Ələsgər Məmmədli

“Ələsgər bəyin müalicə müəssisəsinə köçürülməsi, müalicə və müayinəsini orda davam etdirməsi üçün Ədliyyə Nazirliyinə və Penitensiar xidmətə vəkilin rəsmi elektron müraciətinə hələ də rəsmi cavab verilməyib”.

Bu barədə Amerikanın Səsinə Toplum TV-nin hüquqi təsisçisi Ələsgər Məmmədlinin qardaşı Nəsimi Məmmədli bildirib.

Onun sözlərinə görə, aprelin 12-də təcridxanada Ələsgər Məmmədlinin yenidən ultrasəs müayinəsi aparılıb.

“Müayinə zamanı qalxanabənzər vəzində düyün (şiş) olduğunu yenidən təsdiq ediblər. Amma bildiriblər ki düyünün ölçüsü 18-19 millimetrdir. Hansı ki, həbsdən öncəki müayinə zamanı bu ölçünün 23 millimetr olduğu aşkar olunmuşdu və müayinənin nəticəsini təsdiq edən tibbi sənədlər də var. Ələsgər bəylə sonuncu dəfə aprelin 12-də görüşəndə o, yenə də boğulma hissindən əziyyət çəkdiyini biildirdi. Təcridxanada iynə biopsiyasının edilməsinə şərait yoxdur. Əlavə diaqnoz və müalicə üçün özəl klinikalara müraciət olunmalıdır”, o qeyd edib.

Qardaşı bildirib ki, Ələsgər Məmmədlinin səhətindəki problemə görə aprelin 8-də Ombudsmana rəsmi müraciət edib.

“Dünən Ombudsman Aparatının rəhbəri Aydın Səfixanlının rəsmi cavabını almışam. Onlar mənim müraciətimi Ədliyyə Nazirliynin Baş Tibb idarəsinin rəisi vəzifəsini icra edən Rəfail Mehdiyevə göndəriblər. Əlavə müayinə və iynə biopsiyası üçün özəl klinikalardan birində bizim öz vəsaitimiz hesabına bu prosedurun aparılmasına şərait yaradılması tövsiyə olunub”, o qeyd edib.

Nəsimi Məmmədli hesab eidr ki, qardaşı heç bir sübut, dəlil, əsas olmadan həbs edilib.

“Onun həbsinin iki səbəbi var. Birincisi, Toplum TV-nin təsisçisi olması ilə bağlıdır. Belə ki, hər kəsə çatımlı, balanslı, obyektiv bir YouTube kanalının olmasından narahat olanlar onun azadlığını məhdudlaşdırıb və Toplum TV-ni faktiki sıradan çıxarıblar.

İkincisi isə Ələsgər bəyin ölkədə rəsmi media siyasətinə tənqidi münasibəti, habelə, ölkə qanunlarına və beynəlxalq konvensiyalara uyğun samballı hüquqi təhlillərindən, analizlərindən narahat olan şəxslərin siyasi qərarıdır”, o bildirib.

Nəsimi Məmmədlinin fikrincə, səhhətində problem olduğunu bilərək “Ələsgər bəy kimi dəyərli bir aydını heç bir təqsiri olmadan həbsdə saxlamaq onun həyatına sui-qəsdə bərabərdir”.

Xatırlatma

Ələsgər Məmmədlinin səhhəti ilə bağlı Ədliyyə Nazirliyi Penitensiar Xidmətindən hələlik şərh almaq mümkün olmayıb. Amma bundan əvvəl Amerikanın Səsinin sorğusuna cavab verən Penitensiar Xidmət tibbi təminatı ilə bağlı aiddiyəti üzrə Ədliyyə Nazirliyi Tibb Baş İdarəsinə müraciət etməyi tövsiyə edib.

Öz növbəsində, Ədliyyə NazirliyInin Tibb Baş İdarəsinin isə məlumat telefonları vasitəsi ilə hər hansı məlumat alma1q mümkün olmayıb.
Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edir.

Martın 9-da Bakı şəhəri Xətai Rayon Məhkəməsi Toplum TV-nin həmtəsisçisi Ələsgər Məmmədli barəsində 4 aylıq həbs qətimkan tədbiri seçib. O, qaçaqmalçılıqda ittiham olunub. Bundan öncə, martın 6-da hüquq-mühafizə orqanları Toplum TV-nin, Demokratik Təşəbbüslər İnstitutunun, həmçinin III Respublika Platformasının ofislərində, əməkdaşlıarın evlərində axtarışlar aparıb. Axtarış zamanı ofisdə olan iyirmidən çox jurnalist və fəal polis tərəfindən saxlanılıb. Saxlanılanların bir hissəsi sərbəst buraxılsa da, Toplum TV-nin jurnalistləri Fərid İsmayılova (polisin nəzarətinə verilməklə ev dustaqlığı qətimkanim tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı qətimkan tədbiri seçilib) və Demokratik Təşəbbüslər İnstitutunun rəhbəri, həmçinin III Respublika Platformasının spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs qətimkan tədbiri seçilib.

Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.

Amerikanın Səsi 

Ələsgər Məmmədli

“Toplum” TV-nin təsisçisi, 1 saylı Bakı İstintaq Təcridxanasında saxlanılan Ələsgər Məmmədlinin səhhəti pisləşməkdə davam edir. Bu barədə onun qardaşı Nəsimi Məmmədli ötən gün onunla görüşdükdən sonra bildirib.

Ələsgər Məmmədli çox halsız olub, kəskin baş ağrısından əziyyət çəkir.

“Bütün gecəni yata bilmədiyini bildirdi. Uzanıqlı halda nəfəs almağa çətinlik çəkir. Boğazındakı şişə görə boğulma hissi ona normal yatmağa imkan vermir. Qalxanvari vəzinin boyun hissəsində 23 millimetr ölçüdə düyün var. Bu isə onun əsəb-sinir sistemini ciddi zədələyib. Qan təzyiqi 90-170 arasında yüksəlib”, – Nəsimi Məmmədli Turan-a bildirib.

Bir həftə öncə götürülmüş qan analizinin nəticəsində bəzi problemlər üzə çıxıb: amilaza analizi çox yüksək 333 olub (norma 220-dən az olmalıdır),  xolesterinin miqdarı 250 olub (norma 200-dən az olmalıdır).

Bundan əlavə, mədəaltı vəzidə problem aşkara çıxıb. Həkimlər yenidən müalicə təyin ediblər və ona yeni dərmanlar veriləcək.

“Əgər təcili tibbi müdaxilə olmasa, bu, ona  həyatı bahasına başa gələ bilər”, – Məmmədli deyib.

Onun sözlərinə görə, vəkil Ələsgər Məmmədlinin Ədliyyə Nazirliyinin tibb müəssisəsinə köçürülməsi barədə müraciət etsə də, cavab gəlməyib.

*Martın 6-8-də “Toplum” TV və onun tərəfdaş təşkilatı Demokratik Təşəbbüslər İnstitutunun 9 əməkdaşı saxlanılıb. Onlara qarşı xarici valyuta qaçaqmalçılığı ittihamı irəli sürülüb. Yeddi nəfər 4 ay müddətinə ilkin həbs cəzasına məhkum edilib, daha iki nəfər isə polis nəzarətinə verilib.

Ələsgər Məmmədli də valyuta qaçaqmalçılığında ittiham olunub. Onun mənzilində axtarış zamanı guya 7300 avro tapılıb.

Turan