Qubad İbadoğlu

İqtisadçının azadlığını tələb edən kampaniyanın adı “52 şəhərdə 52 aksiya”dır

Hazırda həbsdə olan iqtisadçı, Azərbaycan Demokratiya və Rifah Partiyasının sədri (ADR) Qubad İbadoğlunun sentyabrın 12-də 52 yaşı tamam olur.

Onun doğum günü münasibətilə beynəlxalq aksiya keçirilməsi planlaşdırılır.

Aksiyanın adı “52 şəhərdə 52 aksiya”dır. Beləliklə, dünyanın müxtəlif ölkələrinin şəhərlərində insanlar Qubad İbadoğluna azadlıq tələbi ilə aksiya keçirəcəklər.

Qubad İbadoğlunun qardaşı Qalib Bayramov deyir ki, ilk aksiya Cənub-Şərqi Asiyada yerləşən Şərqi Timor Demokratik Respublikasının (Timor-Leste) paytaxtı Dili şəhərində olub.

Orada artıq sentyabrın 12-dir.

Dilidəki müstəqil vətəndaş cəmiyyəti fəalları Azərbaycan hökumətini Qubad İbadoğlunu azad etməyə çağırıb.

Növbəti gün, yəni sentyabrın 12-də ABŞ, Almaniya, Belçika, Fransa, Türkiyə, Polşa, Böyük Britaniya, Macarıstan, Danimarka, Norveç, Niderland, Gürcüstan və İsveçin müxtəlif şəhərlərində Qubad İbadoğluna azadlıq aksiyaları keçiriləcəyi planlaşdırılır.

Qalib Bayramov deyir ki, hazırda bu ölkələrdə keçiriləcək aksiyalara hazırlıq gedir.

İyulun 24-də barəsində 3 ay 26 gün həbs-qətimkan tədbiri seçilən iqtisadçıya qarşı saxta pul hazırlama, dini-ekstremist materialların hazırlanması, saxlanması və ya yayılması ittihamları irəli sürülüb.

Azərbaycan Daxili İşlər Nazirliyi onun Türkiyədə 2016-cı ildə çevriliş cəhdində ittiham olunan, hazırda Amerikada yaşayan Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.

Qubad İbadoğlu ittihamları qəbul etmir və həbsinin siyasi sifariş olduğunu qeyd edir.

Bu günədək bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri İbadoğlunun azad edilməsi üçün çağırışlar edib.

Avropa İnsan Hüquqları Məhkəməsi (AİHM) iqtisadçı Qubad İbadoğlunun işinə dərhal baxılmasına qərar verib.

Məhkəmə 39-cu qaydanı (müvəqqəti məcburiyyət tədbirləri) əsas götürərək Azərbaycan hökumətinə suallar göndərib.

Meydan TV 

Ölkədəki siyasətsizlik mühiti siyasi fəaliyyəti mümkünsüz edir

Demokratiya 1918 Hərəkatı (D18) fəaliyyətini dayandırıb. Bu barədə qərar Demokratiya 1918 Hərəkatının sentyabrın 10-da keçirilən növbədənkənar qurultayında qəbul edilib.

Qurultayın qərarında qeyd olunub ki, ölkədəki anti-demokratik sistem və onun yaratdığı siyasətsizlik mühiti hər hansı bir formada siyasi fəaliyyəti mümkünsüz edir:

“Bunun qarşısında isə resurs məhdudluğu müsbət dəyişikliklər edilməsi üçün adekvat cavab imkanını məhdudlaşdırır. Bütün bu səbəblərdən ötrü artıq siyasi səhnədə hər hansı bir qurumun siyasi iddia irəli sürməsi və təşkilatlanması öz əhəmiyyətini itirir”.

“İnanırıq ki, obyektiv və subyektiv səbəblər yetişdikdən sonra siyasi dəyişikliklərin rəhni olacaq təşkilatlar yenidən ortaya çıxacaqdır”,-deyə qərarda bildirilib.

Demokratiya 1918 Hərəkatı 2013-cü ilin martında yaradılıb. 2021-ci ilin sentyabrın 18-də Demokratiya 1918 Hərəkatının II qurultayında İdarə Heyəti və strukturu dəyişilib.

Meydan TV 

Beynəlxalq insan haqları təşkilatı Amnesty International Azərbaycan hakimiyyətini müxalif siyasətçi və iqtisadçı Qubad İbadoğlunu dərhal həbsdən azad etməyə çağırıb.

Qeyri-qanuni həbsdə olan azərbaycanlı alim və siyasi fəal Qubad İbadoğlunun səhhətinin vəziyyəti ciddi şəkildə pisləşir, Amnesty İnternational təşkilatının Şərqi Avropa və Mərkəzi Asiya üzrə tədqiqatçısı Natalya Nozadze deyib.

“Qubad İbadoğlunun qondarma ittihamlarla həbsi Azərbaycan hakimiyyətinin müxalif fikirlərə və dinc tənqidçilərə qarşı mübarizədə cinayət ədliyyə sistemindən necə sui-istifadə etməsinə daha bir nümunədir. Onunla pis rəftar olunması İbadoğlunun vəziyyətini daha da ağırlaşdırır. Qubad İbadoğlu dərhal və qeyd-şərtsiz azadlığa buraxılmalı və onunla pis rəftara görə məsuliyyət daşıyanlar məsuliyyətə cəlb edilməlidir”, – deyə Nozadze Amnesty İnternational-ın saytında dərc olunan müraciətdə bildirib.

Diabet və ürək xəstəliyindən əziyyət çəkən alim və fəalın yaxınları Amnesty İnternational-a bildiriblər ki, iyulda həbs olunduqdan sonra səhhəti xeyli pisləşib. Onlar lazımi tibbi yardıma və dərmanlara müntəzəm çıxışın olmamasının onun sağlamlığına düzəlməz zərər vura biləcəyindən son dərəcə narahat olduqlarını bildiriblər.

Nozadze yekunda deyib: “Qubad azadlığa buraxılmazdan əvvəl hakimiyyət onun ən keyfiyyətli tibbi xidmətə çıxışını təmin etməyə borcludur; bu tələbin yerinə yetirilməməsi işgəncə və ya pis rəftarın digər növləri kimi qiymətləndirilə bilər”.

yulun 24-də Bakının Nərimanov Rayon Məhkəməsi Qubad İbadoğlunu saxta pul hazırlamaq ittihamı ilə 3 ay 26 gün müddətinə həbs edib. Azərbaycan DİN İbadoğlunun 2016-cı ildə Türkiyədə dövlət çevrilişi cəhdində ittiham olunan Fətullah Gülənin tərəfdarları ilə əlaqəsi olduğunu bildirib. Avqustun 25-də ona qarşı “dini-ekstremist materiallar hazırlama, saxlama və ya yayma” ittihamı irəli sürülüb.

Qubad İbadoğlu ittihamları təkzib edir, onları absurd hesab edir. Bir çox beynəlxalq təşkilatlar və rəsmi şxəslər rəsmi Bakını siyasətçini dərhal azad etməyə çağırıblar.

Turan 

Qubad İbadoğlu

Avropa Parlamenti önümüzdəki həftə baş tutacaq plenar iclasında Azərbaycanda həbs edilən Qubad İbadoğlunun işini müzakirə edəcək.

Parlamentin insan hüquqlarının, demokratiyanın və qanunun aliliyinin pozulması hallarına dair təcili debatlar proseduru üzrə keçiriləcək müzakirələr həftənin çərşənbə günü baş tutacaq. Cümə axşamı Qubad İbadoğlunun işi ilə bağlı qətnamə layihəsi səsverməyə çıxarılacaq.

Avropa Parlamentinin Cənubi Qafqaz üzrə nümayəndə heyətinin rəhbəri Mariya Kalyurand və Parlamentin Azərbaycan üzrə məruzəçisi Jelyana Zovko avqustun 21-i birgə bəyanat yayaraq Qubad İbadoğlunun həbsi və Azərbaycanda insan hüquqlarının pisləşən vəziyyəti barədə narahatlıq ifadə ediblər.

“Qubad İbadoğlu 23 iyul 2023-cü ildə saxtakarlıq ittihamı ilə həbs edilib və hələ də həbsdə saxlanılır. Onun həbsdə fundamental hüquqları pozularaq alçaldıcı rəftara məruz qaldığı, ailəsi və vəkili ilə təmasına, qida və həyati əhəmiyyət kəsb edən dərman preparatlarına çıxışına ciddi məhdudiyyətlər qoyulduğu bildirilir. Biz Azərbaycan hakimiyyətini təcili şəkildə İbadoğlunu zəruri tibbi yardımla təmin etməyə və onun dərhal azad edilməsinə çağırırıq”, bəyanatda vurğulanıb.

Avropa Parlament həmçinin bu ilin mart ayında Avropa İttifaqı ilə Azərbaycan arasındakı münasibətləri qiymətləndirən hesabat qəbul edib. Parlament həmin hesabatda Azərbaycanda insan hüquqlarının vəziyyətini tənqid edib, Azərbaycan hakimiyyəti insan hüquqlarına hörmət etməyə çağırıb.

Xatırlatma 

İyulun 24-də Bakının Nərimanov Rayon Məhkəməsi Qubad İbadoğlu barədə 3 ay 26 gün həbs-qətimkan tədbiri seçib.

Qubad İbadoğlu hazırda Azərbaycan Cinayət Məcəlləsinin 204.3.1 (satış məqsədi ilə hazırlama, o cümlədən saxta pul və ya xarici valyuta əldə etmə və ya satma – eyni əməllər mütəşəkkil dəstə tərəfindən törədildikdə), 167-3.1 (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunur. İki ittiham üzrə onu 17 ilədək həbs gözləyir.

Azərbaycan Daxili İşlər Nazirliyi Qubad İbadoğlunun Türkiyədə 2016-cı ildə çevriliş cəhdində ittiham olunan, hazırda Amerikada yaşayan Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.

Qubad İbadoğlu ittihamları qəbul etmir və həbsinin siyasi sifariş olduğunu qeyd edir.

Bu günədək bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri İbadoğlunun azad edilməsi üçün çağırışlar edib.

Amerikanın Səsi 

Nazim Bəydəmirli və həyat yoldaşı Fəridə Bəydəmirli (Fotonu Fəridə Bəydəmirli təqdim edib)

Milli Məclisin keçmiş deputatı Nazim Bəydəmirli sentyabrın 4-dən həbsinə etiraz olaraq saxlanıldığı 1 saylı Bakı İstintaq Təcridxanasında aclıq aksiyası keçirir.

Bu barədə Nazim Bəydəmirlinin həyat yoldaşı Fəridə Bəydəmirli bu gün, sentyabrın 7-də onunla telefon danışığından sonra Amerikanın Səsinə bildirib.

“Mən və övladlarımız Nazim müəllimdən aclığı dayandırmasını xahiş etdik. Xatırlatdım ki, onun 60 yaşı var. Yeməksiz qala bilər, amma susuz yaşaya bilməz. Dedim ki, bu sənin səhhətində geridönməz problemlər yaradacaq. Mən də, uşaqlar da bunu istəmirik. Oğlum xaricdən zəng edib xahiş etdi ki, atası aclığı dayandırsın. Mən ona dedim ki, həbsinə etiraz olaraq mübarizə etmək istəyir, amma səhhəti ilə zarafat etmək olmaz. Ona sistem köçürəcəklərini dedim. Bildirdim ki, köçürülən sistemin necə olacağından narahatam. Onun tərkibi necə olacaq?” o qeyd edib.

Bununıla yanaşı, Fəridə xanım həyat yoldaşının aclığı dayandırıb-dayandırmayacağı barədə dəqiq bir söz deyə bilmir.

“Mən aclığı dayandırması ilə bağlı ailəmizin xahişini ona çatdırdım. O mənimlə razılaşdı. Amma aclığı dayandırıb-dayandırmayacağı barədə bir söz demədi”, o qeyd edib.

Penitensiar Xidməti Amerikanın Səsinin sorğusuna cavabda bildirib ki, Nazim Bəydəmirli aclıq etməsi barədə Penitensiar Xidmətə müraciət etməyib.

İyulun 5-də Nərimanov Rayon Məhkəməsi hakim Vüsal Qurbanovun sədriyi ilə Nazim Bəydəmirli barəsində 4 aylıq həbs-qətimkan tədbiri seçib.

Keçmiş deputata qarşı əvvəlcə Cinayət Məcəlləsinin 182.2.4-cü (Hədə-qorxu ilə tələb etmə, xeyli miqdarda əmlak əldə etmək məqsədi ilə törədildikdə) maddəsi ilə ittiham irəli sürülüb. Sentyabrın 1-də isə Nazim Bəydəmirlinin 27 il əvvəl, 1996-cı ildə Rusiya Federasiyasının Lipetsk şəhərində kimdənsə hədə-qorxu ilə pul tələb etməsi iddiası ilə Cinayət Məclləsinin 182.2.2 (hədə-qorxu ilə təkrar tələb etmə) maddəsilə ilə yeni ittiham irəli sürülüb.

İlkin olaraq Bəydəmirlinin Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində Gədəbəy rayonunun Söyüdlü kəndində yerli sakinlərin etiraz aksiyaları ilə bağlı şübhəli şəxs qismində saxlanılması barədə sosial şəbəkələrdə məlumat yayılıb.

Daxili İşlər Nazirliyinin Mətbuat Xidmətinin məlumatında deyilir ki, Bəydəmirli vətəndaşın müraciəti əsasında saxlanılıb.

“Belə ki, vətəndaş polisə müraciət edərək Nazim Bəydəmirlinin onun barəsində rüsvayedici görüntülərin olduğunu qeyd edərək ondan 50 min manat tələb etdiyini bildirib. O, cari il iyunun 14-də Bəydəmirliyə 10 min manat versə də, sonuncu qalan məbləği vermədiyinə görə şikayətçini ailəsi ilə şantaj edərək rüsvayedici görüntüləri yayacağını bildirib”, mətbuat xidməti bildirib.

İyulun 10-da Bakı Apellyasiya Məhkəməsi iqtisadçı barəsində Nərimanov Rayon Məhkəməsinin seçdiyi həbs-qətimkan tədbiri qərarını qüvvədə saxlayıb.

Keçmiş deputatın həbsini siyasi hesab edən hüquq müdafiəçiləri onun Gədəbəy rayonunun Söyüdlü kəndindəki qızıl mədəni ilə bağlı yerli sakinlərin etirazını müdafiə etdiyinə görə saxlanıldığı qənaətindədir.

Amerikanın Səsi

Avropa İnsan Haqları Məhkəməsi (AİHM) bu gün, sentyabrın 7-də Azərbaycanla bağlı 2 qərarını elan edib. Məhkəmə bir işdə ədalətli məhkəmə araşdırması hüququnun pozuntusuna qərar verib, digər işdə hökumət iddia olunan pozuntuları etiraf edib.

Şahvələd NAMAZOV Azərbaycana qarşı

Bu məhkəmə işi tanınmış jurnalist olan ərizəçinin ölkədən çıxışına rəsmi qurumlar tərəfindən qadağa qoyulması ilə bağlı id. Ərizəçi, həmçinin AİHM qarşısında Konvensiyanın 10 və 18-ci maddələrinin pozntusundan da şikayət etmişdi. O, AİHM-ə şikayətində iddia edirdi ki, hərəkət etmək azadlığına qoyulan məhdudiyyət qanuna uyğun və Konvensiyanın 4 saylı Protokolunun 2-ci maddəsi baxımından zəruri olmayıb. Ərizəçiyə görə, məruz qaldığı pozuntudan müdafiə üçün əlində istifadə edə biləcəyi effektiv müdafiə vasitələri də mövcud olmayıb. Eyni zamanda ifadə azadlığı hüququna da müdaxilə edildiyini bildirən ərizəçi, bu müdaxilənin 10-cu maddəsinin 2-ci bəndi baxımından zəruri olmadığını iddia edirdi. Ərizəçi həmçinin, şikayətində Konvensiyanın 4 saylı Protokolunun 2-ci maddəsinə əsasən dövlət tərəfindən qoyulmuş məhdudiyyətlərin Konvensiyanın 18-ci maddəsinə zidd olaraq, həmin maddədə nəzərdə tutulanlardan fərqli məqsədlər üçün tətbiq edildiyini ifadə etmişdi.

Bu işdə qərardan öncə anlaşma ilə bağlı müzakirələr uğursuz olub – ərizəçi işin qərardan əvvəl həll edilməsi təklfilərini rədd edib, ərizəyə baxılmasını, məhkəmənin qərar verməsini istəyib. Bunun ardınca isə hökumət AİHM-ə təktərəfli bəyannamə təqdim edib – hökumət ərizəçinin effektiv müdafiə vasitələrinə malik olmaq və hərəkət azadlığı hüququna müdaxilənin baş verdiyini etiraf edib, ərizəçiyə ümumilikdə 6 min avro təzminatın ödənilməsini və işin baxılacaq ərizələrin siyahısından çıxarılmasını təklif edib. AİHM bəyannaməni nəzərə alaraq, qərar qəbul edib, həmin qərara əsasən, hökumət jurnalistə təzminat ödəməlidir.

İlqar QURBANOV Azərbaycana qarşı

Bu məhkəmə işi ərizəçinin dövlət qulluğundan xaric edilməsinə dair icraatlarla əlaqəli idi. Ərizəçi iddia etmişdi ki, onun işinə Ali Məhkəmədə baxılarkən iddiaçıya, onun vəkilinə iclasın keçirilmə tarixi və vaxtı barədə lazımi qaydada məlumat verilməyib, işə onların qatılımı olmadan baxılıb və ədalətli məhkəmə araşdırması hüququ pozulub.

Məhkəmə bu işdə hökumətin əks arqumentlərini rədd edib, 6.1-ci maddənin pozuntusuna qərar verib. Qərara görə, hökumət ərizəçiyə 1000 avro təzminat ödəyəcək.

Aihmaz.org