İlhamiz Quliyev

“Şərlənərək həbs oluna biləcəyi ehtimalını nəzərə alaraq, bugünlərdə Narkoloji Mərkəzə gedərək, oradan narkotik istifadəçisi olmaması haqda arayış alıb”

İctimai fəal İlhamiz Quliyev dekabrın 4-də saxlanılıb. Ona qarşı narkotik ittihamı irəli sürüldüyü bildirilir.

Bu barədə məlumat verən yaxınlarının sözlərinə görə, İlhamiz Quliyev bir həftədən çoxdur ki, izlənilirdi, yaşadığı evin qarşısında polislər onu güdürdülər. Şərlənərək həbs oluna biləcəyi ehtimalını nəzərə alaraq, bugünlərdə Narkoloji Mərkəzə gedərək, oradan narkotik istifadəçisi olmaması haqda arayış alıb.

İlhamiz Quliyev oktyabrda da 30 günlük həbs olunmuşdu. Ona İnzibati Xətalar Məcəlləsinin 510 (xırda xuliqanlıq) və 535.1-ci (polisin qanuni tələbinə qəsdən tabe olmama) maddələrilə 30 sutka inzibati həbs cəzası verilmişdi.

Yaxınları deyir ki, xuliqanlıq və polisə müqavimət ittihamı yalan idi, o zaman İlhamiz Quliyev “AbzasMedia”ya müsahibəsinə görə cəzalandırılmışdı.

Keçmiş polis əməkdaşı olan İlhamiz Quliyev həbsindən bir neçə gün öncə “AbzasMedia”ya müsahibə verib. Sözügedən müsahibədə polislərin vətəndaşları narkotiklə necə şərləməsindən danışıb, qeydiyyata alınmayan narkotiklərin bu məqsədlə istifadə olunduğunu deyib. Müsahibədə onun adı çəkilməsə də, üzü görünməsə də, İlhamiz Quliyev olduğu müəyyənləşdirilib və bir həftə sonra həbs olunub.

Arayış

“Müsavat Partiyası Azərbaycan hakimiyyətindən ölkə Konstitusiyasına və imzaladığı beynəlxalq konvensiyalara əməl olunmasını, bütün siyasi məhbusların dərhal azad olunmasını, repressiyalara son qoyulmasını, ölkədə söz, media, sərbəst toplaşma və digər fundamental hüquqların təmin olunmasını tələb edir. Müsavat Partiyası ölkə ictimaiyyətini və beynəlxalq birliyi repressiya qurbanı olan şəxslərə və qurumlara dəstək verməyə, irticaya qarşı etiraz səsini ucaltmağa çağırır”.

Bu barədə Müsavat Partiyasının dekabrın 2-də keçirilən 10-cu qurultayının “Azərbaycanda repressiyaların növbəti dalğası ilə əlaqədar” bəyanatında deyilir.

Sənəddə bildirilir ki, Azərbaycanda 30 ildən artıqdır hakimiyyət tərəfindən yürüdülən siyasət nəticəsində, ölkə demokratik seçkilərin keçirilmədiyi, müxalifətin daim təzyiq və təhdid altında saxlandığı, söz, ifadə, sərbəst toplaşma azadlığının təmin edilmədiyi, insan haqlarının mütəmadi və kütləvi olaraq pozulduğu bir ölkəyə çevrilib.

“Xalqın və siyasi qüvvələrin ordumuza dəstəyi sayəsində Azərbaycanın işğal olunmuş əraziləri tam azad olunduqdan sonra, siyasi hakimiyyət vətəndaş həmrəyliyini inkişaf etdirmək, dövlətin və cəmiyyətin bütün resurslarını əhalinin rifahının yaxşılaşdırılmasına və dövlətin gücləndirilməsinə yönəltmək əvəzinə, ölkədə siyasi repressiyaların yeni amansız dalğasına rəvac verib. Müsavat Partiyası Gənclər Təşkilatı İdarə Heyətinin üzvü, partiya başqanının oğlu Orxan Hacılı adi yol qəzasına görə heç bir əsas olmadan həbs edilib. Bu qanunsuz həbs ictimaiyyət tərəfindən birmənalı olaraq Müsavat Partiyasına və onun başqanına təzyiq kimi qiymətləndirilib. Ötən iki həftə ərzində “Abzas Media”nın baş redaktoru Ülvi Həsənli, onun müavini Məhəmməd Kekəlov, nəşrin baş redaktoru Sevinc Vaqifqızı, əməkdaşı Nərgiz Absalamova, “Kanal 13” televiziyasının rəhbəri Əziz Orucov, həmin kanalın aparıcısı Rüfət Muradlı uydurma ittihamlarla həbs ediliblər. İnzibati resurslar və qanunlara mürtəce dəyişikliklər etmək yolu ilə media orqanlarının və vətəndaş cəmiyyəti institutlarının bütün dünyada qəbul edilən legitim maliyyələşmə üsullarını məhdudlaşdıran hakimiyyət indi bu müddəalardan tənqidçiləri susdurmaq və cəzalandırmaq üçün istifadə edir. Hüquq mühafizə orqanları hakimiyyəti tənqid edən və korrupsiya faktlarını ortaya çıxaran jurnalistləri yox, korrupsioner məmurlar məsuliyyətə cəlb etməlidirlər”, deyə Müsavat Partiyası qeyd edir.

Bəyanatda deyilir ki, ölkədə siyasi məhbusların sayı getdikcə artmaqdadır.

“ADR sədri Qubad İbadoğu, ALÖV partiyasının sədri Rza Səfərsoy, iş adamı Nazim Bəydəmirli, Xural TV-nin rəhbəri Əvəz Zeynallı, AXCP üzvləri Zamin Salayev, Elnur Həsənov və digər şəxslər qanunsuz həbs ediliblər”, deyə sənəddə qeyd edilir.

Bununla yanaşı, Azərbaycan hakimiyyəti ölkədə bütün fundamental hüquqların tam bərpa edildiyini, insanların iradəsinə görə təqib edilmədiyini bildirir. Siyasi hakimiyyət tənqidləri qəbul etmir, qərəzli sayır.

Xatırladaq ki, hüquq müdafiə təşkilatları hazırda ölkədə 250-dən çox şəxsi siyasi məhbus kimi tanıyır.

Turan 

Şəhla Kərim və Aytac Məmmədli

Aytac Məmmədli və Şəhla Kərim saxlanıldıqdan bir saat sonrasərbəst buraxılıb.

Qızlar bildiriblər ki, onlar şəhərin küçələrində sorğu keçirərkən saxlanılıblar.

Polis işçiləri bildiriblər ki, onların müvafiq sənədləri yoxdur və guya onların vətəndaşları narahat etdiklərinə dair şikayətlər daxil olub.

Onlardan qeydlərini silməyi tələb ediblər. Lakin onlar bundan imtina ediblər.

Son nəticədə onları qeydləri silmədən sərbəst buraxıblar.

*   *   *

Müstəqil reportyorlar Şəhla Kərim və Aytac Məmmədli Lənkəranda çəkiliş edərkən saxlanıldığı bildirilir. Bu barədə Turan-a onların yaxınları məlumat verib.

Jurnalistlər çəkiliş edərkən polis tərəfindən saxlanılıblar. Onlardan çəkdikləri materialları telefonlarından silmələri tələb edilib.

Hələlik DİN-in mətbuat xidmətindən şərh almaq mümkün olmayıb.

Turan 

ADR sədrinin müavini və İdarə Heyətinin üzvü, Kanal 13-ün aparıcısı Rüfət Muradlının həbsi ilə bağlı ADR İH-i etiraz bəyanatı ilə çıxış edib.

«23 iyul 2023-cü ildə beynəlxalq səviyyədə tanınmış iqtisadçı alim, ADR Partiyasının sədri və London İqtisadiyyat və Siyasi Elmlər məktəbinin professoru Qubad İbadoğlunun şərlənərək həbs edilməsi ilə başlayan yeni məzmunlu repressiya dalğası kütləvi xarakter almaqdadır. Fundamental insan hüquq və azadlıqları, liberal iqtisadiyyat və digər demokratik prinsiplərin daşıyıcıları Qərbə qarşı absurd mübarizə fonunda şiddətli təqiblərə məruz qalıb», – deyə sənəddə bildirilir.

Hazırda Azərbaycan həbsxanalarında 250 nəfərə yaxın siyasi məhbusun olduğu bildirilir: o cümlədən, onların arasında son illərdə həbs olunmuş Polad Aslanov, Əvəz Zeynallı, Elnur Şükürov, İlham Aslanoğlu (Təhməzov), Osman Nərimanoğlu (Rzayev), Bəxtiyar Hacıyev, Nazim Bəydəmirli (Məmmədov), Niyaməddin Əhmədov, Rəşad Ramazanov, Pünhan Kərimli, Samir Aşurov, Qubad İbadoğlu, Afiyəddin Məmmədov, Ülvi Həsənli, Sevinc Vaqifqızı (Abbasova), Məhəmməd Kekalov, Əziz Orucov, Rza Səfərsoy, Nərgiz Absalamova və adı çəkilməyən çox sayda tanınmış siyasi, ictimai və mətbuat xadimləri də var. AXCP-nin 10-dan çox fəalı hazırda siyasi həbs həyatı yaşamaqdadır. Hətta təzyiq tədbiri kimi Müsavat Partiyasının Başqanı Arif Hacılının oğlu Orxan Hacılı da qondarma ittihamla həbs edilmişdir.

Dünən – 02.12.2023-cü il tarixdə isə ADR sədrinin müavini, Kanal 13-ün aparıcısı Rüfət Muradlı qondarma ittihamla şərlənərək həbs edilib, daha sonra bəyanatda vurğulanır.

Partiya,  professor Qubad İbadoğlu başda olmaqla bütün siyasi məhbusların azad edilməsini qətiyyətlə tələb edir.

ADR repressiya siyasətinə qətiyyətlə və təkidlə etirazıını bildirir, bu repressiyaların durdurulmasını qətiyyətlə tələb edir və hakim rejimi konstitusion normalara hörmətlə yanaşmağa dəvət edir.

Turan 

“Jurnalistlərin həbslərinin davam etməsi qəbuledilməzdir”

Jurnalistləri Mudafiə Komitəsi (CPJ) jurnalist Nərgiz Absalamovanın həbsini pisləyən bəyanat yayıb.

Komitə Azərbaycan hakimiyyətini “AbzasMedia” saytının həbs olunmuş bütün jurnalistlərini azad etməyə çağırıb.

““AbzasMedia” jurnalistlərinin həbslərinin davam etməsi qəbuledilməzdir. Həbslər yalnız onu göstərir ki, Azərbaycan hakimiyyəti media orqanını cəsarətli antikorrupsiya xəbərlərinə görə bağışlamaq iqtidarında deyil”, – CPJ-nin proqram direktoru Karlos Martinez de la Serna deyib.

“Jurnalistlər ictimai maraqlara xidmət edən reportajlarına görə cəzalandırılmamalı və ya diplomatik çəkişmələrə alət edilməməlidir. Azərbaycan hakimiyyəti Nərgiz Absalamovanı, onun “AbzasMedia”dan olan həmkarlarını və bütün digər haqsız yerə həbs edilən jurnalistləri dərhal azad etməlidir”, – bəyanatda deyilir.

Daha öncə “AbzasMedia”nın direktoru Ülvi Həsənli, baş redaktoru Sevinc Vaqifqızı və saytın direktor müavini, ictimai fəal Məhəmməd Kekalov qaçaqmalçılıq ittihamı ilə həbs olunub.

Bakı Şəhəri Xətai Rayon Məhkəməsi onlar barəsində müvafiq olaraq 4 ay, 3 ay 29 gün və 3 ay 27 gün həbs qətimkan tədbiri seçib.

Nərgiz Absalamova noyabrın 30-u Bakı Şəhər Baş Polis İdarəsinə dəvət edilib və daha sonra saxlanılıb. Dekabrın 1-də Xətai Rayon Məhkəməsi onun barəsində 3 ay müddətinə həbs qətimkan tədbiri seçib.

“AbzasMedia”nın həbs edilən digər jurnalistləri kimi Nərgiz Absalamovaya qarşı da qaçaqmalçılıq ittihamı irəli sürülüb.

Azərbaycan Cinayət Məcəlləsinin 206.3.2-ci maddəsi ilə səkkiz ilədək həbs cəzası gözləyir.

Korrupsiya araşdırmaları ilə tanınan “AbzasMedia” xəbər saytının jurnalistləri onlara qarşı irəli sürülən ittihamları qəbul etmir və həbslərinin peşə fəaliyyətləri, xüsusən də yüksək səviyyəli məmurların korrupsiyasına dair araşdırmaları ilə əlaqəli olduğunu qeyd edir.

Noyabrın 28-də daha bir jurnalist – “Kanal 13” internet televiziyasının rəhbəri və təsisçisi Əziz Orucov barəsində 3 aylıq həbs qətimkan tədbiri çıxarılıb.

Cinayət Məcəlləsinin 188.2 maddəsi (Torpaq üzərində mülkiyyət, istifadə və ya icarə hüququnu pozma _ icarə hüququ olmadan torpaq sahəsi üzərində özbaşına tikinti və ya quraşdırma işləri aparma) üzrə ittiham olunan Əziz Orucov ittihamları rədd edib və həbsinin jurnalist fəaliyyətini məhdudlaşdırmağa yönəldiyini qeyd edib.

Sərhədsiz Reportyorlar, Amnesty International, Avropa Jurnalistlər Federasiyası və digər bir sıra yerli və beynəlxalq insan hüquqları təşkilatları, Avropa İttifaqının insan hüquqları üzrə xüsusi nümayəndəsi, habelə Avropa Şurası Parlament Assambleyasının (AŞPA) məruzəçiləri Azərbaycan hakimiyyətini müstəqil mediaya qarşı təzyiqlərə son qoymağa, həbs edilən jurnalistləri azad etməyə çağırıblar.

Meydan TV