Araz Əliyev

III Respublika Platforması Qurucu Heyətinin və NİDA Vətəndaş Hərəkatının üzvü Araz Əliyev elektron cihazlar və şəxsi əşyalarının qaytarılmadığını bildirir.

Araz Əliyev “Turan”a bildirib ki, ötən il dekabrın 23-də həbs olunarkən üstündəki elektron cihazlar (noutbuk, makbuk, mobil telefon), o cümlədən bank və iş kartları, evin açarlarına qədər hər şey çantası ilə bərabər götürülüb:

“Bir aydan çoxdur ki, əşyalarımla bağlı hər hansı məlumat ala bilməmişəm. Onların harada olmasından və hansı məqsədlər üçün istifadə edildiyindən xəbərsizəm”.

Fəalın fikrincə, əşyalarını onu saxlayan mülki geyimli şəxslər götürüblər.

Araz Əliyev məsələ ilə bağlı Daxili İşlər Nazirliyinə (DİN) müraciət etdiyini deyib.

DİN-dən məsələyə münasibət bildirilmədi.

Xatırlatma

Araz Əliyev dekabrın 23-də, axşam saatlarında saxlanılıb. Onun polisə itaətsizlik göstərdiyi deyilərək 25 sutka inzibati həbsə məhkum edilib. 29 yaşlı fəal məhkəməsində deyib ki, haqqındakı məhkəmə qərarında göstərilənlər yalandır, nə küçədə söyüş söyüb, nə də polislərə itaətsizlik göstərib. Fəal yanvarın 17-də azadlığa çıxıb.

Dekabrın 7-də Azərbaycanda parlamentarizmin təsis olunmasının 105-ci ildönümü günündə bir qrup ictimai-siyasi fəal III Respublika Platforması adlı siyasi təşkilat yaradıb.

“Tək Adama deyil, Hüquqa itaət edirik!” şüarı ilə çıxış edən platformanın əsas prinsiplərinin seçkili demokratiya, özünüidarə və güc tarazlığı (hakimiyyət bölgüsü) olduğu bildirilir.

Platforma Araz Əliyevin həbsi ilə bağlı açıqlamada bu olayın siyasi motivli olduğunu bəyan edib.

AzadlıqRadiosu

Arzu Sayadoğlu

Ailəsi 3 gündür Arzu Sayadoğludan xəbər ala bilmədiyini deyir

İnternet kanallarında hökuməti tənqid edən Arzu Sayadoğlunun ailə üzvləri üç gündür ki, ondan xəbər ala bilmir. Bu barədə Meydan TV-yə məlumat verən hüquq müdafiəçisi Rüfət Səfərov bildirib ki, jurnalistin hüquq-mühafizə orqanları tərəfindən saxlandığı ehtimal olunur.

“Youtube”dakı “Arzu Sayadoğlu” adlı kanalın rəhbəri və aparıcısı olan Arzu Sayadoğlu bu kanalda ölkədəki siyasi vəziyyəti, məmur özbaşınalığını tez-tez tənqid edirdi.

Rüfət Səfərov deyir ki, Arzu Sayadoğlu sonuncu dəfə öz kanalında yox, “Azad söz” kanalında çıxış edib, tənqidi fikirlərlə yanaşı, həm də insanları susmamağa, dinc etirazlara səsləyib. Bundan sonra isə o yoxa çıxıb.

“Üç gündür ki, yaxınları onun haqqında heç bir məlumat ala bilmir. Əvvəlki acı təcrübələri nəzərə alaraq, ehtimal edirik ki, onu ya polis, ya da DTX saxlayıb, yeri barədə ailəsinə məlumat verilməyib. Çünki bundan əvvəl də dəfələrlə olub ki, ictimai-siyasi fəallar yoxa çıxıb, bir neçə gün sonra onların səsi hansısa polis idarəsindən, istintaq təcridxanasından, DTX-dan gəlib. Hətta Arzu Sayadoğlunun hazırda işgəncə altında olduğu da istisna deyil”, – hüquq müdafiəçisi belə deyib.

Arzu Sayadoğlu son dövrlərdə “Xalqa xidmət hərəkatı” yaradıldığını və bu təşkilatın rəhbəri olduğunu bəyan etmişdi.

Daxili İşlər Nazirliyindən Arzu Sayadoğlunun saxlanması, onun yeri barədə məlumat almaq mümkün olmayıb.

Bakı Slavyan Universitetinin jurnalistika fakültəsinin məzunu olan Arzu Sayadoğlu əvvəllər bir neçə telekanalda və radioda çalışıb.

Meydan TV

Avropa İnsan Haqları Məhkəməsi (AİHM) 2023-cü ildə Azərbaycanla bağlı mahiyyəti üzrə 40 qərar qəbul edib, həmin qərarlardan 38-də azı bir pozuntu müəyyən edilib.

Bu statistik rəqəmlər AİHM prezidentinin yanvarın 25-də 2023-cü ilin yekunları ilə bağlı keçirilən mətbuat konfransında açıqlanıb.

AİHM Azərbaycanla bağlı qərarlarında ən çox ədalətli məhkəmə araşdırması hüququnun pozuntusunu tanıyıb – 10 qərar. Azadlıq və toxunulmazlıq, şəxsi həyata hörmət hüququnun pozuntuları 8 qərarda müəyyən edilib.

Yaşamaq hüququnun pozuntusu 3, işgəncə və pis rəftara məruz qalmamaq hüququnun pozuntusu 4, ifadə azadlığı hüququnun pozuntusu 3, birləşmək hüququnun pozuntusu 6, mülkiyyət hüququnun pozuntusu 5, effektiv müdafiə vasitələrinə malik olmaq hüququnun pozuntusu isə 1 qərarda tanınıb.

AİHM 2023-cü ildə ümumilikdə mahiyyəti üzrə 1014 qərar elan edib.

Mahiyyəti üzrə ən çox qərar Rusiyaya qarşı çıxarılıb – 217 qərar. Həmin qərarlarda ən çox azadlıq və toxunulmazlıq (168 qərar), işgəncəyə məruz qalmamaq (156) və ədalətli məhkəmə araşdırması hüquqlarının (138) pozuntuları tanınıb.

Rusiyadan sonra Türkiyə gəlir – 78 qərar. Qərarlarda ən çox azadlıq və toxunulmazlıq (16 qərar) və ədalətli məhkəmə araşdırması hüquqlarının (17) pozulmasına qərar verilib.

AİHM 2023-cü ildə Ermənistanla bağlı 25, Gürcüstanla bağlı 17 qərar elan edib. Ermənistana münasibətdə ən çox yaşamaq (11 qərar), Gürcüstana münasibətdə isə işgəncə və pis rəftara, ayrıseçkiliyə məruz qalmamaq hüquqlarının (hər biri üzrə 4 qərar) pozuntusu tanınıb.

Siyahıdan çıxarılan ərizələr

2023-cü ildə Azərbaycandan göndərilmiş 111 ərizəyə baxılması hökumətin təqdim etdiyi təktərəfli bəyannaməyə əsasən başa çatıb. Bu işlərdə hökumət ərizəçilərin idddia etdiyi pozuntuları etiraf edib. 2021-ci ildə Azərbaycandan göndərilmiş 55, 2022-ci ildə isə 4 ərizəyə baxılması hökumətin təqdim etdiyi təktərəfli bəyannaməyə əsasən yekunlaşımışdı.

2023-cü ildə Azərbaycandan göndərilən 154 ərizəyə baxılması tərəflərin dostca anlaşmaları ilə yekunlaşıb, ərizələr baxılacaq işlərin siyahısından xaric edilib. Bu göstərici 2021-ci ildə 67, 2022-ci ildə 64 olmuşdu.

Yeni ərizələr

2023-cü ildə yeni daxil olan ərizələrin sayında azalma müşahidə olunub. 2022-ci ildə 45 min 500 yeni ərizə icraata daxil olmuşdusa, 2023-cü ildə bu göstərici 34 min 650-yə düşüb. Həmin ərizələrin 438-i Azərbaycana aiddir. Bu göstərici 2021-ci ildə 425, 2023-cü ildə isə 389 olmuşdu.

2023-cü ildə ən çox ərizə Türkiyədən daxil olub – 8341. Ukraynadan 2531, Rumıniyadan 2821, Macarıstandan 2469 ərizə icraata daxil olub.

Məhkəmə Ermənistandan 147, Gürcüstandan 156 ərizəni icraata götürüb.

Baxılmasını gözləyən ərizələr

AİHM-də baxılmasnı gözləyən ərizələr azalıb – 2022-ci ildə 74 min 650 ərizə baxılmasını gözləyirdi, 2023-cü ildə bu göstərici 68 min 450-ə düşüb.

AİHM-də baxılmasını gözləyən ərizələrin sayı baxımından Türkiyə şəksiz liderdir. Hazırda baxılmasını gözləyən 68 min 450 ərizədən 23 min 397-i Türkiyəyə qarşıdır. Bu, bütün ərizələrin 34 faizindən çoxdur.
2-ci sıradakı Rusiyadan 12453, Ukraynadan 8737, Rumıniyadan 4171, İtaliyadan 2743, Yunanıstandan 2429 ərizə baxılmasnı gözləyir.

Azərbaycan 7-ci sıradadır, 1877 ərizə baxılmasnı gözləyir.

Ermənistandan 836, Gürcüstandan isə 185 ərizə baxılmasını gözləyir.

Pozuntusu ən çox tanınan hüquqlar

AİHM 2023-cü ildə ən çox ədalətli məhkəmə arşadırması (372), azadlıq və toxunulmazlıq (348), işgəncə və pis rəftarın yolverilməzliyi (344) hüquqlarının pozuntusunu müəyyən edib.

Aihmaz.org

Mogens Yensen

Avropa Şurası Parlament Assambleyasının media azadlığı və jurnalistlərin təhlükəsizliyi üzrə məruzəçisi, Danimarkalı deputat Mogens Yensen Azərbaycan və Türkiyəni Avropada jurnalist hüquqlarının pozulması faktlarının sayına görə lider hesab edir.

“Jurnalistlərin və bütünlükdə media hüquqlarının pozulması halları hər yerdə artmaqda davam edir. 2015-ci ildə belə halların sayı 180 olub, 2022-ci ildə 280-ə çatıb.

Ən pis vəziyyət Azərbaycan və Türkiyədədir. Bu ölkələrdə və bir sıra digər ölkələrdə jurnalistlərə ciddi hücumlar, o cümlədən qətl, təqib, mətbuat işçilərinə, xüsusən qadınlara qarşı qaralama kampaniyaları müşahidə edirik.

Bu gün Avropada 68 jurnalist həbsdədir və bu, bizim həll etməli olduğumuz böyük problemdir”, deyə Yensen AŞPA-nın bugünki sessiyasında Media Box resursuna müsahibəsində bildirib.

Bu məsələ ilə bağlı təklifləri haqqında suala cavabda mətbuat azadlığı üzrə məruzəçi Yensen belə deyib: “Biz bu ölkələrdən üzvü olduqları Avropa Şurasının standartlarına uyğun yaşamağı, belə halların baş verməməsi üçün qanunvericiliyi və onun tətbiqini dəyişdirməyi xahiş edirik. Biz həmçinin Avropa İnsan Hüquqları Məhkəməsinin qərarlarını icra etməyə çağırırıq.

Eyni zamanda, bütün ölkələri mətbuatın inkişafı üzrə milli strategiya işləyib hazırlamağa və mətbuatın azadlığına və təhlükəsizliyinə hörmətə nail olmaq üçün mətbuat və hökumət arasında dialoqa başlamağa çağırırıq”, deyə Yensen qeyd edib.

Turan 

Avropa Şurası Parlament Assambleyası. Foto: Leonid Andronov/shutterstock

Biz seçki ərəfəsindəyik və nəticəni artıq hamı bilir”

“Deməli, bizim Azərbaycanda demokratik vəziyyət, insan haqlarının vəziyyəti və qanunun aliliyi ilə bağlı, həm də bütün təşkilat qarşısında öhdəliklərimiz var. Bu baxımdan Morqen Yensenin hesabatını dəstəkləməyinizi xahiş edirəm”, – bu fikirləri Avropa Şurası Parlament Assambleyasındakı (AŞPA) çıxışı zamanı deputat Frank Şvabe deyib.

Yanvarın 24-də keçirilən axşam iclasında deputatlar Azərbaycan nümayəndə heyətinin AŞPA-nın 2025-ci ilin yanvar sessiyasına qədər səsvermə hüququndan məhrum edilməsinə qərar veriblər. Qərara dair 15 898 saylı qətnamə təsdiqlənib.

Qərarın 76 deputat “lehinə”, 10 deputat “əleyhinə” səs verib, 4 nəfər isə bitərəf qalıb.

Qərardan öncə müzakirələrdə çıxışçılar Azərbaycanda media azadlığına təzyiqlərdən, “AbzasMedia”nın jurnalistlərinin həbsindən danışıblar. Korrupsiya araşdırmaları ilə tanınan “AbzasMedia” əməkdaşları qaçaqmalçılıqda ittiham olunsalar da, özləri həbslərinin peşə fəaliyyətləri ilə bağlı olduğunu deyirlər.

Müzakirə zamanı “Tərtər işgəncələri” və iqtisadçı professor Qubad İbadoğlunun həbsi xüsusi qeyd olunub.

Qərarın lehinə səs verən Norveç, İrlandiya, Xorvatiya, Almaniya, Lüksemburq, Fransa, İslandiya və s. ölkələrdən olan deputatlar olub. Onlar bu qərarı ədalətli və zəruri adlandırıblar.

Qərarın əleyhinə olan ukraynalı deputat Oleksey Qonçarenko çıxış edərək bildirib ki, Azərbaycanın çıxmasına yalnız Rusiya sevinə bilər:

“Çünki bu, Rusiyanın xeyrinədir. Gəlin, səsvermə hüquqlarını əllərindən almayaq, onlara şans verək”.

Çıxışı zamanı jurnalistlərin həbsinə toxunan Morqen Yensenin sözlərinə görə, bu qərarın yeganə səbəbi əməkdaşlığın olmaması və məruzəçilərin ölkəyə buraxılmamasıdır:

“Yəni, əgər məruzəçiləri ölkəyə buraxsalar, icazə verilsə ki, məruzə etsinlər, o zaman biz belə qərar qəbul etməzdik”.

Çıxışı zamanı siyasi məhbuslar və Azərbaycanın öhdəliklərinə toxunan F.Şvabe deyib ki, artıq siyasi məhbusların sayını hesablamağı dayandırıb:

“Bu gün Drezden Universitetində dərs deməli olan Qubad İbadoğlu həbsdədir. Qubad İbadoğlu Azərbaycanda çox tanınan professordur. O, indi Drezden Universitetində professor olmalı idi. Amma təəssüf ki, həbsdədir. Sadəcə həqiqəti dediyi üçün həbs olunub. Və o tək deyil. 200-dən çox siyasi məhbus var. Mən onları saymağı dayandırdım, çünki belə görünür, hər gün, hər həftə daha çox siyasi məhbus həbs olunur”.

“Müşahidəçilərin ölkəyə buraxılmaması, seçkiyə dəvət olunmama və siyasi məhbuslara görə Azərbaycanın səsvermə hüququnu əlindən aldıq. Biz seçki ərəfəsindəyik və seçkinin nəticəsini artıq hamı bilir. 7 fevral seçkiləri demokratik seçkilərin minimum kriteriyalarına belə cavab vermir və əvvəlki seçkilər də eyni idi, ondan əvvəlki də, daha əvvəlki də. Nəticələr həmişə eynidir. Bu, kifayət qədər problemlidir, lakin Azərbaycan nümayəndə heyətinin akkreditasiyasının məhdudlaşdırılmasına əsas deyil” – F.Şvabe vurğulayıb.

AŞPA-nın seçkilərə müşahidə missiyası göndərmək öhdəliyinin olduğunu xatırladan F.Şvabe bildirib ki, Azərbaycan bu missiyanı dəvət etməyə borcludur və bu, Parlament Assambleyasında nümayəndə heyətinin təmsil etdiyi parlamentin öhdəliyi və məsuliyyətidir:

“Daha da problemli olan odur ki, Azərbaycan bizi başqa beynəlxalq təşkilatlara, ATƏT-ə qarşı qoymağa çalışıb. 2015-ci ildə bizi ona görə dəvət etdilər ki, [Azərbaycan] korrupsiyaya uğrayıb və bizdə buna dair sübut var. ATƏT təşkilatının Seçki Müşahidə Missiyasının gəlməsinə icazə verilməyib. İndi ATƏT-i dəvət edirlər və Avropa Şurasının Seçki Müşahidə Missiyasının olmasını istəmirlər. Əgər buna imkan versək, Pandora qutusunu açacağıq, o zaman söhbət təkcə Azərbaycanla bağlı olmayacaq”, – F.Şvabe deyib.

M.Yensen də bildirib ki, Azərbaycan onlarla əməkdaşlıq etmir və öhdəliklərini yerinə yetirmir:

“Son illərdə insan hüquqlarının pozuntusu ilə bağlı 14 qətnamədə Azərbaycandan danışılıb. Qapı açıqdı, ümid edirəm Azərbaycan nümayəndə heyəti bura yenidən qayıdacaq. Onlar bunun üçün nə etməli olduqlarını bilirlər”.

Azərbaycan nümayəndə heyəti müzakirələrdən öncə bəyanatla çıxış edərək AŞPA ilə əməkdaşlığı dayandırdığını bildirib.

Bəyanatda bildirilib ki, dünyada heç kim, o cümlədən bu zalda əyləşənlər Azərbaycanla təhdid və şantaj dili ilə danışa bilməzlər:

‘’AŞPA-nın tarixində heç vaxt bu təşkilat özünü belə biabırçı şəkildə aparmayıb’’.

Nümayəndə heyəti bəyanatı səsləndirəndən sonra məkanı tərk edib.

Aytən Fərhadova

Meydan TV 

“İndiyədək 64 minə yaxın müşahidəçi qeydiyyatdan keçib”

Azərbaycanda 7 fevral bövbədənkənar Prezident seçkisini izləmək üçün qeydiyyatdan keçən müşahidəçilərin sayı açıqlanıb.

Bu barədə yanvarın 24-də Mərkəzi Seçki Komissiyasının (MSK) sədri Məzahir Pənahov jurnalistlərə bildirib.

Onun sözlərinə görə, indiyədək 64 minə yaxın müşahidəçi qeydiyyatdan keçib:

“Onlardan 400-ü beynəlxalq müşahidəçidir”.

MSK sədri “exit-poll”un keçirilməsi üçün 3 təşkilatın müraciət etdiyini və yaxın günlərdə bunlara baxılacağını söyləyib.

Meydan TV