“Tərtər işi”. Foto: Meydan T

Hərbi qulluqçular müxtəlif cəzalar aldı

2017-ci ildə Tərtərdə əsgər və zabitlərə qarşı kütləvi işgəncələrə görə keçirilən məhkəmə proseslərindən biri yekunlaşıb. İşgəncələrdə ittiham olunan 4 nəfərə noyabrın 29-da Sumqayıt Məhkəmə Kompleksində hökm oxunub.

Bakı Hərbi Məhkəməsinin hökmüylə Tərtərdəki N saylı hərbi hissənin komandiri olmuş polkovnik-leytenant Vüsal Ələsgərov, hərbi hissənin qərargah rəisi, polkovnik Rəşid Niftəliyevin hər birinə 5 il 6 ay azadlıqdan məhrumetmə cəzası verilib.

Onlarla birlikdə iki nəfər müddətdən artıq xidmət etmiş kəşfiyyatçı-hərbi qulluqçu da mühakimə olunurdu. Onlardan Ramil Qarayevə də eyni cəza kəsilib – 5 il 6 ay.

Digər hərbi qulluqçu Rüstəm Ələsgərov isə 9 il 6 ay azadlıqdan məhrum edilib.

Təqsirləndirilən şəxslər də, zərərçəkənlər də hökmdən narazı qalıb.

Təqsirləndirilən şəxslər məhkəmədən bəraət istəmişdilər.

Zərərçəkmişlər isə ədalətli məhkəmə araşdırması aparılmadığını deyir.

Vüsal Ələsgərov, Rəşid Niftəliyev, Ramil Qarayev Cinayət Məcəlləsinin 145.3 (qanunsuz azadlıqdan məhrum etmə), 293 (işgəncə, qeyri-insani, yaxud ləyaqəti alçaldan rəftar) və 341-ci (vəzifə səlahiyyətlərini aşma) maddələrilə ittiham olunur.

Rüstəm Ələsgərova isə bunlarla yanaşı, həm də Cinayət Məcəlləsinin 125 (özünü öldürmə həddinə çatdırma) və 126.3 (bədənə ağır xəsarət yetirmə, ölümə səbəb olduqda) maddələrilə də ittiham verilib.

Lakin o, ölüm hadisələrinə aidiyyəti olmadığını, ümumiyyətlə, işgəncələrdə iştirak etmədiyini bildirir. Onun sözlərinə görə, Tərtər işgəncələri başlayanda kəşfiyyat bölüyünün hərbi qulluqçularını hadisələrin cərəyan etdiyi binanın mühafizəsi üçün gətiriblər. O da 5 gün ərzində həmin binanın mühafizəsində olub. O vurğulayıb ki, əsl cinayətkarları məsuliyyətdən kənarda saxlayıb, onun kimi kimsəsizləri “gözdən pərdə asmaq üçün” cəzalandırırlar.

Polkovnik Vüsal Ələsgərov da bildirib ki, əgər onları mütəşəkkil cinayətkar dəstənin üzvü kimi mühakimə edirlərsə, o zaman dəstənin başçıları, Tərtər hadisələrinə göstəriş verənlər də cəzalandırılmalıdır.

Zərərçəkmişlər iddia edir ki, bu məhkəmə sadəcə, onları sakitləşdirmək, Tərtər işgəncələrinin araşdırılması görüntüsü yaratmaq məqsədi daşıyırdı.

Tərtərdə işgəncə nəticəsində həyatını itirən hərbi qulluqçu Elçin Quliyevin anası Validə Əhmədova məhkəmə prosesinin ədalətsiz keçirildiyini, cinayətə rəhbərlik edən şəxslərin məsuliyyətdən kənarda saxlandığını bildirib. Onun sözlərinə görə, zərərçəkmişlər həqiqətin üzə çıxması, o cümlədən Müdafiə naziri, Baş Qərargah rəisi, Hərbi prokuror, onun müavini və digər yüksək vəzifəli şəxslərin çağırılıb dindirilməsi barədə çoxsaylı vəsatətlər verib. Lakin onların heç biri təmin olunmayıb.

Meydan TV 

Hafiz Babalı və Toğrul Vəliyev

Onların hər ikisinə çağırılmanın səbəbi deyilməyib

Araşdırmaçı jurnalist Hafiz Babalı və iqtisadçı Toğrul Vəliyev Bakı şəhəri Baş Polis İdarəsinə (BŞBPİ) çağırılıblar. Bu barədə özləri məlumat verib.

Toğrul Vəliyev deyib ki, bu gün ona zəng edərək, saat 6-da BŞBPİ-nə dəvət ediblər. Səbəbi barədə məlumat verməyiblər.

Hafiz Babalı isə saat 3-də idarəyə dəvət edilib. Deyib ki, ona zəng edib idarəyə dəvət edəndə səbəbini açıqlamayıblar:

“Motivi demədilər, mən də soruşmadım. “AbzasMedia”da dərc olunan çoxsaylı arasdırmaların müəllifiyəm və bunu gizlətmirəm”, – jurnalist əlavə edib.

Son günlər hökumətin maliyyələşdirdiyi media orqanlarında müstəqil media qurumu olan “AbzasMedia” ilə bağlı kompromat xarakterli materiallar dərc edilir.

Həmin materiallarda Toğrul Vəliyev və Hafiz Babalının da adı hallanıb.

Jurnalist və iqtisadçının nə səbəbə BŞBPİ-yə dəvət edilməsi ilə bağlı bu qurumdan məlumat almaq mümkün olmayıb.

Xatırlatma

“AbzasMedia”nın direktoru Ülvi Həsənli və ictimai fəal Məhəmməd Kekalov noyabrın 20-də saxlanılıblar. Sonradan Ülvi Həsənliyə qarşı Cinayət Məcəlləsinin 206.3.2. (qabaqcadan əlbir olan bir qrup şəxs tərəfindən qaçaqmalçılıq) maddəsi ilə ittiham verilib.

“AbzasMedia”nın baş redaktoru Sevinc Vaqifqızı isə noyabrın 21-də Azərbaycana dönərkən hava limanında saxlanılıb. Ona qarşı da eyni ittihamla cinayət işi açılıb.

Noyabrın 21-də hər ikisi Xətai Rayon Məhkəməsinin qərarı ilə dörd ay müddətinə azadlıqdan məhrum edilib.

Onlar həbslərini siyasi sifariş sayır, ittihamları qəbul etmirlər.

Məhəmməd Kekalov da “AbzasMedia”nın direktoru Ülvi Həsənli və baş redaktoru Sevinc Vaqifqızıyla eyni cinayət işi üzrə məsuliyyətə cəlb olunub və 3 ay 27 gün azadlıqdan məhrum edilib.

Sevinc Vaqifqızı və Ülvi Həsənlinin evində və “AbzasMedia”nın ofisində axtarış aparılıb. Medianın ofisindən 40 min avro tapıldığı iddia edilib.

Sevinc Vaqifqızı açıqlamasında bildirib ki, ofisdə 40 min avro olması mümkün deyil, oradan tapsalar, yalnız bir qazan dadlı yemək tapa bilərlər.

Beynəlxalq təşkilatlar da Azərbaycan hakimiyyətinə müraciət edərək, azad mediaya qarşı təzyiqi dayandırmasını istəyiblər. Baş verənləri mediaya qarşı “qisas” adlandırıblar.

Meydan TV 

Bakının Sabunçu rayonunun Ramana qəsəbəsində Rixard Zorge adına 90 saylı məktəbin ikinci sinif şagirdi Təranə Məmmədzadə məktəbdə başqa uşaqla toqquşaraq sol gözündən xəsarət alıb. Məktəb rəhbərliyi təcili tibbi yardım briqadasını çağırmaq və məktəbin tibb bacısına müraciət etmək əvəzinə uşağı evə göndərib. Qızın anası Vüsalə Quliyeva uşağın aldığı xəsarətin ağırlaşmasına səbəb olan səhlənkarlığa görə məktəb direktorunun və sinif müəlliminin cəzalandırılmasını tələb edir.

Vüsalə Quliyeva Turan ilə söhbətində məktəbi öz vəzifələrinin yerinə yetirilməsinə səhlənkar yanaşmaqda və xəsarət səbəbindən məktəbə getməyən uşağın gələcək taleyinə marağın olmamasında ittiham edib. İkinci sinif şagirdi Təranə 7 noyabrda (2023-ci il) aldığı zədədən sonra hər gün həkimə getmək məcburiyyətində qalıb. Noyabrın 13-də Quliyeva məktəbə və polisə yazılı ərizə ilə müraciət edib, lakin direktor və müəllim uşağın sağlamlığı ilə maraqlanmır, – V. Quliyeva deyib. İdarələr yalnız 26 noyabrda – hadisədən təxminən iki həftə sonra reaksiya veriblər. Polis isə ananın Daxili İşlər Nazirliyinin “qaynar xətti”nə müraciətindən sonra araşdırmaya başlayıb.

“Müəllim qızının yıxıldığı yerə təcili olaraq məktəbin tibb bacısını və təcili tibbi yardım çağırmaq əvəzinə, digər uşaqlardan xahiş edib ki, çantadan soyuq termos çıxarıb qızın gözünə qoysunlar. Bu vəziyyətdə uşağı evə göndəriblər. Biz təcili yardıma müraciət etdik, həkim küt əşyanın zərbəsi nəticəsində göz zədələnməsi diaqnozunu qoydu. Qızım optik eynək taxmalı olacaq. Mən qızımın toqquşduğu digər uşağı günahlandırmıram. Toqquşma ola bilər, ancaq pedaqoq və məktəbin direktoru Svetlana Nəbiyeva öz vəzifələrini yerinə yetirməyiblər, V. Quliyeva Turan-a bildirib.

Hadisə ictimaiyyətə açıqlandıqdan sonra məktəbin direktoru S.Nəbiyeva qızın anasına baş verənləri açıqlamamaq, məktəbdən maddi yardım almaq təklifilə müraciət edib. Lakin V.Quliyeva yardım almaqdan imtina edib və təhsil müəssisəsinin rəhbərliyinin cəzalandırılmasını tələb edir.

“Direktor məktəbi günahkar hesab etmir, baxmayaraq ki, travmatik hadisədən dərhal sonra həkim çağırmayıblar”,- uşağın anası hesab edir.

Onun sözlərinə görə, nə Təhsil Nazirliyi, nə də polis onun müraciətinə cavab verib, yalnız DİN-in “qaynar xətti”nə (102) zəngdən və mətbuatda yayılan məlumatdan sonra həmin qurumlardan onun müraciətinə cavab gəlib.

V.Quliyeva güman edir ki, qızını başqa uşaqla toqquşaraq xəsaət aldğını söyləməyə məcbur ediblər, bəlkə də qız məktəbdə döyüldüyünü bildirmədən yalan danışmağa məcbur olub. Ana polis araşdırmasını tələb edir.

DİN-dən Turan-a bildiriblər ki, Sabunçu Polis İdarəsində uşağın döyülməsilə bağlı valideynin şikayəti üzrə araşdırma aparılıb. Yoxlama zorakılıq aşkar etməyib, xəsarət bir uşağın digərilə toqquşması nəticəsində baş verib, ikinci uşaq xəsarət almayıb.

Təhsil Nazirliyindən Turan-a bildiriblər ki, insident barədə vaxtında məlumat verilmədiyinə görə ibtidai sinif müəllimi töhmət alıb.

Turan 

Əziz Orucov

“Kanal 13” internet televiziyasının rəhbəri Əziz Orucov Bakının Səbail rayon Polis İdarəsi tərəfindən Cinayət Məcəlləsinin 188.2 maddəsi (Torpaq üzərində mülkiyyət, istifadə və ya icarə hüququnu pozma _ icarə hüququ olmadan torpaq sahəsi üzərində özbaşına tikinti və ya quraşdırma işləri aparma) ilə şübhəli şəxs qismində saxlanılıb.

Bu barədə vəkil Bəhruz Bayramov Turana deyib.

Vəkilin sözlərinə görə, Orucov ittihamı qəbul etməyib və ittihamın jurnalist fəaliyyətinin məhdudlaşdırılmasına yönəldiyini bildirib.

“Əziz dedi ki, “20-ci sahə”dəki evlərin demək olar ki, heç birinin sənədi yoxdur. Orada minlərlə sənədsiz ev var. Onların hamısına cinayət işi qaldırılmalıdır?” vəkil jurnalstə istinadən qeyd edib.

Noyabrın 27-də saxlanılmamışdan öncə polis Əziz Orucovun yaşadığı evdə və ofisində axtarış aparıb.

Vəkil deyib ki, Orucov evində və ofisində məhkəmənin qərarı ilə axtarış aparılıb.

“Axtarışı Səbail rayon Polis İdarəsinin əməkdaşları apardı. Əziz Orucov Bakıda, “20-ci Sahə” adlandırılan ərazidə neçə illər əvvəl torpaq sahəsi alıb, guya orada qanunsuz ev tikib. Axtarış bu əsasla aparıldı. Orucovun avtomobili də saxlanılıb və avtomobilində də axtarış aparılıb”, o qeyd edib.

Əziz Orucovun həyat yoldaşı Lamiyə Orucova Amerikanın Səsinə bildirib ki, yaşadıqları evdə 8 nəfər polis əməkdaşı axtarış aparıb.

“Onlardan birinin üzü açıq, qalanları maskalı idi. Nə axtardıqları barədə hər hansı məlumat vermədilər. Əzizin iki ədəd noutbukunu, işlətmədiyi telefonlarını və onun əvvəllər həbsi ilə bağlı olan sənədləri götürdülər. Evimizin hər yerini axtardılar, hətta mətbəxdə də axtarış etdilər”, o qeyd edib.

Rəsmi qurumlardan jurnalistin saxlanılması, evində və ofisində aparılan axtarışla bağlı hələ münasibət öyrənmək mümkün olmayıb.

Axtarış bəzi media vasitələrində Avropa və ABŞ təşkilatlarından ölkəyə gətirilən qrantların qanunsuz olması ilə bağlı yazıların dərcindən və “Abzas Media” internet dərgisinin direktoru, direktor müavini və baş redaktorunun həbsindən sonraya təsadüf edir.

Bundan öncə Əziz Orucov 2017-ci ilin mayında qanunsuz sahibkarlıq və vəzifə səlahiyyətlərindən sui istifadə ittihamı ilə saxlanılıb, 2017-ci ilin dekabrın 15-də 6 il həbsə məhkum edilib. O özünü təqsirkar bilməyib.

2018-ci il arelin 4-də Ali Məhkəmə hakim Əli Seyfəliyevin sədrliyi ilə Əziz Orucovun azadlığa buraxılması barədə qərar qəbul edib.

Məhkəmə jurnalistin hərəkətində cinayət tərkibinin olmadığını nəzərə alaraq qanunsuz sahibkarlıq üzrə ittihamı Orucovun üzərindən götürüb.

Vəzifə səlahiyyətlərindən sui-istifadə ağır nəticələrə səbəb olduqda ittihamı isə daha yumşaq ittihama tövsif edilib.

Onun cəza müddəti 3 ilədək azaldılıb və məhkəmə Cinayət Məcəlləsinin 70-ci maddəsini tətbiq edib – üç il sınaq müddəti olmaqla şərti cəzanın tətbiqi və jurnalistin həbsdən azad edilməsi barədə qərar qəbul edib.

Turan