Nazim Bəydəmirli

“Nazim Bəydəmirli əsassız və qondarma həbsinə görə aclıq aksiyasına başlayıb”.

Bu barədə vəkil Aqil Layıc Amerikanın Səsinə deyib.

“Nazim Bəydəmirli ilə sonuncu dəfə keçən həftə görüşmüşəm, məlumatı şəxsən özündən dəqiqləşdirmək imkanım olmayıb. Amma sonuncu dəfə müstəntiqin yanında demişdi ki, sentyabrın 4-də aclıq elan edəcək. Yenə qeyd edirəm özü ilə sentyabrın 7-də görüşəndə dəqiqləşdirmə apacam. Amma mənə belə bir məlumat daxil oldu. Qanunsuz və qondarma ittihamlar, aciz məhkəmələr insan talelərini belə məhv etməklə məşğuldur”, vəkil qeyd edib.

Nazim Bəydəmirlinin ailəsindən Amerikanın Səsinə deyiblər ki, vəkilin dedikləri həqiqətdir.

“Nazim Bəydəmirlinin sabah, sentybarın 7-də ailə üzvləri ilə telefon danışığı olmalıdır. Biz onun aclıq etməsindən çox narahatıq”, Bəydəmirlinin həyat yoldaşı Fəridə Bəydəmirli Amerikanın Səsinə bildirib.

Penitensiar Xidmət isə Amerikanın Səsinin sorğusuna cavabda bildirib ki, Nazim Bəydəmirli aclıq etməsi barədə Penitensiar Xidmətə müraciət etməyib.

Xatırlatma

İyulun 5-də Nərimanov Rayon Məhkəməsi hakim Vüsal Qurbanovun sədriyi ilə Nazim Bəydəmirli barəsində 4 aylıq həbs-qətimkan tədbiri seçib.

Keçmiş deputata qarşı əvvəlcə Cinayət Məcəlləsinin 182.2.4-cü (Hədə-qorxu ilə tələb etmə, xeyli miqdarda əmlak əldə etmək məqsədi ilə törədildikdə) maddəsi ilə ittiham irəli sürülüb. Sentyabrın 1-də isə Nazim Bəydəmirlinin 27 il əvvəl, 1996-cı ildə Rusiya Federasiyasının Lipetsk şəhərində kimdənsə hədə-qorxu ilə pul tələb etməsi iddiası ilə Cinayət Məclləsinin 182.2.2 (hədə-qorxu ilə təkrar tələb etmə) maddəsilə ilə yeni ittiham irəli sürülüb.

İlkin olaraq Bəydəmirlinin Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində Gədəbəy rayonunun Söyüdlü kəndində yerli sakinlərin etiraz aksiyaları ilə bağlı şübhəli şəxs qismində saxlanılması barədə sosial şəbəkələrdə məlumat yayılıb.

Daxili İşlər Nazirliyinin Mətbuat Xidmətinin məlumatında deyilir ki, Bəydəmirli vətəndaşın müraciəti əsasında saxlanılıb.

“Belə ki, vətəndaş polisə müraciət edərək Nazim Bəydəmirlinin onun barəsində rüsvayedici görüntülərin olduğunu qeyd edərək ondan 50 min manat tələb etdiyini bildirib. O, cari il iyunun 14-də Bəydəmirliyə 10 min manat versə də, sonuncu qalan məbləği vermədiyinə görə şikayətçini ailəsi ilə şantaj edərək rüsvayedici görüntüləri yayacağını bildirib”, mətbuat xidməti bildirib.

İyulun 10-da Bakı Apellyasiya Məhkəməsi iqtisadçı barəsində Nərimanov Rayon Məhkəməsinin seçdiyi həbs-qətimkan tədbiri qərarını qüvvədə saxlayıb.

Hüquq müdafiəçiləri keçmiş deputatın həbsini siyasi hesab edir və onun Gədəbəy rayonunun Söyüdlü kəndindəki qızıl mədəni ilə bağlı yerli sakinlərin etirazını müdafiə etdiyinə görə saxlanıldığı qənaətindədir.

Amerikanın Səsi

Avropa İnsan Haqları Məhkəməsi

Avropa İnsan Hüquqları Məhkəməsi Azərbaycan Demokratiya və Rifah Partiyasının sədri Qubad İbadoğlunun işinə dərhal baxılmasına qərar verib və Azərbaycan hökumətinə suallar göndərib.

Bu barədə Qubad İbadoğlunun qardaşı Qalib Toğrul Amerikanın Səsinə bildirib.

Onun sözlərinə görə, Avropa İnsan Hüquqları Məhkəməsi 39-cu (Məhkəmə Reqlamentinin 39-cu Qaydasına görə, məhkəmə müvəqqəti tədbirlər təyin edə bilər -red.) qaydanı əsas tutaraq bu qənaətə gəlib.

“İşə dərhal baxılmasının səbəbi qardaşımın səhhətinin kəskin pisləşməsi və onun orqanizminin ağır saxlanma şəraitinə uzun müddət davam gətirə bilməməsi ilə bağlıdır. Biz Qubad İbadoğlunun ev dustaqlığına buraxılması ilə bağlı Nərimanov Rayon Məhkəməsinə müraciət eləmişik. Vəsatətlərimiz təmin olunmyıb. Sonra apellyasiya məhkəməsinə müraciət eləmişik. Orada da şikayətimiz təmin olunmayıb. Daha sonra Avropa məhkəməsinə müraciət etmişik. Bizim Qubad bəyin ev dustaqlığına buraxılmasının əsaslandırmamızın kökündə o dayanır ki, Qubad bəyin səhhəti çox kritikdir”, Qubad İbadoğnunun qardaşı deyir.

O qeyd edib ki, Qubad İbadoğlunu o şəraitdə qalması həyatı təhlükədir.

“Ölümlə nəticələnə bilər. Əsas məsələ təbii ki, Qubad bəyin səhhətidir ki, bu səhhət ilə orada çox davam edə bilməz. Azərbaycanın müvafiq icra hakimiyyəti strukturlarından başqa hər kəs bu təhlükəni görür və nəsə etməyə çalışır”, o bildirib.

Bununla yanaşı, Amerikanın Səsinin Ədliyyə Nazirliyinin Penitensiar Xidmətindən bu deyilənlərlə bağlı şərh alması hələ mümkün olmayıb.

Hüquq müdafiəçisi Rüfət Səfərov məhkəmənin qərarını Amerikanın Səsinə şərh edərək bildirib ki, iqtisadçı alim Qubad İbadoğlu tam qurama ittiham üzrə həbsdədir.

Onun fikrincə, Qubad İbadoğlunun hazırda sağlıq durumu qənaətbəxş deyil.

“Qeyd edirəm ki, Avropa İnsan hüquqları məhkəməsinə şikayət ərizəsi daxil olarkən o şikayətə baxılan müddət ərzində dövlətin müəyyən müvəqqəti məcburiyyət tədbirləri görülməsi barədə qərar qəbul edilə bilər. Bu adətən dövləti nəyisə etməkdən çəkindirməkdən, məsələn şəxslərin ölüm və ya işgəncə ilə üzləşə biləcək ölkələrə qaytarılmaması kimi hallardan ibarətdir. Müvəqqəti məcburiyyət tədbirləri barədə qərar məhkəmə tərəfindən yalnız aydın şəkildə müəyyən edilmiş şəkildə konvensiyanın ciddi pozuntusunun baş verməsi təhlükəsi olduqda qəbul edilir”, hüquq müdafiəçisi deyib.

Onun sözlərinə görə, müvəqqəti tədbirlər Konvensiyanın yaşamaq hüququ, işgəncələrin qadağan edilməsi maddələri, eksdradisiya, həbsdə saxlanılan şəxsin sağlıq durumu ilə bağlı tətbiq edilir.

“Hər halda Qubad bəyin ibtidai istintaq dövründə ev dustaqlığına çıxarılması ilə bağlı hüquqi çalışmalar davam etdirilməkdədir” Rüfət Səfərov bildirib.

İyulun 24-də Bakının Nərimanov Rayon Məhkəməsi Qubad İbadoğlu barədə 3 ay 26 gün həbs-qətimkan tədbiri seçib.

Qubad İbadoğlu hazırda Azərbaycan Cinayət Məcəlləsinin 204.3.1 (satış məqsədi ilə hazırlama, o cümlədən saxta pul və ya xarici valyuta əldə etmə və ya satma – eyni əməllər mütəşəkkil dəstə tərəfindən törədildikdə), 167-3.1 (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunur. İki ittiham üzrə onu 17 ilədək həbs gözləyir.

Azərbaycan Daxili İşlər Nazirliyi Qubad İbadoğlunun Türkiyədə 2016-cı ildə çevriliş cəhdində ittiham olunan, hazırda Amerikada yaşayan Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.

Qubad İbadoğlu ittihamları qəbul etmir və həbsinin siyasi sifariş olduğunu qeyd edir.

Bu günədək bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri İbadoğlunun azad edilməsi üçün çağırışlar edib.

Amerikanın Səsi

Avropa İnsan Haqları Məhkəməsi (AİHM) sentyabrın 7-də Azərbaycanla bağlı 2 qərarını elan edəcək.

Şahvələd NAMAZOV Azərbaycana qarşı

Bu məhkəmə işi tanınmış jurnalist olan ərizəçinin ölkədən çıxışına rəsmi qurumlar tərəfindən qadağa qoyulması ilə bağlıdır. Ərizəçi həmçinin AİHM qarşısında Konvensiyanın 10 və 18-ci maddələrinin pozntusundan da şikayət edib.

Ərizəçi AİHM-ə şikayətində iddia edib ki, hərəkət etmək azadlığına qoyulan məhdudiyyət qanuna uyğun və Konvensiyanın 4 saylı Protokolunun 2-ci maddəsi baxımından zəruri olmayıb. Ərizəçiyə görə, məruz qaldığı pozuntudan müdafiə üçün əlində istifadə edə biləcəyi effektiv müdafiə vasitələri də mövcud olmayıb.

Eyni zamanda ifadə azadlığı hüququna da müdaxilə edildiyini bildirən ərizəçi, bu müdaxilənin 10-cu maddəsinin 2-ci bəndi baxımından zəruri olmadığını iddia edib.

Ərizəçi həmçinin, şikayətində Konvensiyanın 4 saylı Protokolunun 2-ci maddəsinə əsasən dövlət tərəfindən qoyulmuş məhdudiyyətlərin Konvensiyanın 18-ci maddəsinə zidd olaraq, həmin maddədə nəzərdə tutulanlardan fərqli məqsədlər üçün tətbiq edildiyini ifadə edib.

İlqar QURBANOV Azərbaycana qarşı

Bu məhkəmə işi ərizəçinin dövlət qulluğundan xaric edilməsinə dair icraatlarla əlaqəlidir. Ərizəçi iddia edib ki, onun işinə Ali Məhkəmədə baxılarkən iddiaçıya, onun vəkilinə iclasın keçirilmə tarixi və vaxtı barədə lazımi qaydada məlumat verilməyib, işə onların qatılımı olmadan baxılıb.

Aihmaz.org