Məzahir Pənahovun sədrliyi ilə dekabrın 26-da Mərkəzi Seçki Komissiyasının növbəti iclası keçirilib. Əvvəlcə Komissiyanın 21 dekabr və 23 dekabr 2023-cü il tarixli iclaslarının protokolları təsdiq olunub.

Sonra 2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində namizədliklərin irəli sürülməsi ilə əlaqədar məsələlərə baxılıb. Namizədlikləri özləri tərəfindən irəli sürülmüş Sərvan İdris oğlu Kərimovun, Mətləb Əzizulla oğlu Mütəllimlinin, Abutalıb Qənbər oğlu Səmədovun, Fikrət Hüseyn oğlu Yusifovun, Yusif Qəzənfər oğlu Bağırzadənin, Arzuman Səid oğlu Abdulkərimovun, Yunus İsaxan oğlu Oğuzun və Qulamhüseyn Surxay oğlu Əlibəylinin namizədliyinin irəli sürülməsi təsdiq edilib.

Komissiya öz təşəbbüsləri ilə namizədliklərinin irəli sürülməsi təsdiq olunanlardan səlahiyyətli nümayəndələr təqdim edənlərin müraciətlərinin təmin olunmasına qərar verib.

Xarici ölkə səfirliyinin və media qurumlarının nümayəndələrinin iştirak etdiyi iclasda, həmçinin bəzi seçki dairələri dairə seçki komissiyalarının tərkibində dəyişikliklər edilib və cari məsələlərə baxılıb.

Mərkəzi Seçki Komissiyası Katibliyinin
Media və kommunikasiya şöbəsi

Platforma heç bir namizədi dəstəkləməyəcəyini də bəyan edib

III Respublika Platforması fevralın 7-də keçiriləcək növbədənkənar Prezident seçkisində namizəd irəli sürməyəcək. Təşkilat hər hansı prezidentliyə namizədi dəstəkləməyəcəyini açıqlayıb.

Bu barədə dekabrın 26-da III Respublika Platformasının seçkilərlə bağlı mövqe sənədində qeyd edilib.

Platformanın seçkidə iştirak edə bilməməsinin başlıca səbəbləri sırasında qurumun yeni təsis edilməsi, maliyyə və kadr resurslarına malik olmaması göstərilib:

“Belə olan halda III Respublika Platformasının məhz formal olaraq seçkilərdə iştirak etməsinin mənasını görmürük. Bununla yanaşı, mövcud prezidentliyə namizədləri platformamızın dəyərlərini təmsil edə biləcək, eləcə də siyasi dəyişikliyi təşviq edə biləcək şəxslər hesab etmirik. Buna görə onları da dəstəkləmirik”.

Hazırkı seçki mühitinə gəlincə, III Respublika Platforması vətəndaşların seçki təsisatına etimadının olmadığını hesab edir:

“Bunun səbəbi hazırkı hökumətin insanların siyasi prosesə inamını qırmaq üçün uzunmüddətli iş aparmasıdır. Mövcud hökumət bunu seçkiləri davamlı saxtalaşdırmaqla və siyasət peşəsini etibarsızlaşdırmaqla həyata keçirib. Bütün bunlara görə indiki şəraitdə ciddi siyasi apatiya mövcuddur. Platformamız bu siyasi apatiyanı iki ay kimi qısa müddətdə aradan qaldıracağı və seçki iştirakçılığını təşviq edə biləcəyi qənaətində deyil”.

Amma Platforma seçkiylə bağlı bütün addımları rədd etmədiyini də bildirib:

“Səsvermədə iştirak vətəndaşlarımızın seçki vərdişinin qorunub saxlanılması üçün mühümdür. Səbəbi nə olursa olsun, seçki ənənələri itməməlidir və gələcəkdə münbit şərait üçün qorunub saxlanılmalıdır. Buna görə də platformamız seçki ənənəsinin vacib elementi olan səsvermə vərdişinin saxlanılması üçün səsvermədə fərdi qaydada iştirakı dəstəkləyir”.

“Biz seçki dövrü daxil olmaqla passiv dayanmayacağıq. Ona görə də platformamız öz alternativ gündəliyini həm seçki dövrü və həm də seçkidən sonra aktiv təşviq edəcək. Bu məqsədlə vətəndaşlarımızı ölkəmizin gələcəyinə dair bugünlərdə ictimailəşdirdiyimiz konseptual sənədlərin və yaxın dövrdə açıqlayacağımız fəaliyyət planı, eləcə də bu çərçivədə görəcəyimiz işlər və təqdim edəcəyimiz növbəti sənədlərin müzakirəsində fəal iştirak etməyə dəvət edirik”,-deyə açıqlama bu fikirlərlə yekunlaşır.

Xatırlatma

Dekabrın 7-də bir qrup ictimai-siyasi fəal III Respublika Platforması adlı siyasi təşkilat yaratdıqlarını elan edib. Həmin gün Azərbaycanda parlamentarizmin təsis olunmasının 105-ci ili tamam olurdu.

Platformanın Qurucu Heyət üzvləri arasında Akif Qurbanov və Araz Əliyevlə yanaşı, iqtisadçı Rövşən Ağayev, hüquqşünas Səməd Rəhimli, siyasətçilər Yadigar Sadıqlı, Elman Fəttah, Ruslan İzzətli də var.

Platformanın şüarı belədir: “Tək adama deyil, hüquqa itaət edirik!”.

2024-cü ilin fevralın 7-də Azərbaycanda növbədənkənar Prezident seçkiləri keçiriləcək. İlham Əliyev dekabrın 7-də bununla bağlı sərəncam imzalayıb.

Bu günə qədər ölkə başçısı İlham Əliyev, Böyük Quruluş Partiyasının başqanı Fazil Mustafa, Sosial Tədqiqatlar Mərkəzinin (STM) sədri, deputat Zahid Oruc, Böyük Azərbaycan Partiyasının sədri Elşad Musayev, Bütöv Azərbaycan Xalq Cəbhəsi Partiyasının sədri (BAXCP), deputat Qüdrət Həsənquliyev, Milli Cəbhə Partiyasının sədri, deputat Razi Nurullayev, Fuad Əliyev, Yunus Oğuz və Ərəstun Oruclu namizədliklərini irəli sürüblər.

Ümid və Haqq Ədalət partiyaları seçkidə İlham Əliyevi dəstəkləyəcəklərini bildiriblər.

AXCP, Müsavat və Klassik Xalq Cəbhəsi partiyaları isə seçkini boykot edəcəklərini açıqlayıblar.

Azərbaycanda sonuncu dəfə Prezident seçkiləri 2018-ci il aprelin 11-də keçirilib. Həmin seçkilər də növbədənkənar olub.

İlham Əliyev 20 ildir ki, Prezident vəzifəsini icra edir.

Meydan TV

Növbədənkənar seçkilərdə namizədliyini irəli sürmək istəyən üç nəfər bildirib ki, Mərkəzi Seçki Komissiyası onların sənədlərini qəbul etməyib.

Onlardan biri Əvəz Temirxan (Ədliyyə Nazirliyinin təkrar qeydiyyata almaqdan imtina etdiyi Liberal Partiyasının İcraiyyə Komitəsinin sədri, qeyd Turan) Turan agentliyinə bildirib ki,  dekabrın 25-də gün ərzində Mərkəzi Seçki Komissiyasının üzvləri və bu orqanın aparatı onu qəbul etməyib.

“Mənə deyirlər ki,  Mərkəzi Seçki Komissiyasının üzvləri iclasdadır, amma onlardan ikisinin binanı tərk etdiyini gördüm. İclas keçirilərsə, niyə iştirak etmirlər?”, – Temirxan deyib

Digər iki  müstəqil namizədlər tarixçilər Ulduz Quliyeva və Rəşad Dadaşov Turan-a bildiriblər ki, üçüncü gündür ki,   Mərkəzi Seçki Komissiyasına gəlirlər, lakin sənədləri qəbul etmirlər.

“Biz mühafizəçilərdən xahiş etdik ki, xahişimizi ,  Mərkəzi Seçki Komissiyasının rəhbərliyinə çatdırsınlar ki, bizi qəbul etsinlər, amma bundan sonra da heç kim bizi qəbul etmədi. Bu, özbaşınalıqdır”, – Temirxan deyib.

Öz növbəsində, Mərkəzi Seçki Komissiyası aparatında Turan-ın müxbirinə deyiblər ki, iddiaçılar “elektron formada da müraciət edə bilər” və onların ərizələrinə beş gün ərzində baxılacaq.

Turan

Azərbaycan Klassik Xalq Cəbhəsi Partiyası ölkədə seçki kampaniyası üçün demokratik şəraitin olmadığını bildirərək növbədənkənar prezident seçkilərində iştirakdan imtina edib.

Bu qərar rartiyanın Ali Məclisinin sessiyasında qəbul edilib, dekabrın 23-də isə partiyanın V növbədənkənar qurultayında təsdiq edilib.

“Bütün səviyyələrdə seçki komissiyalarının hakim qüvvənin nəzarəti altında olduğu və ölkədə azadlıqların məhdudlaşdırıldığı bir şəraitdə seçkilərdə iştirak mənasını itirir”, partiyanın sədri Mirmahmud Mirəlioğlu bildirib.

Dekabrın 15-də müxalifətyönümlü Müsavat Partiyası ədalətli rəqabət üçün şəraitin olmadığını bildirərək seçkilərdə iştirakdan imtina edib. Dekabrın 16-da isə Azərbaycan Xalq Cəbhəsi Partiyası da prezident seçkilərini boykot etmək qərarına gəlib və bunu azad və ədalətli seçkilər üçün şəraitin olmaması ilə izah edib.

İnidyədək Mərkəzi Seçki Komissiyasına prezidentliyə namizədliyi irəli sürülən 15 nəfər seçicilərin imzasını toplamaq üçün müraciət edib.

Mərkəzi Seçki Komissiyası hazırki prezident İlham Əliyevin, namizədliyi təşəbbüs qrupları tərəfindən irəli sürülən Zahid Oruc (Milli Məclisin İnsan Hüquqları Komitəsinin sədri) və Fuad Əliyevin (keçmiş Liberal Demokrat Partiyasının sədri olub), Böyük Quruluş Partiyasının prezidentliyə namizədi Fazil Mustafanın, Böyük Azərbaycan Partiyasının prezidentliyə namizədi Elşad Musayevin, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyevin, Milli Cəbhə Partiyasının prezidentliyə namizədi Razi Nurullayevin namizədliyinin irəli sürülməsini təsdiqləyib. Beləliklə, 7 nəfərin prezidentliyə namizədliyinin irəli sürülməsi təsdiqlənib.

Öz təşəbbüsü ilə prezidentliyə namizədliyi irəli sürülən digər 8 nəfərlə bağlı məsələyə MSK-nın növbəti iclaslarında baxılacaq. Həmin şəxslər Sərvan Kərimov, Mətləb Mütəllimli, Abutalıb Səmədov, Fikrət Yusifov, Yusif Bağırzadə, Arzuman Abdulkərimov, Yunus Oğuz və Qulamhüseyn Əlibəylidir.

Azərbaycanda 2024-cü il fevralın 7-də növbədənkənar prezident seçkiləri keçiriləcək.

Növbədənkənar prezident seçkiləri Azərbaycanın Qarabağda suverenliyini bərpa etməsindən sonraya təsadüf edir.

Bununla yanaşı, növbədənkənar prezident seçkilərinin elan edilməsinin səbəbləri hələ rəsmi qaydada bəyan edilməyib. Növbədənkənar seçkilər ölkədə hər hansı siyasi partiya tərəfindən təşəbbüs irəli sürülmədən elan edilib.

Amerikanın Səsi

Bunu Mərkəzi Seçki Komissiyasının bu gün keçirilən iclasında MSK sədri Məzahir Pənahov deyib.

MSK sədri bildirib ki, 7 nəfərin namizədliyinin irəli sürülməsi artıq təsdiq olunub.

Öz təşəbbüsü ilə prezidentliyə namizədliyi irəli sürülən digər 8 nəfərlə bağlı məsələyə isə MSK-nın növbəti iclaslarında baxılacaq. Həmin şəxslər aşağıdakılardır:

– Sərvan Kərimov

– Mətləb Mütəllimli

– Abutalıb Səmədov

– Fikrət Yusifov

– Yusif Bağırzadə

– Arzuman Abdulkərimov

– Yunus Oğuz

– Qulamhüseyn Əlibəyli.

Xatırladaq ki, 7 fevral 2024-cü ildə Azərbaycanda növbədənkənar prezident seçkiləri keçiriləcək.

APA

Məzahir Pənahovun sədrliyi ilə dekabrın 23-də Mərkəzi Seçki Komissiyasının növbəti iclası keçirilib. Əvvəlcə Komissiyanın 19 dekabr 2023-cü il tarixli iclasının protokolu təsdiq olunub.

Sonra 2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində səsvermənin yeri və vaxtı barədə seçicilərin məlumatlandırılmasına dair bildirişin mətni, forması, sayı və hazırlanma qaydası ilə bağlı məsələ müzakirə olunub. Məlumat üçün qeyd etmək lazımdır ki, bildirişdə seçicinin adı, özünün və səs verəcəyi seçki məntəqəsinin ünvanı, səsvermənin yeri və vaxtı, səsvermə prosesində istifadə edilən şəxsiyyəti təsdiq edən sənədlərin siyahısı, eləcə də səsvermə qaydaları ətraflı şəkildə izah edilir. Komissiya qanunvericiliyin tələblərinə uyğun olaraq, səsvermənin yeri və vaxtı barədə seçicilərin məlumatlandırılmasına dair 6524203 (altı milyon beş yüz iyirmi dörd min iki yüz üç) bildirişin mətbəə üsulu ilə hazırlanmasına qərar verib.

İclasda qarşıdan gələn seçkilərdə dairə və məntəqə seçki komissiyalarının səsvermənin nəticələrinə dair yekun protokollarının hazırlanması qaydası və sayı məsələsinə də baxılıb. Protokolların Mərkəzi Seçki Komissiyası tərəfindən müəyyənləşdirilmiş nümunələrin forma və mətninə uyğun olaraq, bir-bir ardıcıl nömrələnməklə və seriyaları göstərilməklə, 3 nüsxədən ibarət və hər bir nüsxəsi müxtəlif rəngdə karbonlaşdırılmış kağızdan buklet formasında olmaqla, dairə və məntəqə seçki komissiyaları üçün onların sayına uyğun hazırlanması qərara alınıb. Qərara əsasən, səsvermənin nəticələrinə dair protokollar, habelə aşağı seçki komissiyalarının hər biri üçün 30 ədəd nömrələnməmiş və karbonlaşdırılmamış kağızdan protokollar Azərbaycan Respublikası Milli Məclisinin mətbəəsində mətbəə üsulu ilə hazırlanmalıdır.

Media nümayəndələri tərəfindən geniş işıqlandırılan iclasda, həmçinin bəzi seçki dairələri dairə seçki komissiyalarının tərkibində dəyişikliklər edilib və cari məsələlərə baxılıb.

Mərkəzi Seçki Komissiyası Katibliyinin
Media və kommunikasiya şöbəsi