Avropa İnsan Haqları Məhkəməsi (AİHM) oktyabr ayının 5-də Azərbaycanla bağlı dan göndərilmiş 10-dan artıq ərizə üzrə la bağlı 6 qərarını elan edəcək.

Rəşad Həsənov və başqaları Azərbaycana qarşı

Bu ərizələr vətəndaş cəmiyyəti fəalları və NİDA vətəndaş hərəkatının üzvləri olan ərizəçilərin qanunsuz silah saxlama və kütləvi iğtişaşlar törətməkdə ittiham edilib, cinayət məsuliyyətinə cəlb olunmaları ilə bağlıdır. Ərizəçilər əsasən onlara qarşı cinayət işinin uydurma olduğunu və onların mühakimə olunmasının ifadə və dinc toplaşmaq azadlığı hüquqlarına qanunsuz müdaxilə təşkil etdiyini iddia edirlər.

Ərizəçilərə görə, barələrindəki milli icraatlar onların Konvemsiyanın 6-cı, 10-cu və 11-ci maddələri ilə təminat altına alınan ədalətli məhkəmə araşdırması, ifadə azadlığı və toplaşmaq azadlığı hüquqlarını pozub.

Cəlal Hüseynov və başqaları Azərbaycana qarşı

Bu iş müxtəlif ittihamlarla mühakimə olunan ərizəçilərin Bakı Ağır Cinayətlər Məhkəməsi, Gəncə Apellyasiya Məhkəməsi və Xəzər Rayon Məhkəməsindəki icraatlar zamanı metal qəfəsdə saxlanılmasının qanunsuzluğu iddiaları ilə bağlıdır. Ərizəçilər AİHM qarşısında Konvensiyanın 3-cü maddəsinin pozuntusuna – qeyri-insani və ya ləyaqəti alçaldan rəftara məruz qaldığını iddia edirlər.

Ağahüseyn Gözəlov Azərbaycana qarşı

Bu ərizə 1 noyabr 2015-ci il tarixdə keçirilmiş parlament seçkiləri ilə bağlıdır. Seçkidə namizəd kimi iştirak edən ərizəçi, birmandatlı seçki dairələrində baş verdiyi iddia olunan müxtəlif seçki pozuntuları ilə bağlı şikayətlərinə səmərəli baxılmamasından şikayət edib.

Qazaryan və Bayramyan Azərbaycana qarşı

Ərizəçilər Ermənistanın Azərbaycanla sərhədindən bir neçə kilometr aralıda yerləşən Berdavan kəndində yaşayan Ermənistan vətəndaşları Armen Qazaryan və Astqik Bayramyandır. Məhkəmə işi ərizəçilərin 39 yaşlı oğlunun 2018-ci ilin iyulunda Azərbaycan hərbçiləri tərəfindən saxlanılması ilə bağlıdır. Onların övladları Azərbaycan məhkəmələri tərəfindən təxribat və terrorda təqsirli bilinərək 20 il müddətinə azadlıqdan məhrum olunub. Ardınca, 2020-ci ilin dekabrında əsirlərin mübadiləsi çərçivəsində Ermənistana qaytarılıb. Ərizəçilər övladlarının tutulması, həbsi və mühakiməsinin Konvemsiyanın 3-cü (qeyri-insani və ya ləyaqəti alçaldan rəftarın qadağan edilməsi) və 5-ci maddələrinin (azadlıq və təhlükəsizlik hüququ) pozuntusu ilə müşayət olunduğunu iddia edirlər.

Qarik Ohanyan və başqaları Azərbaycana qarşı

Bu işdə ərizəçilər bir vaxtlar Talış kəndində yaşamış ər və arvad, onların anası və övladlarıdır. Onların şikayətləri 2016-cı ilin aprel döyüşləri kontekstində verilib. Ərizəçilər döyüşlərin fonunda yaşadıqları evi tərk etməli olublar.

Ərizəçilər onlara münasibətdə Konvensiyanın 2-ci, 8-ci, 13-cü və 14-cü maddələrinin pozulduğunu, habelə, mülkiyyət hüquqlarına müdaxilənin baş verdiyini iddia edirlər.

Manvel Hakobyan Azərbaycana qarşı

Bu işdə ərizəçi 1936-cı il təvəllüdlü Ermənistan vətəndaşıdır. Onun şikayəti də 2016-cı ilin aprel döyüşləri kontekstində verilib. Ərizəçi döyüşlərin fonunda yaşadıqları evi tərk etməli olublar.

Bu işdə də Qarik Ohanyan və başqaları Azərbaycana qarşı işindəki kimi oxşar pozuntu iddiaları qaldırılıb.

AİHM oktyabrın 5-də eyni zamanda bir qrup Azərbaycan vətəndaşının Ermənistana qarşı şikayətləri üzrə 4 qərarını da elan edəcək.

Qurbanov Ermənistana qarşı

Bu işdə ərizəçi Azərbaycan vətəndaşıdır, Bakıda yaşayır. Onun Azərbaycan Silahlı Qüvvələrinin əsgəri olan 22 yaşlı oğlu 29 dekabr 2016-cı il tarixdə Azərbaycan və Ermənistan sərhədində baş vermiş hərbi toqquşmalarda həlak olub. Onun meyiti Ermənistanın Tavuş rayonunda aşkar edilib. Məhkəmə işi həlak olmuş hərbçinin nəşinin verilməsinin gecikdirilməsi, yalnız 5 fevral 2017-ci il tarixdə ailəsinə təhvil verilməsi ilə bağlıdır.

Ərizəçi onlara münasibətdə Konvensiyanın 3-cü (qeyri-insani və ya ləyaqəti alçaldan rəftarın qadağan edilməsi), 8-ci (şəxsi və ailə həyatına hörmət), 13-cü (effektiv müdafiə vasitələrinə malik olmaq) və 14-cü (ayrı-seçkiliyin qadağan edilməsi) maddələrinin pozulduğunu iddia edir.

Firuzə ƏSGƏROVA və Albina VESELOVA Ermənistana qarşı

AİHM-ə 2015-ci ildə təqdim edilmiş bu işdə ərizəçilər Şəmkir rayonunun Çinarlı qəsəbəsinin sakini və Tərtər rayonunun Qarağacı kəndində yaşayan Rusiya vətəndaşıdır. Onlar erməni hərbçiləri tərəfindən tutulub məhkum edilmiş Dilqəm Əsgərov və Şahbaz Quliyevin həyat yoldaşlarıdır.

Ərizəçilər AİHM qarşısında iddia edirlər ki, D.Əsgərov və Ş.Quliyevin saxlanılması, mühakimə və məhkum olunması ilə bağlı icraatlar onların Konvensiyanın 3-cü, 5-ci, 6-cı, 8-ci, 13-cü və 14-cü maddələri ilə təminat altına alınan işgəncənin yolverilməzliyi, azadlıq və toxunulmazlıq, ədalətli məhkəmə araşdırması, şəxsi həyata hörmət, effektiv müdafiə vasitələrinə malik olmaq və ayrı-seçkiliyin yolverilməzliyi hüquqlarını pozub.

Abbas Allahverdiyev Ermənistana qarşı

Bu işdə ərizəçi Goranboy rayonunun Tapqaraqoyunlu kəndi sakinidir. Ərizəçi 2016-cı il aprel döyüşləri zamanı təmas xəttindən bir neçə kilometr aralıda yerləşən Tapqaraqoyunlu kəndindəki evi davamlı atəşə tutulduğuna görə, evini tərk edərək qonşu kəndlərdə məskunlaşmalı olub. Ərizəçinin evinə mərmi düşüb, o, üz və göz nahiyələrindən xəsarətlər alıb. Mərmilər onun evinə də ziyan vurub, habelə, 60-dan artıq heyvanını tələf edib.

Ərizəçi AİHM qarşısında yaşamaq, işgəncəyə məruz qalmamaq, şəxsi həyata hörmət, mülkiyyət və effeltiv müdafiə vasitələrinə malik olmaq hüquqularının pozulduğunu iddia edir.

İslam Əliyev Ermənistana qarşı

Ərizəçi 1937-ci ildə doğulub, Tərtər rayonunun Qapanlı rayonunda yaşayır.

Bu işin halları Abbas Allahverdiyev Ermənistana qarşı işinin halları ilə oxşardır. 2016-cı il aprel döyüşləri zamanı ziyana məruz qalan ərizəçi AİHM qarşısında oxşar pozuntu iddiaları irəli sürüb.

Aihmaz.org

Foto: Müdafiə Nazirliyi

192 hərbi qulluqçunun həlak olduğu, 511 nəfərin yaralandığı bildirilir

Sentyabrın 27-də Azərbaycan Müdafiə Nazirliyi 19-20 sentyabr tarixlərində keçirilən hərbi əməliyyatlarda həyatını itirən hərbçilərin siyahısını yayıb.

Nazirliyin siyahısında döyüşlərdə həlak olan 192 hərbçinin adı qeyd edilib.

Bildirilir ki, 180 nəfər Müdafiə Nazirliyinin, 12 nəfər isə Daxili İşlər Nazirliyinin hərbi qulluqçularıdır. Bir nəfər isə mülki şəxsdir.

Ümumilikdə, 193 nəfərin həlak olduğu bildirilir.

Bu gün Səhiyyə Nazirliyi əməliyyat zamanı 511 hərbi qulluqçunun və 1 mülki şəxsin yaralandığını bildirib.

Səhiyyə Nazirliyi həmçinin onu da əlavə edib ki, şəhid olan 11 nəfərin şəxsiyyəti Məhkəmə Tibbi Ekspertiza tərəfindən məhkəmə genetik müayinələr aparıldıqdan sonra müəyyənləşdiriləcək.

Meydan TV-nin yaydığı siyahıda həlak olanların sayı isə 200 nəfər idi.

Meydan TV 

İki aydır Söyüdlüdə monitorinq aparan Britaniya şirkəti nəticələrlə bağlı hesabatı hökumətə təqdim edib

Gədəbəyin Söyüdlü kəndində yerləşən qızıl zavodunun ərazisindəki 3 quyu suyunda sianid aşkarlanıb. Məlumatı bu gün Nazirlər Kabinetinin iclasında ekologiya və təbii sərvətlər naziri Muxtar Babayev verib.

Böyük Britaniyanın “Micon” International Co Limited şirkəti 2 ay müddətində Söyüdlüdə keçirdiyi monitorinqlərin nəticələrinə dair hesabat hazırlayıb.

İclasda müzakirə olunan hesabatda bildirilib ki, şirkət Gədəbəy və Mis çaylarından su, torpaq nümunələri götürüb, atmosfer havasında zərərli qazların, eləcə də toz hissəciklərinin konsentrasiyası, radiasiya fonu və səs-küyün səviyyəsini ölçüb.

“Monitorinq zamanı zavod ərazisindəki üç müşahidə quyusunun suyunda kiçik miqdarlarda sianidin olduğu qeydə alınıb.

Qeyd olunan göstəricilər yol verilə bilən qatılıq həddindən dəfələrlə aşağı olsa da, bu fakt ətraf mühitə potensial risk kimi nəzərə alına bilər”,- Nazirlər Kabinetinin yaydığı məlumatda bildirilib.

Nümunələrin təhlillərinə əsasən, su obyektlərində bir sıra göstəricilərin normadan artıq olduğu aşkarlanıb, lakin bunun ətraf mühit və insan sağlamlığı üçün təhlükə mənbəyi olmaması müəyyənləşdirilib.

Bildirilib ki, torpaq nümunələrində bir sıra göstəricilərin miqdarı yol verilə bilən qatılıq həddindən çox olub. “Micon” şirkəti bunu regionun filizləşmə xüsusiyyətləri və tarixi mədənçiliyin mövcudluğu ilə izah edib.

“Micon” şirkəti ərazidə çalışan “Azərbaycan Beynəlxalq Mədən Şirkəti”nin (AIMC) 2016-cı ildə hazırlanmış sianidin idarəedilməsi planı ilə işlədiyini və bunun yenilənməsinə ehtiyac olduğunu bildirib.

İclasda “Azərbaycan Beynəlxalq Mədən Şirkəti” qarşısında insan sağlamlığına, texnogen təhlükəsizliyə, istehsalatın modernləşdirilməsinə aid bir sıra tələblərin qoyulduğu və tövsiyələrin verildiyi qeyd olunub.

İyunun 20-də Gədəbəyin Söyüdlü kənd sakinləri ekoloji problemlərə etiraz ediblər. Onlar bildiriblər ki, ərazidə fəaliyyət göstərən “Azərbaycan Beynəlxalq Mədən Şirkəti” kənddə zərərli, kimyəvi tullantıların atılacağı ikinci göl yaratmağa çalışır. Buna etiraz edən sakinlər polis zorakılğına məruz qalıblar. Onlara qarşı gözyaşardıcı qazdan və rezin güllələrdən istifadə olunub.

Rəsmi şəxslər aksiyadan sonra 5 nəfərin inzibati həbs cəzası aldığını bildirsə də, Bakıda Söyüdlü sakinlərinə dəstək üçün təşkil olunan İşçi Qrupu 11 nəfərin həbs olunduğunu açıqlayıb. Onlardan 8-i inzibati qaydada həbs olunub, 3 nəfərə narkotik ittihamı ilə cinayət işi açılıb. İnzibati həbs olunanların qərarlarında qeyd olunub ki, onlar  İnzibati Xətalar Məcəlləsinin 513-cü maddəsilə (toplantıların təşkili və keçirilməsi qaydasının pozulması) ittiham olunublar.

DİN ilk aksiyada zorakılıq göstərən polis əməkdaşları ilə bağlı xidməti yoxlama aparıldığını bildirsə də, sonradan cəzalandırılan polisin olmadığını açıqlayıb.

11 iyulda ölkə başçısı İlham Əliyev də hökumət üzvləri ilə keçirdiyi müşavirədə Söyüdlüdə baş verən hadisələrdən danışıb. O bildirib ki, etirazlarda özünü ləyaqətli aparan təkcə polislər olub və onlar dözümlü davranıblar.

4 sentyabrda kənd sakinləri məlumat veriblər ki, qızıl şirkətinin fəaliyyəti bərpa olunub. Amma kəndin girişindəki polis postu hələ də götürülməyib.

AbzasMedia

Qubad İbadoğlu

Bu gün Azərbaycan Demokratiya və Rifah Partiyasının üzvləri Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin qarşısında etiraz aksiyası keçiriblər.

Onlar partiya lideri Qubad İbadoğlunun həbsdə saxlanmasına və səhhətinin pisləşməsinə baxmayaraq, klinikaya köçürülməməsinə etiraz ediblər.

Polis əməkdaşları etirazçılara idarənin binası qarşısında aksiya keçirməyə icazə verməyiblər və onlar Nərimanov Rayon Məhkəməsinin binasının yaxınlığına keçiblər.  binaya köçüblər.

Siyasətçinin tərəfdarları “Qubad İbadoğluna azadlıq!” azadlıq şüarını səsləndiriblər.

Qeyd olunub ki, Avropa İnsan Hüquqları Məhkəməsinin qərarına baxmayaraq, İbadoğlu hələ də xüsusi klinikaya köçürülməyib

“Artıq 66 gündür ki, Qubad İbadoğlu saxta ittihamlarla həbs olunub və indiyədək heç bir istintaq hərəkəti olmayıb. Bu da sübut edir ki, onun həbsi siyasi xarakter daşıyır”, – partiya İdarə Heyətinin üzvü Ədalət Yusub deyib.

O deyib ki, partiyanın ofisi möhürlənib və axtarış zamanı onun sənədləri götürülüb və bu, təşkilatın fəaliyyət imkanlarını məhdudlaşdırır.

Aksiya iştirakçıları İbadoğlunun azad edilməsini, partiya sənədlərinin qaytarılmasını, partiyanın ofisindən istifadəyə qoyulan qadağanın aradan qaldırılmasını tələb ediblər.

Aksiya insidentsiz başa çatıb.

* İyulun 24-də Bakının Nərimanov Rayon Məhkəməsi Qubad İbadoğlunu saxta pul hazırlamaqda ittiham edərək 3 ay 26 gün həbs edib. Azərbaycan Daxili İşlər Nazirliyindən bildiriblər ki, İbadoğlunun 2016-cı ildə Türkiyədə dövlət çevrilişinə cəhddə ittiham olunan Fətullah Gülənin tərəfdarları ilə əlaqəsi var.

Avqustun 25-də ona qarşı “dini ekstremizmyönlü materialların hazırlanması, saxlanması və ya yayılması” barədə daha bir ittiham irəli sürülüb.

Qubad İbadoğlu ittihamları absurd hesab edərək rədd edir. Bir çox beynəlxalq təşkilat və rəsmi şəxslər rəsmi Bakını siyasətçini dərhal azad etməyə çağırıblar.

Turan