Elvin Mustafayev

“İşçi Masası” Həmkarlar İttifaqları Konfederasiyasının həbsdə olan üzvü Elvin Mustafayevin cəza rejiminin ağırlaşdırılmasından ötrü məhkəməyə təqdimat verilib. Hazırda 6 saylı Cəzaçəkmə Müəssisəsində saxlanılan gənc fəalın həbsxana rejiminə köçürülməsi və cəzasının sonuna – 2026-cı ilin avqustunadək bu rejimdə saxlanması istənilib.

Həmin cəzaçəkmə müəssisəsi rəhbərliyinin təqdimatına iyunun 12-də Nizami rayon Məhkəməsində hakim Nəriman Mehdiyev baxacaq.

Təqdimatda iddia olunur ki, Elvin Mustafayev daxili intizam qaydalarını pozur, cəzaçəkmə müəssisəsində müxalifətçilik edir. Müəssisə rəhbərliyinin iddiasına görə, o, əsassız şikayətlər yazmağa çalışır, özünə və işçilərə xəsarət yetirməyə cəhd göstərir. Bu üzdən, ona töhmət də verilib.

Elvin Mustafayevin yaxınları təqdimatda yazılanların hamısını şər-böhtan sayırlar:

“Bu qədər absurd yalan olmaz, axı… Guya Elvin əməkdaşlara xəsarət yetirməyə cəhd edib. Məhbus silahlı əməkdaşa nəsə eləyə bilər? Görünür ki, azadfikirli adamların olması bunlara sərf eləmir, şər-böhtanla həbs elədikləri kimi, eyni qaydada da cəza rejimini ağırlaşdırırlar. Utanmaq hissi olmayan adamlar ora nə istəsələr, yaza bilərlər”.

Yaxınlarının bildirdiyinə görə, Elvin Mustafayev Milli Şuranın və Müsavat Partiyasının üzvü Tofiq Yaqublunun aclıq aksiyasına dəstək məqsədiylə aclığa başlayandan sonra cərimə kamerasına (kars) salınıb. Mayın 6-dan onun ailə üzvləriylə telefon danışığı və görüş hüququ məhdudlaşdırılıb.

Vəkili Zibeydə Sadıqovabildirib ki, iyunun 4-də müvəkkiliylə görüşməkdən ötrü 6 saylı Cəzaçəkmə Müəssisəsinə getsə də, görüşməsinə imkan verilməyib. Bu üzdən, ailəsi ona işgəncə verilməsindən və məsələnin üstünün açılmaması üçün vəkillə görüşə buraxılmamasından şübhələnir.

Deyilənlərə Penitensiar Xidmətdən şərh almaq mümkün olmayıb.

AzadlıqRadiosu

Fazil Qasımov

İstanbul Universitetinin azərbaycanlı doktorantı, iki ilə yaxındır həbsdə olan Fazil Qasımovun aclıq aksiyası keçirdiyinə görə cəzalandırıldığı bildirilir

Yaxınlarının AzadlıqRadiosuna verdiyi bilgiyə görə, mayın 10-dan aclıq edən F.Qasımov 13 gündür cərimə kamerasına (karser) salınıb:

“İyunun 3-də Fazil Qasımov anasına deyib ki, “karser”dən çıxmaq üçün şərt qoyublar – aclığı dayandırması barədə ərizə yazmalıdır. Bu da o deməkdir ki, aclığı dayandırmasa, “karser”dən buraxılmayacaq. Fazil görür ki, heç bir cinayət törətmədiyi halda, ona 9 il həbs cəzası veriblər, ona görə etiraz olaraq aclıq aksiyası keçirir”.

Fazil Qasımova 9 il həbs cəzası kəsilməsi haqda Bakı Ağır Cinayətlər Məhkəməsinin hökmündən verilən şikayətə apellyasiya məhkəməsində baxılır. İyunun 4-də Bakı Apellyasiya Məhkəməsində növbəti məhkəmə iclası keçirilməliydi, ancaq üç hakimdən biri gəlmədiyindən proses baş tutmayıb.

25 gündür aclıq etdiyi bildirilən Fazil Qasımov məhkəmə zalına Penitensiar Xidmətin konvoylarının köməyiylə çətinliklə gətirilib. Onun halsız olduğunu və dayana bilmədiyini görən hakim icazə verib ki, sualları cavablarkən məhkəmə önündə ayağa qalxmasın.

Çətinliklə danışan alim xahiş edib ki, işinə ədalətli baxılsın, vəsatətləri təmin olunsun. O, heç bir cinayət törətmədiyini vurğulayıb.

Fazil Qasımovun məhkəməsi iyunun 17-nə saxlanılıb.

Məhkəmədə bir neçə dəfə vəsatət qaldırılıb ki, professor Qubad İbadoğlu şahid kimi çağrılıb dindirilsin. İttihama görə, Fazil Qasımov İstanbulda saxta dollarları Q.İbadoğluya verib, o da həmin saxta valyutaları Bakıya gətirib.

“Qubad İbadoğlu dindirilsin, görək ki, belə bir hal olub, yoxsa yox. Ortada bircə dənə də sübut yoxdur, adama havadan 9 il azadlıqdan məhrumetmə cəzası verilib”, – vəkil Nemət Kərimlinin sözləridir.

Lakin vəsatətlər təmin olunmayıb.

Fazil Qasımovun aclıq etməsi və saxlandığı penitensiar müəssisədə cəzalandırılması haqda dediklərinə Penitensiar Xidmətdən şərh almaq mümkün olmayıb.

Daha öncəki açıqlamalarda Penitensiar Xidmətin ictimaiyyətlə əlaqələr şöbəsi istintaq təcridxanaları və cəzaçəkmə yerlərində saxlanılan şəxslərin hüquqlarının təmin olunduğunu, onlara qarşı insan ləyaqətini alçaldan, pis rəftara yol verilmədiyini bəyan edib.

İnsan Haqları Evinin təbliğatçısı və qurumun Cenevrə ofisinin rəhbəri Dave Elseroad ATƏT-in İnsan Ölçüsü Konfransında Azərbaycanda jurnalistlərə, hüquq müdafiəçilərinə və müxalif fəallara qarşı kütləvi repressiyalardan danışıb.

Elseroad bildirib ki, bir ildən çoxdur həbsdə olan SMDT-nin rəhbəri Anar Məmədli ATƏT və BMT-nin İnsan Haqları Şurasında Azərbaycanda insan haqlarının kobud şəkildə pozulması və COP29 konfransı ərəfəsində jurnalistlərin və hüquq müdafiçəilərinin kütləvi həbsi haqqında danışdığına görə həbs olunub.

Elseroad İnsan haqlarının pozuntusu hallarını işiqlandıran müstəqil jurnalist Ülviyyə Əlinin saxlanılarkən zorakılığa məruz qaldığını, döyüldüyünü və nəticədə onun sağlamlığında ciddi problemlərin yarandığını vurğulayıb.

Elseroad əlavə edib ki, Ülviyyə Əlinin və Azərbaycanda həbs olunan onlarla müstəqil jurnalistin həbsi insan haqları pozuntusunun qurbanı olan şəxsləri daha da görünməz edir və onların səsinin daha az eşidildiyini göstərir.

Dave Elseroad İnsan Haqları Evinin Anar Məmmədli, Ülviyyə Əli və Azərbaycanda qanunsuz olaraq həbsdə saxlanılan yüzlərlə siyasi məhbsun azadlığa buraxılması üçün çağırış edib.

Azadlıq Qəzeti

“Toplum TV” internet kanalı ilə bağlı cinayət işi üzrə həbs olunan jurnalist və fəalların məhkəməsində ittiham aktının açıqlanma mərhələsidir. İttihamlar 9 nəfəri əhatə etdiyindən, onun elan edilməsi uzun çəkir.

Bakı Ağır Cinayətlər Məhkəməsində keçirilən ötən məhkəmə iclasında “Toplum TV”nin qurucusu, media hüququ eksperti Ələsgər Məmmədli və Demokratik Təşəbbüslər İnstitutunun rəhbəri, eləcə də III Respublika Platformasının spikeri Akif Qurbanov haqqında ittiham açıqlanmışdı.

Prokuror Rauf Malışov iyunun 2-də keçirilən məhkəmədə “Toplum TV”nin jurnalisti Müşfiq Cabbarov, Demokratik Təşəbbüslər İnstitutunun əməkdaşları Əli Zeynal, Ramil Babayev və III Respublika Platformasının qurucu üzvü Ruslan İzzətli haqqında ittihamları elan edib.

Ruslan İzzətli özü haqqında ittiham aktında düzgün yazılmadığını bildirərək, bir sıra məsələlərə etirazını dilə gətirib. Məhkəmə prosesinə sədrlik edən hakim Azər Tağıyev söz verib ki, onun etiraz etdiyi məsələlər prosesin gedişində araşdırılacaq.

Təqsirləndirilən şəxslərdən daha 3 nəfər – jurnalist Fərid İsmayılov, Elmir Abbasov və İlkin Əmrahov haqqında ittihamın elanı isə iyunun 23-də keçiriləcək növbəti məhkəmə iclasına qalıb.

AzadlıqRadiosu

Elgün İbrahimov

Ölümü bütün ölkədə müzakirələrə səbəb olan 18 yaşlı Elgün İbrahimovun hündürlükdən yıxılaraq aldığı xəsarətlər nəticəsində vəfat etdiyinin müəyyən olunduğu bildirilir.

Bu barədə mayın 29-da Baş Prokurorluq və Dövlət Təhlükəsizliyi Xidmətinin birgə məlumatında vurğulanır.

Əlavə edilib ki, cinayət işi üzrə bütün fərziyyələr, onun intihar etməsi, ehtiyatsızlıqdan yıxılması və ya ona ağır bədən xəsarəti yetirilməsi nəticəsində ölümün baş verməsi kimi hallar yoxlanılıb:

“… Şahid ifadələri, hadisə yerinə, müşahidə kameralarına baxış, meyitin xarici, daxili müayinə edilməsi, telefon məlumatları, məhkəmə-genetik, məhkəmə-tibbi… ekspertizaların rəyləri və başqa dəlillərlə müəyyən edilib ki, Elgün İbrahimova hər hansı… xəsarət yetirilməyib, ona qarşı heç bir zorakı hərəkətlərə yol verilməyib, o, hündürlükdən yıxılmaq nəticəsində aldığı çoxsaylı xəsarətlərdən ölüb”.

Vurğulandığına görə, həmçinin müəyyən edilib ki, E.İbrahimov mayın 12-də saat 16 radələrində hazırlıq kursundan çıxdıqdan sonra mobil telefonunu sataraq ayrı-ayrı şəxslərə olan pul borcunu qaytarıb.

Ana intihar versiyasına inanmır…

Birgə rəsmi açıqlamaya, hələlik, onun yaxınlarından münasibət almaq mümkün olmayıb.

Amma bugünlərdə onun anası Fizzə Zeynalova yerli mediaya açıqlamasında oğlunun intihar edə biləcəyini istisna etmişdi:

“Ola bilməz, mənim uşağım həyatdolu uşaq idi. Nəyə görə intihar etməli idi?!”, – o, rəsmi açıqlamadan bir gün öncə “TV Müsavat”a müsahibəsində vurğulamışdı.

Yerli mediada mayın 13-nə keçən gecə Gəncə sakini, 18 yaşlı E.İbrahimovun Texnologiya Universitetinə məxsus, hazırda istifadəsiz olan yataqxananın həyətində ağır vəziyyətdə tapılıb xəstəxanaya yerləşdirilsə də, bir neçə saat sonra vəfat etdiyi barədə məlumatlar yayılmışdı. Faktla bağlı cinayət işi açılsa da, sosial şəbəkələrdə işin açılmaması ilə bağlı tənqidlər səslənmişdi.

AzadlıqRadiosu