Əhməd Məmmədli

İctimai fəal Əhməd Məmmədli yanvarın 23-də Baş prokuror yanında Korrupsiyaya qarşı mübarizə Baş İdarəsində dindirilib.

Bu barədə Turan-a Əhməd Məmmədli özü məlumat verib.

Fəalın sözlərinə görə, o, saxta sənəd məsələsinə görə dindirilib:

“2022-ci ildə mən Türkiyəyə oxumaq üçün getməli idim və bununla bağlı Muğla Sıtkı Koçman Universitetinə qəbul olunduğum haqqında sənədləri Səfərbərlik və Hərbi Xidmətə Çağırış üzrə Dövlət Komitəsinə (SHXÇDK) təqdim etmişəm. Getməzdən bir neçə gün əvvəl həbs olundum və oxumağa gedə bilmədim”.

Əhməd Məmmədli qeyd edib ki, elə o vaxt SHXÇDK təqdim etdiyi sənədləri saxta hesab edib və Cəlilabad rayon prokurorluğuna müraciət edib:

“Prokurorluqda iki dəfə dindirilmişəm və bundan sonra bu məsələ sönüb. Amma dünən mənə Korrupsiyaya qarşı Mübarizə Baş İdarəsindən zəng vurublar ki, işi onlar aparacaqlar və idarəyə çağırıblar”.

Onun sözlərinə görə, o, şahid qismində dindirilib:

“Lakin mənə şifahi dedilər ki, bu iş üzrə şübhəli şəxs sayılıram. İmza nümunələrimi götürdülər, ekspertizaya göndərəcəklərini dedilər”.

Əhməd Məmmədli hesab edir ki, məsələnin yenidən aktivləşməsi son hadisələrlə bağlıdır:

“Mən heç bir saxta sənəd təqdim etməmişəm. Məsələnin 2022-dən sonra yenidən aktivləşməsi sadəcə ölkədəki son həbslərlə və hökümətin Qərblə münasibətlərin gərginləşməsi ilə bağlıdır”.

Məsələ ilə bağlı Baş Prokurorluqdan və Baş prokuror yanında Korrupsiyaya qarşı mübarizə Baş İdarəsindən münasibət öyrənmək mümkün olmayıb.

Turan 

Bazar ertəsi polis “Saxta seçkilərə yox!” şüarı ilə keçirilən razılaşdırılmamış etiraz aksiyasının qarşısını alıb. Aksiyanı Avropadakı azərbaycanlı siyasi mühacir Tural Sadıqlı növbədənkənar prezident seçkilərinə etiraz olaraq təyin edib.

İki gün öncə o, Facebook hesabında aksiyada iştiraka çağıran banner yerləşdirib:

“Etiraz mitinqi. Öz haqlarınızı tələb etmək üçün 22 yanvar saat 13:00-da Nərimanov metro stansiyasından McDonalds tərəfə çıxışa doğru gəlin”.

Bu gün  ehtimal olunan yerdə polis Sadıqlının valideynlərini saxlayıb və bir saat sonra onları sərbəst buraxıb.

Polis aksiyanın keçiriləcəyi ehtimal olunan yerdən daha bir neçə nəfəri, o cümlədən Azərbaycan Demokratiya və Rifah Partiyasının yaşlı üzvü Ənvər Ağamalıyevi və həbsdə olan fəal Rza Səfərsoyun xanımı Təranə Səfərsoyu uzaqlaşdırıb.

Daxili İşlər Nazirliyindən şərh almaq mümkün olmayıb.

Turan 

Strasburqda Avropa Şurası Parlament Assambleyasının qış sessiyasının ilk günündə deputatlar  “təşkilatın prinsiplərini pozduğuna görə” Azərbaycanın nümayəndə heyətinin səlahiyyətlərinin məhdudlaşdırılmasına səs veriblər.

Bu təşəbbüslə Almaniyadan olan deputat Frank Şvabe çıxış edib.

O, öz bəyanatında Azərbaycanda insan hüquqlarının pozulmasının davam etdiyini, siyasi məhbusların sayının artdığını, rəsmi Bakının 7 fevral prezident seçkilərini qiymətləndirmək üçün  Avropa Şurası Parlament Assambleyası nümayəndə heyətini dəvət etməkdən imtina etdiyini göstərib.

O 2023-cü ildə Azərbaycanın Avropa Şurası Parlament Assambleyası məruzəçilərini Laçın dəhlizinə buraxmaqdan imtina etdiyini də vurğulayıb.

Təklif səsverməyə çıxarılıb və səs çoxluğu ilə qəbul edilib.

İclasa sədrlik edən Emmanuelis Sinqeris deyib ki, bu təklifin qiymətləndirilməsilə Avropa Şurası Parlament Assambleyasının Monitorinq Komitəsi məşğul olacaq. Komitənin öz rəyini təqdim etmək üçün 24 saat vaxtı var. Bundan sonra Avropa Şurası Parlament Assambleyası bu məsələni müzakirə edəcək və yekun qərar qəbul edəcək.

Eyni zamanda, Azərbaycan nümayəndə heyəti bu məsələ üzrə səsvermədə iştirak edə bilməz.

Turan 

Beynəlxalq Jurnalistlər Federasiyası (IFJ) və Avropa Jurnalistlər Federasiyası (EFJ) yanvarın 19-da birgə bəyanat yayaraq Azərbaycanda jurnalist həbsləri və media azadlığına qarşı təzyiqləri pisləyiblər.

“2023-cü ilin noyabrı hökuməti tənqid edən media orqanlarına və jurnalistlərə, habelə uydurma ittihamlarla iki fəal və bir müxalif siyasətçiyə qarşı repressiyaların başlanğıcı oldu”, bəyanatda qeyd edilir.

Bəyanatda korrupsiya araşdırmaları ilə tanınan “Abzas Media” xəbər saytına və müstəqil internet televiziyası “Kanal 13” televiziyasına qarşı təzyiqlər vurğulanır.

Ötən həftəsonu saxlanılan “Abzas Media” xəbər saytının jurnalisti Elnarə Qasımova son iki ay ərzində barəsində cinayət ittihamı qaldırılan 10-cu jurnalistdir.

Xətai rayon Məhkəməsi yanvarın 15-də Elnarə Qasımova barəsində 2 ay 17 gün həbs-qətimkan tədbiri seçib. Qasımova “Abzas Media”nın həbs edilən digər jurnalistləri kimi “qaçaqmalçılıq”da ittiham edilir.

Noyabr ayından bəri “Abzas Media” xəbər saytının direktoru Ülvi Həsənli, baş redaktoru Sevinc Vaqifqızı, direktor müavini Məhəmməd Kekalov və reportyor Nərgiz Absalamova həbs edilib. “Abzas Media” ilə əməkdaşlıq edən “Turan” agentliyinin araşdırmaçı jurnalisti Hafiz Babalı da bu iş üzrə həbs edilib.

“Abzas Media” jurnalistləri “qaçaqmalçılıq yolu ilə ölkəyə xarici valyuta gətirməkdə” ittiham edilsə də, onlar peşə fəaliyyətləri, xüsusən də yüksək rütbəli məmurların korrupsiyasına dair dərc etdikləri araşdırmalara görə cəzalandırıldıqlarını bildirirlər.

Azərbaycanda son bir neçə ay ərzində “Kanal 13” internet televiziyasının rəhbəri və təsisçisi Əziz Orucov, “Kanal 13”-ün əməkdaşı Şamo Eminov, habelə “Kanal 11” internet televiziyasının direktoru Teymur Kərimov və “azerinfo.az”xəbər saytının rəhbəri İbrahim Hümbətov Cinayət Məcəlləsinin müxtəlif maddələri üzrə ittiham edilərək həbs ediliblər.

“Biz ölkədə fəaliyyət göstərən bütün jurnalistləri, xüsusən də məmur korrupsiyasını araşdıran jurnalistləri qorxutmağa yönəlmiş repressiya dalğasının şahidi oluruq. Saxta sübutlar əsasında həyata keçirilən bu həbslər hər şeydən əvvəl siyasi hakimiyyətin və onların əlaltılarının cinayətkar fəaliyyətini qorumaq məqsədi daşıyır”, IFJ direktoru Antoni Bellanger və EFJ direktoru Rikardo Qutierrez qeyd ediblər.

Bugünədək bir sıra yerli və beynəlxalq təşkilatlar, o cümlədən Avropa İttifaqı, Avropa Şurası, ABŞ Dövlət Departamenti Azərbaycanda jurnalistlərin həbsi ilə bağlı narahatlıq ifadə edib, Azərbaycan hakimiyyətini müstəqil mediaya və tənqidi səslərə qarşı təqibləri dayandırmağa çağırıblar.

Amerikanın Səsi