Seçkilərin Monitorinqi və Demokratiyanın Tədrisi Mərkəzi (SMDT) 7 fevral 2024-cü ildə növbədənkənar prezident seçkisinin təyin olunması ilə bağlı hüquqi-siyasi mühiti dəyərləndirərək, seçkinin vaxtından 14 ay öncə keçirilməsi barədə sərəncamın Azərbaycan Respublikası və Seçki Məcəlləsinə uyğun olaraq verilsə də, bu tədbirlərin seçkilərin dövriliyi və demokratik konstitusionalizm prinsiplərinə uyğun olmadığını bildirir.

SMDT təəsüflə bildirir ki, hazırda arasında jurnalist, ictimai fəal və siyasi partiya təmsilçilərinin olduğu 200 nəfərə yaxın siyasi məhbusun həbsdə saxlanması, ifadə azadlığını məhdudlaşdıran addımlar, o cümlədən yeni “Media haqqında” və “Siyasi partiyalar haqqında” qanunlar, müstəqil internet TV və  veb səhifələrin bloklanması, sosial media fəallarının kütləvi şəkildə təqib edilməsi növbədənkənar prezident seçkisi ərəfəsində vətəndaş iştirakçılığını məhdudlaşdırır, seçki prosesi ilə bağlı demokratik şəraitin təmin olunmasını çətinləşdirir. Bununla yanaşı vətəndaş cəmiyyəti və hüquq müdafiə təşkilatlarına qarşı davam hüquqi-siyasi təzyiqlər vətəndaş cəmiyyəti təşkilatlarının seçicilərin maarifləndirilməsi, seçki hüquqlarının müdafiəsi və yerli seçki müşahidəçiliyinin təşkili ilə bağlı çalışmaq imkanlarını tükəndirib.

Bəyanatla daha geniş tanış olmaq üçün linkə keçid edin.

Beynəlxalq insan haqları təşkilatı Amnesty International Azərbaycanda müstəqil mediaya qarşı repressiyaların artmasından narahatlığını bildirib. Qurum bu tendensiyanın son nümunəsi kimi Kanal-11 Youtube layihəsinin rəhbəri Teymur Kərimovun Bakıda həbsini göstərib.

“Teymur Kərimovun həbsi Azərbaycanda jurnalistlərə və digər tənqidi şəxslərə qarşı saxta ittihamların səsləndirilməsi ilə bağlı narahatedici tendensiyaya uyğundur. Noyabrın sonunda Abzas Media və Kanal-13 müstəqil resurslarının rəhbərlərinin həbsi ilə başlayan müstəqil mediaya qarşı repressiyaların kəskinləşməsinin şahidi oluruq”, – Amnesty International-ın Cənubi Qafqaz üzrə tədqiqatçısı Natalya Nozadze bildirib.

O, baş verənləri 2012-2015-ci illərdə vətəndaş cəmiyyəti və müstəqil mediaya qarşı repressiyalarla müqayisə edib.

Azərbaycan hakimiyyəti noyabr ayından başlayaraq ən azı altı jurnalisti həbs edib. Daha bir neçə jurnalist istintaqa  çağırılıb və bundan sonra bildirdilər ki, onları  tənqidi reportajlarını dayandırmasalar, təqib ilə hədələyiblər.

Turan 

Teymur Kərimov

DİN “Kanal 11” internet televiziyasının rəhbəri, reportyor Teymur Kərimovun saxlanıldığını təsdiq edib.

O, dekabrın 11-də bir neçə vətəndaşdan daxil olan şikayət əsasında saxlanılıb. Onun barəsində Cinayət Məcəlləsinin 182-ci (hədə-qorxu ilə tələbetmə) maddəsi ilə cinayət işi başladılıb.

Hazırda istintaq hərəkətləri aparılır, deyə DİN-in mətbuat xidmətinin əməkdaşı İbrahim Əmiraslanlı bildirib.

*   *   *

“Kanal 11” internet televiziyasının rəhbəri, reportyor Teymur Kərimovdan səhər saatlarından xəbər almaq mümkün deyil.

Bu barədə Turana reportyorun yaxınları məlumat verib.

Onların sözlərinə görə, axırıncı dəfə Teymur Kərimovla səhər saat 12 radələrində əlaqə saxlamağa mümkün olub: “Bundan sonra onun telefonuna zəng çatmayıb. Özü də evə və dostlarla təyin olunmuş görüşə gəlməyib”.

Yaxınları onun saxlanıldığı düşünür.

“Kanal 11” internet televiziyasının yaydığı bəyanatda da Teymur Kərimovun saxlanıldığı güman edilir:

“Əldə etdiyimiz təsdiqlənməmiş məlumata görə, o, Nərimanov Rayon Polis İdarəsinin 16-cı Polis Bölməsində saxlanılır, barəsində cinayət işi açılıb. Teymur Kərimov bu ilin iyul ayında çəkdiyi, kanalımızda və “Azad Söz” internet televiziyasında yayımlanan Daşkəsən rayonun icra başçısı Əhəd Abıyevlə bağlı video-reportajdan sonra ciddi təqiblərə məruz qalıb. Belə ki, evinə polis nəfəri gələrək, ondan şikayət olduğunu bildirib. Polis bölməsinə getdikdə isə adların səhv düşdüyü deyilib. Bundan əlavə, o dəfələrlə müxtəlif bəhanələrlə polis bölməsinə ifadə üçün çağırılıb və ya ona video-reportajın yayılmasının qarşısının alınması məqsədi ilə zənglər edilib”,  deyə bəyanatda bildirilir.

Məlumatda qeyd olunur ki, bundan sonra Teymur Kərimov qazilərin polis əməkdaşları tərəfindən fiziki zorakılığa məruz qalması və sözügedən qazilərin buna etiraz etməsini işıqlandırdığı üçün yenidən hədəf halına gəlib.

“Teymur Kərimov yenə video-reportajların silinməsi üçün hədə-qorxuya məruz qalıb. İzahat alınması üçün dəvət edilib. Son bir ildə Azərbaycanda azad söz naminə mübarizə aparan, vətəndaşların haqq səsini çatdırmağı özlərinə borc bilən kifayət qədər jurnalist həbs olunub. Son günlərdə bunun nümunəsi “Abzas Media”nın direktoru Ülvi Həsənli, baş redaktoru Sevinc Abbasova (Vaqifqızı), jurnalist Nərgiz Absalamova, “Kanal 13″ internet televiziyasının Azərbaycandakı direktoru Əziz Orucov, yenə sözügedən kanalın əməkdaşı Rüfət Muradlıdır. Düşünürük ki, Teymur Kərimov seçkiqabağı işə düşən repressiya maşının növbəti qurbanıdır” – deyə, internet televiziyasının bəyanatında bildirilir.

“Kanal 11” komandası bəyanatda Teymur Kərimovun həbs ediləcəyi təqdirdə internet televiziyasının fəaliyyətinin dayanmayacağını açıqlayıb.

“Ölkədə haqsızlıq olduqca, bu haqsızlığa səs çıxaranlar da hər zaman var olacaq. Vətəndaşlar, izləyicilər, siz hər zaman doğru və qərəzsiz xəbərlərə layiqsiz. Siz bilməlisiz ki, sizin vergilərinizlə maliyyələşən şəxslər sizdən nələr oğurlayır, sizə nələri layiq görür. Bu yolda həbslərlə, repressiyalarla üzləşə bilərik, azala bilərik, lakin, tükənməyəcəyik! “Kanal 11″ internet televiziyası olaraq aidiyyatı qurumlardan məsələyə aydınlıq gətirilməsini tələb edirik”, bəyanatda bildirilir.

Daxili İşlər Nazirliyindən məlumat almaq mümkün olmayıb.

Turan