Məhərrəm Əkbərov

Hazırda inzibati həbsdə olan Türkiyənin Orta Doğu Texnik Universitetinin (ODTÜ) tələbəsi, “İnqilabın Səsi” platformasının üzvü Məhərrəm Əkbərovun Daxili İşlər Nazirliyinin İnzibati Həbs Olunanların Saxlanılma Məntəqəsində təhdid olunduğu bildirilir. Bu barədə Amerikanın Səsinə “Demokratiya 1918” Hərəkatının sədri Əhməd Məmmədli məlumat verib.

Onun sözlərinə görə, Məhərrəm Əkbərov həbs olunandan sonra onun barəsində araşdırma aparılıb və ailəsi ilə təhdid olunub:

“Məhərrəmi Türkiyədəki fəaliyyətinə görə atası ilə təhdid ediblər. Sorğu-sual ediblər ki, “sənin oradakı solçularla nə əlaqən var?”. Atası da iki il əvvəl şərlənərək həbs olunub, hazırda həbsdədir. Anası isə Azərbaycanda bankların birində işləyir. Anasını da işdən çıxarmaqla hədələyiblər”.

Məmmədli bildirib ki, Məhərrəm Əkbərov hakimiyyətə müxalif mövqedə olduğu üçün təhdid olunur.

“Deyiblər ki, “əgər fəaliyyətinə davam eləsən, atan barəsində daha bir maddə ilə iş açarıq”. Atasının həbsini ona qarşı istifadə edirlər”, deyə o, bildirib.

Daxili İşlər Nazirliyinin mətbuat xidmətinin bölmə rəisi Zeyni Hüseynov Amerikanın Səsinə bildirib ki, siyasi baxışına və fəaliyyətinə görə heç kim həbs olunmur. O, bu iddianı təkzib etdiklərini deyib:

“İddialar əsassız olmaqla yanaşı şəxsi mülahizədir”.

Xat;rladaq ki, Məhərrəm Əkbərovun iyulun 15-də Xırdalanda, yaşadığı evin yaxınlığında saxlanılıb.

Daxili İşlər Nazirliyinin mətbuat xidmətinin müvəqqəti rəisi Elşad Hacıyev Amerikanın Səsinə bildirib ki, Məhərrəm Əkbərova 30 sutka inzibati həbs cəzası verilib.

Elektron Məhkəmə Sistemində Məhərrəm Əkbərova Xətai Rayon Məhkəməsinin qərarına əsasən İnzibati Xətalar Məcəlləsinin 510-cu və 535.1-ci maddələri ilə 1 ay inzibati həbs cəzası verildiyi yazılıb.

Həbs xəbəri yayılan zaman “Demokratiya 1918” Hərəkatının üzvü Afiəddin Məmmədov bildirib ki, Məhərrəm Əkbərov Türkiyədəki Sosialist Əməkçilər Partiyasının tərkibindəki “İnqilabın Səsi” platformasının üzvüdür:

“Platforma Gədəbəyin Söyüdlü kəndindəki hadisələrlə bağlı müxtəlif paylaşımlar edib. Fəalın Bakı Şəhər Baş Polis İdarəsinin mülki əməliyyatçıları tərəfindən aparıldığı bildirilir, amma ailəsinə heç bir məlumat verilmir. Onun hansı səbəbdən saxlanıldığı haqda məlumat yoxdur”.

Dostları onun saxlanılmasının siyasi olduğunu deyirlər.

Sosial Əməkçilər Partiyasının Twitter hesabında da bu barədə məlumat paylaşılıb.

“Yoldaşımız Məhərrəm Əkbərov bir müddət Azərbaycan polisi tərəfindən təqib olunduqdan sonra evinin yaxınlığından qaçırılıb. Ailəsinin gərgin səyləri qarşısında onun Bakı şəhər Baş Polis İdarəsinə aparıldığı öyrənilib. Xalqı soyan Əliyev oliqarxiyası ancaq kobud güclə sağ qalmağa çalışır”, bəyanatda deyilir.

Amerikanın Səsi

Avqustun 3-də 16 Azərbaycan vətəndaşı Suriyadan vətənə qaytarılıb. Cerablus şəhərindəki Amerna düşərgəsində saxlanılan 3 qadın və 13 uşaq Türkiyə ərazisindən tranzitlə Bakıya gətirilib. Bu barədə Azərbaycan Xarici İşlər Nazirliyinin mətbuat xidmətindən bildirilib.

Azərbaycan hökuməti həmin şəxslərin reinteqrasiyası və reabilitasiyası üçün bütün lazımi tədbirlərin görülməsini təmin edir.

Rəsmi məlumata görə, indiyədək İraq və Suriyadan Azərbaycana 436 Azərbaycan vətəndaşı, o cümlədən 410 uşaq və 35 qadın repatriasiya edilib.

Onlar qanunsuz silahlı birləşmələrin üzvlərinin ailə üzvləri kimi bu ölkələrdə yaşayıblar.

2018-ci ildə Beynəlxalq Miqrasiya Təşkilatının nümayəndə heyəti ilə görüşdə Azərbaycan nümayəndələri bildiriblər ki, Suriya və İrana terror təşkilatlarında iştirak etmək üçün 1477 Azərbaycan vətəndaşı (1136 kişi və 341 qadın) gedib. Onlardan 903 nəfəri (749 kişi və 154 qadın) ölüb və ya itkin düşüb.

Mətbuatda yayılan məlumatlara əsasən, Suriya və İraqda həbsxana və düşərgələrdə hələ də xeyli Azərbaycan vətəndaşı var.

Bu ilin mart ayında Bağdad həbsxanasında saxlanılan 120 azərbaycanlı qadın vətənlərinə qaytarılmalarını tələbilə audiomüraciət yayıb.

Turan 

Afiəddin Məmmədov

Avqustun 3-də ictimai fəal, İşçi Masası Həmkarlar İttifaqları Konfederasiyasının sədri Afiəddin Məmmədov Daxili İşlər Nazirliyinin İnzibati Həbs Olunanların Saxlanma Məntəqəsində aclıq aksiyasına başlayıb. Bu barədə Amerikanın Səsinə “Demokratiya 1918” Hərəkatının sədri Əhməd Məmmədli məlumat verib.

“Vəkil bildirdi ki, Afiəddin barəsində iki məhkəmə qanunsuz hökm çıxarıb. Xətai Rayon Məhkəməsi onu 500 manat məbləğində cərimə edib. Yasamal Rayon Məhkəməsi isə 30 sutka inzibati həbs cəzası verib. O da buna etiraz olaraq aclıq aksiyasına başlayıb. Üstəlik, onun telefonla danışmaq hüququ da əlindən alınıb”.

Əhməd Məmmədli bildirib ki, Afiəddin Məmmədov artıq üçüncü dəfədir siyasi fəaliyyətinə görə həbs olunur.

“Son 10 ayda Afiəddin üçüncü dəfədir ki, şərlənərək həbs olunur. O, son 10 ayın 90 gününü həbsdə keçirməli olacaq”, deyə Məmmədli qeyd edib.

Xatırladaq ki, avqustun 2-də Xətai Rayon Məhkəməsinin qərarı ilə ictimai fəal, İşçi Masası Həmkarlar İttifaqları Konfederasiyasının sədri Afiəddin Məmmədov İnzibati Xətalar Məcəlləsinin (İXM) 528.1-ci (Məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsi) maddəsi ilə 500 manat məbləğində cərimə olunub.

Yasamal Rayon Məhkəməsi isə onun barəsində İXM-nin 510-cu (xırda xuliqanlıq) və 535.1-ci (Polis işçisinin və ya hərbi qulluqçunun qanuni tələbinə qəsdən tabe olmama) maddələri ilə 30 sutka inzibati həbs cəzası verib.

Avqustun 1-də İşçi Masası Həmkarlar İttifaqları Konfederasiyası və Kuryer Birliyi Həmkarlar İttifaqı yeni qüvvəyə minmiş qanunla bağlı bəyanat yayıb.

Elə həmin gün bir qrup moped sürən kuryer polislərin onların nəqliyyat vasitələrini cərimə meydançasına aparmasına etiraz edib. Afiəddin Məmmədov da aksiyadan sonra saxlanılıb.

Daxili İşlər Nazirliyinin mətbuat xidmətinin əməkdaşı İbrahim Əmiraslanlı bildirib ki, məhkəmə qərarı ilə müəyyən edilən borc öhdəliyindən yayındığına görə axtarışda olan Afiəddin Məmmədovun yeri müəyyən olunaraq saxlanılıb:

“Onun barəsində toplanmış materiallar baxılması üçün məhkəməyə göndərilib. Məmmədova məhkəmənin qərarı ilə 30 gün müddətinə inzibati həbs cəzası verilib”.

İşçi Masası Həmkarlar İttifaqları Konfederasiyası 2022-ci il martın 1-də bir qrup işçi fəallar tərəfindən qurulub.

İttifaqın məqsədi Azərbaycanda baş verən işçi istismarına qarşı mübarizə aparmaq, işçilərə ödənişsiz hüquqi yardım göstərmək, həmkarlar ittifaqı ənənəsini yenidən bərpa etmək, işçiləri təşkilatlandırmaq və birgə mübarizəyə təşviq etməkdir.

Amerikanın Səsi

Fərid Səfərli

Fərid Səfərliyə yaxın günlərdə hökm oxunacaq

İranda həbs edilən azərbaycanlı tələbə Fərid Səfərliyə avqustun 3-dək məhkəmədə son söz üçün vaxt verilib.

Bu barədə anası Dilarə Əsgərova məlumat verib.

O bildirib ki, oğluna yaxın günlərdə hökm oxunacaq.

Onun sözlərinə görə, oğlu son vaxtlar məhkəmədə ciddi psixoloji təzyiqə məruz qalır. Bəzi məsələrlə bağlı vəkilə ehtiyacı var, lakin təmin edilmir:

“Azərbaycanın İrandakı konsulluğu bir neçə vəkil məsləhət görsə də, razılaşa bilmədik. Xidmət haqqını fantastik həddə yüksək tələb edirlər, vəkillər İran azərbaycanlılarıdırlar. Təkcə, Fəridin telefon zənglərinə cavab verməyə görə 5000 dollar məbləğ istəyirlər. Prosesdə iştiraka görə isə ağlasığmaz bir məbləğ tələb edirlər. Hələ minnət də qoyurlar ki, öz azərbaycanlımızsan”.

Dilarə Əsgərova bildirir ki, oğlu ilə məsləhətləşib.

Fərid ona deyib ki, vəkilin məhkəmənin qərarına təsir etmək imkanı demək olar, sıfırdır və üstəlik, ona qarşı irəli sürülən ittihama dair heç bir sübut yoxdur. Yalnız məsləhət almaq üçün bu məbləği vermək mənasızdır:

“Üstəlik, mənim bu məbləği ödəməyə imkanım olmadığını da nəzərə alıb, Fəridlə qərara aldıq ki, İrandan vəkil tuta bilmirik, buna görə də Azərbaycandan Fəridi bir vəkillə əlaqələndirək ki, zəng edib suallar verə bilsin məhkəməyə qədər. İki vəkil canla, başla heç bir ödəniş olmadan Fəridə kömək edə biləcəklərini dedilər. Nədənsə Azərbaycanın İrandakı Konsulluğu Fəridlə vəkillər arasında telefon əlaqəsi yarada bilməyəcəklərini bildirdilər. Bu ümidimiz də puç oldu. Fərid çox gərgin danışırdı. Hakimin psixoloji təzyiqləri, bu günə qədər vəkillə təmin olunmaması, məhkəmədə Azərbaycan tərəfdən heç kimin iştirak etməməsi onu çox narahat edir”.

Ana bildirir ki, hər yerdən əli üzüldüyü üçün özü oğluna bəzi məsləhətlər verib:

“Məsələn, Fərid onun ifadəsinin farsca yazılı variantını başa düşmür, tapşırdım ki, altına “başa düşmürəm” yaz, sonra qol çək və s”.

Ana Azərbaycan hökumətinin vətəndaşına sahib çıxmamasından təəssüflənir.

Fərid Səfərli nə vaxt həbs olunub?

Almaniyanın Yena şəhərində magistratura təhsili alan 27 yaşlı Fərid Səfərlinin İrana səfərindən sonra ondan xəbər almaq mümkün olmayıb.

Anası deyib ki o, İrana bir zamanlar Yena Universitetində təcrübə keçən həkim qız dostunu görmək üçün gedib.

Fevralın 20-də Almaniyadan çıxan Fərid İranda olarkən dostları və ailəsi ilə əlaqə saxlayıb.

Martın 3-də Almaniyadakı dostlarından ona bilet almalarını da rica edib.

O, martın 4-də Tehran-İstanbul-Berlin reysi ilə Almaniyaya dönməliymiş, lakin həmin gündən onunla əlaqə saxlamaq mümkün olmayıb.

Azərbaycan Xarici İşlər Nazirliyi (XİN) martın 9-da Fərid Səfərli ilə bağlı İrana nota verib.

Fərid Səfərlinin anası Dilarə Əsgərova oğlunun İranda həbs olunması ilə bağlı rəsmi məktubu iyunun 1-də alıb.

XİN-dən tələbənin anasına deyiblər ki, Fərid Səfərli İranda casusluq ittihamı ilə saxlanılıb.

İran hüquq-mühafizə orqanları onun saxlanılmasını 3 ay gizlədiblər.

Meydan TV