Sentyabrın 20-də Bakı vaxtı ilə saat 13-də Qarabağda hərbi əməliyyatların dayandırılması barədə razılıq əldə edilib. Razılığa əsasən Qarabağın erməni nümayəndələri Azərbaycan hökumətinin əsas şərtlərini qəbul edib.

Azərbaycan Prezidentinin Administrasiyası bildirir ki, Azərbaycan Konstitusiyası və qanunları əsasında reinteqrasiya məsələlərinin müzakirə edilməsi üçün Qarabağın erməni sakinlərinin nümayəndələri ilə sentyabr 21-də Yevlaxda görüş keçiriləcək.

Azərbaycan Müdafiə Nazirliyi bildirib ki, Qarabağın erməni sakinlərinin nümayəndələri Rusiya sülhməramlı kontingenti vasitəsilə müraciətini nəzərə alaraq silahı yerə qoymağa, döyüş mövqelərindən və hərbi postlardan çıxmağa və tam şəkildə tərksilah olunmağa razılıq veriblər. Paralel şəkildə bütün silah-sursat və ağır texnika təhvil verilməsi barədə anlaşma əldə olunub.

Sentyabrın 20-nə olan rəsmi məlumata görə, erməni hərbi birləşmələrinin 90-dan artıq döyüş mövqeyi, eləcə də bir neçə strateji əhəmiyyətli yüksəklik Azərbaycan Silahlı Qüvvələrinin nəzarətinə keçib. Eyni zamanda qarşı tərəfə məxsus 7 ədəd hərbi nəqliyyat vasitəsi, 4 ədəd minaatan, 1 ədəd tank, 2 ədəd piyadanın döyüş maşını və xeyli sayda silah-sursat qənimət olaraq ələ keçirilib.

Öz növbəsində, Ermənistanın İnsan Hüquqları Komissiyasının məlumatında deyilir ki, Dağlıq Qarabağda atışma nəticəsində erməni tərəfindən 32 nəfər ölüb, 200-dən çox insan yaralanıb.

Qarabağda hərbi qüvvə saxlamadığını israr edən Ermənistan hərbi münaqişədə iştirak etmədiyini bəyan edib. Rəsmi Yerevan Bakını Qarabağda etnik təzmiləmə siyasəti aparmaqda ittiham edib.

BMT Təhlükəsizlik Şurası sentyabrın 21-də Qarabağda baş verənlərlə bağlı növbədəkənar iclas keçirməyi planlaşdırır.

BMT Baş Katibi Antonio Quterreş savaşın dərhal dayandırılmasına və bütün tərəfləri regiona uzunmüddətli sülh gətirmək üçün səylərə diqqət cəmləməyə çağırıb.

ABŞ Dövlət katibi Antoni Blinken sentyabın 19-da Azərbaycan prezidenti İlham Əliyev və Ermənistanın baş naziri Nikol Paşinyanla ayrı-ayrı telefon danışığı zamanı Qarabağda hərbi əməliyyatları müzakirə edib.

Dövlət Departamentinin sözçüsü Metyu Millerin açıqladığı bəyanatda dövlət katibi Antoni Blinkenin Azərbaycan prezidenti İlham Əliyevlə telefon söhbəti zamanı Azərbaycanı Dağlıq Qarabağda hərbi əməliyyatları dərhal dayandırmağa və gərginliyi azaltmağa çağırdığı bildirilir.

Ermənistanın baş naziri Nikol Paşinyanla telefon söhbəti zamanı Blinken Dağlıq Qarabağdakı vəziyyətlə bağlı dərin narahatlığını ifadə edib və ABŞ-ın Azərbaycanı dərhal hərbi əməliyyatları dayandırmağa və dərhal dialoqa qayıtmağa çağırdığını vurğulayıb.

“O, baş nazir Paşinyana ABŞ-ın Ermənistanın suverenliyi, müstəqilliyi və ərazi bütövlüyünü tam dəstəklədiyini bildirib,” Metyu Millerin açıqladığı bəyanatda bildirilir.

Amerikanın Səsi

Qubad İbadoğlu. Foto: Meydan TV

Vəkilləri  qurumun nümayəndəsinin də məhkəmədə iştirakını istədilər

Sentyabrın 19-da Nərimanov Rayon Məhkəməsində Azərbaycan Demokratiya və Rifah Partiyasının (ADR) sədri, professor Qubad İbadoğlunun sağlamlıq problemlərilə bağlı vəkillərinin verdiyi şikayətə baxılıb.

Vəkilləri onun həbsdə olduğu dövrdə müayinə və müalicəsinin gecikdirilməsi, analizlərinin nəticələrilə bağlı tibbi sənədlərin gec və yarımçıq təqdim olunması kimi hallardan məhkəməyə şikayət ediblər.

Hakim Vüsal Qurbanovun sədrliyilə keçirilən məhkəmə iclasında ADR sədri özü də iştirak edib.

Vəkillər Zibeydə Sadıqova və Bəhruz Bayramov hüquqlarını müdafiə etdikləri şəxsin səhhətindəki problemlərə diqqət çəkərək bildiriblər ki, Qubad İbadoğlu kəskin ürək, şəkər, təzyiq və s. xəstəliklərdən əziyyət çəkir.

Onun qapalı şəraitdə saxlanması sağlamlıq problemlərini daha da kəskinləşdirib. Üstəlik, vaxtında müayinə olunmaması, lazımi şəkildə müalicə ala bilməməsi də durumu kritikləşdirir.

Qubad İbadoğlu özü də çıxış edərək həbsin ona yeni xəstəliklər qazandırdığını bildirib.

Onun sözlərinə görə, həbsdən öncə sağlamlıq problemi olsa da, vaxtlı-vaxtında həkimə gedir, dərmanlarını qəbul edirdi.

O, səhhətində kəskin problemlər olduğu halda, qapalı şəraitdə saxlanmasını, müayinənin nəticələrinin ona verilməməsini və s. halları qeyri-insani rəftar kimi qiymətləndirib.

Qubad İbadoğlu deyir ki, dərmanları ona verirlər, lakin həmişə əlinin altında olmur deyə vaxtında qəbul edə bilmir:

“Nə vaxt mənə verilirsə, onda qəbul edə bilmirəm. Yaxud da gedirəm, təzyiqimi ölçürlər. Onlar ölçəndə guya normal olur. Amma gəlirəm, öz təzyiqölçən aparatımla ölçəndə başqa nəticə olur”.

Qubad İbadoğlunun müayinəsinin nəticələrini əldə etmək üçün vəkilləri dəfələrlə Ədliyyə Nazirliyinin Tibb Baş İdarəsinə sorğular göndərmişdilər. Lakin ya sorğuya cavab verilməyib, ya imtina edilib.

Vəkillərin bildirdiyinə görə, bir neçə müraciətdən sonra alınan cavab isə onları qane etməyib. Onlar hesab edir ki, müayinənin nəticələrinə dair cavablar tam olmayıb.

Hakim Vüsal Qurbanov qərara gəlib ki, Ədliyyə Nazirliyinin Tibb Baş İdarəsinə sorğu verilsin, Qubad İbadoğlunun müayinə və müalicəsilə bağlı sənədlər bu qurumdan alınsın.

Onun vəkilləri bu qurumun nümayəndəsinin də məhkəmədə iştirak etməsini istəyib.

Hakim qərar verib ki, Qubad İbadoğlunun müayinə və müalicəsinə dair şikayətlə bağlı məhkəmə prosesi sentyabrın 22-də davam etdirilsin.

Xatırlatma

London İqtisadiyyat Məktəbinin əməkdaşı olan Qubad İbadoğlu iyulun 23-də saxlanılıb.

Ona Cinayət Məcəlləsinin 204.3.1 ( saxta pul və ya qiymətli kağızlar hazırlama, əldə etmə və ya satma mütəşəkkil dəstə tərəfindən törədildikdə) maddəsi ilə ittiham irəli sürülüb.

Ertəsi gün Nərimanov Rayon Məhkəməsində onun barəsində ilkin istintaq dövrü üçün 3 ay 26 günlük həbs qətimkan tədbiri seçilib.

ADR sədri daha dörd nəfərlə əlbirlikdə ittiham olunur.

Onların adları ilk dəfə iyulun 23-də Türkiyə mediasında açıqlanmışdı.

FETÖ (Fətullah Gülən Terror Örgütü) ilə əlaqəli şəxslər kimi təqdim olunan bu dörd nəfərə qarşı da Qubad İbadoğlu ilə eyni – Cinayət Məcəlləsinin 204.3.1 maddəsi ilə ittiham irəli sürülüb.

Sözügedən dörd nəfər Döyrüş Cəfərov, Gümrah Əbdürəhmanov, Ruslan Əliyev və Anar Əliyevdir.

Qubad İbadoğlu saxlandıqdan sonra yayılan məlumatlarda iddia olunurdu ki, Anar Əliyev ifadəsində onun adını çəkib. Amma Qubad İbadoğlu ümumiyyətlə, bu şəxsi tanımadığını deyib.

Qubad İbadoğlu saxlandığı gün ofisdə keçirilən axtarışda 40 min dollar pul tapıldığı, onun bir hissəsinin saxta olduğu iddia olunur. Lakin ADR sədri bildirib ki, həmin pulun ona heç bir aidiyyəti yoxdur.

Avqustun 25-də ona Cinayət Məcəlləsinin 167-3.1-ci (Dini ekstremist materialları hazırlama, saxlama, yayma) maddəsilə yeni ittiham elan olunub.

Qubad İbadoğlu bu ittihamın da absurd olduğunu deyib və etiraz əlaməti olaraq, ifadə verməkdən imtina edib.

Qubad İbadoğlu həbs olunduğu gün axtarışdan sonra məkandan çıxarılıb aparılarkən Prezident İlham Əliyevin sifarişilə həbs olunduğunu bildirib.

Bundan başqa, avqustun 6-da Türkiyədə yaşayan və orada universitetdə işləyən azərbaycanlı alim Fazil Qasımov saxlanılaraq, Azərbaycana gətirilib.

Avqustun 8-də Nərimanov Rayon Məhkəməsinin qərarıyla onun haqqında həbs qətimkan tədbiri seçilib.

Ona qarşı da eyni maddə ilə ittiham irəli sürülüb.

Meydan TV 

Rail Abbasov

Sentyabrın 19-da ictimai fəal Rail Abbasov Nəsimi rayon Polis İdarəsi tərəfindən saxlanılıb.

Vəkil Zibeydə Sadıqova Amerikanın Səsinə deyib ki, Rail Abbasov Cinayət Məcəlləsinin 178.3.2 (Dələduzluq, külli miqdarda ziyan vurmaqla törədildikdə) maddəsi ilə şübhəli şəxs qismində saxlanılıb.

Vəkil bildirib ki, bu gün istintaq hərəkətləri aparılıb və istintaq hərəkətləri sabah da davam etdirləcək.

“Rail Abbasov ittihamı qəbul etmir və həbsdə olan insan hüquqları fəalı Bəxtiyar Hacıyevi aktiv müdafiədən uzaqlaşdırmaq üçün onu həbs etdiklərini bildirir”, vəkil Abbasova istinadən qeyd edib.

Hüquq müdafiəçisi Rüfət Səfərov Amerikanın Səsinə ictimai fəal Rail Abbasovun Bəxtiyar Hacıyevi müdafiə etdiyinə görə təqib edildiyini deyib.

“O, Bəxtiyar Hacıyevin müdafiəsini yaxından və gündəlik işləyirdi. Hesab edirəm ki, Rail Abbasov şərlənib və Bəxtiyar Hacıyevi ciddi müdafiə etdiyinə görə belə təqib edilir. Bu, qisas aktıdır,” o qeyd edib.

Daxili İşlər Nazirliyi hələ fəalın saxlanılması ilə bağlı açıqlama verməyib.

Amerikanın Səsi

Sentyabrın 19-da ictimai fəallar Cavid Əhmədov və Əmrah Təhməzovun Dövlət Təhlükəsizlik Xidmətinə (DTX) çağırıldığı bildirilir. Bu barədə fəallar özləri məlumat yayıblar.

Hər iki fəal müharibə əleyhinə paylaşımlarına görə DTX-yə dəvət olunduqlarını deyirlər.

Cavid Əhmədov Dövlət Təhlükəsizlik Xidmətinə çağırıldıqdan sonra, eyni gün ora gedib və bir neçə saatdan sonra sərbəst buraxılıb. Əhmədov bildirib ki, DTX-ya rəsmi bildiriş olmadan çağırılıb:

“Rəsmi bildirişi soruşanda dedilər ki, “lazım olsa göndərərik”. Söhbət həddindən artıq uzun oldu, əsasən indiki vəziyyətdə müharibə əleyhinə yazmağımla bağlı danışırdılar, arqumentlər qururdular. 4 saatdan sonra sərbəst buraxıldım”.

Əhmədovun sözlərinə görə DTX-da müharibə əleyhinə yazanları təxribat törətməkdə ittiham ediblər.

“Məlum oldu ki, bura çağırılan təkcə mən deyiləm. Bir neçə AXCP üzvünü gördüm, vətəndaş cəmiyyətindən olmayan adamlar da var idi. Bizim hazırda baş verənlərə alternativ fikir bildirməyimiz onlar üçün qəbuledilməzdir. Sanki hər kəs susmalıdır, heç kim danışmamalıdır. Hamı dəmir yumruğun altında birləşməlidir. Alternativ fikir deyən insanlar isə necəsə cəzalandırılmalıdır”, deyə o, bildirib.

Fəal deyir ki, ona psixoloji təzyiq göstərməyə çalışıblar:

“Fiziki zorakılıq olmadı, amma Cinayət Məcəlləsinin maddələrini açıb oxutdururdular. Bu formada təzyiq edilirdi. Mənə deyirdilər ki, sən çox rahatsan, bir növ bu şey onlarda qıcıq yaradırdı. Dedim ki, heç bir cinayət törətməmişəm və mən başıaşağı deyiləm ki, bura gəlim qorxum”.

Dövlət Təhlükəsizlik Xidmətinə çağırılan digər fəal Əmrah Təhməzov 2020-ci ildə də müharibə vaxtı DTX-yə çağırıldlğını bildirir: “Dövlət Təhlükəsizlik Xidmətindən zəng ediblər, məni yenə çağırırlar”.