Müxalifətdə olan Azərbaycan Xalq Cəbhəsi Partiyasının (AXCP) iki fəalı ilə dünən, mayın 20-dən əlaqənin kəsildiyi bildirilir.

Bu barədə elə AXCP məlumat yayıb.

Bildirilib ki, onlar partiyanın Binəqədi şöbəsinin üzvü, AXCP sədri Əli Kərimlinin ictimai əsaslarla mühafizəçisi Novruz Tağıyev və onu hərdən öz maşını ilə bəzi tədbirlərə aparan, Xətai şöbəsinin üzvü Rəşad Əliyevdir.

AXCP sədri də vurğulayıb ki, onun ətrafını hədəf götürüblər:

“Beləliklə, son iki ayda məni müxtəlif tədbirlərə öz maşını ilə aparan və ya məni həmin tədbirlərdə müşayiət edən səkkiz nəfər cəbhəçi fəal həbs olunub”.

Hələlik, bu deyilənlərə Daxili İşlər Nazirliyi (DİN) və başqa rəısmi qurumlardan münasibət almaq mümkün olmayıb.

Xatırlatma

Müxalifətdə olan AXCP-nin hazırda 15-ə yaxın üzvü uzunmüddətli həbsdədir. Üstəlik, bir çox fəalları inzibati qaydada həbs edilib. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.

Yerli hüquq müdafiəçilərinin hesablamalarına görə, hazırda ölkə həbsxanalarında 350-dən çox siyasi məhbus var. Hökumət belə siyahıları qəbul etmir.

AzadlıqRadiosu

“Abzas Media” əməkdaşlarının cinayət işi üzrə məhkəmə prosesi davam etdirilir. Mayın 20-də Bakı Ağır Cinayətlər Məhkəməsində keçirilən iclasda dövlət ittihamçısı çıxış edərək jurnalistlərə uzunmüddətli həbs cəzaları tələb edib.

Dövlət ittihamçısı “Abzas Media”nın direktoru Ülvi Həsənlinin və jurnalist Hafiz Babalının hər birinin 12 il, baş redaktor Sevinc Vaqifqızının (Abbasova), Məhəmməd Kekalov, Nərgiz Absalamova və Elnarə Qasımovanın hər birinin 11 il, Fərid Mehralızadənin isə 12 il müddətinə azadlıqdan məhrum edilməsini istəyib. Proses iyunun 10-da davam edəcək.

Xatırladaq ki, 2023-cü il noyabrın 21-dən başlayaraq “Abzas Media”nın bir neçə əməkdaşı həbs olunub. İlk olaraq direktor Ülvi Həsənli və baş redaktor Sevinc Vaqifqızı saxlanılıb, ardınca direktor müavini Məhəmməd Kekalov (noyabrın 23-də), əməkdaşlar Nərgiz Absalamova (dekabrın 1-də), Hafiz Babalı (dekabrın 13-də) və Elnarə Qasımova həbs edilib.

Jurnalistlərə qarşı əvvəlcə Cinayət Məcəlləsinin 206.3.2-ci (qrup halında qaçaqmalçılıq) maddəsi ilə ittiham irəli sürülüb. İstintaq dövründə isə onlara qarşı əlavə olaraq 193-1.3.2-ci maddə (cinayət yolu ilə əldə edilmiş əmlakın leqallaşdırılması – xeyli miqdarda törədildikdə) üzrə yekun ittiham elan olunub.

Jurnalistlər ittihamları rədd edir və həbslərini peşə fəaliyyətləri ilə əlaqələndirirlər. Hüquq müdafiəçiləri və yerli, beynəlxalq təşkilatlar “Abzas Media” əməkdaşlarının siyasi motivli ittihamlarla susdurulmağa çalışıldığını bildirir.

Meydan TV

Fazil Qasımov

İstanbul Universitetinin azərbaycanlı doktorantı Fazil Qasımovun həbsdə 10 gündür aclıq etdiyi bildirilir.

Bu barədə AzadlıqRadiosuna məlumat verən yaxınlarının dediyinə görə, Bakının Qaradağ rayonu, Umbakı qəsəbəsindəki penitensiar müəssisədə saxlanılan Fazil Qasımov qanunsuz həbsdə saxlanmasına, yazdığı şikayət və ərizələrin göndərilməməsinə etiraz edir:

“Mayın 10-dan aclığa başlayıb. Heç bir cinayət törətmədiyi halda, Bakı Ağır Cinayətlər Məhkəməsi saxta valyuta ittihamı ilə 9 il cəza kəsdi. Bircə dənə də sübut ortaya qoyulmadı. Fazil Qasımov isə təqsirsiz olduğunu təsdiqləyən nə qədər sübutlar gətirdi, heç birini nəzərə almadılar. Bu adamın da gücü ancaq öz canına qıymağa çatır”.

Fazil Qasımovun aclıq aksiyası keçirməsi barədə deyilənləri vəkili Nemət Kərimli də AzadlıqRadiosuna təsdiqləyib. O bildirib ki, müvəkkili mayın 10-dan aclığa başlayıb.

Xatırladaq ki, Fazil Qasımov iqtisadçı Qubad İbadoğlunun həbsindən təxminən 10 gün sonra – 2023-cü ilin avqustunda İstanbulda saxlanılıb və Bakıya gətirilib. Onunla eyni cinayət işi üzrə təqsirləndirilərək həbs olunan alimin işinə hazırda Bakı Apellyasiya Məhkəməsində baxılır.

Elvin Mustafayev

Mayın 6-dan bəri yaxınlarının barəsində məlumatları olmadıqlarını söylədikləri “İşçi Masası” Həmkarlar İttifaqları Konfederasiyası üzvü Elvin Mustafayevin 6 saylı Cəzaçəkmə Müəssisəsinə köçürüldüyü bildirilir.

Bu barədə mayın 19-da onun yaxınları məlumat veriblər.

Əvvəllər 13 saylı Cəzaçəkmə Müəssisəsində saxlanılan Mustafayev həmin gün – mayın 6-da siyasi məhbuslara dəstək məqsədilə aclıq aksiyasına başladığını açıqlamışdı.

Bildirdiyinə görə, bundan sonra ondan hər hansı xəbər almaq mümkün olmayıb.

Yaxınlarının vurğulamalarına görə, iki həftəyə yaxın bir müddətdən sonra Elvin Mustafayevin 6 saylı Cəzaçəkmə Müəssisəsinə köçürüldüyünü və orada cərimə təcridxanasına (kars) salındığını öyrəniblər.

Hələlik, bu məlumata Penitensiar Xidmətdən münasibət almaq mümkün olmayıb.

AzadlıqRadiosu

Anar Məmmədli

Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin cinayət işi üzrə istintaq yekunlaşıb, iş baxılıması üçün məhkəməyə göndərilib.

Bu barədə müdafiə tərəfi məlumat verib.

Məlumata görə, cinayət işi Bakı Ağır Cinayətlər Məhkəməsinin hakimi Aygün Qurbanovanın icraatına verilib və məhkəmənin hazırlıq iclası mayın 26-ı, saat 11:30-a təyin olunub.

Mayın 16-da Bakı Ağır Cinayətlər Məhkəməsində keçirilən prosesdə “Abzas Media işi” üzrə məhkəmə istintaqının başa çatdığı elan olunub.

Hakim Rasim Sadıxovun sədrliyilə keçirilən iclasda vəkillərin çoxsaylı vəsatətləri təmin edilməyib.

Əvvəlcə “Abzas Media”nın ofisində keçirilən axtarış-götürmə əməliyyatının görüntüləri izlənilib. Təqsirləndirilən şəxslər görüntülərə baxış zamanı ofisə pulu qoyan şəxsin axtarış zamanı əməliyyat qrupunda olan, lakin adı yekun protokolda qeyd edilməyən polis olduğunu iddia ediblər və onun dindirilmək üçün məhkəməyə gətirilməsini tələb ediblər.

Elçin Sadıqov əlavə edib ki, iş üzrə təqsirləndirilən Məhəmməd Kekalovun evində axtarış aparılan zaman 2 hal şahidi olub, onlar dindirilməlidirlər.

Bundan əlavə, Ülvi Həsənli 2023-cü il noyabrın 20-si səhər saatlarında saxlanılarkən zorakılığa məruz qaldığını deməyinə baxmayaraq, həmin gün onu hava limanına aparan taksi sürücüsü əksini iddia etdiyinə görə, vəkil Elçin Sadıqov onun da məhkəmədə dindirilməsini tələb edib. Hakim bunlar daxil olmaqla heç bir vəsatəti təmin etməyib.

Bundan sonra, vəkil Elçin Sadıqov Məhəmməd Kekalova sual verib ki, istintaq materialında onun kompüterindən sənədlər çıxdığı bildirilib. Bu, nə qədər doğrudur? Kekalov isə bu iddianı rədd edib və onun kompüterində ümumiyyətlə sözügedən sənədlərin olmadığını bildirib.

Daha sonra, iş üzrə təqsirləndirilən iqtisadçı Fərid Mehralızadə çıxış edib. O bildirib ki, həbs olunanda müstəntiqlər ona əleyhinə ifadə olduğunu deyiblər. Amma iş materiallarından ortaya çıxıb ki, onun haqda bir dənə də sübut və ya ifadə yoxdur. Məlum olub ki, müstəntiqlər Məhəmməd Kekalovdan Mehralızadənin əleyhinə saxta ifadə almağa çalışıblar, o isə imtina edib. Fərid Mehralızadə 7 aydır günahsız olaraq həbsdə saxlanıldığını bildirib.

Proses zamanı təqsirləndirilən Hafiz Babalı da söz alaraq saxlanılma anından danışıb. Jurnalist bildirib ki, istintaq materiallarında Bakı Şəhər Baş Polis İdarəsinə özünün gəldiyi və ifadə verdikdən sonra həbs edildiyi qeyd edilsə də, o, evindən işinə gedərkən, Azərbaycan Dəmiryol Vağzalında zorakılıqla saxlanılıb.

Daha sonra, hakim Rasim Sadıxov məhkəmə istintaqının yekunlaşdığı elan edib. Prokuror Rauf Malışov çıxış üçün vaxt istəyib.

Növbəti məhkəmə prosesi mayın 20-nə təyin edilib.

AbzasMedia

Bu gün, mayın 16-da Azərbaycan Prezidenti yanında Əfv Məsələləri Komissiyasının bu il üzrə 7-ci iclası keçirilib.

Komissiyadan ölkənin yerli saytlarına verilən məlumata görə, bu, 2025-ci il üzrə sonuncu iclas olub. Vurğulanıb ki, 3 aydan çox davam edən toplantılarda ümumlikdə 800-dən çox müraciətə baxılıb.

Amma müraciətlərin detalları açıqlanmır.

Baxılan müraciətlər yaxın zamanlarda prezidentə təqim olunmalıdır. Mayın 28-i qeyd ediləcək Müstəqillik Günü ərafəsində prezidentin növbəti əvf sərəncamı imzlayacağı gözlənir.

2025-ci ildə komissiyanın ilk iclası fevralın 12-də keçirilmişdi, onda da 100-ə qədər müraciətə baxıldığı bildirilmişdi.

Sonuncu belə sərəncam ötən il mayın 25-də, Müstəqillik Günü ərəfəsində imzalanmışdı. Sərəncam 154 nəfərə şamil edilmişdi. Onlardan 63 nəfər azadlıqdan məhrumetmə cəzasından azad edilmiş, 52 şəxsin cəzasının çəkilməmiş hissəsi yarıyadək azaldılmışdı.

Hüquq müdafiəçilər isə bildirmişdi ki, onların siyasi məhbus kimi tanıdıqları şəxslərin heç birinin adı həmin sərəncama düşməyib.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında 350 civarında siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir. Onların deməsinə görə, həmin siyahılarda yer alanlar sırf törətdikləri əmələ görə məsuliyyətə cəlb ediliblər.

Beynəlxalq insan haqları qurumları isə hökuməti haqsız tutulanları azad etməyə, müstəqil mediaya, vətəndaş cəmiyyətinə basqıları dayandırmağa çağırıb.

AzadlıqRadiosu

Bakı Ağır Cinayətlər Məhkəməsində “AbzasMedia” ilə bağlı cinayət işi üzrə həbsdə olan 7 jurnalistin, o sıradan AzadlıqRadiosunun əməkdaşı Fərid Mehralızadənin mühakiməsi davam edir. Məhkəmə prosesində dindirmələr yekunlaşıb, hazırda cinayət işindəki sənədlər araşdırılır.

Bu məhkəmə prosesində hakim önünə çıxarılanlar arasında “AbzasMedia”nın təsisçisi Ülvi Həsənli, baş redaktoru Sevinc Vaqifqızı (Abbasova), koordinatoru Məhəmməd Kekalov, jurnalistlər Nərgiz Absalamova, Elnarə Qasımova, “Turan” informasiya agentliyinin redaktoru Hafiz Babalı da var.

Mayın 13-də sənədlərin tədqiqindən öncə Nərgiz Absalamova və Elnarə Qasımovanın vəkilləri istintaqdakı ifadələri haqda Məhəmməd Kekalova suallar veriblər. Buna səbəb onun istintaqdakı ifadələrində həmin jurnalistlərin xaricdən Azərbaycana pul gətirilməsi və ölkə daxilində həmin vəsaitin yerbəyer olunmasındakı rolundan bəhs edilməsiydi. Vəkillərin suallarını cavablayan Kekalov ifadələr vermədiyini deyib. Elnrə Qasımova, Nərgiz Absalamova, Hafiz Babalı barədə fikirlərin onun ifadəsində yer almasına gəlincə, Kekalov səbəbi bu cür izah edib:

“Elə ifadə verməmişəm. Hazır sənədləri gətiriblər, mən imza atmışam”.

Kekalov istintaqdakı ifadələrindən imtina etdiyini vurğulayıb.

Məhkəmə prosesi sənədlərin açıqlanmasıyla davam edib. Cinayət işinin materiallarının həcmi böyük olduğundan müdafiə tərəfi vaxta qənaət üçün bəzi sənədlərin elan olunmuş sayılmasına razılıq verib.

Cinayət işinə videodisklər də əlavə olunub. Məhkəmədə görüntülərə baxış keçirmək istəsələr də, hakimlər diski tapa bilmədiyindən “AbzasMedia işi” üzrə proses mayın 16-dək ertələnib.

Xatırlatma

“AbzasMedia” üzrə həbslər 2023-cü il noyabrın 20-dən başlanıb. Həmin gün nəşrin direktoru Ülvi Həsənli və koordinatoru Məhəmməd Kekalov saxlanılıb, onların evində, nəşrin ofisində axtarış aparılıb. Ofisdən 40 min avro pul tapıldığı iddia edilib. Ülvi Həsənli ofisə pulu axtarış aparanların özlərinin atdığını bildirib.

Həmin il noyabrın 22-də ölkəyə qayıdarkən elə təyyarədən düşəndəcə baş redaktor Sevinc Vaqifqızı saxlanılıb və o gecə onun da yaşadığı evdə axtarış aparılıb.

Noyabrın sonunda jurnalistlərdən Nərgiz Absalamova, daha sonra Hafiz Babalı, Elnarə Qasımova və ötən ilin mayında Fərid Mehralızadə həbs ediliblər.

Bu iş üzrə həbsdə olan toplam 7 jurnalistə qaçaqmalçılıq, qanunsuz sahibkarlıq, cinayət yolu ilə əldə edilən əmlakı leqallaşdırma, vergidən yayınma və başqa ittihamlar verilib.

Bu ittihamlarda 12 ilədək həbs cəzası nəzərdə tutulub.

Son ilyarımda Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Onların hamısı ittihamla razılaşmır, peşə fəaliyyətlərinə görə siyasi sifarişlə cəzalandırıldıqlarını söyləyir.

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təxminən 350 nəfər siyasi məhbus var.

Rəsmilər ölkədə siyasi motivli həbslərin olmadığını deyirlər. Beynəlxalq insan haqları qurumları, ABŞ Dövlət Departamenti, Bakıdakı bir qrup Qərb diplomatı isə hökuməti haqsız tutulanları azad etməyə, müstəqil mediaya, vətəndaş cəmiyyətinə basqıları dayandırmağa çağırıb.

AzadlıqRadiosu