Afiəddin Məmmədov

Hakim fəalın məhkəmədə danışmasına icazə verməyib

“İşçi Masası” Həmkarlar İttifaqları Konfederasiyasının sədri, həbsdə olan ictimai fəal Afiəddin Məmmədov Bakı Ağır Cinayətlər Məhkəməsində onun işinə baxan hakimlər kollegiyasına etiraz edir. Onun işi Səbuhi Hüseynovun sədrliyilə, Eldar İsmayılov və Cavid Hüseynovdan ibarət hakimlər kollegiyasının icraatındadır. Lakin ictimai fəal bu kollegiyanın onun işinə obyektiv baxacağına, ədalətli hökm çıxaracağına inanmır.

Ötən məhkəmə iclasında Afiəddin Məmmədov və onun vəkili jurnalistlərə məhkəmə prosesinin gedişində videogörüntülər çəkməyə icazə verilməsini istəmişdi. Ancaq məhkəmə bu vəsatəti təmin etməmişdi. Buna etiraz edən Afiəddin Məmmədov və vəkili bildirmişdi ki, bir çox başqa məhkəmə işlərində videoçəkilişə icazə verilir, lakin onun məhkəməsində yox.

Martın 12-də keçirilən məhkəmə iclasında vəkil hakimlərə etiraz edərkən bu məsələni xatırladıb. Müdafiəçi bildirib ki, Afiəddin Məmmədov hakimlərin onun işinə obyektiv baxmaq niyyətində olmadığını, bu səbəbdən videoçəkilişə icazə vermədiklərini düşünür. Ona görə də bu kollegiyaya etiraz edir.

Məhkəmədə dövlət ittihamını müdafiə edən prokuror Orxan Kəngərli etirazın əsassız olduğunu bildirib. Deyib ki, məhkəmə özü audio və videoyazı aparır.

Hakimlər də etirazın əsassız olduğunu iddia edərək, onun baxılmamış saxlanmasına qərar verib.

Daha sonra məhkəmə istintaqının başlandığı bildirilib, prokuror ittiham aktını elan edib. İttihama əsasən, Afiəddin Məmmədov 2023-cü ilin sentyabrında saat 16.30 radələrində Xətai rayonu, Məhəmməd Hadi küçəsində (metronun “Həzi Aslanov” stansiyasının yaxınlığı-red.) gedərkən Səfər Hüseynovla toqquşub. Bu zaman Afiəddin Məmmədov onun ünvanına nalayiq ifadələr səsləndirib, ardınca gümüşü rəngli bıçaqla ona xəsarət yetirib.

Afiəddin Məmmədova qarşı Məcəlləsinin 126.2.4 (xuliqanlıq niyyətilə qəsdən bədənə ağır xəsarət yetirmə) və 221.3 (silah və ya silah qismində əşyadan istifadə etməklə xuliqanlıq) və 228.4 (qanunsuz olaraq, soyuq silah saxlama) maddələrilə ittiham irəli sürülüb. Bu maddələrin sanksiyasında 11 ilə qədər azadlıqdan məhrumetmə cəzası nəzərdə tutulub.

İctimai fəal bu ittihamların heç birini qəbul etmir. O, prokurorun elan etdiyi ittihama münasibət bildirərkən deyib ki, özünü təqsirli bilmir. İctimai fəal həbsi barədə ətraflı danışmaq istəsə də, hakim onu ifadə verməyə qoymayıb. Deyib ki, vaxt azdır, bu məhkəmə tərkibinin baxmalı olduğu başqa işlər var, növbəti məhkəmə iclasında ətraflı dindiriləcək.
Növbəti məhkəmə iclası isə aprelin 9-na təyin edilib.

Afiəddin Məmmədov deyir ki, o, heç bir cinayət törətməyib. Onun sözlərinə görə, sentyabrın 20-də evdən çıxıb gedəndə bir nəfər ona yaxınlaşıb. Həmin şəxs özünə xəsarət yetirib, bıçağı da onun üstünə atıb. Daha sonra ətrafda əvvəldən gözləyən polislər onu tutub aparıblar.

Bu üsulla şərlənərək həbs olunduğunu deyən ictimai fəalın sözlərinə görə, bıçaqlandığı iddia olunan şəxsin özü ona zərər yetirib. Afiəddin Məmmədov vurğulayıb ki, əsl zərərçəkmiş onun özüdür. Çünki saxlandıqdan sonra özü zorakılığa məruz qalıb:

“Guya mənim bıçaqladığım adam ki var, onun özü mənə zərər yetirib. Məni elə vurmuşdu, iki gün Kürdəxanı təcridxanasında burnumun qanı dayanmırdı”.

Sifarişlə həbs olunduğunu deyən Afiəddin Məmmədov hesab edir ki, ona qarşı bu təxribatın qurulmasının əsl səbəbi işçilərin hüquqlarının müdafiəsilə məşğul olmasıdır. O, yada salır ki, bu fəaliyyətinə görə bundan əvvəl də dəfələrlə polisə müqavimət ittihamıyla şərlənərək, hər dəfə 30 sutka inzibati qaydada həbs olunub.

Avqustun 1-də Bakıda moped sürən kuryerlərin etiraz aksiyası olub. Onlar polislərin nəqliyyat vasitələrini cərimə meydançasına aparmasına etiraz ediblər. Kuryerlərin etiraz aksiyasında

“İşçi Masası” Həmkarlar İttifaqları Konfederasiyasının sədri və üzvləri də iştirak edib.
Bundan dərhal sonra Konfederasiyanın sədri Afiəddin Məmmədov, ardınca da təşkilatın üzvləri Elvin Mustafayev və Ayxan İsrafilov həbs edilib. Hazırda adları çəkilən digər iki ictimai fəal da həbsdədir.

Meydan TV 

Martın 6 və 7-də “Toplum”TV-nin əməkdaşları və təsisçisinin, həmçinin “III Respublika” Platformasının üzvlərinin həbsi Azərbaycanda sivil toplum müqavimətini tam məhv etməyə yönəlib, qaçaqmalçılıq ittihamı ilə həbslər də məhz buna hesablanıb, “III Respublika” Platformasının son həbslərlə bağlı bəyanatında bildirilir.

“Həmin pulların elə axtaranlar tərəfindən qoyulduğuna şübhə etməməklə yanaşı, onu da bildirmək istəyirik ki, evdə xarici valyuta saxlamaq cinayət təqibi üçün, xüsusən də “qaçaqmalçılıq” ittihamı üçün əsas ola bilməz. Şübhə yoxdur ki, baş verənlər Azərbaycanda sivil toplumun müqavimətini tam məhv etməyə yönəlib.

Həbslərdən dərhal sonra “Toplum” TV-nin Youtube və İnstagram hesablarının ələ keçirilərək videoların silinməsi də sübut edir ki, repressiyaların səbəbi heç də qaçaqmalçılıq deyil.

“III Respublika” Platforması bildirir ki, son repressiya dalğasının əsas hədəflərindən biri də onların platformasıdır

Rejim özünü ən güclü hesab etdiyi bir dönəmdə yeni bir müxalif təşkilatın yaranması və ortaya olduqca mütərəqqi hədəflər qoyması cəmiyyətdə ümid yaratdı. Bu da rejimin məqsədləri və cəmiyyəti sürüdüyü istiqamətlə tam əkslik təşkil edir. “III Respublika” Platforması jurnalistikanın və siyasi fəaliyyətin cinayət olmadığını, birləşmək, söz və ifadə azadlığının ölkə konstitusiyasında və Azərbaycan Respublikasının imzaladığı beynəlxalq konvensiyalarda təsbit olunduğunu bildirir, son günlər baş verənləri qanunsuz repressiya aktı kimi qiymətləndirir”, – bəyanatda deyilir.

“III Respublika” Platforması cəmiyyəti baş verənlərə və öz taleyinə biganə qalmamağa çağırıb.

Həmçinin beynəlxalq birliyi Azərbaycanda baş alıb gedən qanunsuzluqlara, insan hüquq və azadlıqlarının tapdanmasına əməli reaksiya verməyə çağırıb.

Xatırladaq ki, martın 6-da xarici valyuta qaçaqmalçılığında ittiham edilən 9 fəal və jurnalist saxlanılıb. “III Respublika” platformasının üzvləri  Akif Qurbanov və Ruslan İzzətli daxil olmaqla, 7 nəfər 4 ay müddətinə həbs edilib. Daha iki nəfər polisin nəzarətinə verilib.

Turan 

Jurnalistləri Müdafiə Komitəsi Azərbaycan hakimiyyətini Toplum TV jurnalistlərini azad etməyə, müstəqil xəbər orqanının əməkdaşlarına qarşı bütün ittihamları ləğv etməyə, medianın azad şəkildə işləməsinə şərait yaratmağa çağırıb.

“Abzas Media və Kanal 13-ə bənzər hücumlardan sonra Toplum TV-yə basqın və jurnalistlərin həbsi onu göstərir ki, Azərbaycan hakimiyyəti ölkənin müstəqil mətbuatının son qalıqlarını da yox etmək niyyətindədir”, CPJ-nin Avropa və Mərkəzi Asiya üzrə koordinatoru Gülnoza Said bildirib.

Toplum TV-nin təsisçisi Ələsgər Məmmədlinin onkoloji xəstəlikdən müalicə aldığı bir zamanda polis tərəfindən saxlanılmasını “xüsusi hədsizlik” kimi qiymətləndirən Gülnoza Said, Azərbaycan hakimiyyətini Ələsgər Məmmədli və Müşfiq Cabbarı dərhal azad etməyə, Toplum TV əməkdaşlarına qarşı bütün ittihamları ləğv etməyə və müstəqil mediadan reportajlarına görə qisas almağı dayandırmağa çağırıb.

Martın 6-da hüquq-mühafizə orqanları Toplum TV-nin, Demokratik Təşəbbüslər İnstitutunun, III Respublika Platformasının ofislərində, həmçinin əməkdaşların evlərində axtarışlar aparıb.

Axtarış zamanı iyirmidən çox jurnalist və fəal polis tərəfindən saxlanılıb. Saxlanılanların bir hissəsi sərbəst buraxılsa da, Tolpum TV jurnalistləri Müşfiq Cabbara, Fərid İsmayılova və Elmir Abbasova qarşı “qaçaqmalçılıq” ittihamı ilə cinayət işi açılıb. Məhkəmə Müşfiq Cabbar barəsində 4 aylıq həbs-qətimkan tədbiri seçib, İsmayılov və Abbasov zaminə buraxılıb.

Martın 6-da saxlanılan Demokratik Təşəbbüslər İnstitutunun rəhbəri, III Respublika Platformasının spikeri Akif Qurbanova, eləcə də fəallar Əli Zeynala, Ramil Babayevə, İlkin Əmrahova da “qaçaqmalçılıq” ittihamı ilə cinayət işi açılıb və barələrində 4 aylıq həbs-qətimkan tədbiri seçilib.

Martın 8-də isə Toplum TV-nin təsisçisi, tanınmış hüquqşünas Ələsgər Məmmədli və III Respublika Platformasının təsisçi üzvü Ruslan İzzətli “qaçaqmalçılıq” ittihamı ilə saxlanılaraq barələrində 4 aylıq həbs-qətimkan tədbiri seçilib.

Toplum TV-nin baş redaktoru Xədicə İsmayıl bildirib ki, “cinayət işinin hədəfi tənqidi səslərdir”.

Martın 11-də yaydığı bəyanatda Toplum TV axtarış əməliyyatının və həbslərin qanunsuzluqla müşayiət olunduğunu qeyd edib. Polis axtarış əməliyyatından sonra Toplum TV-nin ofisini möhürləyib, bir sıra avadanlıqları “qəsb edib”.

Bundan sonra, internet televiziyasının 90 mindən çox izləyicisi olan Youtube səhifəsi və digər sosial media hesabları ələ keçirilərək silinib. Toplum TV kiberhücuma görə məsuliyyəti Bakı Şəhər Baş Polis İdarəsinin əməkdaşlarının daşıdığını bildirir.

ABŞ, Böyük Britaniya və Fransa həbslərlə bağlı “dərin narahatlıq” ifadə edib, Freedom House, Avropa Jurnalistlər Federasiyası, Sərhədsiz Reportyorlar kimi beynəlxalq media azadlığı təşkilatları, habelə AŞPA məruzəçisi həbsləri pisləyiblər.

“Azərbaycanı öz fundamental azadlıqlarından istifadə edənlərə qarşı təzyiqlərə son qoymağa və siyasi motivlərlə haqsız yerə həbs edilən bütün şəxslərin azadlığa buraxılmasına çağırırıq”, ABŞ Dövlət Departamentinin sözçüsü Metyu Miller deyib.

Rəsmi Bakı ABŞ və Böyük Britaniyanın bəyanatlarına cavab verməsə də, Fransanı Azərbaycanın “daxili işinə qarşımaqda” günahlandırıb və əlavə edib ki, “Azərbaycanda fundamental hüquq və azadlıqlar, eləcə də media azadlığı tam olaraq təmin edilir”.

Azərbaycanda ötən ilin noyabrından başlayaraq “ölkəyə qaçaqmalçılıq yolu ilə xarici valyuta gətirmək” ittihamı ilə Abzas Medianın 6 jurnalisti də daxil olmaqla 10-dan çox jurnalist həbs edilib.

Amerikanın Səsi