Nazim Bəydəmirli

Yanvarın 31-də keçmiş deputat və sahibkar Nazim Bəydəmirlinin həbs müddəti iki ay uzadılıb. Bu barədə onun yaxınları bildiriblər.

Müdafiə tərəfi məhkəmənin qərarını əsassız hesab edir və ondan şikayət vermək niyyətindədir.

* Nazim Bəydəmirli ötən il iyulun 4-də Daxili İşlər Nazirliyi Baş Mütəşəkkil Cinayətkarlıqla Mübarizə İdarəsi tərəfindən saxlanılıb. Ona qarşı Azərbaycan Cinayət Məcəlləsinin 182.2.4-cü maddəsilə (xeyli miqdarda əmlaka sahib olmaq məqsədilə hədə-qorxu ilə tələb etmək) ittihamı irəli sürülüb. Ertəsi gün məhkəmə onu 4 ay müddətinə həbs edib.

Bəydəmirli ittihamı rədd edərək onu uydurma və hüquqi əsaslardan məhrum adlandırıb. Onun sözlərinə görə, həbsinin əsl səbəbi ətraf mühitin çirkləndirilməsilə bağlı Gədəbəy rayonunun Söyüdlü kənd sakinlərinin etirazlarını dəstəkləməsidir.

Sentyabrın 1-də Bəydəmirliyə  qarşı Cinayət Məcəlləsinin 182.2.2-ci maddəsilə (hədə-qorxu ilə təkrar tələb etmə) daha bir ittiham irəli sürülüb.

Vəkilin sözlərinə görə, bu ittiham 1996-cı ildə Rusiya Federasiyasının Lipetsk şəhərində guya Bəydəmirlinin təhdid yoluyla kimdənsə pul tələb etməsinə əsaslanır. Vəkil həm mahiyyət etibarilə, həm də iddia müddətinin keçməsilə əlaqədar ittihamın əsassız olduğunu deyib.

Hüquq müdafiəçiləri Nazim Bəydəmirlini siyasi məhbus kimi tanıyıblar.

Turan

Elvin Mustafayev

Elvin Mustafayev son sözündə ictimai fəaliyyətinə görə narkotiklə şərləndiyini deyib

İşçi Masası Həmkarlar İttifaqları Konfederasiyasının üzvü, 6 aya yaxındır həbsdə olan Elvin Mustafayevin məhkəməsi yekunlaşıb. Yanvarın 31-də Bakı Ağır Cinayətlər Məhkəməsində çıxarılan hökmə əsasən, Elvin Mustafayev 3 il azadlıqdan məhrum edilib.

Hakim Faiq Qəniyevin sədrliyilə keçirilən məhkəmə iclasında prokuror iddia edib ki, Elvin Mustafayevə Cinayət Məcəlləsinin 234.4.1 (bir qrup şəs tərəfindən narkotik əldə etmə, daşıma) və 234.4.3 (satış məqsədilə külli miqdarda narkotik əldə etmə, daşıma) maddələrilə verilən ittihamlar məhkəmədə təsdiqini tapıb.

Dövlət ittihamçısı gənc fəalın 7 il azadlıqdan məhrum edilməsini istəyib.

Lakin hakimlər hökmdə ona qarşı irəli sürülmüş ittihamları Cinayət Məcəlləsinin 234.1-1 (satış məqsədi olmadan külli miqdarda narkotik əldə etmə, daşıma, saxlama) maddəsinə tövsif edib.

İttihama görə, Elvin Mustafayev saxlanılandan sonra Binəqədi Rayon Polis İdarəsində onun üstündən 3 qramdan bir qədər artıq narkotik maddə tapılıb.

Elvin Mustafayevin vəkili prokurordan sonra çıxış edərkən müvəkkilinin təqsirsiz olduğunu bildirib və onun haqqında bəraət hökmü çıxarılmasını istəyib.

Özü də son sözündə ictimai fəaliyyətinə görə narkotiklə şərləndiyini deyib.

“Narkotik mənim üçün utancdır. Bunu üzərimə götürmək istəmirdim. Müqavimət göstərdiyimi görüb təhdid eləməyə başladılar ki, “üzünə qadın qoyub, zorlama ittihamıyla göndərərik, İranın agenti ittihamı verə bilərik, ya da 3 nəfər bitmiş narkomanı üzünə qoyub, narkotik satışıyla məşğul olduğunu göstərərik”, – Elvin Mustafayev məhkəmədə bildirib.
İctimai fəalın vəkili onun haqqında hökmdən apelyasiya şikayəti verəcəyini bildirib.

Sosial şəbəkələrdə “Atilla Xan” profiliylə tanınan ictimai fəal Elvin Mustafayev bundan əvvəl – 2023-cü ilin yanvarında Saatlı Rayon Məhkəməsinin qərarıyla 25 sutka inzibati qaydada həbs olunmuşdu. Həmin vaxt o, İnzibati Xətalar Məcəlləsinin 510 (xırda xuliqanlıq) və 535-ci (polisin qanuni tələbinə tabe olmama) maddələri ilə cəzalandırılmışdı.

Ancaq o zaman yaxınları Meydan TV-yə bildirmişdi ki, Elvin Mustafayev polisə çağırılıb və könüllü şəkildə özü gedib. Ona görə də xırda xuliqanlıq, polisə müqavimət ittihamları tamamilə yalandır. İctimai fəal özü də bildirmişdi ki, həmin vaxt Saatlıda sakinlərin su tələbinə yerli hakimiyyət təmsilçilərinin, polisin sərt reaksiyasını tənqid etdiyinə görə cəzalandırılıb.

Avqustun 1-də moped sürən kuryerlərin etiraz aksiyası olub. Onlar polislərin nəqliyyat vasitələrini cərimə meydançasına aparmasına etiraz ediblər. Kuryerlərin etiraz aksiyasında İşçi Masası Həmkarlar İttifaqları Konfederasiyasının üzvləri də iştirak edib.

Bundan dərhal sonra Konfederasiyanın sədri Afiəddin Məmmədov, daha sonra təşkilatın üzvləri Elvin Mustafayev və Ayxan İsrafilov həbs edilib. Hazırda adları çəkilən digər iki ictimai fəal da həbsdədir. Afiəddin Məmmədov xuliqanlıq və soyuq silahla bədənə xəsarət yetirmə, Ayxan İsrafilov isə narkotiklə ittiham olunur. Lakin onların heç biri özünü təqsirli bilmir, hər ikisi şərləndiklərini bildirirlər.

Meydan TV

Qubad İbadoğlu

Yanvarın 30-da Nərimanov Rayon Məhkəməsində siyasətçi Qubad İbadoğlunun vəkillərilə telefon danışıqlarına qadağa qoyulması ilə bağlı şikayətə baxılıb.

Vəkil Zibeydə Sadıqova bildirib ki, siyasətçiyə istintaq təcridxanasından öz vəkillərinə zəng eləmək qadağan edilib, halbuki, o, təcridxana rəhbərliyinə şifahi və yazılı şikayətlər verib.

“Biz bir dəfə şikayət verdik, onu təmin etmədilər. Yenidən məhkəməyə müraciət etməli olduq. Bu gün İstintaq Təcridxanasının nümayəndəsi prosesə gəldi və bildirdi ki, telefon danışığı barədə müraciətlər olmayıb. Belə vəziyyətdə sual yaranır, bəs niyə siz və biz buradayıq?”, – vəkil deyib.

Onun sözlərinə görə, İbadoğlu özü də prosesdə iştirak edib. Lakin məhkəmə şikayəti təmin etməyib.

İstintaq Təcridxanası, Penitensiar Xidmət və istintaq orqanından şərh almaq mümkün olmayıb.

2023-cü il iyulun 24-də Bakının Nərimanov Rayon Məhkəməsi Qubad İbadoğlunu saxta pul hazırlamaqda (Azərbaycan Cinayət Məcəlləsinin 204.3.1-ci maddəsi), həmçinin 167-3.1 (ekstremizmyönlü materialların saxlanması və yayılması) ittihamı ilə 3 ay 26 gün müddətinə həbs edib.

Bir sıra ölkələr və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri Qubad İbadoğlunu siyasi məhbus kimi tanıyaraq onu azad etməyə çağırıblar.

Turan 

Rüfət Səfərov

Hakim Rüfət Səfərovun islah olunmadığını düşünür

“Müdafiə Xətti” insan haqlarını müdafiə təşkilatının icraçı direktoru Rüfət Səfərov üzərindəki məhkumluğun götürülməsi üçün məhkəməyə müraciət etmişdi. Bir həftə idi ki, onun müraciətinə Binəqədi Rayon Məhkəməsində baxılırdı. Yanvarın 29-da bu məsələ ilə bağlı qərar verilib – hakim Abbas Rzayev hüquq müdafiəçisinin müraciətini rədd edib.

Zərdab Rayon Prokurorluğunun müstəntiqi olan Rüfət Səfərov 2015-ci ilin dekabrında öz ərizəsilə bu vəzifədən istefa verib. O bəyanatda bildirib ki, ölkədə insan haqlarının davamlı pozulmasına, prokurorluqdakı korrupsiya və qanunsuzluqlara dözmək istəmir, bu üzdən belə bir addım atır.

Rüfət Səfərovun sözügedən ərizə və bəyanatından dərhal sonra Zərdabda onun yaşadığı evdə axtarış aparılıb, ardınca barəsində cinayət işi başlanıb. Rüfət Səfərova qarşı Cinayət Məcəlləsinin 311.3.2-ci (rüşvət alma-təkrar törədildikdə) maddəsilə ittiham irəli sürülüb. İlkin istintaq dövrü üçün onun barəsində 3 ay 26 günlük həbs qətimkan tədbiri seçilsə də, təxminən bir həftə sonra ev dustaqlığına buraxılıb. Lakin sonradan cinayət işinə Lənkəran Ağır Cinayətlər Məhkəməsində baxılıb və Rüfət Səfərovun barəsində 9 il azadlıqdan məhrumetmə hökmü çıxarılıb.

Rüfət Səfərov 2019-cu ilin martında əfv sərəncamıyla azadlığa buraxılıb.

Hüquq müdafiəçisi Meydan TV-yə bildirib ki, qanuna görə ağır cinayətlərdə cəza çəkiləndən 6 il sonra məhkumluq ödənilmiş sayılır. Lakin qanunvericilik məhkumluğun vaxtından əvvəl də götürülməsinə imkan verir. Rüfət Səfərovun sözlərinə görə, onun üzərindəki məhkumluğun başa çatmasına təxminən bir il qalıb. Ona görə də məhkumluğunun vaxtından əvvəl götürülməsi üçün məhkəməyə müraciət etmişdi.

Rüfət Səfərov əlavə edib ki, vəkil kimi fəaliyyət göstərmək istəyir. Vəkillər Kollegiyasına üzv olmaq üçün imtahanlara hazırlaşmaq niyyətindədir. Bu səbəbdən də məhkumluğunun vaxtından əvvəl götürülməsinə ehtiyac vardı:

“Müddətin bitməsinə 1 il qalmasına baxmayaraq, Baş Prokurorluğu təmsil edən prokuror məhkəmədə deyir ki, üzərimdən məhkumluğun götürülməsi üçün heç bir əsas yoxdur. Hakim də “Rüfət Səfərovun törətdiyi cinayətin xarakteri və islah olunmadığı nəzərə alınmaqla ərizəsi təmin edilməsin” dedi. Düz deyirlər, onların dediyi qaydada “islah olunmamışam”.

Rüfət Səfərov 2020-ci ilin yayında təsis olunmuş “Müdafiə Xətti” təşkilatının icraçı direktoru kimi, vətəndaşların hüquq və azadlıqlarının müdafiəsilə məşğul olur.

O, keçmiş deputat, Müdafiə Nazirliyinin mətbuat xidmətinin sabiq rəisi Eldar Sabiroğlunun oğludur.

Meydan TV