Fazil Qasımov

İstanbul Universitetinin doktorantı, ilyarımdır Azərbaycanda həbsdə olan Fazil Qasımova prokuror 10 il cəza verilməsini istəyib. Fevralın 28-də Bakı Ağır Cinayətlər Məhkəməsində dövlət ittihamçısı bu təkliflə çıxış edib.

Prokuror iddia edib ki, Fazil Qasımova Cinayət Məcəlləsinin 204.3.1 (saxta pul və ya qiymətli kağızlar hazırlama, əldə etmə və ya satma, mütəşəkkil dəstə tərəfindən törədildikdə) maddəsiylə verilən ittiham məhkəmədə sübut olunub.

Cinayət işinin materiallarında iddia olunur ki, o, 2023-cü ilin iyununda İstanbulda iqtisadçı Qubad İbadoğlu ilə görüşüb, ona da saxta yüzlük dollarlar verib. Q.İbadoğlu da həmin saxta əskinasları Bakıya gətirib, bir hissəsini Anar Əliyev adlı şəxsə verib.

Anar Əliyev də Fazil Qasımovla birlikdə mühakimə olunur. Ona saxta puldan əlavə, həm də qanunsuz silah saxlama ittihamı verilib. Prokuror bu iki ittihamla ona 5 il həbs cəzası verilməsini təklif edib. Dövlət ittihamçısı iddia edib ki, Anar Əliyevin istintaqla əməkdaşlığı, cinayətin üstünün açılmasında iştirakı nəzərə alınaraq ona yüngül cəza istəyir.

Anar Əliyev istintaqda və məhkəmədə Qubad İbadoğlunun əleyhinə ifadə verib. O iddia edib ki, saxta pulları ona Qubad İbadoğlu verib.

İqtisadçı isə bu ifadənin yalan olduğunu, Anar Əliyevin sifarişlə ona böhtan atdığını bildirib.

“Fazil Qasımovu ifadə verməyə də qoymursunuz”

Fevralın 27-də məhkəmədə prokurorun çıxışından əvvəl Fazil Qasımovun vəkili Fuad Ağayev hakimlər heyətinə etiraz edib. Vəkil bildirib ki, bu prosesdə obyektiv araşdırmadan söhbət gedə bilməz. Müdafiəçi vurğulayıb ki, cinayət işində F.Qasımova saxta pul ittihamı verilib, lakin bununla bağlı heç bir sübut yoxdur.

“İttiham verilib ki, Fazil Qasımov Qubad İbadoğluya saxta əskinaslar verib. Bunu Fazil Qasımov da təkzib edib, Qubad İbadoğlu da. Başqa sübut da yoxdur. Qubad İbadoğlunu nə məhkəməyə çağırdınız, nə istintaqdakı ifadəsini elan etdiniz. Fazil Qasımovu ifadə verməyə də qoymursunuz. Belə məhkəmə olar?!”, – vəkil Fuad Ağayev bildirib.

Müdafiəçi əlavə edib ki, onun məhkəməyə verdiyi etiraza Bakı Apellyasiya Məhkəməsində baxılıb qərar verilməlidir. Lakin vəkilin etirazı baxılmamış saxlanılıb.

Məhkəmə prosesi martın 7-də vəkilin müdafiə çıxışı və təqsirləndirilən şəxslərin son sözüylə davam edəcək.

Fazil Qasımov məhkəmədə bildirib ki, 2023-cü ilin avqustunda İstanbulda saxlanılıb Bakıya gətiriləndən sonra bir aya yaxın müddətdə onu Qubad İbadoğlu ilə birlikdə yaratdıqları Azərbaycan Gənclərinin Təhsil Fondu barədə sorğu-sual ediblər.

2023-cü ilin yayında Qubad İbadoğlu Londonda bir sıra azərbaycanlı siyasətçi və fəalla birlikdə Azərbaycan Gənclərinin Təhsil Fondunun yaradıldığını elan edib. O, Azərbaycan məmurlarının xarici ölkələrdəki qanunsuz yolla əldə etdiyi vəsaitlərin bu fonda köçürülməsi və gənclərin təhsilinə sərf olunması üçün çalışacaqlarını bəyan edib.

AzadlıqRadiosu

Fatimə Mövlamlı

Jurnalist Fatimə Mövlamlının bu gün, fevralın 28-də saxlanıb.

Bəzi yerli saytlara bu barədə məlumatı Azərbaycan Daxili İşlər Nazirliyindən də təsdiqləyiblər. Onun “MeydanTV işi” ilə əlaqəli saxlandığı vurğulanır.

Yaxınlarının vurğulamasına görə, polis Fatimə Mövlanlının yaşadığı evlərində də axtarış aparıb:

“Polislər Fatiməgildən guya 2 min avro pul tapıblar. Ailə üzvləri bildirir ki, o pul Fatiməyə məxsus deyil”.

Hələlik, bu məlumata Daxili İşlər Nazirliyindən münasibət almaq mümkün olmayıb.

Xatırlatma

“MeydanTV işi”ndə 7 jurnalist ötən ilin dekabrında tutulub, onlar qaçaqmalçılıqda günahlandırılırlar, amma ittihamı qəbul etmirlər.

Ümumilikdə 2023-cü ilin noyabrından başlayaraq Azərbaycanda qruplar halında 30 civarında jurnalist, ictimai fəal qaçaqmalçılıq ittihamı ilə həbs edilib.

MeydanTV ilə əməkdaşlıq etdiyi bildirilən beşdən çox jurnalist ötən ilin dekabrında tutulub. Onların hamısı ittihamla razılaşmır, bunu peşə fəaliyyətləri və siyasi sifariş ilə izah edirlər.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 350 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Beynəlxalq insan haqları təşkilatları, Avropa Şurası Parlament Assambleyası, Avropa Parlamenti hökuməti siyasi motivlərlə, haqsız saxlananları azad etməyə çağırır.

AzadlıqRadiosu

Freedom House

Fevralın 26-da “Freedom House” insan haqları təşkilatı 2024-cü il üzrə hesabatını paylaşıb. “Dünyada Azadlıq” adlanan hesabatda Azərbaycan “azad olmayan” ölkə olaraq təsnif olunub.

Hesabata əsasən, 2024-cü ildə 60 ölkədə insanlar siyasi hüquq və vətəndaş azadlıqlarının pisləşməsini yaşayıblar və yalnız 34 ölkədə yaxşılaşma müşahidə olunub.

Ötən il bir sıra dünya ölkələrində baş tutan seçkilərə də toxunan hesabatda deyilir: “Azad ölkələrdə seçkilər, əsasən, rəqabət ortamında və ədalətli şəkildə keçirilsə də, avtoritar ölkə və ərazilərdə seçicilərin həqiqi seçim imkanı az olub. Azərbaycan, Əlcəzair, Rusiya, Ruanda kimi ölkələrdə avtoritar hakimiyyətlər siyasi rəqiblərini həbs edərək, cəzalandıraraq və ya namizədlikdən çıxararaq məğlubiyyət ehtimalını aradan qaldırıblar”.

Hesabatda qeyd olunur ki, azad olmayanlar kimi təyin edilmiş 67 ölkə və ərazidən Azərbaycan da daxil olmaqla 17-si siyasi hüquqlar və vətəndaş azadlıqları üzrə ən pis ümumi xallara malikdir. Bəziləri 2005-ci ildən bəri dünyanın ən pis bal toplayan ölkələrində və ərazilərində Azadlıq arasında qalıblar, digərləri isə onları aşağı salan böyük enişlərlə üzləşib.

Azad olmayanlar kimi təyin edilmiş 67 ölkə və ərazidən aşağıdakı 17-si siyasi hüquqlar və vətəndaş azadlıqları üzrə ən pis ümumi xallara malikdir. Bəziləri 2005-ci ildən bəri dünyanın ən pis xal toplayan ölkələri və əraziləri arasında qalıblar, digərləri isə onları indeksdə aşağı salan daha böyük enişlərlə üzləşib.

Hesabat görə, Azərbaycan “Dünyada Azadlıq” indeksində son 10 ildə 13 pillə geriləyib. 2005-ci illə müqayisədə isə, ölkənin sahib olduğu xallar 33-dən 7-ə enib.

Qonşu ölkələrdən Ermənistanla Gürcüstan “qismən azad”, Rusiya, Türkiyə və İran isə “azad olmayan” hesab olunub.

“Freedom House” əvvəlki hesabatlarında da son illərdə Azərbaycanda müstəqil media və vətəndaş cəmiyyətinə basqıların gücləndiyini vurğulayıb.

Azərbaycan hökuməti isə ölkədə hüquq və azadlıqların sıxışdırılması ilə bağlı beynəlxalq tənqidləri qəbul etmir və qərəzli sayır. Azərbaycan prezidenti İlham Əliyev nitqlərdində dəfələrdə “Freedom House” və başqa insan haqları təşkilatlarını qərəzli olmaqda ittiham edib.

Amerikanın Səsi