Qubad İbadoğlu

Kürdəxanı İstintaq Təcridxanasında saxlanılan siyasi məhbusların səhhəti pisləşib. Bu barədə təcridxanaya baş çəkən vəkil Şəhla Hümbətova bildirib.

İqtisadiyyat professoru Qubad İbadoğlunun səhhəti xeyli pisləşib.

“Qubadoğlunun qanında şəkərin səviyyəsi artıb, hazırda göstərici maksimum səviyyədədir. Həkim xəstəyə daha böyük dozada insulin yazıb və xəbərdarlıq edib ki,  şəkəri azaltmağın başqa yolu yoxdur. İndi ona preparatın icazə verilən maksimum dozası vurulur”, – vəkil bildirib.

23 iyun 2023-cü il tarixindən istintaq altında olan Qubad İbadoğlu saxta pulların hazırlanmasında, əldə edilməsində və ya satılmasında ittiham olunur.

İstintaq Təcridxanasında həbsdə olan jurnalist Nərgiz Absalamovanın gözünə infeksiya düşüb, qız soyuqlayıb. “Görünür, onun immuniteti zəifləyib. Həkim ona dərman yazıb, damarına iynə vurulur”, – vəkil Hümbətova bildirib.

1 dekabr 2023-cü ildə Bakının Xətai Rayon Məhkəməsi Nərgiz Absalamovanın Azərbaycana qanunsuz pul gətirmək məqsədilə  qabaqcadan əlbir olmaq ittihamı ilə həbs edilməsi barədə qərar verib. O, “Abzas Media” və “Toplum” TV media resurslarının jurnalistləri adı çəkilən saytların qanunsuz maliyyələşdirilməsində ittiham olunurlar.

Azərbaycan Siyasi Məhbuslara Azadlıq Uğrunda İttifaq siyasi məhbusların yeni siyahısını açıqlayıb. Dekabrın əvvəlində elan edilmiş əvvəlki siyahı ilə müqayisədə siyasi məhbusların sayı 43 nəfər artaraq 288 məhbus təşkil edib.

Bir çox yerli və beynəlxalq təşkilat Qubad İbadoğlu, Nərgiz Absalamova və həbsdə olan siyasətçilərin və jurnalistlərin müdafiəsinə qalxaraq Azərbaycandakı bütün siyasi məhbusların dərhal azadlığa buraxılmasını tələb edir.

Turan 

Elxan Əliyev

İddia etdiyi pul qaytarılsa da, zərərçəkmiş təqsirləndirilən şəxsləri bağışlamadığını deyir

Azərbaycan Xalq Cəbhəsi Partiyasının (AXCP) fəalı, 8 aydır həbsdə olan Elxan Əliyevin işi üzrə məhkəmə istintaqı tamamlanıb. Prokuror çıxış edərək AXCP üzvünün 7 il azadlıqdan məhrum edilməsini istəyib.

Elxan Əliyev və onunla birlikdə mühakimə olunan Vəfadar Axundov və Yusif Əliyevin işinə ötən ilin sentyabrından Bakı Ağır Cinayətlər Məhkəməsində baxılır. Bu iş Leyla Əsgərova-Məmmədovanın sədrliyilə, Novruz Kərimov və Rasim Sadıxovdan ibarət hakimlər kollegiyasının icraatındadır.

Təqsirləndirilən şəxs Cinayət Məcəlləsinin 178 (dələduzluq) və 320-ci (saxta sənəddən istifadə) maddələrilə ittiham olunur. Cinayət işində söhbət Sabunçu rayonu, Nardaran qəsəbəsində torpaq sahəsinin satışından gedir. Zərərçəkmiş qismində tanınan Ramo Şükürov iddia edir ki, ona mülkiyyət sənədi olmayan, bələdiyyənin sərəncamıyla verilmiş torpaq sahəsi 57 min manata satılıb.

Təqsirləndirilən şəxslər isə ittihamı qəbul etmir. Onlar bildirirlər ki, əvvəldən Ramo Şükürov özü də torpağın çıxarışının olmadığını, bələdiyyə sərəncamıyla verildiyini bilirdi. Bunu bilərək razılaşmışdı.

Elxan Əliyev bildirib ki, Ramo Şükürov müəyyən strukturlarda çalışan qohumlarının olduğunu və onların köməyilə çıxarış alacağını demişdi. Lakin torpaq sahəsini alıb, pulunu verəndən dərhal sonra polis idarəsində şikayətçi olub. Deyib ki, onu aldadıb, sənədsiz torpaq satıblar.

Əvvəllər daşınmaz əmlak alqı-satqısıyla məşğul olan AXCP üzvü vurğulayıb ki, Ramo Şükürov özü israrla ona zəng edib, bağ evi, torpaq sahəsi tapmasını istəyib. Hətta bu şəxsin ona dəfələrlə zəng etməsi, israrla görüşmək istəməsindən də şübhələnib. Bu şəxsin məqsədli şəkildə onun yanına göndərildiyini düşünüb. Bununla əlaqədar AXCP funksionerlərindən olan dostuna videogörüntü də göndərib. Həbsindən bir neçə gün əvvəl göndərdiyi videoda Elxan Əliyev ona qarşı təxribat hazırlanmasından şübhələndiyini bildirib.

“Əvvəllər ev alqı-satqısı işiylə məşğul idim. İndi məşğul deyiləm. İndi mənə bir nəfər zəng edir, əl çəkmir. Deyir ki, mənə ev tap, bağ tap. Birini tapdım, xoşuna gəlmədi. Amma yenə də əl çəkmir. İndi yenə zəng eləyib, deyir ki, “gedək, çörək yeyək, yaxından tanış olaq”. Bilmirəm ki, nə məsələdir. Hakimiyyətin oyunudur, nədir…”, – Elxan Əliyev videoda deyir.

Bu videogörüntü məhkəməyə də təqdim edilib. Elxan Əliyev əvvəldən hazırlanan təxribat nəticəsində həbs olunduğunu vurğulayıb.

Ramo Şükürovun torpaq sahəsini aldığı şəxsə ödədiyi 57 min manat ona tam şəkildə qaytarılıb. Elxan Əliyev deyir ki, alqı-satqı prosesində makler olaraq, ona 3900 manat pul çatmışdı, o da ödənilib.

Zərərçəkmiş məhkəmədə bildirib ki, pulu qaytarılsa da, təqsirləndirilən şəxslərdən şikayətçidir, onlarla barışmayıb.

Elxan Əliyevlə birlikdə mühakimə olunan digər iki təqsirləndirilən şəxslərdən Vəfadar Axundovun 6 il, Yusif Əliyevin isə 6 il 6 ay azadlıqdan məhrum edilməsi istənilib. Yusif Əliyev hazırda həbsdə deyil. Prokuror onun hökmdə məhkəmə zalında həbs olunmasını təklif edib.

Bu iş üzrə məhkəmə prosesi aprelin 1-də vəkillərin çıxışıyla davam edəcək. Daha sonra təqsirləndirilən şəxslər son sözünü deyəcək və ardınca hökm oxunacaq.

Elxan Əliyevin vəkili Nemət Kərimli Meydan TV-yə bildirib ki, cinayət işində müvəkkilinin dələduzluq etməsi, saxta sənəddən yararlanmasını təsdiqləyən heç bir sübut-dəlil yoxdur. Onun sözlərinə görə, hüquqlarını müdafiə etdiyi şəxsin səhhətində ciddi problemlər var:

“Həbsdə olduğu 8 ay ərzində istintaq təcridxanasında bir neçə dəfə vəziyyəti pisləşib. Elxan Əliyev insult keçirmiş adamdır, onu bu vəziyyətə salmaq olmaz. Himayəsində 3 azyaşlı uşağı var…”.

AXCP Təşkilat Şöbəsinin əməkdaşı olan Elxan Əliyev bundan əvvəl də etiraz aksiyalarında və s. dəfələrlə saxlanılıb. Ona polisin tələbinə tabe olmama ittihamıyla bir neçə dəfə 30 sutkalıq inzibati həbs cəzası verilib.

Meydan TV 

Sahib Məmmədzadə

Daxili İşlər Nazirliyindən (DİN) AXCP Daşkəsən rayon şöbəsinin sədri Sahib Məmmədzadənin saxlanması ilə bağlı məlumatları təsdiqləyiblər.

Nazirliyin mətbuat xidmətinin regional qrupundan “Turan”ın sorğusuna cavab olaraq bildirilib, narkotik vasitələrin qanunsuz dövriyyəsində şübhəli bilinən Sahib Məmmədzadəni Baş Narkotiklərlə Mübarizə İdarəsinin əməkdaşları saxlayıb.

*  *  *

Martın 18-də axşam saatlarında müxalifətdə olan Azərbaycan Xalq Cəbhəsi Partiyasının (AXCP) üzvü Sahib Məmmədzadənin saxlanıldığı bildirilir.

Partiyadan deyilib ki, Sahib Məmmədzadə yaşadığı Daşkəsən rayonunun girişində saxlanıb:

“Sahib bəy heyvanlarını yaylağa aparırdı. Qara maskalı şəxslər polis postunda Sahib bəyi saxlayıb naməlum istiqamətə aparıblar”.

AXCP-dən iddia edirlər ki, fəalın saxlanması onun siyasi fəaliyyəti ilə bağlıdır.

AXCP-nin hazırda azı beş fəalı müxtəlif ittihamlarla uzunmüddətli həbsdədir. Partiyadan onların siyasi sifarişlə şərləndiyini bəyan ediblər. Amma rəsmilər ölkədə siyasi həbslərin olması ilə bağlı deyilənləri qəbul etmirlər.

AzadlıqRadiosu 

Əziz Orucov

“Kanal 13” İnternet Televiziyasının rəhbəri Əziz Orucovun həbsxanada səhhətinin pisləşdiyi bildirilir. Bu barədə jurnalistin həyat yoldaşı Lamiyə Orucova məlumat verib.

“Uzun müddət idi ki, Əziz Orucovun nevroloji problemləri var idi. Nəfəs darlığından əziyyət çəkirdi, əsəbdən əlləri əsirdi. Görüşdə olarkən əllərini cibində gizlədirdi ki, biz görməyək. Martın 15-də axşam yenidən vəziyyəti pisləşib və sabahsı gün təcili tibb müəssisəsinə köçürülüb”, o bildirib.

Məsələ ilə bağlı Penitensiar Xidmətdən mövqe almaq mümkün olmayıb.

“Kanal 13” İnternet Televiziyasının rəhbəri Əziz Orucov ötən ilin noyabrın 27-də saxlanılıb. Bakı Şəhər Səbail Rayon Məhkəməsi onun barəsində 3 aylıq həbs qətimkan tədbiri seçib.

Cinayət Məcəlləsinin 188.2-ci (Torpaq üzərində mülkiyyət, istifadə və ya icarə hüququnu pozma, icarə hüququ olmadan torpaq sahəsi üzərində özbaşına tikinti və ya quraşdırma işləri aparma) və 206.3.2-ci (qabaqcadan əlbir olan bir qrup şəxs tərəfindən qaçaqmalçılıq) maddələri üzrə ittiham olunan Əziz Orucov ittihamları rədd edir və həbsinin jurnalist fəaliyyətini məhdudlaşdırmağa yönəldiyini bildirir.

“Kanal 13″ün əməkdaşı Rüfət Muradlı isə dekabrın 7-də 30 sutkalıq inzibati həbs cəzasına məhkum edilib.

Dekabrın 11-də məhkəmə qərarı ilə Azərbaycanda “Kanal 13”-ün internet səhifəsinə giriş məhdudlaşdırılıb.

“Kanal 13” internet televiziyasının əməkdaşı Şamo Eminov barəsində isə qaçaqmalçılıq maddəsi ilə cinayət işi açılıb. Məhkəmə Eminov barəsində 3 ay 5 gün müddətinə həbs qətimkan tədbiri seçib.

Ailəsinin məlumatına görə, Şamo Eminov dekabrın 22-də Səbail Rayon Polis İdarəsinə aparılıb. Şamo Eminov saxlanıldıqdan 4 gün sonra ailəsi ilə Bakı İstintaq Təcridxanasından əlaqə saxlaya bilib.

“Kanal 13” 2008-ci il noyabrın 10-dan yayımlanır. Televiziyanın YouTube kanalında 1 milyon 590 min abunəçisi var. Televiziya YouTube kanalında 37 mindən çox video yerləşdirib.

Sərhədsiz Reportyorlar, Amnesty International, Avropa Jurnalistlər Federasiyası və digər bir sıra yerli və beynəlxalq insan hüquqları təşkilatları, Avropa İttifaqının insan hüquqları üzrə xüsusi nümayəndəsi, habelə Avropa Şurası Parlament Assambleyasının (AŞPA) məruzəçiləri Azərbaycan hakimiyyətini müstəqil mediaya qarşı təzyiqlərə son qoymağa, həbs edilən jurnalistləri azad etməyə çağırıb.

Amerikanın Səsi