəşrin böhtan xarakterli iddiaları təkzib etməsi, ondan üzr istəməsi, 9900 manat məbləğində kompensasiya ödəməsi və redaksiyanın 119 manat məbləğində məhkəmə xərclərini ödəməsi barədə qərar qəbul etsin.

Babalı iddianı hələ ötən ilin yazında qaldırıb. Məhkəmə iclasları dəfələrlə təxirə salınıb. Oktyabrın əvvəlində məhkəmə mətni məhkəmə-linqvistik ekspertizaya göndərməyə qərar verib.

Babalının vəkili Rəsul Cəfərov deyib ki, mülki prosessual qanunvericiliyə əsasən ekspertiza aparılmalıdır və onun nəticələri bir ay ərzində məhkəməyə təqdim edilməlidir. Və ya göstərilən müddətdə ekspertizadan imtina edilməlidir.

“Babalı ilə bağlı vəziyyətdə bunların heç biri yoxdur. Müstəsna hallarda ekspertiza ekspertlərin işləməsi üçün daha çox vaxt verilməsi ilə bağlı məhkəmə qarşısında vəsatət qaldıra bilər. Ancaq indiki halda bu da yoxdur”, o qeyd edib.

Ötən həftə Cəfərov məhkəməyə müraciət edib ki, ya ekspertiza rəyinin alınmasını təmin etsin ya da məhkəmə icraatını yeniləsin və işə ekspertiza olmadan baxılması davam etdirilsin, amma buna da reaksiya yoxdur.

Babalı məhkəmənin fəaliyyətsizliyindən Məhkəmə-Hüquq Şurasına şikayət etmək niyyətindədir.

Hafiz Babalı 2023-cü ilin dekabrında “xarici valyuta qaçaqmalçılığında” və digər iqtisadi cinayətlərdə ittiham olunaraq həbs edilib. Hüquq müdafiəçiləri Hafiz Babalını siyasi məhbus kimi tanıyır.

Amerikanın Səsi