Ülvi Həsənli

Bu barədə Həsənli iyulun 21-də ailəsi ilə telefon danışığında məlumat verib.

Ülvi Həsənli bildirib ki, təcridxana rəhbərliyi onun aclığa başlaması ilə bağlı ərizəsini qəbul etmək istəməyib. Yalnız iyulun 21-də nəhayət ərizə qəbul olunub.

Jurnalist deyib ki, telefon danışığından sonra onu cərimə kamerasına köçürəcəklər.

O əlavə edib ki, hazırda saxlanıldığı kamera boğanaqdır, xüsusilə son günlərdəki isti havalarda orada qalmaq dözülməz hal alıb.

Həsənlinin fikrincə, cərimə kamerasında qalmaq bundan daha çətin olacaq.

Azadlıq qəzeti

Ülvi Həsənli

“Abzas Media” nəşrinin həbsdə olan direktoru Ülvi Həsənli iyulun 20-dən müddətsiz aclıq aksiyasına başladığını elan edib. O, bununla bağlı ictimaiyyətə müraciətində bu qərarı Penitensiar Xidmətin məhkəmə qərarlarını yerinə yetirməməsi ilə əlaqələndirib.

Həsənli bildirib ki, Bakı Ağır Cinayətlər Məhkəməsi onun Bakı İstintaq Təcridxanasına (BİT) köçürülməsi ilə bağlı vəkil Zibeydə Sadıqovanın verdiyi vəsatəti iyulun 3-də təmin edib və bu qərar Penitensiar Xidmətə təqdim olunub. Lakin onun qeyd etməsinə görə, 15 gündən artıq vaxt keçməsinə baxmayaraq, qərar hələ də icra olunmayıb.

“Görünür, Penitensiar Xidmət məhkəmə qərarlarını saymır və özünü məhkəmədən üstün tutur”, –Həsənli vurğulayıb.

Ülvi Həsənli daha əvvəl də eyni məsələ üzündən doqquz günlük aclıq aksiyası keçirdiyini, lakin qadın həmkarlarının da ona dəstək olaraq aclığa başlaması və onların sağlamlığı ilə bağlı narahatlıq səbəbi ilə aksiyanı dayandırdığını bildirib. Həmçinin qeyd edib ki, Penitensiar Kompleksin rəhbərliyi ona 12 iyula qədər köçürüləcəyi vədini versə də, bu vəd yerinə yetirilməyib.

Həsənlinin sözlərinə görə, hazırda saxlanıldığı Umbakı qəsəbəsindəki Penitensiar Kompleks Bakı İstintaq Təcridxanasından daha uzaqda yerləşir və bu, onun ailəsi, vəkilləri, xüsusilə də 3 yaşlı övladı ilə görüşünə ciddi maneə yaradır:

“Burada övladımla görüşmək üçün heç bir şərait yoxdur. Ona görə, ümumiyyətlə, görüşə bilmirəm”.

O, hesab edir ki, baş verənlərin səbəbi onların çıxışlarıdır: “Bunlar bizim yazılarımıza görə edilir…”.

Ülvi Həsənli qadın həmkarlarından xahiş edib ki, ona dəstək aksiyasına qoşulmasınlar.

Bu müraciətə Penitensiar Xidmət və başqa rəsmi qurumlardan münasibət almaq mümkün olmayıb.

İyunun 20-də Bakı Ağır Cinayətlər Məhkəməsində baş tutan iclasda “AbzasMedia işi” üzrə təqsirləndirilən şəxslərə hökm oxunub. Hakimin qərarı ilə “AbzasMedia”nın direktoru Ülvi Həsənli, baş redaktor Sevinc Vaqifqızı, araşdırmaçı jurnalist Hafiz Babalı və Azadlıq Radiosunun jurnalisti, iqtisadçı Fərid Mehralızadə 9 il, jurnalistlər Nərgiz Absalamova və Elnarə Qasımova 8 il, “AbzasMedia”nın koordinatoru Məhəmməd Kekalov isə 7 il 6 ay azadlıqdan məhrum edilib.

Onlar qaçaqmalçılıq da daxil olmaqla bir neçə maddədə ittiham ediliblər. Lakin jurnalistlər və müdafiəçiləri istintaqın ortaya tutarlı sübutlar qoymadığını bildirib.

Hökmdən sonra onlardan Ü.Həsənli və daha bir neçəsi Bakı İstintaq Təcridxanasından Umbakı qəsəbəsindəki Penitensiar Kompleksə köçürülüblər. Müdafiə tərəfi hesab edir ki, hökm tam qüvvəyə minmədiyindən bu qərar qanunsuzdur.

“AbzasMedia işi” üzrə həbslər 2023-cü il noyabrın 20-dən başlayıb.

Xatırlatma

2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Yerli hüquq-müdafiə təşkilatlarının hazırladığı siyahılara görə, hazırda Azərbaycan həbsxanalarında 370-dən çox siyasi məhbus var. Rəsmilərsə, bir qayda olaraq, vurğulayırlar ki, ölkədə heç kim peşə fəaliyyəti ilə bağlı, siyasi əsaslarla həbs edilmir. Onlar iddia edirlər ki, həmin siyahılarda adları yer alanlar törətdikləri əmələ görə cinayət məsuliyyətinə cəlb olunublar. Amma beynəlxalq insan haqları qurumları da hökuməti haqsız tutulanları azad etməyə çağırıb.

AzadlıqRadiosu

İyulun 21-də Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi baş tutub.

Hakim Azər Tağıyevin sədrliyilə baş tutan prosesdə təqsirləndirilən şəxslərdən Toplum TV-nin həmtəsisçisi Ələsgər Məmmədli və jurnalist Fərid İsmayılovun müdafiəçiləri onların səhhətindəki problemləri əsas gətirərək ev dustaqlığına buraxılmalarını istəyib.

Hakim isə təqsirləndirilənlərin səhhətinin pisləşməsi haqqında həkim müayinəsi və rəyi olmadığını əsas gətirərək vəsatətləri təmin etməyib.

Təqsirləndirilən şəxslərdən biri, Demokratik Təşəbbüslər İnstitutunun (İDİ) rəhbəri Akif Qurbanov isə ötən dəfəki iclaslarda başladığı çıxışını bitirib.

O, çıxışının bu dəfəki hissəsində ictimai-siyasi fəaliyyətlə məşğul olmağa başlayandan ailə üzvlərinin üzləşdiyi təhdidlərdən danışıb, buna görə hakimiyyətin məsuliyyət daşıdığını deyib.

Növbəti məhkəmə prosesi avqustun 4-ə təyin olunub.

Toplum TV

Bəşir Süleymanlı

Bəşir Süleymanlı iyulun 16-da həbs müddətinin uzadılması ilə bağlı verilən apelyasiya şikayətinə baxan Bakı Apellyasiya Məhkəməsinin hakimi Emin Əliyevdən şikayətçidir.

O, bildirib ki, məhkəmə iclası başlayandan bitənə qədər hakim onunla aqressiv davranıb, bir neçə dəfə sözünü kəsərək çıxış etməsinə şərait yaratmayıb:

“Hakim aqressiv davranaraq bir neçə dəfə sözümü kəsərək çıxışıma imkan vermədi. Bu ifadə azadlığımın və özünü müdafiə etmək hüququmun kobud şəkildə pozulmasıdır”.

Bəşir Süleymanlı hakimin bu davranışından və onun barəsində tədbir görülməsi üçün Məhkəmə Hüquq Şurasına və Ombudsman Aparatına şikayət edəcəyini deyib.

Bəşir Süleymanlı məhkəmələrdə məhbusların saxlanılması üçün normal şəraitin olmadığını da qeyd edib:

“Məhkəməyə aparılanda saatlarla orada məhkumlar üçün nəzərdə tutulan otaqda saxlanırıq. 40-50 nəfər, o cümlədən müxtəlif xəstəliklərdən əziyyət çəkən məhbuslar 2-3 saat bir otaqda saxlanılır. Bu da normal şəraiti olmayan həmin yerlərdə bəzi problemlər yaradır”.

Hüquq müdafiəçisi onu da əlavə edib ki, istintaq təcridxanasında ona göndərilən bəzi ərzaq, qida məsullarının və əşyaların ona verilməsində də problemlərlə üzləşir:

“Mənə göndərilən süd məhsullarının saxlandığı qabların qapağı açılmış şəkildə mənə təqdim edilir. Belə olan halda həmin məhsullar tez bir zamanda yararsız hala düşür, ondan istifadə edə bilmirik və onları atmağa məcbur oluruq”.

Bəşir Süleymanlı deyib ki, bəzi ərzaq və qida məhsularının məhkumlara verilməsi qadağan olunmasa da, onlara verilmir:

“Məsələn, göndərilən kofe mənə verilmir”.

Bəşir Süleymanlı ona göndərilən kitabların da ona verilmədiyini bildirib.

Fərid İsmayılov

Həbsdə olan jurnalistlərdən Fərid İsmayılov öz məhkəməsinə qatılmaq istəmir. Sağlamlığında ciddi problemlər olduğunu, altı dəfə cərrahiyyə əməliyyatı keçirdiyini deyən jurnalistin sözlərinə görə, 40 dərəcəni aşan istidə hər dəfə məhkəməyə gətirilib-aparılması durumunu daha da ağırlaşdırır.

Fərid İsmayılov “ToplumTV” internet televiziyası ilə bağlı cinayət işi üzrə təqsirləndirilən doqquz nəfərdən biridir. O, özünün ifadə verəcəyi məhkəmə iclasından başqa, qalan iclasların onun iştirakı olmadan keçirilməsi barədə vəsatət qaldırıb. Saxlandığı Bakı İstintaq Təcridxanasından onlayn qaydada prosesə qatılmasına şərait yaradılmasını da mümkün variant sayıb.

Jurnalist məhkəmədən ədalətli hökm gözləntisinin olmadığını, bu üzdən, prosesə qatılmağı vacib saymadığını da vurğulayıb.

Bakı Ağır Cinayətlər Məhkəməsində “ToplumTV işi” üzrə məhkəmə prosesinə sədrlik edən hakim Azər Tağıyev deyib ki, təqsirləndirilən şəxsin məhkəmə prosesində iştirakı məcburidir. O, Fərid İsmayılovun sağlamlığındakı problemləri nəzərə alaraq, onun daha yaxşı şəraitli nəqliyyat vasitəsiylə məhkəməyə aparılıb-gətirilməsindən ötrü Penitensiar Xidmətə müraciət olunacağını söyləyib.

Jurnalistin yaxınları AzadlıqRadiosuna bildiriblər ki, Fərid İsmayılov yeddi aydır həbsdə iynə-dərmanla yaşayır:

“Fəridin bədənində əməliyyat yerlərinin çapıqlarından yer yoxdur. Hər gün ona iynə, sistemlər vurulur. Adamın nə qədər xəstəliyi olar?! Deyib-gülməyinə, nikbinliyinə baxmayın, vəziyyəti yaxşı deyil”.

“ToplumTV işi” üzrə məhkəmə prosesi iyulun 22-də davam edəcək.

AzadlıqRadiosu