Hafiz Həsənov

“Hüquq və İnkişaf” İctimai Birliyinin rəhbəri Hafiz Həsənov da Baş Prokurorluğun İstintaq İdarəsində yerli və beynəlxalq qeyri-hökumət təşkilatları (QHT) haqqında cinayət işi üzrə təqsirləndirilən şəxs kimi tanınıb. Martın 17-də Binəqədi Rayon Məhkəməsinin qərarı ilə onun haqqında ev dustaqlığı qətimkan tədbiri seçilib.

Hafiz Həsənov martın 14-də daha 3 təşkilat rəhbəri ilə birlikdə saxlansa da, həmin gün axşam saatlarında buraxılmışdı. O, sonradan təqsirləndirilən şəxs qismində yenidən istintaqa cəlb edilib. Hafiz Həsənov rəhbərlik etdiyi “LD Konsaltinq” MMC vasitəsilə donor təşkilatlardan layihə üçün aldığı maliyyəni qrant müqaviləsi yox, xidmət müqaviləsi kimi rəsmiləşdirməkdə suçlandırılır.

Martın 14-də eyni cinayət işi üzrə Seçki Müşahidə Alyansının icraçı direktoru Məmməd Alpay (Məmmədzadə) və Vətəndaş Hüquqları İnstitutunun rəhbəri Bəşir Süleymanlı da həbs olunub. Binəqədi Rayon Məhkəməsinin qərarı ilə onların hər biri haqqında 3 ay 28 günlük həbs qətimkan tədbiri seçilib. Martın 19-da həbs qərarından apellyasiya şikayətinə baxan Bakı Apellyasiya Məhkəməsi həbsi qüvvədə saxlayıb.

AzadlıqRadiosu

Bəşir Süleymanlı

Jurnalistlərin həbsindən sonra Azərbaycanda vətəndaş cəmiyyəti üzvlərinə qarşı təqiblər daha da genişlənib

Martın 18-də “Vətəndaş Hüquqları” İnstitutunun rəhbəri Bəşir Süleymanlının həbsindən verilmiş apellyasiya şikayətinə baxılıb.

Bu barədə onun yaxınları məlumat verib.

Bakı Apellyasiya Məhkəməsində keçirilən prosesdə Bəşir Süleymanlının həbsindən verilmiş şikayət təmin edilməyib. Hüquq müdafiəçisi çıxış edərək ittihamları rədd edib.

“Heç bir ittihamı qəbul etmirəm, həbsim hüquqi fəaliyyətimlə əlaqədardır”, – o, məhkəmədəki çıxışında bildirib.

Xatırladaq ki, Bəşir Süleymanlı martın 14-də saxlanılıb. Onunla birlikdə “Seçki Müşahidə” Alyansının icraçı direktoru Məmməd Alpay (Məmmədzadə), “Hüquq və İnkişaf” İctimai Birliyinin rəhbəri Hafiz Həsənov və “Media Hüququ” İnstitutunun koordinatoru Xalid Ağəliyev də saxlanılıb. Onların mənzillərində axtarış aparılıb. Sonradan Xalid Ağəliyev və Hafiz Həsənov sərbəst buraxılıb.

Ələsgər Məmmədli

Martın 18-də  “Toplum TV”nin həbsdə olan təsisçisi və media hüququ üzrə ekspert Ələsgər Məmmədlinin ev dustaqlığına buraxılması ilə bağlı növbəti vəsatətə baxılıb

Xətai rayon Məhkəməsində hakim Sülhanə Hacıyevanın sədrliyi ilə keçirilən iclasda müdafiə tərəfinin vəsatəti təmin edilməyib. Bu barədə Ələsgər Məmmədlinin qardaşı Nəsimi Məmmədli bildirib.

Qardaşı deyib ki, Ələsgər Məmmədli məhkəmə iclasında geniş çıxış edib. Ələsgər Məmmədli bilirib ki, istintaqın materiallarına görə, onun həbsinə əsas yaradan heç bir fakt və sübuta rast gəlməyib.

O, hüququ pozan hakim kimi Sülhanə Hacıyevadan Məhkəmə Hüquq Şurasına 35 səhifəlik şikayət yazdığını xatırladıb. Ələsgər Məmmədli xüsusilə vurğulayıb ki, onun azadlığa buraxılmasını şərtləndirən amillər var. Səhhətində ciddi problemlər yarandığını bildirən Məmmədli deyib ki, o, təcili cərrahi əməliyyatı olunmalıdır.

“Eyni zamanda mən ictimai statusu olan, ölkədə tanınmış hüquqşünas kimi törətmədiyim əmələ görə niyə bir ildən çoxdur həbsxanada olmalıyam?”, – deyə Ələsgər Məmmədli hakimdən soruşub.

Vəkili isə onun Novruz bayramı ərəfəsində azadlığa buraxılmasının cəmiyyətdə rəğbətlə qarşılana biləcəyini vurğulayıb. Buna baxmayaraq, hakim Sülhanə Hacıyeva onun həbsdə saxlanması barədə qərarı qüvvədə saxlayıb.

2024-cü il martın 6-da Bakıda müstəqil fəaliyyət göstərən “Toplum TV” onlayn televiziyasının ofisində axtarış aparıb və media qurumunun ofisi möhürlənib.  Bu əməliyyatlar çərçivəsində 10-dan çox şəxs saxlanılıb.

Saxlanılanların əksəriyyəti sonradan buraxılsa da, Akif Qurbanov, Müşviq Cabbarov, Əli Zeynalov, İlkin Əmrahov, Ramil Babayev cinayət məsuliyyətinə cəlb olunaraq haqlarında həbs qətimkan tədbiri seçilib. Fərid İsmayılov və Elmir Abbasov da cinayət məsuliyyətinə cəlb olunsalar da, onlar polis nəzarətinə buraxılıblar.

İş üzrə Cinayət Məcəlləsinin 206.3.2-ci (qaçaqmalçılıq, bir qrup şəxslə əvvəlcədən əlbir olaraq törədildikdə) maddəsi ilə cinayət işi açılıb.

Martın 8-də “Toplum TV”nin təsisçisi Ələsgər Məmmədli və 3-cü Respublika Platformasının qurucu üzvü Ruslan İzzətli eyni iş üzrə saxlanılaraq cinayət məsuliyyətinə cəlb ediliblər. Sonradan onlar barəsində də həbs qətimkan tədbiri seçilib.

AbzasMedia

Rüfət Səfərov

Bu gün, martın 18-də hüquq müdafiəçisi Rüfət Səfərov barəsində seçilmiş həbs-qətimkan tədbirinin uzadılması ilə bağlı istintaq orqanından verilən təqdimata baxılıb.

Binəqədi rayon Məhkəməsinin qərarına əsasən, Rüfət Səfərovun həbs müddəti mayın 3-dək uzadılıb.

AzadlıqRadiosu

Bəşir Süleymanlı və Məmməd Məmmədzadə

Martın 14-də Binəqədi rayon Məhkəməsinin qərarı ilə”Vətəndaş Hüquqları” İnstitutunun rəhbəri Bəşir Süleymanlı və “Seçki Müşahidə Alyansı”nın rəhbəri Məmməd Məmmədzadə barəsində 3 ay 28 gün həbs qətimkan tədbiri seçilib.

Bəşir Süleymanlı və Məmməd Məmmədzadəyə qarşı isə Cinayət Məcəlləsinin 193-1.3.2-ci (Cinayət yolu ilə əldə edilmiş əmlakı leqallaşdırma xeyli miqdarda törədildikdə), 308.2-ci (Vəzifə səlahiyyətlərindən sui-istifadə ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə), 313-cü (Vəzifə saxtakarlığı) maddələrilə ittiham irəli sürülüb.

Qeyd edək ki, bu gqn saxlanılan “Hüquq və İnkişaf” İctimai Birliyinin rəhbəri Hafiz Həsənov və “Media Hüququ” İnstitutunun koordinatoru Xalid Ağəliyev axşam saatlarında sərbəst buraxılıb.