Bəxtiyar Hacıyev

Bakı Ağır Cinayətlər Məhkəməsində ictimai fəal Bəxtiyar Hacıyevin işi üzrə hazırlıq iclası başlayıb. İclasa hakim Əli Məmmədov sədrlik edib.

Anket məlumatlarının yoxlanılması zamanı hakim Hacıyevin istintaq təcridxanasında saxlanıldığını bildirdikdə fəal replika atıb ki, o, “məhbus” deyil, “girovdur”.

Məhkəmə vəkillərin istintaq təcridxanasında Hacıyevlə görüşünə icazə verilməsi (məhkəmə prosesi başladıqdan sonra vəkillər istintaq təcridxanasına yeni icazələr təqdim etməlidirlər), habelə müdafiəçilərin pis çap olunmuş cinayət işinin yeni nüsxəsilə təmin edilməsi barədə müdafiə tərəfinin vəsatətini təmin edib.

Hakim prosesin videoçəkilişinin aparılması barədə vəsatətə baxılmasını növbəti iclasa saxlayıb.

Hacıyev ittiham aktını dünən aldığını deyəndə, hakim dinləmələri təxirə salıb, çünki qanunvericiliyə görə, təqsirləndirilən şəxs bu sənədi məhkəmə başlamazdan ən azı bir həftə əvvəl almalıdır.

Növbəti məhkəmə iclası yanvarın 7-nə təyin edilib.

Bəxtiyar Hacıyev 9 dekabr 2022-ci ildə Cinayət Məcəlləsinin 221 (xuliqanlıq) və 289-cu (məhkəməyə hörmətsizlik) maddələrilə saxlanılıb.

Bu ilin iyulunda ona qarşı Cinayət Məcəlləsinin 192 (qanunsuz sahibkarlıq), 193-1 (cinayət yoluyla əldə edilmiş gəlirlərin leqallaşdırılması) və 206-cı ( qaçaqmalçılıq) maddələrilə ittihamlar irəli sürülüb.

Noyabrın 7-də Hacıyevə qarşı Cinayət Məcəlləsinin  213.1-ci (vergidən, işsizlik, icbari tibbi və sosial sığorta üzrə ödənişlədən yayınma) maddəsi irəli sürülüb.

Bəxtiyar Hacıyev əmindir ki, bütün ittihamlar uydurulub. Həbs və ittihamların səbəbi hakimiyyətin tənqidinə görə cəzadır,

Hüquq müdafiəçiləri onu siyasi məhbus kimi tanıyıblar.

Turan 

ATƏT-in Demokratik Təsisatlar və İnsan Hüquqları Bürosu (DTİHB) fevralın 7-də Azərbaycanda keçiriləcək növbədənkənar prezident seçkilərində öz müşahidəçi missiyasının fəaliyyətə başladığını elan edib.

Dekabrın 29-da Bakıda mətbuat konfransında DTİHB Seçki missiyasının rəhbəri Ouen Mörfi bildirib ki, ATƏT missiyası 8 həftə ərzində seçki kampaniyasının, səsvermənin və seçkilərin yekunlaşdırılması prosesinin monitorinqini aparacaq.

Ouen Mörfi həmçinin qeyd edib ki, missiya 11 nəfərlik əsas heyət və 5 yanvardan etibarən ölkənin digər ərazilərinə təhkim ediləcək 28 uzunmüddətli müşahidəçidən ibarətdir. Bundan əlavə, DTİHB ATƏT-ə üzv ölkələrə Azərbaycanda president seçkisi günü müşahidə üçün 280 nəfər qısamüddətli müşahidəçi göndərilməsi ilə bağlı sorğu göndərib.

Missiya seçki qanunvericiliyinin praktikada tətbiqi, seçki administrasiyaları üzvlərinin hazırlanması və təlimi, namizədlərin qeydiyyatı, seçki kampaniyasının gedişi, media mühiti, seçkilərin KİV-də işıqlandırılması, qadınların seçkilərdə iştirakının monitorinqini aparacaq. Aralıq hesabat seçkidən əvvəl açıqlanacaq. Səsvermədən sonrakı gün missiya ilkin hesabatı açıqlayacaq, tövsiyələrin yer aldığı yekun hesabat isə seçkidən bir neçə ay sonra yayılacaq.

“Bizi seçkilərin nəticələri maraqlandırmır, biz seçki prosesini ATƏT standartlarına və beynəlxalq öhdəliklərə uyğunluğu baxımından qiymətləndiririk”, – Ouen əlavə edib.

O xatırladıb ki, bundan əvvəl ATƏT Demokratik Təsisatlar və İnsan Hüquqları Bürosunun seçkilərlə bağlı ehtiyacların qiymətləndirilməsi missiyası öz müşahidələri haqqında hesabat yayıb.

Dövlət Departamenti həbsləri “qəbuledilməz” sayır

ABŞ Azərbaycan hökumətini hər kəsə, o cümlədən ifadə azadlığı hüququndan istifadə edənlərə hörmət etməyə çağırıb.

Bunu Dövlət Departamentinin sözçüsü dekabrın 27-də “Turan”ın jurnalist Şamo Eminovun həbsi ilə bağlı sorğusuna cavabında qeyd edib.

“Kanal13” internet televiziyasının əməkdaşı Şamo Eminov dekabrın 22-də saxlanılıb.

Onun barəsində 3 ay 5 gün müddətinə həbs qətimkan tədbiri seçilib.

Eminov kanalın son bir ayda həbs edilən üçüncü əməkdaşıdır.

Dövlət Departamentinin sözçüsü son aylar Azərbaycanda həyata keçirilən həbsləri qəbuledilməz sayıb:

“Azərbaycanda son zamanlar jurnalistlərin, vətəndaş cəmiyyəti fəallarının və müxalifətçilərin saxlanılması tendensiyası dərin narahatlıq doğurur. Ötən ay Azərbaycanda ondan çox belə şəxs saxlanılıb. Bu, qəbuledilməzdir”.

Eyni zamanda, Dövlət Departamenti Azərbaycan hökumətini insan hüquqları və əsas azadlıqlarına hörmət etməyə çağırıb:

“Biz Azərbaycan hökumətini hamının, o cümlədən ifadə azadlığından istifadə edənlərin hüquqlarına və əsas azadlıqlarına hörmət etməyə çağırmaqda davam edirik”.

Azərbaycanda noyabr ayının sonlarından etibarən korrupsiya araşdırmaları ilə tanınan “AbzasMedia” xəbər saytının direktoru Ülvi Həsənli, baş redaktoru Sevinc Vaqifqızı, direktor müavini Məhəmməd Kekalov və reportyor Nərgiz Absalamova “qaçaqmalçılıq” ittihamı ilə həbs edilib.

Dekabrın 13-də “Abzas Media” ilə əməkdaşlıq edən araşdırmaçı jurnalist Hafiz Babalı həbs edilib. O eyni zamanda, “Turan” agentliyinin iqtisadiyyat şöbəsinin redaktoru olub.

Bundan sonra da jurnalist həbsləri davam edib. “Kanal 13” internet kanalının rəhbəri Əziz Orucov, əməkdaşları Rüfət Muradlı, Şamo Eminov və jurnalist Teymur Kərimov hazırda həbsdədirlər.

Həbs edilən jurnalistlər və onların müdafiəçiləri ittihamları qəbul etmir, siyasi sifariş adlandırırlar.

Meydan TV 

Mərkəzi Seçki Komissiyası 2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkiləri ilə əlaqədar imza vərəqələrinin yoxlanılmasına başlayıb.

Bu barədə “Report”a Mərkəzi Seçki Komissiyasından bildirilib.

Xatırladaq ki, Seçki Məcəlləsinə əsasən, Mərkəzi Seçki Komissiyasının prezidentliyə namizədliyin irəli sürülməsini təsdiq edən qərarından sonra Azərbaycan Respublikası Prezidentliyinə namizədə və ya onun səlahiyyətli nümayəndəsinə, habelə siyasi partiyanın və siyasi partiyalar blokunun səlahiyyətli nümayəndələrinə imza vərəqələri verilir.

Namizədin qeydə alınması üçün zəruri olan seçki sənədləri qəbul edildikdən sonra 7 gün müddətində MSK imza vərəqələrində və təqdim edilən digər sənədlərdə olan məlumatların düzgünlüyünü yoxlamalı və namizədin qeydə alınıb-alınmaması haqqında qərar qəbul etməlidir.

Qeyd edək ki, indiyədək yalnız Yeni Azərbaycan Partiyası 2024-cü il fevralın 7-nə təyin edilmiş Azərbaycan Respublikası Prezidenti seçkilərində Azərbaycan Respublikası Prezidentliyinə irəli sürdüyü namizəd İlham Heydər oğlu Əliyevin müdafiəsi üçün topladığı 50 min seçici imzasının olduğu imza vərəqələrini Seçki Məcəlləsinin 58.1-ci maddəsinə əsasən tələb olunan digər sənədlərlə birlikdə dekabrın 26-da MSK-ya təqdim edib.

Mərkəzi Seçki Komissiyası (MSK) prezidentliyə namizədliyinin irəli sürülməsi təsdiqlənən daha 6 şəxsin səlahiyyətli nümayəndələrini qeydə alıb.

“Report”un xəbərinə görə, məsələ barədə komissiyanın dekabrın 26-da keçirilən iclasında MSK katibi Arifə Muxtarova məlumat verib.

Müzakirələrdən sonra prezidentliyə namizədliyi özü tərəfindən irəli sürülən Abutalıb Səmədov, Fikrət Yusifov, Yusif Bağırzadə, Arzuman Abdulkərimov, Yunus Oğuz və Qulamhüseyn Əlibəylinin səlahiyyətli nümayəndələri qeydə alınıb.

Qeyd edək ki, 2024-cü il fevralın 7-də Azərbaycanda növbədənkənar Prezident seçkiləri keçiriləcək.

Afiəddin Məmmədov

İşçi Masası Həmkarlar İttifaqları Koalisiyasının sədri, hazırda həbsdə olan Afiəddin Məmmədovun işi üzrə istintaq bitib və ittiham olunduğu maddələr ağırlaşdırılıb.

Bu barədə vəkili Zibydə Sadıqova məlumat verib.

Onun sözlərinə görə, Afiəddin Məmmədov artıq Cinayət Məcəlləsinin 126.2.4-cü (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma), 228.4-cü (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə) və 221.3-cü (silah və ya silah qismində əşyadan istifadə etməklə xuliqanlıq) maddələri ilə ittiham olunur.

Xatırladaq ki, Afiəddin Məmmədov sentyabrın 20-də həbs olunub. Ona qarşı Cinayət Məcəlləsinin 126.1-ci (qəsdən sağlamlığa ağır zərər vurma) və 221.3-cü (xuliqanlıq-silah qismində istifadə olunan əşyalardan istifadə etməklə törədildikdə) maddələri ilə ittiham irəli sürülüb.