Tofiq Yaqublu

ABŞ-ın Azərbaycandakı səfirliyi Azərbaycan hökumətini Milli Şuranın Koordinasiya Mərkəzinin və Müsavat Partiyasının üzvü Tofiq Yaqublunu həbsdən azad etməyə çağırıb.

“Tofiq Yaqublunun həbsi və saxlanması bizi çox narahat edir. Biz Tofiq Yaqublunu və fundamental azadlıqlardan istifadə etdiklərinə görə həbsdə olanların hamısını azad etməyə çağırırıq”, ABŞ-ın Azərbaycandaklı səfirliyi dekabrın 18-də X sosial media platformasında qeyd edib.

Xatırlatma

Tofiq Yaqublu dekabrın 14-də həbs edilib. Ona qarşı Cinayət Məcəlləsinin 178.3.2 (külli miqdarda ziyan vurmaqla dələduzluq), 320.1-ci (rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama və ya satma) və 320.2-ci (bilərəkdən saxta sənədlərdən istifadə etmə) maddələri ilə cinayət işi açılıb.

Son günlərdə ölkədə qaçaqmalçılıq, sənədsiz torpaq üzərində qanunsuz ev tikmək və başqa ittihamlarla 8 jurnalist həbs edilib. 2023-cü ilin iyul ayından iqtisadçı alim, ADR Partiyasının sədri Qubad İbadoğlu (satış məqsədi ilə saxta valyuta hazırlamaqda ittiham olunur), ötən ilin dekabrından insan hüquqları faəlı Bəxtiyar Hacıyev (Cinayət Məcəlləsinin 8 maddəsi üzrə ittiham olunur) həbs edilib.

Yerli hüquq müdafiəçilərinin hesabatlarına görə, hazırda ölkədə ümumilikdə siyasi iddialarla iki yüzdən çox insan həbsdədir.

Azərbaycandakı həbslər çoxsaylı beynəlxalq hüquq müdafiə təşkilatları, həmçinin ABŞ Dövlət Departamenti tərəfindən qınanılıb.

Rəsmi Bakı ölkədə insanların iradəsinə görə təqib edilmədiyini, siyasi məhbusların olmadığını bildirir. Dövlət rəsmiləri bu sahədə tənqidləri qəbul etmir və qərəzli sayır.

Amerikanın Səsi

Dekabrın 18-də Bütöv Azərbaycan Xalq Cəbhəsi Partiyasının (BAXCP) sədri, Milli Məclisin deputatı Qüdrət Həsənquliyevin və Milli Cəbhə Partiyasının sədri, Milli Məclisin deputat Razi Nurullayevin növbədənkənar prezident seçkilərində iştirak etmək üçün namizədliyi irəli sürülüb. Bu barədə hər iki partiyanın bugünki iclaslarında qərar qəbul edilib.

Qüdrət Həsənquliyev 1965-ci il yanvarın 29-da Naxçıvan Muxtar Respublikası Culfa rayonunun Əbrəqunus kəndində anadan olub. O, Bakı Dövlət Universitetinin hüquq fakultəsini bitirib.

Prezident Əbülfəz Elçibəy hökumətində dövlət katibinin köməkçisi işləyib. 2000–2003-cü illərdə Azərbaycan Mərkəzi Seçki Komissiyasının katibi olub.

Qüdrət Həsənquliyevin rəhbərliyi ilə 2004-cü il aprelin 3-də Bütöv Azərbaycan Xalq Cəbhəsi Partiyası təsis edilib.

Həsənquliyev ikinci, üçüncü, dördüncü, beşinci və altıncı çağırış Azərbaycan Milli Məclisinin deputatı seçilib. Milli Məclisin Hüquq siyasəti və dövlət quruculuğu komitəsi sədrinin müavinidir.

O, 2003, 2008, 2013 və 2018-ci il prezident seçkilərində prezidentliyə namizəd olub.

Evlidir, 2 övladı var.

Razi Nurullayev 1 aprel 1971-ci ildə İmişli rayonunun Xəlfəli kəndində anadan olub. Azərbaycan Dövlət Dillər Universitetinin İngilis-fransız dilləri fakultəsini və Cənubi Rusiya Humanitar İnstitutunun Hüquq fakultəsini bitirib.

2009-cu il sentyabrın 15-dən 2015-ci ilin fevralınadək Azərbaycan Xalq Cəbhəsi Partiyası (AXCP) sədrinin xarici məsələlər üzrə müavini olub.

Nurullayev 2020-ci ildə Milli Cəbhə Partiyasını təsis edib.

Razi Nurullayev 2018-ci ildə Prezident seçkilərində prezidentliyə namizəd olub.

Evlidir, 2 övladı var.

Müstəqil Həmkarlar Birliyinin (MHB) sədri Fuad Əliyev də 7 fevral növbədənkənar Prezident seçkisində namizədliyini irəli sürüb. O, deyib ki, seçkiyə müstəqil şəkildə qatılır, Müstəqil Həmkarlar Birliyinin sədri kimi yox.

Bununla Azərbaycanda fevralın 7-də keçiriləcək növbədənkənar prezident seçkilərində namizədliyi irəli sürülən şəxslərin sayı 7-yə çatıb.

İndiyədək hazırkı prezident İlham Əliyevin, Böyük Quruluş Partiyasının sədri, Milli Məclisin Mədəniyyət Komitəsinin rəhbəri Fazil Mustafanın, Milli Məclisin İnsan Hüquqları Komitəsinin sədri, Sosial Tədqiqatlar Mərkəzinin rəhbəri Zahid Orucun və Böyük Azərbaycan Partiyasının (BAP) sədri Elşad Musayevin namizədliyi irəli sürülüb.

Müxalifət partiyaları, – Müsavat Partiyası növbədənkənar prezident seçkilərində iştirak etməmək, Azərbaycan Xalq Cəbhəsi Partiyaasi seçkiləri boykot etmək barədə qərar qəbul edib.

Azərbaycanda 2024-cü il fevralın 7-də növbədənkənar prezident seçkiləri keçiriləcək.

Növbədənkənar prezident seçkiləri Azərbaycanın Qarabağda suverenliyini bərpa etməsindən sonraya təsadüf edir.

Bununla yanaşı, növbədənkənar prezident seçkilərinin elan edilməsinin səbəbləri hələ rəsmi qaydada bəyan edilməyib. Növbədənkənar seçkilər ölkədə hər hansı siyasi partiya tərəfindən təşəbbüs irəli sürülmədən elan edilib.

Azərbaycan Konstitusiyasına görə, Azərbaycan Prezidenti ümumi, bərabər və birbaşa seçki hüququ əsasında, sərbəst, şəxsi və gizli səsvermə yolu ilə 7 il müddətinə seçilir.

“Seçki Məcəlləsi”nə görə, seçki hüququ olan hər bir vətəndaş və yaxud vətəndaşlar prezidentliyə namizəd irəli sürmək üçün azı 100 nəfərdən ibarət olan təşəbbüs qrupu yarada bilərlər. Seçkilərin təyin edilməsi haqqında qərar rəsmi dərc olunduqdan sonra prezidentliyə namizədlər irəli sürülür.

Siyasi partiya, siyasi partiyaların bloku və yaxud seçicilərin təşəbbüs qrupları prezidentliyə irəli sürdükləri namizədin müdafiəsi üçün 40 mindən az olmayan sayda seçici imzası toplamalıdırlar.

Azərbaycanın hazırkı lideri İlham Əliyev 2003-cü il oktyabrın 15-də Azərbaycan Prezidenti seçilib. O, həmçinin 2008-ci il oktyabrın 15-də, 2013-cü il oktyabrın 9-da, 2018-ci il aprelin 11-də prezident seçkilərində qalib olub.

Turan 

Elməddin Şamilzadə

“Üç nəfər yaxınlaşdı, məni bıçaqla hədələdilər”

Hazırda Gürcüstanın paytaxtı Tbilisidə təhsil alan jurnalist Elməddin Şamilzadə təhdidlə üzləşdiyini deyir.

Bu barədə jurnalist “Facebook” səhifəsində məlumat paylaşıb.

Onun dediyinə görə, dekabrın 15-də axşam saatlarında dostlarıyla Tbilisidəki məkanlardan birində əylənərkən tanımadığı 3 nəfər onu izləyib:

“Onlar bizim masaya baxırdılar. Çölə siqaret üçün çıxanda dostlara xəbərdarlıq etdim ki, problem yaratsalar, mənə deyin. Çox keçmədi ki, onlardan biri çölə çıxıb “səni tanıyıram” bəhanəsi ilə məni kənara çəkməyə başladı. Uzun-uzadı mənasız söhbətlər etdikdən sonra məni daha da uzağa çəkməyə çalışdı. Bıçaq çıxardığını gördüm. Digər 2-i də orada gözləyirdilər. Mən ona gəlməyəcəyimi deyib dostarın yanına qayıdandan sonra üçü də bizə sarı gəldilər. Guya mən onlara lənkəranlı olduğumu demişəm, əslində, azərbaycanlı olduğumu deməliyəmmiş kimi mənasız söhbətlər etməyə başladılar. Digər dostlar müdaxilə edəndə söhbətin istiqamətini dəyişməyə başladılar”.

Jurnalist yazıb ki, həmin adamlar guya maşınlarının benzinin qurtardığını deyiblər və pula ehtiyacları olduğunu söyləyib onlardan pul istəyiblər:

“20 lari verəndə məni yenə də uzaqlaşdırmağa çalışdılar, amma dostların müdaxiləsindən bir anda gözdən itdilər”.

E.Şamilzadə həmin adamların onunla bərabər başqa bir dostunu da təhdid etdiyini vurğulayıb:

“Onu döyməklərini eşidəndə söhbətin ciddiyyətinin fərqinə vardım”.

“Onları göndərənə deyirəm ki, niyyətiniz məni öldürməkdirsə, daha az ağrılı üsullar seçin. Bıçaqdan-zaddan zəhləm gedir, adam gec ölür. Tapança daha məqsədə müvafiqdir”, – deyə jurnalist əlavə edib.

O, ilk dəfə təqib olunmadığını da qeyd edib:

“Daha əvvəl də məkanların birində 1 saat susaraq yan masada bizi dinləyənlərin söhbətimiz bitəndə: “Bura maraqsızlaşdı”, – deyib getmək qərarı verdikləri anda azərbaycanlı olduqlarını anlamışdım. Çöldə bir xeyli bizi gözləyəndən sonra çıxmayacağımızı görüb getdilər”.

Jurnalist məsələ ilə bağlı Gürcüstan hüquq-mühafizə orqanlarına müraciət edəcəyini deyib.

Meydan TV 

Məzahir Pənahovun sədrliyi ilə dekabrın 16-da Mərkəzi Seçki Komissiyasının növbəti iclası keçirilib. Əvvəlcə Komissiyanın 18 oktyabr, 20 oktyabr və 8 dekabr 2023-cü ildə keçirilmiş iclaslarının protokolları təsdiq olunub.

Sonra bəzi seçki dairələri üzrə yeni seçki məntəqələrinin yaradılması məsələsinə baxılıb. Bildirilib ki, işğaldan azad edilmiş ərazilərdə məskunlaşan və uzunmüddətli tikinti-quruculuq işlərində çalışan çoxsaylı seçicilərin seçki hüquqlarının qanunvericiliyə uyğun təmin edilməsi, eləcə də Seçki Məcəlləsinin bununla bağlı tələbinin ödənilməsi məqsədilə müvafiq seçki dairələrinin dairə seçki komissiyaları tərəfindən yeni seçki məntəqələrinin yaradılması zərurəti yaranıb. Komissiyanın qərarı ilə 2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində qanunvericiliyin tələblərinə uyğun olaraq 1 saylı Şərur – Sədərək, 2 saylı Şərur – Kəngərli, 3 saylı Babək – Şahbuz – Kəngərli, 4 saylı Naxçıvan şəhər, 5 saylı Babək – Naxçıvan – Culfa, 47 saylı Sumqayıt – Abşeron – Qaradağ, 75 saylı Yardımlı – Masallı, 84 saylı Füzuli, 97 saylı Tərtər – Naftalan – Goranboy, 118 saylı Ağdam şəhər, 120 saylı Cəbrayıl – Qubadlı, 121 saylı Laçın, 122 saylı Xankəndi, 123 saylı Kəlbəcər, 124 saylı Şuşa – Ağdam – Xocalı – Xocavənd, 125 saylı Zəngilan – Qubadlı seçki dairələrinin hüdudları daxilində yeni seçki məntəqələrinin yaradılması və həmin seçki məntəqələri üzrə yeni məntəqə seçki komissiyalarının formalaşdırılması aidiyyəti seçki dairələrinin dairə seçki komissiyalarına həvalə olunub.

İclasda sözügedən seçkilərlə əlaqədar maarifləndirmə tədbirlərinin təşkilinə dair məsələyə də baxılıb. Azərbaycan Respublikası Prezidentinin 27 dekabr 2011-ci il tarixli Sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”na və Seçki Məcəlləsinə əsasən seçki iştirakçıları üçün müxtəlif istiqamətlər üzrə çoxsaylı layihələri əhatə edən genişmiqyaslı maarifləndirmə proqramının gerçəkləşdirilməsi qərara alınıb.

Media nümayəndələri tərəfindən geniş işıqlandırılan iclasda, həmçinin bəzi seçki dairələri üzrə dairə seçki komissiyalarının tərkibində dəyişiklik edilib və cari məsələlərə baxılıb.

Mərkəzi Seçki Komissiyası Katibliyinin
Media və kommunikasiya şöbəsi

Azərbaycan Xalq Cəbhəsi Partiyası (AXCP) 7 fevral növbədənkənar Prezident seçkisində iştirak etməyəcək.

Bu barədə dekabrın 16-da partiyanın sədri Əli Kərimli VII (X) qurultayda bildirib.

Onun sözlərinə görə, partiyadaxili müzakirələr apararaq seçkilərdə iştirak etməməyə qərar veriblər.

Qurultay Əli Kərimlinin çıxışından sonra seçkidə iştirak edib-etməməyi səsə qoyub.

Qurultay seçkidə iştirakın əleyhinə səs verib, 2 nəfər isə seçkiyə qatılmağı dəstəkləyib.

Bununla da AXCP seçkini boykot qərarı çıxarıb.

Azərbaycan Xalq Cəbhəsi Partiyası (AXC) 1992-ci ildə Prezident seçkilərinə Əbülfəz Elçibəyin namizədliyini irəli sürüb və qalib gəlib.

1995-ci ildə parlament seçkilərinə siyasi partiya kimi qatılmaq məqsədiylə Azərbaycan Xalq Cəbhəsinin bazasında Azərbaycan Xalq Cəbhəsi Partiyası (AXCP) təsis edilib, 1 sentyabr 1995-ci il tarixində Azərbaycan Xalq Cəbhəsi Partiyası Ədliyyə Nazirliyi tərəfindən qeydiyyata alınıb.

AXCP-in qurultayı. Foto: Meydan TV

Partiya 1998-ci il Prezident seçkilərini boykot etsə də, 2003-cü ildə AMİP sədri Etibar Məmmədovun namizədliyini dəstəkləyib.

AXCP 2008-ci il Prezident seçkilərini də boykot edib. Amma 2013-cü ildə Demokratik Qüvvələrin Milli Şurasının vahid namizədi, professor Cəmil Həsənlinin namizədliyini müdafiə edib.

2018-ci il seçkilərində isə iştirak etməyib.

2024-cü ilin fevralın 7-də Azərbaycanda növbədənkənar Prezident seçkiləri keçiriləcək.

İlham Əliyevin dekabrın 7-də imzaladığı sərəncamda qeyd olunub ki, Mərkəzi Seçki Komissiyası növbədənkənar Prezident seçkilərinin 2024-cü il fevralın 7-nə təyin olunmasını və Seçki Məcəlləsində müəyyən edilmiş qaydada keçirilməsini təmin etməlidir.

Bu günə qədər ölkə başçısı İlham Əliyev və Sosial Tədqiqatlar Mərkəzinin (STM) sədri, deputat Zahid Oruc və Böyük Quruluş Partiyasının başqanı, deputat Fazil Mustafa namizədliyini irəli sürüb.

Müsavat Partiyası isə dekabrın 15-də bəyanat yayaraq, seçkidə iştirak etməməklə bağlı qərar qəbul etdiyini açıqlayıb.

Partiya bunu seçkiqabağı mühit və ölkədəki siyasi həbslərlə əlaqələndirib.

Azərbaycanda sonuncu dəfə Prezident seçkiləri 2018-ci il aprelin 11-də keçirilib.

Həmin seçkilər də növbədənkənar olub.

İlham Əliyev 20 ildir ki, prezident vəzifəsini icra edir.

Meydan TV 

Norveç “İnsan Hüquqları Evi” Fondu Azərbaycanda müstəqil KİV-ə və tənqidi səslərə qarşı hazırkı repressiya dalğasından narahatdır.

“Son 25 gündə ən azı 11 jurnalist və hüquq müdafiəçisi öz fikirlərini qanuni ifadə etdiklərinə görə şübhəli və əsassız ittihamlarla həbs edilib.

Bu hadisələr 7 fevral 2024 – cü il tarixli növbədənkənar prezident seçkilərində Azərbaycan mediasına və narazı səslərə narahatedici hücumdur”, – məlumatda deyilir.

Təşkilat Azərbaycan hakimiyyətini yeni həbs olunanlara qarşı cinayət işlərinə son qoymağa və onları  dərhal azad etməyə çağırır.

“Biz Azərbaycan hakimiyyətini çağırırıq:

– beynəlxalq hüquq üzrə öhdəliklərinə riayət etməyə və ittihamları dərhal ləğv etməyə, həbs edilmiş hüquq müdafiəçilərini və jurnalistləri azad etməyə;

– həbsdə olanların peşəkar tibbi yardıma çıxışını təmin etməyə;

– saxlanılanların öz ailələri və vəkillərilə ünsiyyətinə, o cümlədən telefonla əlaqə saxlamasına icazə verməyə;

–  saxlanılanlara qarşı amansız rəftar və işgəncə hallarını operativ və hərtərəfli araşdırmağa, günahkarları məsuliyyətə cəlb etməyə;

– öz fikrini sərbəst ifadə etməyə icazə verməyə, jurnalistlərin və vətəndaş fəallarının fəaliyyətini repressiyalardan qorumağa;

– ifadə azadlığının sıxışdırılmasına son qoymağa, azad vətəndaş məkanı üçün əlverişli mühit yaratmağa”, – bəyanatda deyilir..

* Norveçdə fəaliyyət göstərən “İnsan Hüquqları Evi” Fondu Avropanın bir çox insan hüquqları təşkilatlarını birləşdirir.

Turan