Kamran Fərat (Kərimov)

Vəkil Zibeydə Sadıqova Meydan TV-yə bildirib ki, axşam saatlarında Kamran Fərat sərbəst buraxılıb.

*   *   *

Noyabrın 16-da mülki geyimli şəxslər “Müsəlman Birliyi” Hərəkatının fəalı, bu təşkilatın himninin müəllifi Kamran Fəratı (Kərimov) evindən aparıb.

Fəalın həyat yoldaşı onun saxlanılmasını videoya çəkib. Video sosial şəbəkədə yer alıb. Kadrlarda fəalın Bayıl qəsəbəsindəki evindən çıxarılması, avtomobilə mindirilib aparılması əksini tapıb.

Fəalın həyat yoldaşı onun üzərinə narkotik maddə qoyulmasından və həbs oluna biləcəyindən ehtiyatlanır.

Vəkil Zibeydə Sadıqova Amerikanın Səsinə bildirib ki, Kamran Fərat Səbail Rayon Polis İdarəsinin 8-ci Polis Bölməsinə aparılıb.

Onun sözlərinə görə, Fərat bundan əvvəl qısamüddətli həbslərə məruz qalıb, onun ölkədən çıxışına qadağa qoyulub.

“Mən artıq iki saatdır ki, polis bölməsinin qarşısında gözləyirəm. Məni hüquqlarını müdafiə etdiyim şəxslə görüşə buraxmırlar. Artıq bu barədə daxili işlər nazirinə və Ombudsmana şikayət etmişəm”, vəkil Amerikanın Səsinə deyib.

Öz növbəsində, Daxili İşlər Nazirliyinin Mətbuat Xidməti bu məlumata hələ münasibət bildirməyib.

“Azərbaycanda Siyasi Məhbusların Azadlığı Uğrunda” İttifaq oktyabrın 4-də siyasi məhbusların yenilənmiş siyahısını dərc edib. Siyahıya daxil edilən 235 nəfərdən 171 nəfəri dindardır.

Siyasi Məhbusların Monitorinqi Mərkəzinin rəhbəri Elşən Həsənov Amerikanın Səsinə deyib ki, siyasi məghbusların “Dindarlar” qrupuna 171 soyad, o cümlədən “Nardaran işi” üzrə fiqurantlar, bir neçə ilahiyyatçı, habelə ötən ilin yayından bu ilin sentyabrına qədər həbs olunmuş dindar qrupu daxildir.

“Həbs olunan dindarların hamısı narkotik maddələrin qanunsuz dövriyyəsində ittiham olunur”, hüquq müdafəçisi qeyd edib.

Öz növbəsində, Azərbaycan hakimiyyəti bir qayda olaraq ölkədə iradəsinə görə insanların təqib edilmədiyini bildirir və siyasi məhbusların olmasını qəbul etmir. Rəsmi Bakı bəyan edir ki, Azərbaycanda insanların fundamental azadlıqları tam təmin olunub.

Xatırladaq ki, Avropa Şurası Parlament Assambleyası 2020-ci ildə Azərbaycanda siyasi məhbuslarla bağlı qətnamə qəbul edib.

Amerikanın Səsi 

Hökumət nümayişdə tutulan müxalifətçilərə təzminat ödəyəcək

Yaşar Kərimov və başqaları Azərbaycana qarşı

Bu iş ictimai toplantıların təşkilatçılarına və iştirakçılarına qarşı qeyri-qanuni və ya qeyri-proporsional tədbirlər tətbiqi və inzibati xəta haqqında iş üzrə icraat zamanı məhkəmələrin ədalətsizliyi ilə bağlı idi. 5 ərizəçi onlara münasibətdə Konvensiyanın 11 və 6-cı maddələrinin pozuntusunun baş verdiyini iddia edirdilər.

Ərizəçilərin kommunikasiya zamanı tərəflər dostca anlaşıblar. Dostca anlaşmalara əsaslanan qərardada görə, hökumət ərizəçilərə ədalətli əvəz ödəməlidir.

Ərizəçilərdən Yaşar Kərimova, Elnur Quliyevə, Emin Fərhadova və Babək Muradova mənəvi zərər əvəzi 3700 avro, xərc və məsrəflərə görəsə 450 avro (hər birinə) ödənilməlidir. Sarvan Cumayevə isə mənəvi zərər əvəzi 2500, xərc və məsrəflərə görə 350 avro ödənilməlidir.

Zülfiyyə Nəcəfova və başqaları (3) Azərbaycana qarşı

Bi məhkəmə işi mülkiyyət hüququnun pozuntusu və səmərəli müdafiə vasitələrinin mövcud olmaması iddiaları ilə bağlı idi.

Məhkəmə ərizəni baxılacaq işlərin siyahısından çıxarmağa qərar verib. Qərardadda qeyd edilir ki, Hökumət ərizələrlə bağlı qeydlərini təqdim etsə də ərizəçilər (Zülfiyyə Nəcəfova, Çingiz MÜRSƏLOV, Nazim MUSAYEV və Ruslan RÜSTƏMOV) məhkəmənin məktublarına cavab vermədiyindən belə qərar qəbul edilib.

Aihmaz.org

Qubad İbadoğlu

“Bununla onları qorxu və vahimə içərisində saxlamağa çalışırlar”

Hazırda həbsdə olan iqtisadçı Qubad İbadoğlunun Füzulidə yaşayan qohumlarının araşdırıldığı bildirilir.

Bu barədə danışan iqtisadçının qardaşı Qalib Bayramov deyir ki, onların Füzulidə yaşayan qohumlarını son dörd ayda ikinci dəfədir araşdırırlar. O düşünür ki, bununla onları qorxu və vahimə içərisində saxlamağa çalışırlar.

Qalib Bayramov bildirir ki, ilk belə araşdırma qardaşı həbs olunandan sonrakı bir ay içərisində olub. İndi növbəti dəfə qohumlarına zəng edib, onları sorğu-suala tuturlar:

“Prosesdə Füzuli Rayon İcra Hakimiyyətinin və Füzuli rayon Polis Şöbəsinin əməkdaşları xüsusi fəallıqları ilə seçilirlər. Həyasızcasına hətta 60-70 il öncə rəhmətə getmiş uzaq qohumlarımızın kimliyinin araşdırılmasına belə cəhd olunur”.

Qalib Bayramov. Foto: “abzas.net”

Məsələ ilə bağlı Füzuli rayon Polis Şöbəsindən münasibət öyrənmək mümkün olmayıb.

Füzuli rayon İcra Hakimiyyətinin sənədlərlə və vətəndaşların müraciətləri ilə bağlı şöbəsindən bu barədə məlumatsız olduqları bildirilib.

Xatırlatma

İyulun 24-də barəsində 3 ay 26 gün həbs-qətimkan tədbiri seçilən iqtisadçıya qarşı saxta pul, dini-ekstremist materialların hazırlanması, saxlanması və ya yayılması ittihamları irəli sürülüb.

Qubad İbadoğlu ittihamları qəbul etmir və həbsinin siyasi sifariş olduğunu bildirir.

Bugünədək bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri Qubad İbadoğlunun azad edilməsi üçün çağırışlar edib. Avropa İnsan Hüquqları Məhkəməsi (AİHM) iqtisadçı Qubad İbadoğlunun işinə dərhal baxılmasına qərar verib. Məhkəmə 39-cu qaydanı (müvəqqəti məcburiyyət tədbirləri) əsas götürərək Azərbaycan hökumətinə suallar göndərib.

Meydan TV 

Bəxtiyar Hacıyev. Foto: Meydan TV

13 cilddən ibarət istintaq materialı məhkəməyə göndəriləcək

Həbsdə olan ictimai fəal Bəxtiyar Hacıyevin işi üzrə istintaq yekunlaşıb.

Hazırda Bəxtiyar Hacıyevin özü və vəkillərinin cinayət işinin materiallarıyla tanış olması mərhələsidir.

Meydan TV-nin əldə etdiyi məlumata görə, ictimai fəal haqqında cinayət işinin materialları 13 cilddən ibarətdir.

Xatırlatma

Bəxtiyar Hacıyev 2022-ci ilin dekabrında bloger Ülviyyə Muradova (Alovlu) ilə aralarındakı insidentə görə həbs olunmuşdu.

Həmin vaxt ona qarşı Cinayət Məcəlləsinin 221.2.2 (ictimai qaydanın qorunması üzrə vəzifəni yerinə yetirən şəxsə qarşı müqavimət göstərməklə xuliqanlıq) və 289.1 (məhkəməyə hörmətsizlik) maddələrilə ittiham irəli sürülmüşdü.

Ancaq 2023-cü il iyunun 16-da ona yeni maddələrlə əlavə ittihamlar verildi. Bunlar əsasən maliyyə məsələlərilə bağlı ittiham idi.

İctimai fəala qarşı Cinayət Məcəlləsinin (CM) 192 (qanunsuz sahibkarlıq), 193-1 (cinayət yoluyla əldə edilmiş əmlakı leqallaşdırma), 206 (qaçaqmalçılıq), 320-ci (saxta sənədlərdən istifadə) maddələrilə ittiham irəli sürülüb.

Noyabrın 7-də isə Bəxtiyar Hacıyevə Cinayət Məcəlləsinin 213.1 (vergidən yayınma) maddəsilə daha bir ittiham verildi.

Bundan sonra istintaq yekunlaşıb.

Cinayət işinin materiallarıyla tanışlıq mərhələsi başa çatandan sonra prokuror ittiham aktını təsdiqləyəcək və iş məhkəməyə göndəriləcək.

Bəxtiyar Hacıyevin işinə Bakı Ağır Cinayətlər Məhkəməsində baxılacaq.

Bəxtiyar Hacıyev özünü təqsirli bilmir, sifarişlə həbs olunduğunu, Daxili İşlər naziri Vilayət Eyvazovun ünvanına səsləndirdiyi tənqidlərə görə cəzalandırıldığını deyir.

Meydan TV 

Qubad İbadoğlu

Noyabrın 11-də Azərbaycan Demokratiya və Rifah Hərəkatının sədri Qubad İbadoğlunun qardaşı Qalib Toğrul onun səhhəti ilə bağlı məlumat yayıb. Qardaşı bildirir ki, onlar Qubad İbadoğlunun səhhətindən narahatdırlar.

“Londonda olarkən şəkərli diabetə qarşı gündə 1 dəfə olmaqla 1 tabletka” Metformin” və “Glimepride” qəbul edib. Aclıq və toxluq şəkəri daim normal olub. Hazırda bu iki dərmanın gündəlik qəbul edilən dozası Ədliyyə Nazirliyinin Tibb baş idarəsinin endokrinoloqu tərəfindən 3 dəfə artırılıb. Əlavə olaraq yüksək dozada – gündə 24 vahid (unit) Tresiba insulini vurur”.

Qalib Toğrulun sözlərinə görə, dərmanların dozası artsa qardaşının şəkəri normadan 3-3,5 dəfə çox olur.

“Stress, mənəvi işgəncə və hərəkətsizliyin fəsadlarıdır ki, 112 gündür qanunsuz həbsdə saxlanılan qardaşımın şəkəri normallaşmır”, deyə o bildirib.

Qeyri-iş günü olduğu üçün Penitensiar Xidmətdən məsələ ilə bağlı mövqe almaq mümkün olmayıb.

Xatırltma

İyulun 24-də Bakının Nərimanov Rayon Məhkəməsi Qubad İbadoğlu barədə 3 ay 26 gün həbs qətimkan tədbiri seçib. Qubad İbadoğlu hazırda Azərbaycan Cinayət Məcəlləsinin 204.3.1 (satış məqsədi ilə hazırlama, o cümlədən saxta pul və ya xarici valyuta əldə etmə və ya satma – eyni əməllər mütəşəkkil dəstə tərəfindən törədildikdə), 167-3.1 (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunur. İki ittiham üzrə onu 17 ilədək həbs gözləyir.

Azərbaycan Daxili İşlər Nazirliyi Qubad İbadoğlunun Türkiyədə 2016-cı ildə çevriliş cəhdində ittiham olunan, hazırda Amerikada yaşayan Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.

Qubad İbadoğlu ittihamları qəbul etmir və həbsinin siyasi sifariş olduğunu qeyd edir.

Bir sıra ölkə və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri İbadoğlunun azad edilməsi üçün çağırışlar edib.

Amerikanın Səsi