Səməd Şıxı

İctimai fəal Səməd Şıxı sərbəst buraxıldığını bildirib.

Bu barədə Səməd Şıxı özü “Facebook” səhifəsində məlumat paylaşıb:

“Artıq evdəyəm. Telefonuma ailəmin vasitəsi ilə girib, bəzi postları sildikdən sonra sərbəst buraxdılar. Mənə görə narahat olan hər kəsə təşəkkür edirəm”.

*   *   *

“Səməd Şıxıdan telefonu tələb olunur”

İctimai fəal, yazar Səməd Şıxının Abşeron Rayon Polis İdarəsinin Qobu qəsəbəsində yerləşən bölməsində saxlanıldığı bildirilir.

Bu barədə Meydan TV-yə onun dostları məlumat verib.

Avqustun 10-da Səməd Şıxı “Facebook” hesabında məlumat yaymışdı ki, Abşeron Rayon Polis İdarəsinin əməkdaşları yaşadığı evə gəlib, onu aparmaq istəyiblər:

“Evdə olmadığım üçün sabah səhər tezdən saat 9-da bölməyə çağrılmışam. Qəsəbəsindəki polis bölməsinə gedəcəyəm…”.

Dostlarının bildirdiyinə görə, Səməd Şıxı polis bölməsinə gedərkən telefonunu özüylə aparmayıb.

Orada ondan israrla telefonunu tələb edirlər:

“Səməd Şıxı hazırda Qobu polis idarəsində girov saxlanılır. Ona telefonunu polisə təhvil vermədiyi halda, sərbəst buraxılmayacağı deyilib”.

Daxili İşlər Nazirliyinin Mətbuat Xidmətinindən Meydan TV-yə fəalın saxlanılması ilə bağlı məsələnin araşdırıldığı bildirilib.

Azərbaycanda son on gündə xeyli ictimai fəal həbs olunub.

Onların arasında İşçi Masası Həmkarlar İttifaqları Konfederasiyasının sədri Afiyəddin Məmmədov, Kuryerlər Birliyinin üzvü Elvin Mustafayev də var.

Həbs olunanların bəzilərinə xuliqanlıq, digərinə narkotik ittihamı irəli sürülüb. Lakin heç biri özünü təqsirli bilmir, ittihamın saxta olduğunu, ictimai fəaliyyətinə görə cəzalandırıldığını deyir.

Meydan TV

Miller danışıqların detallarını açıqlamayıb

ABŞ həbsdə olan iqtisadçı Qubad İbadoğlunun işini diqqətlə izlədiyini açıqlayıb.

Bu barədə avqustun 9-da ABŞ Dövlət Departamentinin mətbuat katibi Metyu Miller “Washington Post”un son redaktor məqaləsini “Turan”a şərh edərkən deyib.

Bununla belə Metyu Miller xüsusi  diplomatik danışıqların məzmununu açıqlamayacağanı əlavə edib:

“Lakin biz bu həbsi diqqətlə izləyirik”.

“Biz insan hüquqlarının və əsas azadlıqların təşviqinə qəti sadiq qalırıq. Azərbaycanı ölkə konstitusiyasına və beynəlxalq öhdəliklərə uyğun olaraq öz vətəndaşlarının, o cümlədən Qubad İbadoğlunun insan hüquqlarını və əsas azadlıqlarını qorumağa çağırırıq”, – deyə Miller davam edib.

Metyu Miller

Qubad İbadoğlu iyulun 23-də saxlanılıb, ertəsi gün Nərimanov Rayon Məhkəməsində onun barəsində ilkin istintaq dövrü üçün 3 ay 26 günlük həbs qətimkan tədbiri seçilib.

Ona qarşı Cinayət Məcəlləsinin 204.3.1 ( saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.

ADR sədri daha dörd nəfərlə əlbirlikdə ittiham olunur.

Onların adları ilk dəfə iyulun 23-də Türkiyə mediasında açıqlanmışdı.

FETÖ (Fətullah Gülən Terror Örgütü) ilə əlaqəli şəxslər kimi təqdim olunan bu dörd nəfərə qarşı da Qubad İbadoğlu ilə eyni – Cinayət Məcəlləsinin 204.3.1 maddəsi ilə ittiham irəli sürülüb.

Sözügedən dörd nəfər Döyrüş Cəfərov, Gümrah Əbdürəhmanov, Ruslan Əliyev və Anar Əliyevdir.

Qubad İbadoğlu saxlandıqdan sonra yayılan məlumatlarda iddia olunurdu ki, Anar Əliyev ifadəsində onun adını çəkib. Amma Qubad İbadoğlu ümumiyyətlə, bu şəxsi tanımadığını deyib.

Qubad İbadoğlu saxta pul ittihamını rədd edir, siyasi sifarişlə həbs olunduğunu bildirir.

Beynəlxalq təşkilatlar və ABŞ-ın bir neçə konqresmeni onun dərhal azadlığa buraxılmasını tələb edib.

Meydan TV 

Nazim Bəydəmirli. Foto: Meydan TV

Vəkili: “Hazırda ona qarşı olan ittiham tamamilə cəfəngiyyatdır”

Həbsdə olan keçmiş deputat Nazim Bəydəmirli özünü “ekologiya məhbusu” sayır.

O düşünür ki, rəsmi ittiham fərqli olsa da, həbsinin əsas səbəbi Gədəbəyin Söyüdlü kəndində yerli sakinlərin keçirdiyi etiraz aksiyasıdır.

Bəydəmirli vəkilə deyib ki, onu Söyüdlüdə baş verən etirazlarla əlaqələndirirlər, əslində isə həmin hadisələrə heç bir aidiyyəti yoxdur.

Bu barədə Meydan TV-yə vəkili Aqil Layıc danışıb.

Vəkil bildirib ki, avqustun 10-da Bakı İstintaq Təcridxanasında Nazim Bəydəmirli ilə görüşüb:

“Nazim Bəydəmirli özünü “ekologiya məhbusu” sayır. Həbsinin yeganə səbəbi Söyüdlüdə baş verən hadisələrdir. Hazırda ona qarşı olan ittiham tamamilə cəfəngiyyatdır”.

Aqil Layıcın sözlərinə görə, müvəkkili Prezident İlham Əliyevə müraciət edərək onu inandırmaq istəyir ki, Söyüdlü hadisələrilə heç bir əlaqəsi olmayıb.

“Ölkə başçısına müraciət ünvanlayaraq, bəyan edir ki, onun Söyüdlü hadisələrilə heç bir əlaqəsi olmayıb, ona verilən informasiya düzgün deyil”, – vəkil bildirib.

Nazim Bəydəmirli müdafiəçisinə deyib ki, deputat olanda prezidentin tapşırığıyla Gədəbəydə qızıl zavodunun açılışında iştirak edib.

“Onun ekoloji təmizliyin qorunmasına dair mediadakı çıxışları, ölkə başçısının açılış zamanı və Söyüdlü hadisələrindən sonrakı çıxışı zamanı qeyd etdiyi nüanslarla üst-üstə düşür. Əgər onun təqsiri bundan ibarətdirsə, təqsirini boynuna alır”, – vəkil Aqil Layıc əlavə edib.

Xatırlatma

2005-2010-cu illərdə 104 saylı Gədəbəy-Tovuz seçki dairəsindən Milli Məclisin deputatı olmuş Nazim Bəydəmirli iyulun 4-dən həbsdədir.

Ona qarşı Cinayət Məcəlləsinin 182.2.4 (xeyli miqdarda əmlak tələb etmək məqsədilə hədə-qorxu ilə tələb etmə- xeyli miqdarda əmlak əldə etmək məqsədi ilə törədildikdə) maddəsilə ittiham irəli sürülüb.

Cinayət işinin materiallarında iddia olunur ki, o, pay sahibi olduğu şirkətdə şərikini görüntülərlə şantaj edərək, ondan 50 min manat pul tələb edib.

Nazim Bəydəmirli iyulun 4-də Baş Mütəşəkkil Cinayətkarlıqla Mübarizə İdarəsinə (“bandotdel”) çağırılaraq saxlanılıb. O, ittihamı qəbul etmir, Söyüdlü etirazlarına görə həbs olunduğunu deyir.

Nazim Bəydəmirlinin həbsindən bir neçə gün öncə hökumətə yaxın media orqanlarında Söyüdlü hadisələrinin təşkilatçıları qismində bir neçə nəfərin sırasında Nazim Bəydəmirlinin də adı hallandırılırdı.

Nazim Bəydəmirli özü də “bandotdel”ə çağırılarkən oradan vəkilinə telefon zəngində Söyüdlü hadisələrinə görə saxlandığını bildirib.

Meydan TV 

“Vəkil deyir ki, Fəridi casusluqda ittiham edəcək heç bir dəlil-sübut yoxdur”

Anası İranda həbs edilən azərbaycanlı tələbəyə vəkil tutub.

Vəkil işlə tanış olandan sonra bildirib ki, Fərid Səfərlini casusluqda ittiham edəcək heç bir dəlil-sübut yoxdur.

Fərid Səfərlinin anası Dilarə Əsgərova Meydan TV-yə deyib ki, oğlu ilə dünən danışıb.

Onun sözlərinə görə, oğlu bəraət alacağına ümid edir:

“Oğlumun qız dostu da barəsində ifadə verib. Onun casus olduğuna inanmadığını bildirib. Fərid onun ifadəsi ilə də tanış olub. Lakin hakim bunlarla razı deyil, deyir ki, casusluq üçün gəlmisən, ola bilər qorxmusan, yaxud şərait olmayıb deyə heç nə edə bilməmisən. Amma məqsədin bu olub”.

Ana bildirir ki, oğlu həbsdə olduğu müddətdə kor bağırsağından əməliyyat da olunub.

O bildirir ki, həbsxana mühiti onun sağlamlığına zərər vurur:

“Özü də çox gərgindir. Deyirəm ki, sənə kitab göndərim. Ona belə etiraz edir ki, kitabın mövzusundan, nə bilim hər şeydən bir problem çıxarırlar, o dərəcədə gərginlik içindədir. Mən ona öz imkanlarımla vəkil tutdum, vəkil işlə tanış olub, Fəridlə və hakimlə görüşüb. Telefon, internet yox, bütün gününü fars dilini öyrənməklə keçirir. Bir də çox düşünür, fikir çəkir”.

Fərid Səfərlinin ən son, iyulun 19-da keçirilmiş məhkəmə iclası zamanı ona qarşı irəli sürülmüş “casusluq” ittihamı “casusluq etmək niyyəti” ittihamı ilə əvəz olunub.

Almaniyanın Yena şəhərində magistratura təhsili alan 27 yaşlı Fərid Səfərlinin İrana səfərindən sonra ondan xəbər almaq mümkün olmayıb.

Anası deyib ki o, İrana bir zamanlar Yena Universitetində təcrübə keçən həkim qız dostunu görmək üçün gedib.

Xatırlatma

Fevralın 20-də Almaniyadan çıxan Fərid İranda olarkən dostları və ailəsi ilə əlaqə saxlayıb.

Martın 3-də Almaniyadakı dostlarından ona bilet almalarını da rica edib.

O, martın 4-də Tehran-İstanbul-Berlin reysi ilə Almaniyaya dönməliymiş, lakin həmin gündən onunla əlaqə saxlamaq mümkün olmayıb.

Azərbaycan Xarici İşlər Nazirliyi (XİN) martın 9-da Fərid Səfərli ilə bağlı İrana nota verib.

Fərid Səfərlinin anası Dilarə Əsgərova oğlunun İranda həbs olunması ilə bağlı rəsmi məktubu iyunun 1-də alıb.

XİN-dən tələbənin anasına deyiblər ki, Fərid Səfərli İranda casusluq ittihamı ilə saxlanılıb.

İran hüquq-mühafizə orqanları onun saxlanılmasını 3 ay gizlədiblər.

Meydan TV 

“Tərtər işi”. Foto: Meydan TV

Babək Baxşəliyevin qardaşı Hikmət Həsənov və Teymur Məmmədovun həbsini istəyib

2017-ci ilin may-iyun aylarında Tərtərdə əsgər və zabitlərə qarşı işgəncələrlə bağlı məhkəmə araşdırmaları davam edir.

Hazırda işgəncələrlə əlaqədar hər biri 4 nəfərdən ibarət iki qrupun məhkəməsi gedir.

5 nəfərlik daha bir qrupun məhkəməsi isə yaxın günlərdə başlayacaq.

Məhkəmə prosesləri Sumqayıt Məhkəmə Kompleksinin binasında keçirilir. Lakin onların işinə Bakı Hərbi Məhkəməsinin hakimləri baxır.

Tərtərdəki N saylı hərbi hissələrdən birinin komandiri olmuş polkovnik Vüsal Ələsgərov, hərbi hissənin qərargah rəisi Rəşid Niftəliyev, müddətdən artıq xidmət etmiş kəşfiyyatçı-hərbi qulluqçular Ramil Qarayev və Rüstəm Ələsgərovun daxil olduğu qrupun məhkəməsində hazırda şahidlərin dindirilməsi mərhələsidir.

Budəfəki məhkəmə iclasında hakim Zeynal Ağayev məlumat verib ki, mərhum zərərçəkmiş Babək Baxşəliyevin hüquqi varisi qismində tanınan qardaşı Bəhruz Baxşəliyev Məhkəmə-Hüquq Şurasına, Ali Məhkəmənin sədrinə məktub göndərib.

O yazıb ki, məhkəmənin obyektivliyinə, ədalətliliyinə inanmadığına görə iştirak etmək istəmir. Çünki mərhum qardaşına işgəncə verilməsində günahkar saydığı vəzifəli şəxslər hələ də azadlıqdadır.

O, həmin hadisələr zamanı korpus komandiri olmuş general Hikmət Həsənovun, briqada komandiri olmuş polkovnik Teymur Məmmədovun və başqalarının adlarını çəkib.

Məktub elan olunandan sonra məhkəmədə Hərbi Polis İdarəsinin Biləcəri şöbəsinin rəisi olmuş Bəhruz Musayev şahid qismində dindirilib.

O, Tərtərdə işgəncələrə məruz qalan hərbçilərin sonradan Biləcəri hauptvaxtına gətirilməsi, uzun müddət orada saxlanmasıyla əlaqədar sorğulanıb.

Məhkəmədə ifadə verən zərərçəkmişlər bildirmişdilər ki, onlar orada da işgəncələrə məruz qalıblar: döyülüblər, ac-susuz saxlanılıblar, hətta tualetə getməyə belə, imkan verilməyib və s.

Bəhruz Musayev isə işgəncə iddialarını təkzib edərək bildirib ki, ona Tərtərdən göndərilən hərbçilərin gətirilməsi haqda məlumatı Hərbi Polis İdarəsinin rəisi 2017-ci ilin aprelində verib.

O da deyib ki, prokurorluq və Müdafiə Nazirliyinin rəhbər heyətinin göstərişidir, hauptvaxta hərbçilər gətiriləcək, yerlər hazırlanmalıdır:

“Şəxsi heyəti yığıb dedim ki, gətirilənlərdən heç kimi söyüb-döyməyin. Gündə 3 dəfə yemək verilirdi. Orada bir neçə hərbçinin əlində, üzündə xəsarətlər vardı. Tibb işçilərinə tapşırmışdım ki, onların sarğısını vaxtında dəyişsinlər…”.

Hakim də, prokuror da onun nəzərinə çatdırıb ki, zərərçəkmişlər məhkəmədə dindirilərkən hauptvaxtdakı durumla bağlı fərqli ifadələr veriblər.

Onlar bildiriblər ki, nəinki yemək, hətta su belə verilmirdi. Onların bəziləri “pampers”lə gəzməyə məcbur edilirdi, əlləri, gözləri bağlı vəziyyətdə saxlanılırdılar, beton döşəmədə yatırdılar və s.

Hərbçilər ora hər biri haqqında 10 günlük həbs qərarı çıxarılaraq gətirilib.

Sonradan onların cəzaları artırılıb. Bəhruz Musayev iddia edir ki, onlar daxili qaydaları pozduğuna görə özü qərar verərək həbs müddətlərini artırıb.

“Əlləri, gözləri bağlı adamlar hansı qayda pozuntusuna yol verə bilərdilər?” – ondan soruşulanda Bəhruz Musayevin cavabı belə olub:

“Hətta döşəməni cızmaq, axşam saat 10-dan sonra işığı yandırmaq kimi hərəkətlər də bir neçə sutka həbs müddətini artırmaq üçün əsas ola bilər. Mən oranın rəisi deyiləm, konkret deyə bilmərəm ki, kim neyləmişdi. Amma mənə sənədlər gətirilib, mən də qərar vermişəm”.

“Tərtər işi”. Foto: Meydan TV

O əlavə edib ki, hauptvaxtda işgəncə alətləri olmayıb, kimsənin döyülməsinə göstəriş də verməyib.

Onun sözlərinə görə, hərbçilərin əlləri və gözləri də açıq olub.

Məhkəmədə iştirak edən zərərçəkmişlər Bəhruz Musayevin yalan danışdığını, orada işgəncələrə məruz qaldıqlarını bildiriblər.

“Mən 10 gün yaralı vəziyyətdə orada olmuşam. Çarpayılar divara bağlı olurdu. Axşam yatmaq vaxtında açılmalıydı. Amma açmırdılar. Biz betonun üstündə yatırdıq. Əllərim, gözlərim bağlı olurdu. Qanım aşağı düşmüşdü deyə soyuqdan dayana bilmirdim. Tualetdən istifadə etməyə qoymurdular. İstifadə edənə söyüş qoyurdular. İndi gəlib burada yalan danışır ki, guya yaxşı şəraitdə saxlayıblar bizi. Sanki kurortda olmuşuq”, – zərərçəkmiş polkovnik Boris Cəfərov bildirib.

Digər zərərçəkmiş Fərzəli Cahangirov da 20 gün orada ağır vəziyyətdə saxlandığını deyir:

“Bu adam yalan danışır. Həmin 20 gündə cəmi 1 dəfə yuyunmağa aparıblar. Onda da əynimizdə paltar ola-ola, başımıza soyuq suyu töküb, geri qaytarıblar…”

Zərərçəkmişlər əlavə edib ki, orada işgəncə halları da olub.

Onlar baş verənlərə görə Bəhruz Musayevin də cinayət məsuliyyətinə cəlb olunmasını istəyib.

“Orada nə asma yeri, nə də tok olub. Bir nəfər işgəncə aləti göstərsə, özümü burada asaram. Atamın ruhu üçün mən kiminsə döyülməsinə göstəriş verməmişəm. Hər gün prokurorluğun nümayəndələri səhərdən gəlirdi, gecəyə qədər dindirmə aparırdı. Dindirmə bəzən gecə 3-ə qədər davam edirdi”, – Bəhruz Musayev bildirib.

Onun istintaqa ifadəsi elan olunub.

O ifadəsində bildirib ki, həmin vaxt müdafiə nazirinin müavini, hazırda isə Baş Qərargah rəisi olan Kərim Vəliyevin göstərişi əsasında hauptvaxtda saxlanılan hərbçilər haqqında həbs qərarı verib.

Məhkəmədə çıxış edən təqsirləndirilən polkovnik Vüsal Ələsgərov bildirib ki, işgəncəyə məruz qalmış hərbçilərin qanunsuz azadlıqdan məhrum edilməsilə bağlı ona ittiham verilib.

Onun sözlərinə görə, bu ittihamı daşımalı olan şəxslər azadlıqdadır:

“Əslində, o maddə ilə Hərbi Prokurorluğun, Baş Prokurorluğun rəsmilərini cəlb etmək lazım idi. Mən kim idim ki, bu adamları qanunsuz saxlayım? Siyahılar gəlirdi ki, filan hərbçiləri göndərin, mən də göndərirdim. Mən verilən əmrləri icra etmişəm…”.

Tərtərdə Mənzil İstismar Xidmətinin rəisi olmuş İldırım Ramazanov məhkəmədə danışıb ki, 2017-ci il aprelin sonunda ona göstəriş gəlib, köhnə qərargah binasının açılmasını, oradakı su, elektrik xətlərinin təcili təmir olunmasını istəyiblər.

Onun sözlərinə görə, sonradan həmin binaya çoxsaylı hərbçilər gətirilib və oradan qışqırıq səsləri eşidilib:

“Orada olduğum müddətdə adamlara cəza verirdilər, içəridən səslər gəlirdi. Adamları görəndə üzləri şişmişdi…”.

İldırım Ramazanov əlavə edib ki, saxlanılan şəxslərdən biri pəncərədən düşəndən sonra bütün pəncərələrə dəmir barmaqlıq salınması haqda göstəriş verilib.

Məhkəmədə şahid qismində dindirilən Anar Ramazanovun adı bundan əvvəlki iclaslarda da çəkilib. Məsələn, zərərçəkmiş Nemət Məhərrəmov bildirmişdi ki, gözünü açanda ona işgəncə verənlər arasında mayor Anar Ramazanovu da görüb. Ona həmin vaxt suda boğmaqla işgəncə verirmiş.

Hakim zərərçəkmişin dediklərini Anar Ramazanov bu dəfə məhkəmədə dindiriləndə onun nəzərinə çatdırıb.

“Tərtər işi”. Foto: Meydan TV

O isə inkar edib və deyib ki, işgəncələrin törədildiyi binanın mühafizəsilə məşğul olub.

O iddia edib ki, özü işgəncələrdə iştirak etməyib.

Anar Ramazanov inkar etsə də, digər zərərçəkmiş onun da işgəncələrdə iştirak etdiyini məhkəmədə bir daha deyib.

“Sən bizi ora gətirəndə şəxsi əşyalarımızın götürülməsində iştirak etmisən. Şəxsən mənim şəxsi əşyalarımı sən aldın. İndi deyirsən ki, kənardan mühafizədə olmuşam mən…”, – Boris Cəfərov ona deyib.

Məhkəmədə dindirilən daha bir şahid Daşqın Süleymanov isə Tərtərdəki hərbi hissənin tabor komandiri olub.

Həmin tabordan dindirməyə aparılan hərbçilərdən 5 nəfər işgəncə nəticəsində həyatını itirib.

Ölənlərdən biri olan Elçin Quliyevin evdən aparılması üçün onların qapısına gələn də Daşqın Süleymanov olub. Həmin vaxt Elçin Quliyev evdə olmayıb.

Onun atası tabor komandirindən gəlişinin səbəbini soruşanda isə:  “Qurbanlıq qoyun lazım idi”, – deyə o, cavab verib.

Məhkəmədə mərhum Elçin Quliyevin anası Validə Əhmədova ondan soruşub ki, həmin vaxt niyə elə demişdi?

O, belə cavab verib:

“Hərbi hissə komandiri Teymur Məmmədov məni göndərmişdi ki, get, Elçin Quliyevi gətir. Mən də gəldim, atası dedi ki, evdə yoxdur. Niyə gəldiyimi soruşanda bəhanə kimi, özümdən dedim ki, qurbanlıq qoyun lazım idi. Ağlıma o gəldi. Sonra Teymur Məmmədov dedi ki, qayıt gəl, gətirdilər…”.

Həmin vaxt Elçin Quliyev əmisigildə olub, ona zəng edərək çağırıblar.

Məhkəmədə təqsirləndirilən Vüsal Ələsgərov bildirib ki, təcili əməliyyata ehtiyacı var:

“Əgər təcili əməliyyat olunmasam, zəhərlənmə qanıma keçəcək…”.

Hakim bildirib ki, bu məsələ ilə əlaqədar sorğu göndərilib və yaxın vaxtlarda cavab gələcək.

Tərtərdəki işgəncələrlə bağlı məhkəmə araşdırmaları davam edir.

2021-ci ildə Tərtər hadisələrilə bağlı cinayət işi üzrə icraat yenilənəndən sonra 450-yə yaxın adam zərərçəkmiş qismində tanınıb.

Ardınca həmin dövrdə dövlətə xəyanət ittihamıyla həbs olunub, 20 ilə qədər azadlıqdan məhrum edilmiş 19 nəfər 5 il 6 ay sonra bəraət alaraq, azadlığa buraxılıb.

Meydan TV