Ramil Babayev

Aprelin 1-də Bakı Apellyasiya Məhkəməsində “Toplum TV işi” üzrə həbs olunan Ramil Babayevin şikayətinə baxılıb. Vəkil Ayşə Abdel Qadirin məlumatına görə şikayət Xətai Rayon Məhkəməsinin qərarından verilib.

“Biz həbs qətimkan tədbirinin ev dustaqlığı ilə əvəzedilməsi ilə bağlı vəsatət vermişdik, lakin Xətai Rayon Məhkəməsi vəsatətimizi təmin etməmişdi. Bu gün Apellyasiya Məhkəməsi də şikayətimizi təmin etmədi. Ramilin özü də məhkəməyə gətirilmişdi. O, səhər saat 8-dən məhkəməyə gətirilmişdi, iclasımız isə saat 4 radələrində idi, bütün gün məhkəmədə saxlanılıb. Orada isə onlara yemək verməyə icazə vermirlər, bütün gün ac qalıb. Bununla bağlı da ayrıca şikayət verəcəyik”, deyə, vəkil qeyd edib.

Ramil Babayev martın 6-da Cinayət Məcəlləsinin 206.3.2-ci (qaçaqmalçılıq) maddəsi ilə saxlanılıb. O, həbsinə etiraz olaraq 5 gün quru aclıq aksiyası keçirib.

Elə həmin gün hüquq-mühafizə orqanları “Toplum TV”nin, Demokratik Təşəbbüslər İnstitutunun, həmçinin III Respublika Platformasının ofislərində, bir neçə əməkdaşın evində axtarış aparıb. Məlumata görə, iyirmidən çox əməkdaş polis tərəfindən saxlanılıb, bir neçə saat sonra əməkdaşların əksəriyyəti sərbəst buraxılıb. Onlardan Fərid İsmayılova, Müşfiq Cabbara, Elmir Abbasova və Demokratik Təşəbbüslər İnstitutunun rəhbəri, həmçinin III Respublika Platformasının spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb.

Martın 8-də isə “Toplum TV”nin təsisçilərindən Ələsgər Məmmədli və “III Respublika” Platformasının qurucu üzvü Ruslan İzzətli də qaçaqmalçılıq ittihamı ilə saxlanılıb və barələrində 4 aylıq həbs qətimkan tədbiri seçilib.

“Toplum TV”nin baş redaktoru Xədicə İsmayıl bildirib ki, “cinayət işinin hədəfi tənqidi səslərdir”.

Saytın baş redaktoru Xədicə İsmayıl martın 14-də şahid qismində dindirdikdən sonra Azərbaycandan çıxışına qadağa qoyulub.

Daxili İşlər Nazirliyinin mətbuat xidmətindən Amerikanın Səsinin sorğusuna cavab olaraq bildirilib ki, paytaxtın Nərimanov rayonu Yusif Vəzir Çəmənzəminli ev 98 B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları tərəfindən əməliyyat-axtarış tədbirləri keçirilib.

“Əlavə məlumat veriləcək” – açıqlamada bildirilib.

“Toplum TV” 2016-ci ilin oktyabr ayından fəaliyyətə başlayan müstəqil informasiya resursudur. Əsas məqsədi insan hüquq və azadlıqlarını, ifadə azadlığını ön planda tutaraq cəmiyyətin obyektiv informasiya ilə təmin olunmasına xidmət etməkdir. Sayt həmçinin Demokratik Təşəbbüslər İnstitutunun (IDI) “Demokratiya Məktəbi” proqramının jurnalistika təlimlərində iştirak edən gənclərin peşəkarlıqlarını artırmaq üçün platforma rolunu oynayır.

Amerikanın Səsi 

Elxan Əliyev

Aprelin 1-də Bakı Ağır Cinayətlər Məhkəməsi Xalq Cəbhəsi Partiyasının (AXCP) fəalı Elxan Əliyevi 5 il müddətinə azadlıqdan məhrum edib.

O, Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə), 320.1 (hüquq verən rəsmi sənədi istifadə etmək məqsədi ilə qanunsuz hazırlama) və 320.2-ci (bilə-bilə saxta sənədlərdən istifadə etmə) maddələrilə ittiham olunur.

Vəkili Nemət Kərimli Amerikanın Səsinə bildirib ki, iş üzrə digər iki müttəhim – Yusif Əliyev və Vəfadar Axundova məhkəmə şərti cəza verib.

AXCP fəalı məhkəmədə ittihamları qəbul etmədiyini, siyasi motivlərlə və saxta ittihamla təqib edildiyini bildirib.

Vəkilin fikrincə, məhkəmə Elxan Əliyevə verilən ittihamla bağlı günahını sübut etməyib.

“Məhkəmə obyektiv istintaq aparmadı, hakim Leyla Əsgərova-Məmmədova təqsirləndirilən şəxsin son sözlə çıxış etməsinə imkan vermədi”, Kərimli qeyd edib.

Cinayət işi vətəndaş Ramo Şükürovun şikayəti əsasında açılıb. O bildirib ki, müttəhimlər Bakının Nardaran qəsəbəsində mülkiyyət hüququna dair sənədi olmayan torpaq sahəsini ona 57 min manata sataraq “dələduzluq” ediblər.

Lakin Şükürov əvvəllər rieltor fəaliyyətilə məşğul olmuş Elxan Əliyevə israrla müraciət edərək ona torpaq sahəsi almasına kömək etməsini xahiş edib.

“Şükürova xəbərdarlıq edilib ki, həmin ərazidə mülkiyyət haqda sənəd yoxdur. Buna baxmayaraq, alıcı israr edib, deyib ki, mülkiyyət hüququnun qeydiyyatı məsələsini özü həll edəcək. Eyni zamanda, Şükürov əvvəlcədən beh ödəmədən, məbləği dərhal ödəyib. Pullar Şükürova qaytarılsa da, o, məhkəmədə yalnız Elxan Əliyevin cəzalandırılmasını israr edib”, vəkil qeyd edib.

Elxan Əliyevin barəsində hökmdən Apellyasiya Məhkəməsinə şikayət veriləcək.

Hüquq müdafiəçiləri Elxan Əliyevi siyasi məhbus kimi tanıyıblar.

Amerikanın Səsi 

Nazim Bəydəmirli

Amerikanın Səsi 

Ələsgər Məmmədli

Bu gün, martın 29-da Xətai rayon Məhkəməsi “Toplum” internet televiziyasının həbsdə olan təsisçisi Ələsgər Məmmədlinin ev dustaqlığına buraxılması ilə bağlı verilən vəsatəti təmin etməyib.

Bu barədə vəkil Aqil Layıc məlumat verib. Onun sözlərinə görə, vəsatət Ələsgər Məmmədlinin səhhəti ilə bağlı verilmişdi:

“Qalxanabənzər vəzdəki şişin həcmi artıb, boğulmalar baş verir. Elə məhkəmə iclasında Ələsgər bəyin qan təzyiqi 160-a qalxıb. Ələsgər bəy müalicə olunmasını xahiş edir”.

Vəkil məhkəmə qərarını əsassız hesab edir və qərardan apellyasiya şikayəti veriləcəyini bildirib.

Müdafiə tərəfinin bu açıqlamasına rəsmi qurumlardan münasibət almaq mümkün olmayıb.

Ələsgər Məmmədli bu il martın 8-də saxlanıb. Martın 9-da Xətai rayon Məhkəməsi barəsində 4 aylıq həbs-qətimkan tədbiri seçib. O, qrup halında qaçaqmalçılıqda ittiham olunur. Ə.Məmmədli ittihamı qəbul etmir.

Xatırlatma

Son aylar Azərbaycanda aralarında “ToplumTV”nin əməkdaşı da olmaqla 10-dan çox jurnalist, ictimai fəal qaçaqmalçılıq ittihamı ilə həbs edilib. Onlar da ittiham ilə razılaşmır, onu siyasi sifarişli hesab edirlər. Amma rəsmilər ölkədə siyasi həbslərin olması ilə bağlı deyilənləri əsassız sayır.

AzadlıqRadiosu

Ülvi Həsənli

“Abzas Media işi” üzrə həbs olunan jurnalistlərin heç bir vəsatəti təmin olunmur

Martın 27-də “Abzas Media-nın direktoru Ülvi Həsənlinin həbsinin uzadılmasından verilən şikayətə baxılıb.

Bakı Apellyasiya Məhkəməsində keçirilən prosesdə şikayət təmin olunmayıb. Hakim həbs müddətinin uzadılması ilə bağlı Xətai Rayon Məhkəməsinin qərarını qüvvədə saxlayıb.

Fevralın 24-dən başlayaraq “Abzas Media işi” üzrə həbs edilən bütün jurnalistlərin həbs müddətləri daha 3 ay artırılıb.

Beynəlxalq təşkilatlar bunu istintaqın əsassız aparılması ilə əlaqələndirib, jurnalistlər üzərində təzyiq olduğunu bildiriblər.

Xatırlatma

Ötən il noyabrın 20-də “Abzas Media”nın direktoru Ülvi Həsənli, onun müavini Məhəmməd Kekalov, noyabrın 21-də saytın baş redaktoru Sevinc Vaqifqızı, noyabrın 30-da reportyor Nərgiz Absalamova, dekabrın 13-də araşdırmaçı jurnalist Hafiz Babalı, son olaraq yanvarın 13-də isə jurnalist Elnarə Qasımova saxlanılıb.

Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb, barələrində həbs qətimkan tədbiri seçilib.

Jurnalistlər ittihamları rədd edir, həbslərini “Abzas Media”da dərc olunan korrupsiya araşdırmaları ilə əlaqələndirirlər.

AbzasMedia