Azərbaycanda “Siyasi partiyalar haqqında” qanunvericiliyin pozulmasına görə yeni cərimələr müəyyənləşib.

Bu, dövlət başçısının imzaladığı qanun əsasında “İnzibati Xətalar Məcəlləsinə”edilən  dəyişiklik sonra baş verib.

Dəyişikliklə Azərbaycan ərazisində xarici dövlətlərin siyasi partiyalarının, habelə onların bölmələrinin və təşkilatlarının təsis edilməsinə və ya fəaliyyətinə görə fiziki şəxslər 700 manatdan 1000 manatadək, vəzifəli şəxslər isə 1 500 manatdan 2 000 manatadək, hüquqi şəxslər isə 6 000 manatdan 8 000 manatadək cərimə olunacaq.

Səlahiyyət müddəti bitmiş siyasi partiyanın hər hansı fəaliyyətinə görə fiziki şəxslər 700 manatdan 1 000 manatadək, vəzifəli şəxslər 1 000 manatdan 1 500 manatadək, hüquqi şəxslər isə 2 000 manatdan 3 000 manatadək cərimə olunacaq.

Siyasi partiya üzvlərinin reyestrində baş vermiş sonrakı dəyişikliklər barədə məlumatın təqdim edilməməsinə görə vəzifəli şəxslər 1 000 manatdan 1 500 manatadək, hüquqi şəxslər isə 2 000 manatdan 3 000 manatadək cərimə olunacaq.

İctimai-siyasi nəşrlərin, digər təbliğat və təşviqat materiallarının hazırlanması, həmçinin sahibkarlıq fəaliyyəti ilə məşğul olmasına görə siyasi partiya əldə edilən gəlirin 2 mislindən 4 mislinədək miqdarda cərimə ediləcək.

Siyasi partiya tərəfindən dövlət orqanlarının, yerli özünüidarəetmə orqanlarının, vəzifəli şəxslərin fəaliyyətinə, həmçinin digər şəxslərin sahibkarlıq fəaliyyətinə müdaxilə edilməsinə görə fiziki şəxslər 500 manatdan 700 manatadək məbləğdə, hüquqi şəxslər 3 000 manatdan 5 000 manatadək məbləğdə cərimə olunacaq.

Siyasi partiyanın digər ölkələrin siyasi partiyaları ilə sazişin bağlanması və ya siyasi partiyaların beynəlxalq ittifaqlarına üzvlüyə daxil olması barədə dövlt orqanına məlumat verməməsinə görə cərimə 1 500 manatdan 2 000 manatadək qədər təşkil edəcək.

Siyasi partiya “Siyasi partiyalar haqqında” qanunun tələblərini pozmaqla qəbul etdiyi ianəni həmin qanunla müəyyən edilmiş müddətdə geri qaytarmasa, ianə məbləğinin 60 faizindən 80 faizinədək məbləğdə cərimə olunacaq.

Turan

Qubad İbadoğlu. Foto: Meydan TV

Azərbaycan Demokratiya və Rifah Partiyasının (ADR) həbsdə olan sədri, eyni zamanda, London İqtisadi və Siyasi Elmlər Məktəbinin müəllimi Qubad İbadoğlu ilə bağlı avqustun 15-də bir sıra istintaq hərəkətləri aparılıb. Bu barədə onun qardaşı Qalib Bayramov məlumat verərək bildirib ki, istintaq hərəkətləri Qubad İbadoğlunun saxlandığı Bakı İstintaq Təcridxanasında vəkilinin iştirakıyla həyata keçirilib. O cümlədən, onun işi üzrə ekspertizanın nəticələri də açıqlanıb.

“Bugünkü istintaq hərəkətləri onu deməyə əsas verir ki, Qubad İbadoğlunu FETÖ-ya bağlamaq üçün bütün şər-şəbədə yaratma və böhtanatma imkanlarını işə salıblar”, – Qalib Bayramovun sözləridir.

Qubad İbadoğlunun sağlıq durumuna gəlincə, qardaşı bildirib ki, səhhətindəki problemlər qalmaqdadır. Onun sözlərinə görə, xüsusən havaların çox isti keçməsi onun səhhətindəki ürək-damar problemlərini daha da kəskinləşdirir:

“Qan təzyiqilə bağlı problem kəskinləşir. Şəkəri də qalxır. Bədən temperaturu yüksək olur…”.

O, əlavə edib ki, Qubad İbadoğlu hələ də yaxınlarıyla görüşə bilmir. Onun ailə üzvlərilə görüşmək hüququna istintaqın qoyduğu qadağa davam edir.

Qalib Bayramov. Foto: “abzas.net”

Qubad İbadoğlu iyulun 23-də saxlanılıb, ertəsi gün Nərimanov Rayon Məhkəməsində onun barəsində ilkin istintaq dövrü üçün 3 ay 26 günlük həbs qətimkan tədbiri seçilib.

Ona qarşı Cinayət Məcəlləsinin 204.3.1 ( saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.

ADR sədri daha dörd nəfərlə birlikdə ittiham olunur. Onların adları ilk dəfə iyulun 23-də Türkiyə mediasında açıqlanmışdı. FETÖ (Fətullah Gülən Terror Örgütü) ilə əlaqəli şəxslər kimi təqdim olunan bu dörd nəfərə qarşı da Qubad İbadoğlu ilə eyni – Cinayət Məcəlləsinin 204.3.1 maddəsi ilə ittiham irəli sürülüb.

Sözügedən dörd nəfər Döyrüş Cəfərov, Gümrah Əbdürəhmanov, Ruslan Əliyev və Anar Əliyevdir.

Qubad İbadoğlu saxlandıqdan sonra yayılan məlumatlarda iddia olunurdu ki, Anar Əliyev ifadəsində onun adını çəkib. Amma Qubad İbadoğlu ümumiyyətlə, bu şəxsi tanımadığını deyib.

Qubad İbadoğlunun ofisində, mənzilində, bağ evində axtarışlar aparılıb. Ofisdən 40 min dollar pul tapıldığı, onun bir hissəsinin saxta olduğu iddia olunur.

Lakin ADR sədri bildirib ki, həmin pulun ona heç bir aidiyyəti yoxdur.

Qubad İbadoğlu axtarışdan sonra məkandan çıxarılıb aparılarkən siyasi sifarişlə həbs olunduğunu bildirib.

Bundan başqa, avqustun 6-da Türkiyədə yaşayan və orada universitetdə işləyən azərbaycanlı alim Fazil Qasımov saxlanılaraq, Azərbaycana gətirilib. Avqustun 8-də Nərimanov Rayon Məhkəməsinin qərarıyla onun haqqında həbs qətimkan tədbiri seçilib. Ona qarşı da eyni maddə ilə ittiham irəli sürülüb.

Meydan TV 

Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli

Seçkilərin Monitorinqi və Demokratiyanın Tədrisi mərkəzinin rəhbəri Anar Məmmədli Amerikanın Səsinə müsahibəsində Azərbaycanda insan hüquqlarının hazırkı durumu, ölkənin üzərinə götürdüyü beynəlxalq öhdəliklərin yerinə yetirilməsi sahəsindəki vəziyyətdən danışıb.

Amerikanın Səsi: Bu ilin noyabr ayında BMT İnsan Hüquqları Şurasının 44-cü Universal Dövri Icmal (UDİ) müzakirələri çərçivəsində Azərbaycandakı vəziyyətə baxılacaq. Bu müzakirələrin əhəmiyyəti nədir?

Anar Məmmədli: Bu müzakirələr beş ildən bir keçirilir. Həmin beş il ərzində ölkələr BMT-nin İnsan Hüquqları Şurasında üzərinə götürdükləri öhdəliklərlə bağlı konkret insan hüquqlarının müxtəlif sahələri üzrə fəaliyyətlə məşğul olur və beş ilin sonunda hesabat verirlər. Bu prosesdə vətəndaş cəmiyyəti təşkilatları da iştirak edə bilir. Mütəmadi olaraq mənim təmsil etdiyim SMDT (Seçkilərin Monitorinqi və Seçkilərin Tədrisi Mərkəzi) prosesdə iştirak edir. Biz 2013-2018-ci illərdə BMT-nin İnsan Hüquqları Şurasınna Universal Dövri İcmal ilə bağlı hesabatlarımızı, sənədlərimizi göndərmişik. Artıq 2023-cü ilin noyarbında olacaq müzakirələr zamanı təqdimn ediləcək hesabatımız da BMT-nin İnsan hüquqları Şurasına göndərilib. Əsasən siyasi azadlıqlarla bağlı vəziyyətə dair ölkədəki durumu, siyasi repressiyalar, sərbəst toplaşma azadlığı sahəsində məhdudiyyətlər, seçkilərlə bağlı ötən beş il ərzində görülməyən işlərə dair hesabatımızda təkliflərimizi, tövsiyələrimizi göndərdik. Yəni mənim düşüncəmə görə, Azərbaycan höküməti bu prosesə əvvəlki dövrlərlə müqayisədə daha acınacaqlı vəziyyətdə gedir. Çünki 2018-ci ildə üzərinə götürdüyü xeyli sayda öhdəliklər var ki, heç biri icra olunmayıb. Elementar sahələrdə, sosial-iqtisadi hüquqlarla bağlı, mülki hüquqların müdafiəsi ilə bağlı, ədalətli mühakimə hüququnun təmin olunması ilə bağlı, sərbəst toplaşma azadlığı, vətəndaş cəmiyyəti hüquqları ilə bağlı onların fəaliyyəti və bu sahədə görülən işlərlə bağlı demək olar ki, ortada daha da geriləmə var. Mən düşünürəm ki, bu sessiya üçün Azərbaycan hakimiyyətinin verəcəyi hesabat başdan-başa ötən illər ərzində görülməmiş işlərə həsr oluna bilər. Bu sahədə elə bir nəaliyyət yoxdur.

Amerikanın Səsi: Müzakirələr öncəsi Azərbaycan QHT-ləri ölkədə insan hüquqları sahəsində problemlərlə bağlı öz təkliflərini göndərib. Sizcə, bu təkliflər Azərbaycan üzrə tövsiyyələrdə nəzərə alınacaqmı?

Anar Məmmədli: Bəzi dövlətlər yəqin ki, bu təklifi dəstəkləyəcəklər. O dövlətlər ki, Azərbaycanda insan hüquqları məsələsinə önəm verirlər və çox ciddi siyasi maraqları yoxdur. Yəni tutalım neft, qaz, geopolitik maraqları yoxdur. Çox rahat şəkildə bu məsələləri qoya bilirlər. Məsələn İrlandiya, Norveç, Danimarka, Hollandiya kimi ölkələr çox rahatlıqla bu məsələləri qaldıra bilirlər. Mən bunu əvvəlki BMT sessiyalarına əsaslanaraq deyirəm. Bu il də vətəndaş cəmiyyətinin bu tövsiyyələri beynəlxalq təşkilatlar və o cümlədən, həmin şurada iştirak edən üzv dövlətlərin nümayəndələri tərəfindən dəstəklənə bilər. Amma məsələ burasındadır ki, Azərbaycan hakimiyyəti bu təkliflərə, tövsiyyələrə nə dərəcədə diqqətli yanaşacaq? Bax problem buradadır ki, Azərbaycan hakimiyyətinə biz illərdir tövsiyyələr veririk ki, sərbəst toplaşma azadlığı haqqında qanunu ATƏT-in və Avropa Şurasının Venesiya Komissiyasının tövsiyyələri əsasında təkmilləşdir. Amma bu yetmirmiş kimi “Siyasi partiyalar haqqında” qanununu dəyişirlər. Dəyişərkən də həm ATƏT-in, həm də Avropa Şurasının ekspertlərinin rəyi əsas götürülmür. Bütün bu məsələlər tövsiyyələrdə öz yerini alıb. Bəzi dövlətlər bunu səsləndirəcək. Amma top yenə Azərbaycan hökümətinin qapısındadır. O topu öz qapısına qəbul etmək istəyir, yoxsa topu çıxarmaq istəyir. Həqiqətən ölkədə gərçək islahatlar aparmaq istəyir? Siyasi iradə yoxdur. Bunun yeganə səbəbi ölkədə insan hüquqlarını böhranlı vəziyyətdən çıxarmaq üçün siyasi iradə çatışmazlığıdır. Azərbaycan höküməti özündə siyasi təpər, siyasi iradə tapa bilmir ki, insan hüquq və azadlığına dair normativ aktlar qəbul eləsin. Məhkəmələrin işinə müdaxilə etməsin. Siyasi repressiyaları dayandırsın. Vətəndaş cəmiyyətinə, siyasi partiyalara, mediaya normal şərait yaratsın. Bunun üçün siyasi iradə olmalıdır.

Amerikanın Səsi: ADR Partiyasının sədri, iqtisadçı alim Qubad İbadoğlunun həbsi yerli və beynəlxalq hüquq müdafiə təşkilatlarının etirazları ilə qarşılanıb. İddia olunur ki, həbsin əsl səbəbləri siyasidir. Siz necə qiymətləndirirsiniz?

Anar Məmmədli: Qubad İbadoğlunun həbsi birmənalı şəkildə siyasi sifariş və siyasi motivdir. Qubad İbadoğlu cinayətkar ola bilməz. Çünki onun illər ərzində fəaliyyətində hansısa cinayətkar bir element aşkarlana bilməz. Yəni bu insan daim Azərbaycanda korrupsiya ilə bağlı , şəffaflıqla bağlı, idərəçilikdə təkmilləşmə ilə bağlı, ölkədə hüquq və azadlıqların müdafiəsi ilə bağlı çağırışları ilə yadda qalan insandır. O ona görə həbs olunub ki, siyasi iradə ortaya qoyub. Siyasi iddia ortaya qoyub. Azərbaycanda dinc yolla hakimiyyətin dəyişilməsi üçün bir hərəkat yaradıb və həmin hərəkatın lideridir. Niyyəti də Azərbaycana daha fərqli gələcək vəd etməkdir. Yəni ölkədə siyasi bir alternativ yaratmaqdır. Ölkədə 4-5 siyasi qrup var ki, müstəqil, müxalifyönlü fəaliyyət göstərirlər. Onlardan da biri Demokratiya və Rifah hərəkatıdır. Tamaşaçılar bu məsələdə yanlışlığa yol verirlər, bu siyasi partiya deyil, bu hərəkatdır. Vaxtilə “Siyasi partiyalar haqqında” qanun qəbul olunandan sonra Qubad İbadoğlu bildirdi ki, hərəkat kimi fəaliyyətlərini davam etdirəcəklər. Çünki siyasi partiya kimi qeydiyyatdan keçmək, mövcud olmaq mümkün deyil. Yəni bu hakimiyyət Qubad İbadoğlunun rəhbərlik etdiyi hərəkata öz pisliyini eləmişdir. Öz təzyiqini göstərmişdir. Mən onun həbsində birmənalı şəkildə “siyasi çalar” görürəm. Onun əməlində heç bir cinayətdən söhbət gedə bilməz. O, Azərbaycanda fərqli siyasi mövqe nümayiş etdirdiyi üçün həbs olunan yüzlərlə siyasi məhbusdan biridir. Bu ölkədə siyasi repressiya dayanmayıb. Qubad İbadoğlu da növbəti siyasi repressiyanın qurbanıdır.

Amerikanın Səsi: Son zamanlar Azərbaycanda alternativ həmkarlar ittifaqları təşkilatları yaranmaqdadir. Buna misal kimi “Demokratiya 1918” Hərəkatının nəzdində yaradılmış Həmkarlar İttifaqları Konfeserasiyasının İşçi Masasını göstərmək olar. Ölkədə vətəndaşların əmək hüquqlarını müdafiə edəcək müstəqil həmkarlar hərəkatı varmı?

Anar Məmmədli: Vətəndaşların peşə birlikləri, həmkarlar ittifaqları bütün inkişaf etmiş, gəlişməkdə olan ölkələr üçün səciyyəvi bir məsələdir. Əgər bir ölkədə istehsalat varsa, əmək münasibətləri varsa orada işçi və işə götürən münasibətləri də var. İşçilərin haqlarını, hüquqlarını müdafiə edən qrupların peşə birliklərinin olması labüddür. Bu müəllimlərə də aiddir, həkimlərə də aiddir. Bax, İşçi Masası da çox parlaq işlər gördü. Xüsusilə də son dövrlər haqları pozulan qruplardan biri kimi kuryerlərin haqlarının müdafiəsi yönündə çalışmalar elədi. Fəaliyyətdə oldular. Mən hesab edirəm ki, bu qrupa qarşı aparılan basqı o təzyiqlər birmənalı şəkildə birləşmək azadlığına qarşı təzyiqdir. Çünki hər bir vətəndaşın istədiyi niyyət naminə dinc məqsədlərlə birləşmək haqqı var. Həmkarlar ittifaqı da bu ittifaqlardan biridir. Onlara təzyiq etməklə birləşmək haqqından məhrum qoymuş olurlar. İkincisi, bu da yetmirmiş kimi həmin qrupun liderlərini həbslərə, təzyiqlərə məruz qoyurlar. Bütün bunlar Azərbaycanda əmək hüququnda, sosial-iqtisadi hüquqlar uğrunda təşkilatlanmaq istəyən insanları susdurmağa yönəlib.

Qeyd: Bunlar Anar Məmmədlinin fikirləridir. Rəsmi Bakı ölkədə davamlı islahatların aparıldığını bildirir. İnsanların əqidəsinə görə təqib edilmədiyini, vətəndaşların qanun qarşısında bərabər olduğunu bəyan edir. Dövlət rəhbərləri ölkədə siyasi məhbusların oldğunu qəbul etməsə də Avropa Şurası Parlament Assambleyasında Azərbaycanda siyasi məhbuslar üzrə məruzəçi fəaliyyət göstərib.

Amerikanın Səsi

“Tətbiqimiz aktivdir və müştərilər öz sifarişlərini həmişəki qaydada yerləşdirə bilərlər”

“Volt Azərbaycan” MMC (Wolt) Qida Təhlükəsizliyi Agentliyinin iddialarına cavab verib.
Şirkət bu barədə sosial şəbəkələrdə məlumat yayıb. Bildirilir ki, “Wolt” şirkəti öz fəaliyyətini davam etdirir:

“Tətbiqimiz aktivdir və müştərilər öz sifarişlərini həmişəki qaydada yerləşdirə bilərlər. AQTA tərəfindən irəli sürülən iddialara gəldikdə isə “Wolt” öz fəaliyyətini heç bir qanun pozuntusu olmadan həyata keçirir və bu məhkəmənin qüvvəyə minmiş qərarı ilə təsdiqlənib”.

“AQTA tərəfindən “Volt Azərbaycan” MMC-nin fəaliyyətində pozuntuların aşkar edilməsi barədə yayılan məlumatların həqiqətlə heç bir əlaqəsi yoxdur. Təəssüflər olsun ki, AQTA şirkətimizə təzyiq göstərmək üçün nüfuzumuza xələl gətirən natamam və həqiqətə uyğun olmayan məlumatların sosial şəbəkələrdə yayılması yolunu seçib”, – şirkətin məlumatında deyilir.

Azərbaycan Respublikasının Qida Təhlükəsizliyi Agentliyi “Volt Azərbaycan” (“Wolt”) Məhdud Məsuliyyətli Cəmiyyətin fəaliyyətinin dayandırılması ilə bağlı məhdudlaşdırıcı qərarın təkrar tətbiqi barədə qərar qəbul edilib.

*   *   *

AQTA şirkətlə bağlı qərar qəbul edib

Azərbaycan Respublikasının Qida Təhlükəsizliyi Agentliyi “Volt Azərbaycan” (“Wolt”) Məhdud Məsuliyyətli Cəmiyyətin fəaliyyətinin dayandırılması ilə bağlı məhdudlaşdırıcı qərarın təkrar tətbiqi barədə qərar qəbul edilib.

Qurumun yaydığı məlumatda deyilir ki, bu MMC-yə məxsus qida məhsullarının çatdırılması (daşınması) müəssisəsində  aparılmış planlı yoxlama çərçivəsində qida təhlükəsizliyi sahəsində texniki normativ hüquqi aktların bir sıra tələblərinin pozulması faktları aşkarlanıb.

AQTA iddia edir ki, müəssisə ”Qida təhlükəsizliyi haqqında” Qanuna zidd olaraq qida təhlükəsizliyi qeydiyyatından keçmədən fəaliyyət göstərib, qida məhsullarının istehlakçılara çatdırılması zamanı isti və soyuq zənciri qorunmayıb, məhsulların temperatur rejimi və mal qonşuluğu qaydaları pozulmaqla daşınıb, həmin nəqliyyat vasitələrində dezinfeksiya işləri aparılmayıb, qida məhsullarının çatdırılmasında iştirak edən şəxslərin tibbi müayinədən keçmədikləri müəyyən olunub.

AQTA-dan bildirilib ki, aşkarlanmış nöqsanlarla əlaqədar sözügedən müəssisə tərəfindən qida məhsullarının çatdırılması fəaliyyətinin dayandırılması, ilkin və dövri tibbi müayinədən keçməyən şəxslərin müəssisədən kənarlaşdırılması ilə bağlı məhdudlaşdırıcı tədbirlərin tətbiqi barədə qərar qəbul edilib.

Həmçinin MMC-nin məsul şəxsi barəsində müvafiq tədbir görülüb.

Bildirilir ki, qəbul edilmiş qərarın icra vəziyyətinin yoxlanılması ilə əlaqədar “Volt Azərbaycan” MMC-də plandankənar yoxlama keçirilib. Yoxlama zamanı şirkət tərəfindən nöqsanların aradan qaldırılmadığı, həmçinin fəaliyyətinin dayandırılmasına baxmayaraq, fəaliyyət göstərdiyi müəyyən olunub.

“Göstərilənlərə əsasən, AQTA insanların həyat və sağlamlığının qorunması, istehlakçıların hüquqlarının müdafiəsi məqsədilə bir daha ictimai iaşə müəssisələrinin rəhbərlərini  qidaların daşınmasını və istehlakçılara çatdırılmasını yalnız qeydiyyatdan keçmiş və temperatur rejimi təmin olunan avadanlıqlara (nəqliyyat vasitələrinə) malik, qida ilə təmasda olan şəxsləri tibbi müayinədən keçmiş qida subyektləri tərəfindən həyata keçirilməsini təmin etməyə çağırır”, – məlumatda qeyd olunur.

Son bir ildə daşınma şirkətləri ilə bağlı məsələlər tez-tez gündəmin əsas mövzusu olur.

Ötən il aprelin 21-də “Wolt” şirkətinin kuryerləri xidmət haqlarının aşağı olması ilə əlaqədar sosial şəbəkələrdə etiraz ediblər.

Bu il avqustun 1-də isə bir qrup kuryer idarə etdikləri mopedləri yol polislərinin saxlayaraq cərimə meydançasına aparmasına etiraz edib. Həmin etiraz aksiyasından dərhal sonra İşçi Masasının sədri Afiəddin Məmmədov saxlanılıb və 30 sutka inzibati həbsə məhkum edilib. Sonrakı günlərdə isə İşçi Masası İdarə Heyətinin üzvləri Ayxan İsrafilov və Elvin Mustafayev narkotik maddələrin əldə edilməsi, saxlanılması və satışı ittihamı ilə həbs olunublar. İşçi Masası İdarə Heyətinin daha bir üzvü Orxan Zeynalov isə onu təqib edənlərin əlindən qaçaraq yayına bilib və həbs təhlükəsi barədə sosial şəbəkə üzərindən məlumatlar yaydıqdan sonra Daxili İşlər Nazirliyi onun barəsində hər hansı icraat tədbiri olmadığı haqda açıqlama verib.

Ekologiya və Təbii Sərvətlər Nazirliyinin monitorinq qrupu kənddədir

Lənkəran rayonunun Təngivan kənd sakinləri deyir ki, son 1-2 gündür gecələr havadan üfunət iyi çəkilib, amma çayda hələ də lillənmə müşahidə edilir.

Təngivanlılar uzun illərdir Lerikin Piran kəndində yerləşən “Lerik Broyler MMC”yə məxsus “Lebro” quşçuluq təsərrüfatının havanı və Lənkəran çayı çirkləndirdiyindən şikayətlənirlər. Sakinlər bir neçə dəfə etiraz aksiyası keçirməyə də cəhd ediblər. Onların sözlərinə görə, hazırda Ekologiya və Təbii Sərvətlər Nazirliyinin monitorinq qrupu kənddədir. Şikayətçi tərəf kimi kənd sakinləri də monitorinqdə iştirak edirlər.

Kənd sakini Vüqar Əliyev Meydan TV-yə bildirib ki, əvvəlki illərdə də şirkət cərimələnib. Amma cəriməni ödəməyib və işini davam etdirib.

“Əvvəllər də belə olub. Məsələ ictimailəşəndən sonra toyuq tullantılarını yandırmağı dayandırıblar. Prezidentin ekoloji məsələləri diqqətdə saxlamasından sonra çox ümidliyik. Yəqin ki, uzun müddət ətraf mühitin çirkləndirilməsi dayandırılacaq”,- sakinlər bildiriblər.

Vüqar Əliyev isə deyib ki, bir neçə gün bundan əvvəl çay yenidən lilli olub:

“Broyler şirkəti deputat İqbal Məmmədovundur, yaxınları tərəfindən işlədilir. Bundan başqa, deputatın Lerikdə karxanası da var. Çay 3 mənbədən broyler təsərrüfatı, deputatın karxanası və Təngivandakı tanınmış rəssamlardan birinin karxanası tərəfindən çirkləndirilir. Nazirlik hazırda əsasən broyler təsərrüfatı ilə məşğuldur”,- sakinlər deyib.

Onlar bildiriblər ki, uzun aylardan bəri ilk dəfədir üfunətsiz gecə keçirirlər.

“Lerik Broyler MMC”-dən məsələ ilə bağlı məlumat verə bilməyəcəklərini deyiblər və “şirkətimiz ölkənin ən iri broyler şirkətidir” deyə suala aidiyyatı olmayan açıqlama verməklə kifayətləniblər.

Lerikin Piran Kənd Bələdiyyəsindən isə deyiblər ki, onlar sakinlərin narazılığından xəbərdar deyillər.

Ekologiya və Təbii Sərvətlər Nazirliyindən isə monitorinq aparıldığını, nəticələrlə bağlı açıqlama verəcəklərini deyiblər.

Meydan TV